Ɛ́ há mɔhɛ̃́ rɩ́ɩ́ kánɩ́ tɩɩ Wɩɩsɛ nɩɛ sɩɛrʋ
5
1 Pɔ́ rɩ́ɩ́ sɩ́ nɔhɔ̃́ mɛ́ bɛ́sʋ́ rɩ́ dóé; amá cáánʋ́ anɩ́ áná, a cáánɛ heŋbiwafɛlɛ anɩ́ mááláwa rɩ́rɩ́ maábɛlɛ,
2 a cáánɛ háhɩ́ɛ̃́sɛ anɩ́ maáwa, a cáánɛ háwiisi má anɩ́ nátolé, rɩ́ busunnu sɩ́ɩ́wa pɛ́kɛ zʋ́.
3 Bel yúháála ná há wɩ bíbelle kené mí.
4 Amá rɩ yúháálɔ ná nɛ́ kéŋ bɛlɛ, ɛ́ rá má nihẽ, ʋ mɔhɔ̃́, Wɩɩsɛ ŋmɛ́nɔ mɛ́, rɩ́wɔ́ la sɩ́ɛ́ máŋsɛ, a a wɩ́ɩ́ ná há mɔhɛ̃́ rɩ́wɔ́ aa pɔ́wɔ́ nɩɛ, a bélwó lʋlla mɛ́, anɛ ɓa má die há bélwó mí ɛ́ ná; ɛ́ nɛ́ cɛ́rɛ́, a pá Wɩɩsɛ.
5 Yúháálɔ ná há ká yúhál tɩɩ, a wɩ nɛ́ŋ kené rʋ́ʋ́ bélú, ʋ kéŋ Wɩɩsɛ yɩɛla nɛ́, aá sʋl Wɩɩsɛ tɛ́ŋ wuu mí, wɔhɔ rɩ́ tɩ́taŋ wuu, rʋ́ʋ́ sáŋʋ́ mɛ́.
6 Amá yúháálɔ ná há mɩŋ satɔ́ɔ́rwɩ́ɛ́ mɛ́ aá a, ʋ sʋ́wɔ́ rɛ́, káá va.
7 Ná wɩ́ɛ́ ná há mɔhɛ̃́ rɩ́ɩ́ makɛ rɩ́wɔ́ a, a makɛ rɩ́wɔ́ sɩ́ yɩtɔk mʋɔ́ wuu kánʋ́.
8 Rɩ nɛrɔ nɛ́ wʋ́ʋ́ nɩɛ mɩ́ɩ́ bel, a wʋ́ʋ́ jaa nɩɛ má tɩɩ mɩ́ɩ́ bel, ʋ vɛ́ yardá ná ʋ há ɛ́ɛ́ arɩ́ Wɩɩsɛ; ʋ sɩɛ́ bɔŋ nɛrɔ ná há wɩ Wɩɩsɛ yardá ɛ́ɛ́.
9 Yúháálɔ ná há pérí bɩŋsɛ mɛɛ́sɩbotoro, a fa ja bál balá, ʋ nɛ́ mɔhɛ̃́ rɩ́ɩ́ hóú yɩr yúháála kɛnɔ sɩɛrʋ.
10 Ʋ sɩɛ́ mɔhɔ̃́ rʋ́ʋ́ a háálɔ ná nɩɛ háá bʋ́ʋ́ mɛ́, ʋ tʋtʋ́ŋwere wɩ́ɛ́; rʋ́ʋ́ a háálɔ ná há bélú bɛlɛ mɛ́ wérí, a cakla nɩhʋɔra wérí ʋ jaa mɛ́, a sɛsɛ wɩcʋɔla naasɛ,*f1* a a nɛrɔ ná há fá nɩyaara búŋsé, a tʋŋ tʋtʋ́ŋwere rɩ́wɔ́ dúó wuu.
11 Amá yúháála ná ha há ká háwiisí, sɩ́wɔ́ yɩra pʋ́ŋsɩ́ hé yúháála kɛnɔ sɩɛrʋ; bee wɩ́ɛ́ rɩ baljaasɛ sabɩɩna nɛ́ ísíwó mí, ɓa sɩ́ lo Kirisi wɩ́ɛ́, ká ja báláwa,
12 a vɛ́wɔ́ dʋ́ŋdʋ́ʋ̃́ wɩ́kanɩ́ ná ɓa fa há kené rɩ́ Kirisi, rʋ́ʋ́ ɛ́ a wɩ́zɔkɩ́ pɔ́wɔ́.
