Wɩcʋ́ɔ́lɩ́sɩ́dííre há mɔhɛ̃́ rɩ́wɔ́ nɛ ɛ́
3
1 Wɩ́ɩ́ né ŋ háá á rɩ́ŋ bʋl, ʋ ká wɩ́tɩɩ rɛ́, nɩɛ wuu zɩ́mʋ́ mɛ́.
Ʋ nɛ́ ká:
Rɩ nɛ́ŋ rɩ́ hɩɛ̃nɛ wɩcʋ́ɔ́lɩ́sɩ́dííro* tʋtʋmɛ́, ʋ tɩ́ná hɩɛ̃nɛ tʋtʋ́ŋwérí rí.
2 Ɛ́ wɩ́ɛ́, wɩcʋ́ɔ́lɩ́sɩ́dííro wɩ mɔhɛ̃́ rʋ́ʋ́ ka yɩtɔk mʋɔ́ wuu, ʋ mɔhɔ̃́ rʋ́ʋ́ ka háálɔ balá* léŋ.
Ʋ mɔhɔ̃́ rʋ́ʋ́ zɩ́mʋ́ tɩɩ kanɛ́, a bɩɩnɛ wɩ́ɛ́ káá a, rʋ́ʋ́ rɩ́ nɩɛ wólli náŋá mɛ́, a cakɛ aá la nɩhʋɔra, a wólli nɩɛ aá karmɛ.
3 Ʋ wɩ mɔhɛ̃́ rʋ́ʋ́ a sɩnyɔ́r; ʋ wɩ mɔhɛ̃́ rʋ́ʋ́ a cɔ́ɛ́ tɩ́ná.
Amá ʋ mɔhɔ̃́ rʋ́ʋ́ a nɩpɔrɩ́, rʋ́ʋ́ rɩ́ nɛ́ŋ sɩ́ wɩ́ɩ́ kánʋ́.
Ʋ wɩ mɔhɛ̃́ rʋ́ʋ́ púú nyúú hé meéwíé mí.
4 Ʋ mɔhɔ̃́ rʋ́ʋ́ kánʋ́ tɩɩ jaa wérí, a wóllú bɛlɛ, rɩ́wɔ́ tɩ́tɩ́ŋʋ́ nʋɔ.
5 Rɩ́ nɛrɔ nɛ́ wʋ́ʋ́ tɩɩ jaa mɛ́ wuó bel, ʋ wɩ wɩcʋɔla púl* má mɛ́ wuó bel.
6 Wɩcʋ́ɔ́lɩ́sɩ́dííro wɩ mɔhɛ̃́ rʋ́ʋ́ a nɛrɔ ná há lá Zeezi wɩ́ɛ́ dí fɛ́lfɛ́l mɛ́; rɩ ɛ́ rá, nyʋkɔ sɩ́ kánʋ́, rʋ́ʋ́ hóŋŋú tɩɩ, rɩ́ Wɩɩsɛ dúú sarɩ́ya, anɛ ʋ há dí Sɩtaanɛ sarɩ́ya ɛ́.
7 Wɩcʋ́ɔ́lɩ́sɩ́dííro mɔhɔ̃́ rʋ́ʋ́ a nɩwérí, rɩ́ nɩɛ ná má há to Kirisi nɩɛ, rɩ́wɔ́ zízílú; rɩ ɛ́ rá, ɓa sɩ́ zɔ́kʋ́ yɩr, rɩ́ Sɩtaanɛ tɩŋ ɛ́ mɛ́, a hé báráwa kánʋ́.
Wɩcʋ́ɔ́lɩ́tʋtʋnna há mɔhɛ̃́ rɩ́wɔ́ nɛ ɛ́
8 Wɩcʋ́ɔ́lɩ́tʋtʋnna* má mɔhɔ̃́ rɩ́wɔ́ ka málwero, a a nɩtáŋsɛ.
Ʋ wɩ mɔhɛ̃́ rɩ́wɔ́ a sɩnyɔ́ɔ́rá; ʋ wɩ mɔhɛ̃́ rɩ́wɔ́ tɩŋ gɩragɩra, aá ja meéwíé.
