Nyɛwɩ́ɛ́ karmɩ'ánáwa wɩ́ɛ́
4
1 Wɩɩsɛ Sabɩɩna dé caasɛ bʋl nyaamɩ́, a bʋlɛ́ hatɩ́ŋnɩ́tápʋlɛ, nɩɛ náŋa sɩ́ vɛ yardá ná ɓa fa há kené arɩ́ Wɩɩsɛ, ká tɩŋ nyɩsɛ́ sabɩŋsɛ sɛ́, arɩ́ kaŋtɔmɔ wɩ́makɛ́.
2 Nʋŋmɔ́ŋtɩɩna ná háá karmɛ nyɛwɩ́ɛ́, ɓa nɩ́ɩ́ yéŋŋíwó; ɓa sɩɛnnɛ wuu sɩɛ́ dé nɛ hɔɔ há fɛ́l níŋ mí, ɓa pii nyɩkɛ omo ʋ nɛ ɛ́ nɛ́.
3 Ɛ́ nɩɛ duo, ɓaá karmɛ nɩɛ, a bʋl rɩ́wɔ́ sɩ́ háála já, a sɩ́ onni náŋa má dí.
Ká Wɩɩsɛ á ɛ́ onni, a makɛ rɩ́ nɩɛ ná há ɔ́ʋ́ yardá, a zɩŋ taŋá ná, rɩ́wɔ́ bɔ́llɛ Wɩɩsɛ ká dí ní.
4 Onni ná wuu Wɩɩsɛ há ɛ́ɛ́, ɓa wér; oŋvɛɛlɩ́ toó.
Amá óŋ wuu mɔhɔ̃́ ráá bɔ́llɛ Wɩɩsɛ nɛ́, ká dí.
5 Rɩ Wɩɩsɛ nɛ́ bʋ́lɛ́ bʋlɛ́ omo wuu wéró, rɩ́ wɩsʋlɔ́ súúri, ɛ́ omo báá wɩ busunnu kené, Wɩɩsɛ sɩ́ɛ́.
Kirisi Zeezi tʋtʋnnʋwero
6 Rɩɩ nɛ́ pí wɩ́ɛ́ nyáŋ rɩ́ɩ́ kármɩ́ maábináŋa, ɩ sɩ́ a Kirisi Zeezi tʋtʋnnʋwero, há lá Wɩɩsɛ wɩ́bʋlɛ́ ná, á há lɛ́ɛ́ dí, arɩ́ karmɛ́ ná, há ká taŋá ná, ɩ háá tɩŋɛ́ ɓa sɩ́ɩ́ mɛ́, aá dɩ́ɛ́sɩ́ tɩɩ.
7 Amá vɛ wɩ́luké ná há ká nɩcʋ́lwɩ́ɛ́; ɓa rɩ́ Wɩɩsɛ wɩ́ɛ́ wɩ náŋá hé.
Hé dóé, a tɩŋ Wɩɩsɛ ŋmɛ́nɔ ná wérí.
8 Hé dóé, tɛŋ záksɛ mɛ́, anɛ fɛ́ɛ́ nyɛ, ʋ wéró, ká ʋ nyʋɔrɛ́ wɩ zeŋ; amá rɩ tɩ́na nɛ́ tɩ́ŋ Wɩɩsɛ ŋmɛ́nɔ ná wérí, ʋ nyʋɔrɛ́ nɛ́ zené kɩ́ŋkáŋ, a párá zaa hiẽsó né mí, arɩ́ mɩɩsɛ ná há waá tenni cíé kal.
9 Wɩ́ɩ́ né ŋ há bʋ́lɛ́, ʋ ká wɩ́tɩɩ rɛ́, nɩɛ wuu zɩ́mʋ́ mɛ́, a mɔ rɩ́ nɩɛ lɔ́ʋ́ wuu bílwó beŋtunni mí.
10 Ɛ́ nɛ́ tɛ, á hé dóé aá tʋŋ rɩ́ taŋá, bee wɩ́ɛ́ á yɩɛla wuu mɩŋ Wɩɩsɛ ná há wómmó mí ní; ʋ nɛ́ ká nɩɛ wuu Laataarɔ; amá nɩɛ ná há lɔ́ʋ́ dí, ɓa nɩ́ɩ́ yúú mí.
11 Pi wɩ́ɛ́ nyáŋ wuu karmɛ nɩɛ, a máŋsɛ pɔ́wɔ́, rɩ́wɔ́ a ɛ́.
12 Sɩ́ ló rɩ́ nɛ́ŋ wuu bel gúóní, ɩ há ká heŋbié wɩ́ɛ́, amá lo ríí wɩ́bʋlɛ́ rɩ́rɩ́ wɩ́'állɛ, rɩ́rɩ́ nɩɛ cólle, rɩ́rɩ́ yardá arɩ́rɩ́ sapʋmmɩ́, rɩ́wɔ́ a wérí, rɩ́ Zeezi laadííre bélí nabulle, káá va.
13 Karmɛ Wɩɩsɛ Kɛnɔ aá pá nɩɛ, a cáánɩ́wɔ́, a máŋsɛ Wɩɩsɛ wɩ́ɛ́ aá pɔ́wɔ́, rɩ́ŋ kúko.
14 Wɩɩsɛ Sabɩɩna pálɔ ná ʋ há pɛ́ɩ́, a tɩŋ Wɩɩsɛ wɩ́laabʋlɩ́ rɩ́ wɩcʋ́ɔ́lɩ́sɩ́dííre* há píwó nɛ́ŋsa tɩ́kɩ́ mɛ́ ɛ́, sʋ́ʋ́ vɛ́ɛ́ tá.