Pool ná wɩ́ɛ́ anɛ duose mí
12
1 Ʋ mɔhɔ̃́ rɩ́ŋ a nyʋkɔ, ká zɩŋ rɩ́ nyʋkɔ wɩ nɛ́ŋ mɩ́ɩ́ sáŋ.
Mʋ́l néé mí, ŋŋ́ já rɩ́ŋ bʋl wɩ́muulináálɛ arɩ́ wɩ́ɛ́ ná Nyuutɩna há mákɛ́ páŋ, wɩ́ɛ́ nɛ́.
2 Ŋ ɛ̃ bál oro há lá Zeezi wɩ́ɛ́ dí.
Wɩɩsɛ púú kaa zɩ́ bána nyúú rí nyúú rí wuu.
Ʋ ɛ́ bɩŋsɛ fí rí baná nɛ́ nyɛ.
(Rʋʋ ɓɩɛ́na kenú tɛŋ nyɛ nɛ́ zɩ́ bána, ŋ wɩ ɛ̃.
Rɩ duose mí ní rʋ́ʋ́ dʋma zɩ́ bána, ŋ wɩ ɛ̃.
Amá Wɩɩsɛ dʋŋɔ nɛ́ ɩ́ɛ̃́.)
3 Ŋ ɩ́ɔ̃́ rɩ́ Wɩɩsɛ kéŋ ɛ́ báálɔ zɩ́nʋ́ dɩhɩ̃́, ʋ zʋ́ɔ́ mɛ́.
(Rʋʋ ɓɩɛ́na kenú tɛŋ nyɛ nɛ́ zɛ́, ŋ wɩ ɛ̃.
Rɩ duose mí ní rʋ́ʋ́ dʋma zɩ́ bána, ŋ wɩ ɛ̃.
Wɩɩsɛ dʋŋɔ nɛ́ ɩ́ɛ̃́.)
4 Ʋ há zɩ́ ráŋ, ʋ nɩ́ wɩ́ɛ́ ná nɩbííne há wʋ́ɔ́ wuo la aá bʋl.
Nɩbííno wɩ mɔhɛ̃́ rʋ́ʋ́ bʋ́lwɔ́ má tɩɩ.
5 Ŋ sɩ́ nyʋ́nyʋ́kɛ, nyɛ báálɔ duo mí wɩ́ɛ́.
Ká rɩŋ nɩ́ɩ́ nyʋ́kɩ́ŋ tɩɩ nyɛ é wɩ́ɛ́ má, ŋ há wɩ dóé kené ná wɩ́ɛ́ nɛ́.
6 Rɩŋ faá já rɩ́ŋ bʋl nyʋkɔ má, ŋ waá gáásɛ; taŋá nɛ́ rɩ́ŋ bʋl.
Ŋ sɩɛ́ wɩ nyʋkɔ́ a, rɩ́ nɩɛ máŋsɩ́ŋ mʋ́ dáárɩ́ŋ mʋɔsɔ; ŋ mʋɔsɔ ná ɓa há tɩ́ŋɩ́ŋ wɩ́'állɛ rɩ́rɩ́ŋ wɩ́bʋlɛ́ mɛ́ ná.
7 Wɩɩsɛ há ɛ́ɛ́ ŋ muuli ná wɩ́kɩɛka ná, ŋ fa wówó wɩ́ɛ́ tɩŋ aá a nyʋkɔ.
Amá Nyuutɩna há wɩ ɛ́ɛ́ ja, ʋ lóó Sɩtaanɛ nɩtʋmɩ́ ko fɩ́rɩ́ŋ, a pi óŋ tʋ́rɩ́ŋ tɛŋ mɛ́ anɛ sɔɔ, a pɔ́ rɩ́ŋ sɩ́ nyʋkɔ á.
8 Naasɩ́ botoro ní, ŋ sʋl Nyuutɩna rʋ́ʋ́ lɩ́sɛ ɛ́ wɩɩla ŋ tɛŋ mɛ́.
9 Amá ʋ bʋ́lɔ́ páŋ bʋlɛ́:
«Ŋ zilé dʋŋɔ mɔhɩ̃́.
Ɩ há kúé ɩ wɩ dóé kené tɛ́ŋ ná mɛ́ nɛ́, rɩ́ŋ ɔsɛ mákɩ́ŋ há kéŋ dóé aá tʋŋ ɛ́.»
Ɛ́ wɩ́ɛ́, ŋ sɩ́ taalɛ aá a nyʋkɔ, ŋ há wɩ dóé kené wɩ́ɛ́, a makɛ rɩ́ Kirisi dóé ko mɩ́nɩ́ŋ mɛ́.
10 Ɛ́ nɛ́ tɛ, ŋ wɩ dóé kené káá jʋɔsɛ, a saŋ zome, sazɔ́krɩ́wɩ́ɛ́, wálmɛ rɩ́ tɛŋbuoró, Kirisi yɩr mɛ́.
Dóé sɩɛ́ háá ko múríŋ tɛŋ ná mɛ́ nɛ́, Kirisi pi dóé aá páŋ.
Wɩ́ɩ́ ná háá wɛ Pool mí
11 Ɩ́ náŋ há píé aá gáásɛ ɛ́!
Ɩ́ nɛ́ héŋ ráŋ.
Ɩ́ nɛ́ fa mɔhɛ̃́ rɩ́ɩ́wa máŋsɩ́ŋ há ká nɛ́ŋ ná a pá nɩɛ.
