Kɛnɔ ná Pool há pʋ́ŋsɛ́ pá
Tiiti
Cʋɔla
1
1 Ŋ Pool,* Wɩɩsɛ tʋtʋnnɔ, há ká Zeezi Kirisi nɩtʋmɩ́,* ŋ nɛ́ pʋ́ŋsɛ kɛnɔ né.
Ŋ tʋtʋmɩ́ nɛ́ ká, rɩ́ŋ pɛ́ Wɩɩsɛ nɩtʋɔsɛ́ mɛ́, rɩ́wɔ́ ka yardá, ká a rɩ́wɔ́ zɩŋ taŋá, a tɩŋ Wɩɩsɛ ŋmɛ́nɔ,
2 a makɛ rɩ́wɔ́ ka mɩɩsɛ ná há waá tenni yɩɛla; Wɩɩsɛ ná há wɩ nyɩɛrʋ́ nyɛ, ʋ nɛ́ bʋ́l ɛ́ mɩɩsɛ wɩ́ɛ́ fól wuu, rɩ dúníé ha toó.
3 Wɩɩsɛ tɛ́ŋ cólli mí ní, ʋ wɩ́bʋlɛ mákʋ́ pá nɩɛ, a tɩŋ Labaarɩwero ná ʋ há píé héŋ nɛ́sɛ mɛ́, á Laataarɔ Wɩɩsɛ páŋ ŋmɛ́nɔ, ŋ bʋl aá pá nɩɛ.
4 Ŋ Pool ní pʋ́ŋsɛ kɛnɔ né aá pɛ́ɩ́ Tiiti, ŋ bio tɩɩ, a tɩ́ŋrá wuu há tʋ́ŋ yardá ná mɛ́ wɩ́ɛ́.
Á Ana Wɩɩsɛ rɩ́rá Laataarɔ Kirisi Zeezi sɩ́ pɛ́ɩ́ bárka rɩ́ tɛŋfɩ́ɛ́l!
Tiiti há mɔhɛ̃́ rʋ́ʋ́ tʋ́mʋ́ ná Kɩrɛtɛ dɩtɩ́llɛ
5 Ŋ tɛ́ɩ́ Kɩrɛtɛ dɩtɩ́llɛ, a makɛ rɩ́ɩ́ ɔsɛ wɩ́ɛ́ ná ha há káánɛ́ nɛ́, ká bil wɩcʋ́ɔ́lɩ́sɩ́dííre* tɔ́ɔ́ wuu mí, anɛ ɛ́ ŋ há máŋsɛ pɛ́ɩ́.
6 Nɩɛ ná há mɔhɛ̃́ rɩ́ɩ́ lɩ́sɛ nɛ́ ká:
nɛrɔ ná há wɩ yɩtɔk mʋɔ́ wuu kené, a ka háálɔ balá* léŋ, ʋ bɛlɛ la Zeezi dí, a ka málwero, a zɩ́ŋwɔ́ tɩɩ kanɛ́ aá tɩ́ŋwɔ́ lʋlla nʋɔ.
7 Wɩcʋ́ɔ́lɩ́sɩ́dííro tʋtʋmɩ́ nɛ́ ká, rʋ́ʋ́ bel Wɩɩsɛ wɩ́ɛ́ mɛ́; ɛ́ wɩ́ɛ́, ʋ wɩ mɔhɛ̃́ rʋ́ʋ́ ka yɩtɔk.
Ʋ wɩ mɔhɛ̃́ rʋ́ʋ́ a nyʋktɩ́ŋ; ʋ wɩ mɔhɛ̃́ rʋ́ʋ́ a cɔ́ɛ́ tɩ́ná; ʋ wɩ mɔhɛ̃́ rʋ́ʋ́ a sɩnyɔ́r; ʋ wɩ mɔhɛ̃́ rʋ́ʋ́ a nɛnár; ʋ wɩ mɔhɛ̃́ rʋ́ʋ́ tɩŋ gɩragɩra aá ja meéwíé.
