Pool bʋ́l nɩɛ ná há nyɛ́ nyɩɛrʋ, a bʋlɛ́ ɓa ká Kirisi nɩtʋmɛ́ wɩ́ɛ́
11
1 Ŋ faá já rɩ́ɩ́wa saŋ rɩ́ŋ bʋl gɩŋgáwɩ́ɩ́ rɛ́; óó!
Ɩ́ saŋ rɩ́ŋ bʋl.
2 Ŋ cóíwa, aá dí báhaksɩ́ ɩ́ wɩ́ɛ́, báhaksɩ́ ná há lɛ́ Wɩɩsɛ, bee wɩ́ɛ́ ŋ cɔ́ɩ́wa pá bál balá rɛ́, ʋ nɛ́ ká Kirisi.
Ŋŋ́ já rɩ́ɩ́wa nɛ toopero ná há wɩ bál ɛ̃ nɛ́, rɩ́ŋ pííwa pɔ́ʋ́.
3 Amá anɛ dʋŋ há kúé pi lɩ́ŋ mɛ́ nyɩsɛ Ɛɛvɛ* ɛ́, ŋŋ́ fá rɩ́wɔ́ háá ko bʋl nyɛwɩ́ɛ́ pɛ́ɩ́wa, a yéŋŋíwa sabɩŋsɛ, rɩ́ɩ́wa báá sɩ́ Kirisi mí tɩ́ŋʋ́ wérí arɩ́ taŋá, anɛ ɩ́ háá tɩŋ ɛ́;
4 bee wɩ́ɛ́ rɩ nɛ́ŋ nɔ́ŋ kúó bʋl Zeezi nɔ́ŋ wɩ́ɛ́ pɛ́ɩ́wa, rʋʋ to Zeezi ná á há mákɛ́ pɛ́ɩ́wa má, ɩ́ɩ́ sáŋʋ́ tɩ́na.
Rʋʋ bʋ́l sabɩɩna ná má há to Wɩɩsɛ Sabɩɩna wɩ́ɛ́ pɛ́ɩ́wa, a bʋl labáárɛ ná má há to Labaarɩwero ná wɩ́ɛ́ pɛ́ɩ́wa, ɩ́ɩ́ laa dí ní.
5 Ŋ sɩɛ́ wɩ bɩ́ɩ́nɛ́ rɩɩ́wa sabɩ́ɩ́nájáŋ Wɩɩsɛ nɩtʋmɛ́ bɩbara ná má kɩ́ŋ.
6 Rɩŋ wɩ wɩ́ɛ́ bʋlɛ́ ɛ̃ má, ŋ ɛ̃ wɩ́ɛ́ é rí.
Á tɩ́ŋrá wɩ́'állɛ wuu mí, a mákrá wɩ́zɩmɛ pɛ́ɩ́wa.
7 Ŋ há kúé bʋl Wɩɩsɛ Labaarɩwero ná pɛ́ɩ́wa, ŋ wɩ́ɩ́wa óŋ lɛ́ɛ́; ŋ múúríŋ tɩɩ nɛ́, ká rɩ́ɩ́wa a nɩpíŋé.
Ʋ ɛ́ sɩɛ́ ká wɩ́tɔ́k rɛ́ ŋ a?
8 Ŋ fa há tʋ́mɛ́ aá pɛ́ɩ́wa ɛ́, wɩcʋɔla púlli* nɩ́ɛ́ náŋá rɩ́ɩ́ túmíŋ.
9 Ŋ fa há mɩ́nɩ́wa sɩɛrʋ, óŋ wɩ́ɛ́ ko kánɩ́ŋ baŋ mɛ́ má, káŋ wɩ́ɩ́wa oro wuu rɩ́ mʋ́ɛ́ la óŋ.
Á maábináŋa ná há lɛ́ Masɩdʋanɛ* ko, ɓa nɛ́ kéŋ ɓɩɛ ko páŋ, ŋ laa ɔ́sɩ́ŋ wɩ́ɛ́ wuu.
Ŋ fa wɩ có rɩ́ŋ a cɩká, a pɛ́ɩ́wa oro wuu; ŋ sɩɛ́ ha waá ja rɩ́ŋ a cɩká a pɛ́ɩ́wa nɛ́ŋ oro wuu.
10 Ʋ ɛ́ ká jɛsɩwɩ́ɩ́ rɛ́ a páŋ.
Kirisi taŋá ná há mɩ́nɩ́ŋ mɛ́ wɩ́ɛ́, nɛ́ŋ tóó aá kɛ́rɩ́ŋ mɛ́, Akayi* dɩtɩ́llɛ wuu mí, rɩ́ŋ sɩ́ jɛ́sʋ́.
