Bʋl pá nɩɛ rɩ́wɔ́ ɩ́'a wérí, tɛ́ŋ wuu mí
3
1 Liisi laadííre ná, rɩ́wɔ́ saŋ pá gʋ́vɛ́rnɩ́máŋ nɩɛ rɩ́ tíŋ tɩ́náwa, aá zílwó, a cóllí wérí rɩ́rʋ́ dúó wuu ɛɛ.
2 Bʋl rɩ́wɔ́ sɩ́ bɔ́ŋbɔ́ŋ bʋ́l caasɛ nɛ́ŋ wuu, a sɩ́ nɛsɛ já rɩ́ nɛ́ŋ wuu, amá rɩ́wɔ́ káŋwɔ́ tɩɩ wérí, a pɔrɛ wérí pá nɩɛ wuu.
3 Tésíé mí, á má fa ká nɩcʋ́llɛ́ rɛ́, a a waásaŋwa, a fa yéŋŋi, a a wɩ́hɩɛ̃nɛ́ rɩ́ satɔ́ɔ́rwɩ́cólle rɩ́wɔ́ dúó wuu yósí, a a sɔhɔtɩ́ɩ́ná, a gɩ́gɩɛnɛ nɩɛ, nɩɛ fa bɛ́rɩ́rá ká á má bɛ́rwɔ́.
4 Amá á Laataarɔ Wɩɩsɛ há mákʋ́ sawér rɩ́rʋ́ cólle pá nɩbííne,
5 ʋ lárá tá; ʋ sɩɛ́ to anɛ á wɩ́'állɛ ká tékétéké mí ní, amá ʋ háá fárá susu ná nɛ́ tɛ.
Ʋ tɩ́ŋ Wɩɩsɛ Sabɩɩna* dóé mí a sɛ́sɩ́rá wɩ́bɔma, a lárá tá, a bɩrlʋ́lrá lʋlfɛlɔ, a párá mɩfɛlɔ má.
6 Wɩɩsɛ tɩ́ŋrá Laataarɔ Zeezi Kirisi mí, a púú Sabɩɩna ná wáálɩ́rá wérí.
7 Wɩɩsɛ tʋ́ŋ ɛ́, a makɛ rʋ́ʋ́ tɩ́ŋʋ́ zilé mí, a a ráá a nɩtékétékéwa ʋ sɩ́ɛ́, a ka mɩɩsɛ ná há waá tenni yɩɛla.
8 Wɩ́tɩɩ nɛ́ nyɛ, nɩɛ wuu zɩ́mʋ́ mɛ́.
Ŋ sɩɛ́ já rɩ́ɩ́ bʋ́lʋ́ fɛ́l sɩ́ɩ́ wérí, a makɛ rɩ́ nɩɛ ná há lá Wɩɩsɛ wɩ́ɛ́ dí, rɩ́wɔ́ ɔsɛ héwó tɩɩ wɩ́were ɛɛ mɛ́, tɛ́ŋ wuu mí.
Ná wɩ́ɩ́ ná há wéró, a ka nyʋɔrɛ́ pá nɩɛ nɛ́ ɛ́.
9 Amá vɛ nɩcʋ́ltɩ́ŋtɔ́ɛ́, a sɩ́ɩ́wa naabálwa nɩtɩnnɛ diŋderé ná dɩ́dɩ́ɩ́sʋ́, a sɩ́ nɛsɛ hé, a pɔ́ rɩ́ɩ́ sɩ́ Zuwifiwa kíŋse ná má wɩ́ɛ́ káá pʋ́pɔsɛ, bee wɩ́ɛ́ ɓa ká wɩ́yɔ́ɔ́wa rɛ́, ɓa wɩ nɛ́ŋ ɔsɛ.
10 Nɛrɔ ná háá já rʋ́ʋ́ hé cakɔ́ ɩ́ pɛ́kɛ, yɩ́rɛ tɩ́na a cáánʋ́.
Rʋʋ vɔ́ɔ́ ká ɩ́'a, ɩ baa yɩ́rʋ́ bʋllɛ mɛ́ a bʋl; rɩɩ gúló, ɩ lɩ́sɩ́ nɛ́sɛ ká tɔ́ʋ́.
11 Ɩ ɩ́ɔ̃́ zɩŋ rɩ́ ɛ́ nɛrɔ duo yéŋŋó ní; ʋ wɩ́bɔma ná ʋ háá ɛɛ́ nɩ́ɩ́ á rɩ́wɔ́ dúú sarɩ́ya.
Hatɩ́ŋnɩ́wɩ́ɛ́
12 Rɩŋ nɛ́ ɛ́ɛ́ rɩ́ Artɩmasɛ rɩ́ Tisiiki oro kóí dɩhɩ̃́, ɩ hé dóé ká kóŋ rɩ́, Nikopolisi mí; ŋŋ́ bɩ́ɩ́nʋ́ rɩ́ŋ mʋ́ ké ráŋ nɛ́, waarʋ cɛ́rɛ.
13 Hé dóé, ká sáŋ wádawa kɛŋzɩnnɔ Zɩnasɛ* rɩ́ Apolosi* mí, ɓa háá á rɩ́wɔ́ pi ŋmɛ́nɔ, rɩ́wɔ́ sɩ́ óŋ wuu jáá gúl.
14 Á má nɩɛ mɔhɔ̃́ rɩ́wɔ́ gʋnnɛ wɩ́were ɛɛ rɛ́, a makɛ rɩ́wɔ́ wólli sáŋ nɩɛ ná há mɔhɛ̃́ sáŋɛ mɛ́; ʋ wɩ mɔhɛ̃́ rɩ́wɔ́ ké yɔ́ɔ́ ɛ́.
15 Nɩɛ ná wuu há mɩ́nɩ́ŋ rɩ́ rɛɛ́, ɓa wuú cʋ́ɔ́lɩ́.
Cʋɔlɛ nɩɛ ná há kárá naŋnɔ́ŋsɛ, yardá sɩɛrʋ.
Rɩ́ Wɩɩsɛ hé bárka pɛ́ɩ́wa wuu!