Nɩɛ háá á rɩ́wɔ́ nɛ ɛ́, dúníé hatɩ́ŋnɩ́tápʋlɛ
3
1 Timote, zɩŋ rɩ́ dúníé hatɩ́ŋnɩ́tápʋlɛ sɩ́ lɔrɛ.
2 Nɩɛ sɩ́ cóllíwó tɩɩ dʋŋɔ nɛ́, a dí meéwí naŋnɔŋnɛ.
Ɓa sɩ́ mákwɔ́ tɩɩ, aá nyʋ́kɛ, a bʋl wɩ́ɛ́ aá tʋksɛ Wɩɩsɛ, a sɩ́ sáŋ pɔ́wɔ́ lʋlla, a sɩ́ zilé kánʋ́, a sɩ́ Wɩɩsɛ onni bú.
3 Nɩɛ wɩ náŋá cólli, ɓa wɩ náŋá susú fá, ɓa sɩ́ bʋl wɩ́ɛ́ aá zɔkɛ náŋá yɩ́rá, a sɩ́wɔ́ tɩɩ kanɛ́ zɩ́mʋ́, ɓa sɩ́ ɩ́'a bɩbarɩ́, ɓa sɩ́ bɛ́rɛ wɩ́were.
4 Nɩɛ sɩ́ yɛ́llɛ náŋá aá dí, ɓa sɩ́ a nyúdotɩ́ɩ́ná, ɓa sɩ́ a nyʋkɔ aá hóŋŋíwó tɩɩ; ɓa sɩ́ cóllíwó satɔ́ɔ́rwɩ́ɛ́, a kɩ́llɛ Wɩɩsɛ.
5 Ɓa sɩ́ a anɛ ɓaá tɩŋ Wɩɩsɛ ŋmɛ́nɔ nɛ́ nɩɛ sɩ́ɛ́ mɛ́, amá taŋá taŋá, ɓa wʋ́ʋ́ dóé ná sáŋɛ́.
Sɩ́ ɛ́ nɩɛ lɛ́lʋ́.
6 Ɛ́ nɩɛ náŋa nɩ́ɩ́ zʋ nɩɛ jɩɩsɛ, aá nyɩsɛ hácʋ́llɛ ná há cɩ́ɩ́nɛ wɩ́bɔma, aá tʋ́ŋwɔ́ tɩɩ wɩ́hɩɛ̃nɛ́ rɩ́wɔ́ duó wuu.
7 Ɛ́ hácʋ́llɛ có wɩ́ɛ́ gʋnnɛ́, amá ɓa wɩ taŋá wuó zɩŋ, ábádá.
8 Anɛ tésíé mí, Zanɛsɛ rɩ́ Zaŋbɩrɛsɛ fa há cɩ́ Moyizi* mí ɛ́, ɛ́ nɩɛ má zaa dé cɩ́ taŋá ná mɛ́ ɛ́ nɛ́.
Ɓa sabɩŋsɛ cɔ́rmɔ́, ká ɓa wɩ Wɩɩsɛ lɛ́ɛ́ dí taŋá taŋá.
9 Amá ɛ́ nɩɛ wɩ sɩ́ɛ́ mʋ́, bee wɩ́ɛ́ nɩɛ wuu sɩ́ kɩ́ɛ́lɛ zɩŋ rɩ́ ɓa cʋ́ʋ́lɔ́, anɛ Zanɛsɛ rɩ́ Zaŋbɩrɛsɛ.
Pool cáánɛ Timote
10 Amá ɩ é, ɩ lɛ́lɩ́ŋ, a ná wɩ́ɛ́ ná ŋ há píé karmɛ nɩɛ, a zɩ́mɩ́ŋ mála, a zɩ́mɩ́ŋ sabɩŋsɛ, ŋ yardá, ŋ nyamma, cólle ná ŋ há kené rɩ́ nɩɛ, ŋ há cɩ́nɛ́ tɩkɛ ɛ́;
11 ɩ ɩ́ŋ há ná wálmɛ rɩ́ wɩɩla ɛ́wa.
Bee wɩ́ɩ́lá rɛ́ ŋ wɩ néé, Aŋtɩɔsɛ rɩ́ Ikooni arɩ́ Lisitiri mí?
Amá Nyuutɩna lɩ́sɩ́ŋ ɓa wuu mí.
12 Nɩɛ ná é wuu háá já rɩ́wɔ́ tɩŋ Kirisi Zeezi mí arɩ́ taŋá, ɓa sɩ́ ná wálmɛ.
13 Amá nɩbɔma rɩ́ nɩnyɩɩsa sɩ́ ɔsɛ mʋʋrɛ bɔ́ŋbɔ́ŋ sɩɛrʋ, a yéŋŋíwó tɩɩ, ká yéŋŋi nɩɛ náŋa má.
14 Ɩ é taŋa hé dóé tɩŋ wɩ́ɛ́ ná ɩ há máŋsɛ, a laa dí; ɩ ɛ̃ nɩɛ ná há pí ɛ́ wɩ́ɛ́ kármɩ́ rɛ́.
15 Ɩ heŋbíírí mí wuu, ɩ ɛ̃ Wɩɩsɛ Kɛnɔ sɩɛrʋ wɩ́ɛ́ rɛ́; ɛ́ wɩ́ɛ́ nɩ́ɩ́ pɛ́ɩ́ zɩmɛ́, rɩ́ɩ́ Kirisi Zeezi laa díí ná a rɩ́ Wɩɩsɛ lɛ́ɩ́ tá.
16 Wɩɩsɛ Kɛnɔ ná wuu lɛ́ Wɩɩsɛ nɛ́; Wɩɩsɛ Sabɩɩna nɛ́ mákɛ́ nɩɛ ɓa pʋ́ŋsɛ.
Ʋ wéró arɩ́ nɩɛ karmɛ́; rɩ nɛ́ŋ á wɩ́ɩ́ zɔkɛ, ʋ mákɩ́ dɩzɔkɩ́; ʋ wéró arɩ́ nɩɛ tʋrɛ́, ʋ wéró arɩ́ nɩɛ máŋsɛ rɩ́wɔ́ a tékétéké,
17 a makɛ rʋ́ʋ́ pɛ́ Wɩɩsɛ tʋtʋnnɔ mɛ́, rʋ́ʋ́ kánʋ́ tɩɩ wérí a wólli wɩ́were wuu aá a.