13 Wɩ́ɩ́ ná nɔ́ŋɔ má há súúré ní ká, rɩɩ nɛ́ pʋ́ŋsɩ́wɔ́ yɩra, ɓa báá waá sáŋ tʋŋ, káá dé mɩŋ jɩɩsɛ gʋɔrɛ́ mɛ́, rɩ́ɩ́ cícesi wɩ́kana, rɩ́ɩ́ píwó nʋʋsɛ rɩ́ɩ́ híhé nɩɛ wɩ́ɛ́ mɛ́, káá bʋ́bʋl wɩ́waábʋlwa.
14 Ɛ́ nɛ́ tɛ, ŋ cólli rɩ́ yúháála ná ha há ká háwiisí, rɩ́wɔ́ bɩrja báláwa, a lʋllɛ bɛlɛ, aá bélwó jɩɩsɛ mɛ́, a makɛ rɩ́wɔ́ sɩ́ wɩ́ɩ́ á, ráá dɩŋdɔma tɩŋ ráŋ bʋ́bʋ́lrá bɔ́ŋbɔ́ŋ.
15 Yúháála náŋá wáárɔ́ vɛ́ Kirisi, ká tɩŋ Sɩtaanɛ mɛ́.
16 Amá nɛ́ŋ ná wuu há lá Zeezi dí, rɩ yúháála mɩ́nʋ́ jaa nɩɛ sɩɛrʋ, ʋ mɔhɔ̃́ rʋ́ʋ́ bélwó mí, rɩ́wɔ́ sɩ́ wɩcʋɔla púl nɩɛ cɩká á, ká rɩ́wɔ́ wólli bel yúháála ná há wɩ nɛ́ŋ kenéwa mɛ́.
17 Wɩcʋ́ɔ́lɩ́sɩ́dííre ná háá tʋ́ŋwɔ́ tʋtʋmɛ́ wérí, ʋ mɔhɔ̃́ rɩ́wɔ́ ná zíle bʋllɛ; ɓa ná há bʋ́l Wɩɩsɛ wɩ́ɛ́ aá pá nɩɛ, a kɩ́karmɛ nɩɛ má, ɓa wɩ́ɩ́ nɛ́ kɩ́ɛ́.
18 Ɓa pʋ́ŋsɛ Wɩɩsɛ Kɛnɔ cɔɔ nɔ́ŋɔ a bʋlɛ́:
«Ʋ wɩ mɔhɛ̃́ rɩ́ɩ́ tɔ́ nɔɔ nʋɔ mɛ́,
ká kaá tʋ́mɩ́ mɩ́ɛ́ sɩɛrʋ.»
Ɓa báá pʋ́ŋsɛ cɔɔ nɔ́ŋɔ má bʋlɛ́:
«Tʋtʋnnɔ mɔhɔ̃́ rʋ́ʋ́ nóú túme.»
19 Rɩ nɛ́ŋ bʋ́lɩ́ rɩ́, bʋlɛ́ wɩcʋ́ɔ́lɩ́sɩ́dír rí zɔ́kɛ́ wɩ́ɩ́, rɩ nɩɛ nɛ́ wɩ bɛllɛ, botoro péré, rɩ́ɩ́ a ɛ́ wɩ́ɩ́ dáŋsɩ́ɛ́wa, ɩ sɩ́ láá dí.
20 Ɓa ná háá a wɩ́bɔma, bʋ́lwɔ́ rɩ́, nɩɛ wuu sɩ́ɛ́ mɛ́, a makɛ rɩ́ héwíŋ ka náŋa má.
21 Ŋŋ́ sʋ́lɩ́ kɩ́ŋkáŋ Wɩɩsɛ sɩ́ɛ́, rɩ́ Kirisi Zeezi sɩ́ɛ́, arɩ́ Wɩɩsɛ malɩ́kawa ná ʋ há tʋ́ɔ́sɛ́ sɩ́ɛ́, rɩ́ɩ́ tɩŋ wɩ́ɛ́ nyáŋ ɓa sɩ́ɩ́ mɛ́, ká sɩ́ nɩɛ cáksʋ́, ɩ wɩ́'állɛ sɩɛrʋ, a sɩ́ nɩɛ tʋ́ɔ́sʋ́ má.
22 Sɩ́ búúrí pɛ́ɩ́ nɛ́ŋsa rɩ́ɩ́ tɩkɛ nɛ́ŋ nyúú mí, rɩ́ɩ́ pi tʋtʋmɛ́ rɩ́ɩ́ pɔ́ʋ́.
Sɩ́ nɩɛ mɛ́ tɩ́ŋɩ́ a wɩ́bɔma; kánɩ́ tɩɩ rɩ́ busunnu.
23 Báá sɩ́ nyii dʋŋɔ nyɔ́, amá nyʋ́nyɔ dɩvɛ́ŋ* mʋɔ́ mʋɔ́wa, rɩ́ɩ́ lowíwɩɩla ná háá ísí mí ɓárɛ́ ɓárɛ́, sɩ́ɩ́ bílú.