Rɩŋ nɛ́ to óŋ má, ɩ́ sabɩ́ɩ́nájáŋ Wɩɩsɛ nɩtʋmɛ́ bɩbara ná má wɩ́ŋ kɛ.
12 Ŋ kéŋ nyamma a tʋŋ tʋtʋmɛ́ ná ŋ há tʋ́mɛ́, rɩ́wɔ́ zɩŋ rɩ́ŋ ká Kirisi nɩtʋmɩ́, ɩ́ sɩ́sɩ́ɛ́nnʋ́wa.
Ŋ á wɩ́nyɩnɩwa, a a wɩ́gɩrɛ́, a a wɩ́nyáŋsɛ.
13 Beé sɩɛ́ ŋ aa pá wɩcʋɔla púl nɩɛ náŋa, ká wɩ ɛ́ɛ́ pɛ́ɩ́wa é?
Rɩŋ fa há tóíwa nyúú cɩká, rɩ́ɩ́wa pɩ́páŋ ɓɩɛ dʋŋɔ rá.
Ʋ ɛ́ há to yɛ́rɛ́ wɩ́ɛ́, ɩ́ héŋ suúri.
14 Ŋ keníŋ tɩɩ rɩ́ŋ kóíwa dɩhɩ̃́ rɛ́, ŋ naasɩ́ botoro nyúú mí.
Ŋ sɩɛ́ waá ja rɩ́ŋ ko cɩ́kɩ́wa oro wuu daha má.
Ɩ́ ɓɩɛ rá ŋ jɩ́ja, ɩ́ tɩɩ wuu ní ŋ jɩ́ja; bee wɩ́ɛ́ bɛlɛ ra wɩ mɔhɛ̃́ rɩ́wɔ́ ja ɓɩɛ aá bil ánáwa mɛ́, ánáwa nɛ́ mɔhɛ̃́ rɩ́wɔ́ já ɓɩɛ aá bil bɛlɛ mɛ́.
15 Ŋ é có rɩ́ŋ taalɛ zɔ́kɩ́ŋ tɩɩ pɛ́ɩ́wa; rɩŋ kéŋ óŋ má, rɩ́ŋ pii sáŋɩ́wa mɛ́.
Ŋ há cóíwa mɔ nyɛ, ɩ́ é wɩ́ŋ ɛ́ wuó cólli?
16 Ʋ ká taŋá rɛ́, ŋ wɩ kúé sákɩ́wa daha, a bʋlɩ́wa túmíŋ.
Amá ɩ́ nɩɛ náŋa sɩ́ lɩ́ŋ nɛ́ ŋ a, a nyɩsɛ kɛ́sɩ́wa.
17 Nɩɛ ná wuu ŋ há tʋ́mɩ́wa rɩ́, ŋ tɩ́ŋwɔ́ oro mí fóríwa óŋ rí?
18 Ŋ sʋ́l Tiiti, a a, á maábinɔ́ŋɔ ná ɩ́ há ʋ́ʋ̃́, ʋ kánʋ́, ɓa kóíwa rɩ́.
Ʋ kúó fóríwa óŋ rí?
Ŋ rɩ́ Tiiti wuu to wɩ́ɩ́ balá hár rɛ́, a tʋŋ valɛ́ mɛ́?
19 Fól wuu, ɩ́ bɩ́ɩ́nɔ́ raá wɩ́bʋlɛ́ ná wuu ká nʋʋsɛ rɛ́, á lɩ́sɛ aá já ráá lárá tɩɩ ɩ́ sɩ́ɛ́ mɛ́?
Ɛ́ rá sɩɛ́ toó!
Wɩɩsɛ sɩ́ɛ́ mɛ́ nɛ́, á tɩŋ Kirisi mí aá bʋl.
Naŋnɔ́ŋwere, á sɩɛ́ bʋ́l wɩ́ɛ́ nyáŋ wuu, aá jɛ́ɩ́wa yardá súúre ní.
20 Ŋŋ́ fá wɩ́ɩ́ héwíŋ rí:
Rɩ́ŋ háá ko aá néíwa, rɩɩ́wa to ɛ́ ná ŋ háá jɛɛ́, ká, rɩŋ má to ɛ́ ná ɩ́ háá jɛɛ́ wɩ́ɛ́.
Ŋŋ́ fá rɩ́ŋ háá ko, rɩ nɛsɛ, báhaksɩ́, cɔwɩɩlɔ́, dɩŋdɔmɩ́, nɩtʋksɛ, zaŋbá, nyʋkɔ, rɩ́ kapɔsɛ, nɛ́ mɩ́nɩ́wa pɛ́kɛ.
21 Ŋ sɩɛ́ haá fa héwíŋ wɩ́ɩ́ nɔ́ŋ má wɩ́ɛ́ rɛ́:
Rɩ́ŋ háá ko, rɩ́ŋ Wɩɩsɛ baa múúríŋ pɛ́ɩ́wa; rɩ́ɩ́wa ɓɩkana wɩ́bɔmɔ wɩ́ɛ́ a yúó a páŋ.
Wɩ́bɔmɔ ná ɓa há ɛ́ɛ́ fól wuu, ká ha mɩ́ŋwɔ́ ɛɛ mɛ́, a ha wɩ bɩ́rsɛ́ a ko Wɩɩsɛ rɩ́, ká ha mɩŋ busunnu wɩ́'állɛ mɛ́, aá a nɩlɩɩlɩ́wɩ́ɛ́, rɩ́ nyúzɔ́krɩ́wɩ́ɛ́.