9 Ʋ mɔhɔ̃́ rɩ́wɔ́ ka sawero ná há wo Wɩɩsɛ wɩ́ɛ́ laá bil; ɓa fa ká wɩ́féŋsé rí Wɩɩsɛ makɛ párá, á laa dí.
10 Ʋ sɩɛ́ mɔhɔ̃́ rɩ́wɔ́ mɩ́lwɔ́ ná kɛ́rɛ́; rɩ ɓa wɩ yɩtɔk kené, rɩ́wɔ́ lɩ́sɩ́wɔ́, rɩ́wɔ́ tʋ́tʋŋ wɩcʋ́ɔ́lɩ́tʋtʋmɛ́.
11 Háála ná má há ká wɩcʋ́ɔ́lɩ́tʋtʋnna, ʋ mɔhɔ̃́ rɩ́wɔ́ má ka málwero, a sɩ́ nɩɛ bɔ́ŋbɔ́ŋ bʋ́lʋ́.
Ʋ mɔhɔ̃́ rɩ́wɔ́ zɩ́ŋwɔ́ tɩɩ kanɛ́, rɩ́ nɩɛ ɔ́wɔ́ yardá, wɩ́ɛ́ wuu mí.
12 Ʋ mɔhɔ̃́ rɩ́ wɩcʋ́ɔ́lɩ́tʋtʋnna ka háálɔ balá léŋwa.
Ʋ mɔhɔ̃́ rɩ́wɔ́ káŋwɔ́ tɩɩ jɩɩsɛ wérí, a wóllíwó bɛlɛ.
13 Wɩcʋ́ɔ́lɩ́tʋtʋnna ná háá tʋ́ŋwɔ́ tʋtʋmɛ́ wérí, nɩɛ́ zílwó.
Ɓa wo Kirisi Zeezi wɩ́ɛ́ ná ɓa há lɛ́ɛ́ dí aá bʋl, arɩ́ taŋá, ká sɩ́ héwíŋ fá.
14 Wɩ́ɛ́ nyáŋ ŋ há pʋ́ŋsɛ́ aá pɛ́ɩ́, ŋŋ́ bɩ́ɩ́nʋ́ rɩ́ŋ kóí dɩhɩ̃́ rɛ́, tápʋlɛ nyáŋ nʋɔ mɛ́;
15 ŋ taŋa pʋ́ŋsɔ́ pɛ́ɩ́, a makɛ rɩŋ nɛ́ wɩ́ɩ́ dɩhɩ̃́ kɩ́kɛ́lɛ́ kúé má, rɩ́ɩ́ zɩŋ ɛ́ ná há mɔhɛ̃́ rɩ́ɩ́ kánɩ́ tɩɩ, nɩɛ ná há lá Wɩɩsɛ dí sɩɛrʋ.
Ɓa nɛ́ ká Wɩɩsɛ ná há wómmó nɩɛ púl ná, há cákɛ́ taŋá ná cɛ́, anɛ nafara há cákɛ́ jaa cɩ́ ɛ́.
16 Taŋá, ʋ to tɩ́ŋtɔ́ɛ́, á há lá Wɩɩsɛ wɩ́ɛ́ ná dí aá cʋ́ɔ́lʋ́ ɛ́, ʋ ká wɩ́féŋsi rí, Wɩɩsɛ makɛ párá.
Ɛ́ wɩ́ɩ́ nɛ́ ká:
Wɩɩsɛ tɩɩ bɩ́rmɛ́ nɩbííno, a ko dúníé.
Wɩɩsɛ Sabɩɩna* sʋ́ʋ́ ká tékétéké.
Wɩɩsɛ malɩ́kawa má nóú.
Nɩɛ bʋ́lʋ́ wɩ́ɛ́ dúníé kíŋkere wuu,
dúníé nɩɛ lɔ́ʋ́ dí.
Wɩɩsɛ kánʋ́ zɩ́ bána nyúú, ʋ ké dɩpiŋo.