11 Beé rí sɩɛ́ tɛ ŋ bʋl nyɛ?
Ŋ há wɩ́ɩ́wa có ní?
Aɩ́!
Wɩɩsɛ tɩɩ ɩ́ɔ̃́ rɩ́ŋ cóíwa.
12 Ŋ sɩɛ́ há tʋ́ŋ ɛ́, ŋ haá já rɩ́ŋ tʋŋ ɛ́ tɩɩ tɩɩ nɛ́, a makɛ rɩ́ ŋmɛ́nɔ sɩ́ mɩ́nʋ́, rɩ́ɩ́ pá nɩɛ ná háá nyʋ́kɛ́, a bɩɩnɛ rɩ́ ɓaá tʋ́ŋrá háá tʋŋ ɛ́ nɛ́.
13 Ɛ́ nɩɛ to Zeezi nɩtʋmɛ́, nyɛtɩ́ɩ́ná rɛ́ kɔ́wɔ́, ká píwó tɩɩ makɛ Kirisi nɩtʋmɛ́.
14 Ʋ ɛ́ to wɩ́gɩrɩ́, Sɩtaanɛ máá gɩ́nʋ́ tɩɩ ɛ́ nɛ́, anɛ malɩ́ka ná há kéŋ pʋmmɔ.
15 Ɛ́ wɩ́ɛ́, ʋ to wɩ́gɩrɩ́, rʋʋ tʋtʋnna má nɛ́ gɩ́ŋwɔ́ tɩɩ, anɛ tékétéké tʋtʋnna.
Ɓa sɩɛ́ sɩ́ mʋ́ ná ker ná há cɛ́rɛ́ rɩ́wɔ́ tʋtʋmɛ́.
Pool ná wɩɩla, ʋ há ká Zeezi nɩtʋmɩ́ wɩ́ɛ́
16 Ŋ báá ha bʋ́lɔ́ aá pɛ́ɩ́wa, ɩ́ sɩ́ bɩ́ɩ́nʋ́ rɩŋ ká gɩŋgátɩ́ŋ.
Rɩɩ́wa píŋ makɛ gɩŋgátɩ́ŋ má, ɩ́ sáŋɩ́ŋ ɛ́, ká rɩ́ŋ a jɛsɔ mʋɔ́.
17 Ŋ dɩbʋlɩ́ né sɩɛ́ to Nyuutɩna háá ja ɛ́ nɛ́; rɩŋ nɛ́ sɛ́ rɩ́ŋ já rɩ́ŋ a jɛsɔ, ŋ gɩŋgárʋ mɛ́ nɛ́.
18 Nɩɛ ɓɩkana tɩ́ŋ nɩbinní mí aá ja rɩ́wɔ́ mákwɔ́ tɩɩ, ɛ́ nɛ́ ŋ má jɩ́ja rɩ́ŋ mákɩ́ŋ tɩɩ.
19 Ɩ́ ká wɩ́zɩ́nná, ká rɩ gɩŋgátɩɩna kúó aá bʋ́lwɔ́ wɩ́ɛ́, ɩ́ saŋ pɔ́wɔ́.
20 Ɩ́ sáŋɔ́ lo nɩɛ pííwa makɛ yósi, a kánɩ́wa tʋŋ aá dí, aá vɩ́rɩ́wa, a cúllíwa mɛ́, aá ŋmɔ́wɩ́wa sɩ́ɛ́ mɛ́.
21 Ʋ bʋlɛ́ hɩɩ̃sɛ keníŋ rí, á há wɩ ɛ́ dóé kené ɩ́ mɛ́.
Ká rɩ nɛ́ŋ sʋ́ʋ́ wo wɩ́ɩ́ wɩ́ɛ́ tɩŋ aá a jɛsɔ, ŋŋ́ já rɩ́ŋ bʋl gɩŋgárʋ nɛ́, ŋ má wúóló rí.
22 Ɓa há ká Ebirewa* nɛ́?
Ŋ má ká nɔ́ŋɔ nɛ́.
Ɓa há ká Ɩzɩrayɛl nɩɛ nɛ́?
Ŋ má ká nɔ́ŋɔ nɛ́.
Ɓa há ká Abɩrahaŋ* dunɩɛ nɛ́?
Ŋ má ká nɔ́ŋɔ nɛ́.
23 Ɓa ká Kirisi tʋtʋnna nɛ́?
