6
1 Nɩɛ ná wuu há ká yósí, ɓa mɔhɔ̃́ rɩ́wɔ́ zílwó tɩ́náwa ɓóŋ, a makɛ rɩ́ nɩɛ sɩ́ Wɩɩsɛ yɩr, arɩ́rá karmɛ́ ná yɩr zɔ́kʋ́.
2 Yósi ná, ɓa tɩ́náwa há lá Zeezi dí, ɛ́ yósi wɩ mɔhɛ̃́ rɩ́wɔ́ gúóníwó tɩ́náwa ná, a tɩ́ŋwɔ́ wuu sɩ́sɛ́nyɛ há ká maábináŋá wɩ́ɛ́.
Amá ʋ mɔhɔ̃́ rɩ́wɔ́ ɔsɛ tʋŋ wérí pɔ́wɔ́, bee wɩ́ɛ́ nɩɛ ná ɓa há tʋ́mɛ́ aá pá, a cóllíwó wérí, ɓa ká Zeezi laadííre ní, a ɔ́wɔ́ nɩcólle tɩɩ.
Wɩ́ɛ́ nyáŋ nɛ́ mɔhɛ̃́ rɩ́ɩ́ pii karmɛ nɩɛ, a máŋsɛ pɔ́wɔ́.
Pool cáánɛ Timote
3 Nɛrɔ ná wuu háá karmɛ wɩ́húó, ká wɩ́rá Nyuutɩna Zeezi Kirisi wɩ́táŋsɛ ná sáŋɛ́, a wɩ Wɩɩsɛ ŋmɛ́nɔ́ tɩŋɛ́ yɛ́rɛ́ karmɛ́ má sáŋɛ́,
4 ʋ tɩ́na wɩ wɩ́ɩ́ wuu ɛ̃, nyʋkɔ nɛ́ súú, ʋ cólli kapɔsɛ kɩ́ŋkáŋ, arɩ́ wɩ́ɛ́ kaa vásɛ.
Ɛ́ nɛ́ tɛ:
sɩ́ɩ́ rɩ́ kapɔsɛ, rɩ́ nɩtʋksɛ, arɩ́ bɩɩnɛ bɔ́ŋbɔ́ŋ cáásɩ́ nɔ́ŋɔ.
5 Ɛ́ nɛ́ ha tɛ, tɩ́ŋtɔ́ɛ́ diŋderé nɩɛ ná sabɩŋsɛ há yéŋŋé pɛ́kɛ, ɓa báá wɩ taŋá ɛ̃, ká bɩɩnɛ rɩ Wɩɩsɛ ŋmɛ́nɔ tɩŋɛ́ nɩ́ɩ́ ɛɛ́, rɩ́wɔ́ ná ɓɩɛ.
6 Taŋá, rɩɩ nɩ́ɩ́ tɩŋ Wɩɩsɛ ŋmɛ́nɔ, rɩ́ɩ́ sɩɛrʋ tɔrɛ onni ná ɩ há kené, ʋ nyʋɔrɛ́ nɛ́ zené.
7 Á háá ko dúníé, á wɩ óŋ wuu kené ko.
Ɛ́ wɩ́ɛ́, raá nɩ́ɩ́ lɛ dúníé mí, á wɩ óŋ wuu wuo pɛ́ kaá col.
8 Ɛ́ wɩ́ɛ́, raá nɛ́ kéŋ ɓɩdííli rɩ́ gɛsuo, ʋ mɔhɔ̃́.
9 Amá nɩɛ ná háá ja ɓɩɛ nɛ́, Sɩtaanɛ tɩ́ŋwɔ́ nɩcʋ́l'oŋkana ná há bɔ́mɔ́, ká ɓaá hɩɛ̃nɛ mɛ́, a nyɩsɛ aá kɛsɛ, anɛ bárá, ɓa há zʋ́ɛ́; ɓa nɛ́ sɩɛ́ zɔkɛ nɩɛ ɓóŋ, a yéŋŋíwó.
10 Meéwíé cólle ní ká wɩ́bɔma duo wuu mʋ́kur.
Nɩɛ náŋa tɩ́ŋ meéwíé cólle wɩ́ɛ́, a vɛ Wɩɩsɛ ŋmɛ́nɔ, ká mɩŋ wɩhála ɓɩzeno mí.
11 Amá ɩ é há ká Wɩɩsɛ nɛ́ŋ, sɩ́ wɩ́ɛ́ nyáŋ oro wuu á.
Hé dóé, a makɛ rɩ́ɩ́ wɩ́ɛ́ a wérí Wɩɩsɛ sɩ́ɛ́, a tɩ́ŋʋ́ ŋmɛ́nɔ rɩ́ taŋá, a ka yardá rɩ́ cólle, a ka nyamma, a a nɩpɔrɩ́.
12 Lowi yardá lowero; ka mɩɩsɛ ná há waá tenni wérí; ɛ́ mɩɩsɛ wɩ́ɛ́ nɛ́ Wɩɩsɛ yɩ́rɩ́, ɩ cɩ́ nɩkana sɩ́ɛ́ a tɛ́ɩ́ sɩɛ́da ɛ́.