8 Amá ʋ mɔhɔ̃́ rʋ́ʋ́ cakɛ aá la nɩhʋɔra, a cólli wérí ɛɛ, a bɩɩnɛ wɩ́ɛ́ káá a, a a tékétéké, a sɩ́ busunnu ɓárʋ́, a wóllú tɩɩ má.
9 Wɩ́taŋá ná ɓa há píé kármʋ́, ʋ mɔhɔ̃́ rʋ́ʋ́ kánʋ́ wérí, a makɛ rʋ́ʋ́ wólli tɩŋ ɛ́ wɩ́taŋá mɛ́ aá cáánɛ nɩɛ náŋa, ká makɛ nɩɛ ná há cɩ́ ɛ́ wɩ́taŋá mɛ́, dɩyéŋŋi aá pɔ́wɔ́.
10 Waásaŋwa káŋ; Zuwifiwa* ná há lá Zeezi dí, ɓa sɩɛrʋ waásaŋwa nɛ́ sɩɛ́ kɩ́ɛ́; ɓa nɛ́ tɩ́ŋwɔ́ wɩ́kaŋyɔ́ɔ́wa mɛ́ aá yéŋŋi nɩɛ.
11 Ʋ mɔhɔ̃́ rɩ́ɩ́ a rɩ́ ɛ́ nɩɛ tɔ́wɔ́ nʋʋsɛ mɛ́, bee wɩ́ɛ́ ɓa pí wɩ́ɛ́ ná há wɩ mɔhɛ̃́ rɩ́wɔ́ karmɛ nɛ́, aá karmɛ nɩɛ, a tɩŋ ɛ́ mɛ́ aá vúkmi jɩpírme, a tɩŋ gɩragɩra mɛ́, aá ja meéwíé.
12 Ɓa naabál oro ɓa fa há sʋ́ʋ́ lá wɩ́ɛ́ aá bʋl, ʋ sɛ́:
«Kɩrɛtɛ nɩɛ ká nyɛtɩ́ɩ́ná rɛ́ tɛ́ŋ wuu mí, a a sɔhɔtɩ́ɩ́ná anɛ kaadíhuorúwa, a a tɛŋwɩtɩ́ɩ́ná; díí dʋŋɔ nɛ́ kɔ́wɔ́ wɩ́ɩ́.»
13 Ʋ wɩ́bʋlɩ́ ná sɩɛ́ ká taŋá nɛ́.
Ɛ́ wɩ́ɛ́, bɛ́sɩ́wɔ́ mɛ́ kɩ́ŋkáŋ, a makɛ rɩ́wɔ́ káŋwɔ́ yardá wérí,
14 a sɩ́ Zuwifiwa naabálwa wɩ́luké zésú, a sɩ́ nɩɛ ná má há vɛ́ taŋá ná, wɩ́makɛ́ tɩ́ŋʋ́.
15 Óŋ wuu wɩ busunnu kené a pá nɩɛ ná há wɩ busunnu kené, Wɩɩsɛ sɩ́ɛ́.
Amá óŋ wuu kéŋ busunnu a pá nɩɛ ná há kéŋ busunnu rɩ́ dɩlhɔɔ, Wɩɩsɛ sɩ́ɛ́ mɛ́.
Wɩ́bɔma zɔ́kwɔ́ zɩmɛ́ rɩ́wɔ́ sabɩɩna wuu.
16 Ɓa sɛ́ ɓa ɛ̃ Wɩɩsɛ rɛ́, amá ɓa wɩ́'állɛ mákɔ́ rɩ ɓa wʋ́ʋ́ ɛ̃.
Ɓa wɩ́'állɛ lɔrɛ́, ɓa wɩ wɩ́ɛ́ saŋ, ɓa wɩ wɩ́wérí balá má wuu wuó a.