Ŋŋ́ já rɩ́ŋ bʋl anɛ ŋŋ́ gáásʋ́ nɛ́.
Ŋ ká Kirisi tʋtʋ́nnʋ́, a tʋŋ pɔ́ʋ́ kɩ́llɩ́wɔ́.
Ɓa tɔ́ŋ bɩnajaa kɩ́llɩ́wɔ́, a ŋmásɩ́ŋ kɩ́llɩ́wɔ́, ŋ cɩ́ sʋwɛ́ má mɛ́ a kɩ́llɩ́wɔ́.
24 Zuwifiwa* fɩ́rɩ́ŋ, vɩla balá tóó mɛɛ́sɛllɛwa, naasɩ́ bɔmmʋ́ɔ́.
25 Naasɩ́ botoro ní, Romi* tɩ́náwa há pɔ́wɔ́ vɩllɛ fɩ́rɩ́ŋ; Zuwifiwa yósíŋ rɩ́ dɔ́wʋ́ɔ́ rɩ́wɔ́ ɓʋ́, naasɩ́ balá.
Ŋ há zʋ́ nyiidaborsi ɓa zɔkɛ héŋ mí mʋʋ sɩɛrʋ nɛ́, naasɩ́ botoro, ŋ cɔ́ nyii daha má, naasɩ́ balá, tɩ́taŋ rɩ́ wɔhɔ pírmí.
26 Ŋ vá ŋmɛ́ŋsɛ ɓɩkana a ná wɩɩla wérí, ɓa mɛ́.
Ŋ ná wɩɩla fuonni há súé wɩ́ɛ́, a ná wɩɩla gaara nɛ́sɛ mɛ́, a ná wɩɩla ŋ aŋbɛlɛ Zuwifiwa, rɩ́ nɩɛ ná há to Zuwifiwa wuu nɛ́sɛ mɛ́; ŋ ná wɩɩla tɔ́nɛ sɩɛrʋ, baksɛ mɛ́ arɩ́ mʋʋ sɩɛrʋ.
Ŋ ná wɩɩla nɩɛ ná há nyɛ́ nyɩɛrʋ bʋlɛ́ ɓa kárá maábináŋa, ká tówó, má nɛ́sɛ mɛ́.
27 Ŋ tʋ́ŋ tʋtʋ́ŋduoru, a ná wɩɩla wérí; ŋ wɩ dóŋ néé pɛ́, tɛŋ náŋa mɛ́; ŋ ná losu rɩ́ nyinyʋɔ́sɛ wɩɩla, a fɩkɛ vɔwɛ* nʋɔ tɛ́ŋ náŋa mɛ́; waarʋ kánɩ́ŋ, ká ŋ wɩ gɛnnɛ má kené.
28 Rɩŋ ló wɩ́ɛ́ náŋa má, ŋ sɩ́ bʋ́lɩ́ŋ wɩ́fɩɛmɔ né:
«Wɩcʋɔla púlli* wuu nɩɛ wɩ́ɛ́ nɛ́ mɩ́nɩ́ŋ beŋtúú mí.»
Ŋŋ́ bɩ́ɩ́nɩ́wɔ́ wɩ́ɛ́ nɛ́ kál wuu.
29 Ɓa oro wuu wɩ dóé kené ká, ŋ má wɩ dóé kené ní; rɩ nɛ́ŋ á wɩ́bɔmɔ, ŋŋ́ de la aá ná wɩɩla nɛ́.
30 Rʋʋ hé rɩ́ŋ a jɛsɔ má, ŋ sɩ́ jɛsɛ, a tɩ́ŋɩ́ŋ há wɩ dóé kené wɩ́ɛ́.
31 Ŋ wɩ nyɩɛrʋ́ nyɛ, Wɩɩsɛ há ká Nyuutɩna Zeezi Ana, tɩɩ ɩ́ɔ̃́ rɩ́ŋ wɩ nyɩɛrʋ nɩ́ɩ́ nyɛ.
Á píŋsú kál wuu!
32 Ŋ fa há mɩŋ Damaasɛ mɛ́, kuózeno Arɩtasɛ ɔ́ɔ́ kʋ́máŋdá tʋŋ gárdɩwa, rɩ́wɔ́ lɩɩ pɔ́ tɔ́ɔ́ dánnʋʋsɛ mɛ́ a kánɩ́ŋ.
33 Amá laadííre píŋ hé zaŋgbaarɛ mɛ́, a tɛrɛ a tá, ŋ tɩŋ tókóró tuwi zɩ́ŋbal, a lú lʋ́ʋ́ nɛ́sɛ mɛ́.