Wɩ́taŋá ná há mɔhɛ̃́ ráá tɩŋ
2
1 Amá ɩ é, pi wɩ́taŋá ná karmɛ nɩɛ.
2 Bʋl pá bánɩ́ɩ́náwa, rɩ́wɔ́ zɩŋ rʋ́ʋ́ mɔhɔ̃́ rɩ́wɔ́ káŋwɔ́ tɩɩ wérí, a zízílwó tɩɩ, aá tɩŋ taŋá, a ka yardá wérí; a cólli nɩɛ, a ka nyamma má.
3 Bʋl pá hánɩ́ɩ́náwa má, rɩ́wɔ́ zɩŋ rʋ́ʋ́ mɔhɔ̃́, rɩ́wɔ́ má wɩ́'állɛ tɔrɛ Wɩɩsɛ sɩɛrʋ.
Ʋ wɩ mɔhɛ̃́ rɩ́wɔ́ bʋ́bʋl nɩɛ bɔ́ŋbɔ́ŋ, ʋ wɩ mɔhɛ̃́ rɩ́ sɩ́ŋ lɔ́wɔ́ yɔwɛ.
Ʋ mɔhɔ̃́ rɩ́wɔ́ ka cáánɛ ná há wéró,
4 aá cáánɛ háwiisi, rɩ́wɔ́ cóllíwó báláwa rɩ́wɔ́ bɛlɛ,
5 rɩ́wɔ́ bɩɩnɛ wɩ́ɛ́ káá a, a sɩ́ busunnu wɩ́ɛ́ á, a bíbélwó jɩɩsɛ tʋtʋmɛ́ mɛ́, a a nɩwéré, rɩ́ háálɔ wuu tɩ́ŋʋ́ bála nʋɔ, a makɛ rɩ́ nɛ́ŋ wuu sɩ́ gbel ná, rɩ́ɩ́ ga Wɩɩsɛ wɩ́ɛ́ ná har.
6 Bʋl ɛ́ tɩɩ tɩɩ pá heŋbiwafɛlɛ má.
Ʋ mɔhɔ̃́ rɩ́wɔ́ bɩɩnɛ wɩ́ɛ́ káá a.
7 Ɩ tɩɩ mɔhɔ̃́ rɩ́ɩ́ a wɩ́were rɩ́wɔ́ bélí ká má ɩ́'a.
Ɩ karmɛ́ mɛ́, sɩ́ sɛ́ŋɓɛlɩ́ hé, fɛ́l sɩ́ɩ́ a cɩ́ taŋá ná mɛ́.
8 Lo rɩ́ɩ́ wɩ́bʋlɛ́ a wɩ́bíé, rɩ́ nɩɛ sɩ́wɔ́ wóllí káá tɔ, a makɛ rɩ́ hɩɩ̃sɛ kánɩ́ dɩŋdɔma, ɓa há wɩ ŋmɛ́nɔ néé, rɩ́wɔ́ bʋl bɔ́ŋbɔ́ŋ cáásɩ́rá wɩ́ɛ́.
9 Bʋl pá yósi má, rɩ́wɔ́ saŋ pɔ́wɔ́ tɩ́náwa wɩ́ɛ́ wuu mí, a a wɩ́ɛ́ ná háá tɔ́rwɔ́ sɩɛnnɛ, ká sɩ́wɔ́ tɩ́náwa wɩ́bʋlɛ́ mɛ́ cɩ́nʋ́,
10 a sɩ́wɔ́ ɓɩɛ má gá.
Amá rɩ́wɔ́ a nɩwéré, rɩ́wɔ́ káŋwɔ́ yardá, a makɛ rɩ́ nɩɛ tɩŋ ɛ́ mɛ́, a píŋsírá Laataarɔ Wɩɩsɛ wɩ́ɛ́ ná, á háá karmɛ́, wɩ́ɩ́ wuu mí.
11 Wɩɩsɛ mákʋ́ zilé nyaamɩ́, nɩbííne wuu laatɛ́ wɩ́ɛ́.
12 Wɩɩsɛ zilé ná nɛ́ sɩɛ́ kármɩ́rá, ráá sɩ́ wɩ́ɛ́ ná há to Wɩɩsɛ ŋmɛ́nɔ mɛ́ á, a lɩ́sɩ́rá tɩɩ dúníé né wɩ́hɩɛ̃nɛ́ mɛ́, ká káŋrá tɩɩ, a bɩɩnɛ wɩ́ɛ́ káá a, a a tékétékéwa, aá tɩŋ Wɩɩsɛ ŋmɛ́nɔ dúníé né mí.
13 Ʋ kármɩ́rá, ráá ka yɩɛla aá dɛ́llɩ́rá Wɩɩsɛ ná há zénó, arɩ́rá Laataarɔ Kirisi Zeezi tápʋlwero ná, ʋ píŋ háá á rʋ́ʋ́ nyɩɩsɛ.
14 Ʋ púú mɩɩsɛ lenni sʋʋ, rʋ́ʋ́ yɔwɛ lárá, a lɩ́sɩ́rá wɩ́bɔmɔ rɩ́rʋ́ dúó wuu mí, ráá sɩ́ busunnu kánʋ́, ká ɔ́ʋ́ dʋŋɔ nɩtɩ́llɛ́, a bíéri wɩ́were ɛɛ mɛ́.
15 Nyɛ nɛ́ mɔhɛ̃́ rɩ́ɩ́ karmɛ nɩɛ, a dúóríwó naasɛ, rɩ ɓa zɔ́kɛ́ wɩ́ɩ́, ɩ bʋ́lwɔ́; tʋŋ ɛ́ arɩ́ tíŋ ná wuu ɩ há kené.
Sɩ́ ló rí nɛ́ŋ wuu bel gúóní.