13 Wɩɩsɛ ná háá pá onni wuu hiẽsó sɩ́ɛ́, arɩ́ Kirisi Zeezi sɩ́ɛ́, ʋ nɛ́ há lɩ́sɛ nʋɔ wérí, a tɛ sɩɛ́da Pɔŋsɛ Pɩlatɛ* sɩ́ɛ́, ŋŋ́ sʋ́lɩ́:
14 Tɩŋ wɩ́máŋsɛ ná ŋ há bʋ́lɛ́ pɛ́ɩ́, arɩ́ sabalá, rɩ́ nɛ́ŋ wuu má sɩ́ wɩ́tɔ́k ráŋ ná rɩ́ɩ́ bʋl, a kaá járá Nyuutɩna Zeezi Kirisi bɩrkoe.
15 Ʋ sɩ́ bɩrko tɛŋ ná mɛ́, Wɩɩsɛ há mákɛ́.
Wɩɩsɛ dʋŋɔ léŋ ní kɛ onni wuu, ʋ nɛ́ ká wér wuu tɩ́na, ʋ nɛ́ ká kuóre wuu Kuoro, arɩ́ nyúútɩ́náwa wuu Nyuutɩna.
16 Ʋ dʋŋɔ léŋ ní waá sʋ́wɩ́ ná; ʋ dɩmɩnɩ́ wuu ká pʋmmɔ ɓɩzeno ní, nɛ́ŋ wuu wɩ ráŋ kɔwɛ aá peri.
Nɛ́ŋ wuu ha wʋ́ʋ́ néé, nɛ́ŋ sɩɛ́ báá wʋ́ʋ́ wuó ná má.
Ʋ nɛ́ tɛ zíle rɩ́ dóé ná há wɩ tokó kené!
Amɩɩ*!
17 Bʋl pá nɩɛ ná há kéŋ dúníé kuóɓɩɛ ná, rɩ́wɔ́ sɩ́ nyʋ́kʋ́; rɩ́wɔ́ sɩ́wɔ́ yɩɛla píí hé ɓɩɛ ná mɛ́, bee wɩ́ɛ́ ɓa waá dáánɛ.
Amá rɩ́wɔ́ píwó yɩɛla hé Wɩɩsɛ mɛ́ nɛ́, ʋ nɩ́ɩ́ párá onni wuu kɩ́ŋkáŋ, a makɛ ráá jɩ́jʋɔsɛ.
18 Bʋl pɔ́wɔ́ rɩ́wɔ́ ɩ́'a wérí, rɩ́wɔ́ lo rí tʋtʋ́ŋwere ní ɔ́wɔ́ ɓɩɛ; rɩ́wɔ́ ka zilé aá sáŋ nɩɛ mɛ́ arɩ́wɔ́ ɓɩɛ ná.
19 Rɩ ɓa nɛ́ tʋ́ŋ ɛ́, ká ná ɓa sɩ́ ná ɓɩɛ ná há wéró, a waá zɔkɛ cíé kal, rʋ́ʋ́ ɛ́ a rɩ́wɔ́ ná mɩɩsɛ ná há ká mɩɩsɛ tɩɩ.
20 Tóó!
Ŋ nɩwero Timote, bel tʋtʋmɩ́ ná Wɩɩsɛ há píé héí nɛ́sɛ mɛ́ wérí.
Kánɩ́ tɩɩ rɩ́ wɩ́bʋlyɔ́ɔ́wa ná rɩ́ Wɩɩsɛ wɩ́ɛ́ há wɩ náŋá hé, a kánɩ́ tɩɩ rɩ́ nyɩɛrʋ zɩmɛ́ wɩ́ɛ́ ná nɩɛ há bʋ́lɛ́ aá ja tɩ́ŋtɔ́ɛ́.
21 Nɩɛ náŋa sɩ́ ɓa kéŋ ɛ́ zɩmɛ́ nɛ́, ká wɩ wɩ́ɩ́ wuu ɛ̃ má; a tɩŋ ɛ́ mɛ́ a cʋ́rɛ ká tá yardá.
Rɩ́ Wɩɩsɛ hé bárka pɛ́ɩ́wa!(5.10) Sɛsɛ wɩcʋɔla naasɛ (1 Timote 5.10) Zeezi mɩnɛ́ tɛ́ŋ mɛ́, ɛ́ tʋtʋmɩ́ ká wɩ́'aamalɩ́ rɛ́; yosi tʋtʋmɩ́ nɛ́.
Ɛ́ nɛ́ Zeezi má kal oro a nyii sɛ́sʋ́ karmɩbɛlɛ naasɛ (Zaŋ 13.5) ká bʋlʋ́ hatɩŋna tʋ́tʋŋ ɛ́, náŋá mɛ́.
Ɛ́ tʋtʋmɩ́ nɛ́ Pool máŋsɛ hé wɩcʋɔla púl nɩɛ sɩɛrʋ háála tʋtʋmɛ́ mɛ́.