Pool bʋ́l tíŋ ná ʋ há kené aá tʋ́mʋ́ tʋtʋmɛ́ wɩ́ɛ́
10
1 Ŋ é Pool ná, nɩɛ há sɛ́ rɩŋ mɩ́nɩ́wa sɩɛrʋ, ŋ pɔrɛ́, ká rɩŋ tóíwa laka, ŋ haakɩ́, ŋ pí Kirisi sapɔrɩ́ rɩ́rʋ́ sawér aá sʋ́lɩ́wa.
2 Ŋŋ́ sʋ́lʋ́ rɛ́, ɩ́ sɩ́ŋ mɛ́ fɩ́kʋ́, rɩŋ kúó mɩ́nɩ́wa sɩɛrʋ, rɩ́ŋ tʋŋ haksɩ́.
Ɩ́ nɩɛ náŋa sɩ́ ráá va tɛŋnamɩɛ cólle sɩɛrʋ nɛ́; ɛ́ nɩɛ é rɩ́, ŋ sɩ́ tʋŋ haksɩ́ mákwɔ́.
3 Á ká nɩbííne é rí dúníé sɩɛrʋ, amá á wɩ dúníé dóé ní kené aá yo lal ná, á háá yoé.
4 Á lalyóórícɩksɛ to dúníé né ɓɩ́ɛ́, ɓa lɩ́ Wɩɩsɛ rɩ́ nɛ́.
Ɓa kéŋ dóé, a yiki dɩhɩ̃́ dúókówa wuu ní áá yo, aá zɔkɛ nɩbííne sabɩŋyeŋŋéwa.
5 Onni ná wuu há cɩ́nɛ́ arɩ́ nyʋkɔ, a kɛ́rɛ rɩ́ nɩɛ sɩ́ Wɩɩsɛ zɩ́mʋ́ mɛ́, ɓa wuu ní á yiki aá yo.
Á ɔ́ɔ́ nɩɛ bɩ́bɩ́rsɛ sabɩŋsɛ, aá tɩŋ Kirisi mí, arɩ́wɔ́ sɩɛnnɛ wuu.
6 Rɩɩ́wa kúó wólli Kirisi nʋɔ wɩ́ɛ́ wuu aá zíl, á sɩ́ tʋrɛ nɛrɔ ná há sɩ́ vɛ́wɔ́ zíle.
7 Ɩ́ sɩ́ wɩ́ɛ́ bélú dɛ́ŋdɛ́rɛ́ŋ.
Rɩ nɛrɔ bɩ́ɩ́nɔ́ rʋʋ ká Kirisi nɛ́ŋ, rʋ́ʋ́ zɩŋ rʋ́ʋ́ há ká Kirisi nɛ́ŋ ɛ́, á má ká Kirisi nɩɛ nɛ́.
8 Nyuutɩna há párá tíŋ ná, ʋ sɩ́ ráá kaa tʋŋ, ɩ́ súúre wɩ́ɛ́ nɛ́, ɩ́ zɔkɛ́ wɩ́ɛ́ rá.
Rɩŋ tɩ́ŋ ɛ́ wɩ́ɛ́ nyʋ́kɛ aá daarɛ má, hɩɩ̃sɛ wɩ́ŋ ka.
9 Ŋ waá ja rɩ́ɩ́wa bɩɩnɛ, rɩŋ pʋ́ŋsɩ́ŋ kɛnnɛ ná pɛ́ɩ́wa, aá ja rɩ́ héwíŋ ní kánɩ́wa.
10 Nɩɛ sɛ́:
«Pool kɛŋpʋ́ŋsɛ ná dúókó, ɓa háákɔ́ má; ká rʋʋ kúó mɩ́ŋrá sɩɛrʋ, ʋ wɩ dóé kené, ʋ wɩ́bʋlɛ́ a yɔ́ɔ́.»
11 Rɩ nɛ́ŋ bɩ́ɩ́nɛ́ ɛ́, ʋ́ʋ́ zɩŋ rɩ́, á há nɩhɩ̃́ ɛ́ wɩ́bʋlɛ́ mɛ́ kɛnnɛ sɩɛrʋ, áá nɛ́ ɛ́ nɛ́ á wɩ́'állɛ má mɛ́, ɩ́ sɩ́sɩ́ɛ́nnʋ́wa, raá nɛ́ kúé.
12 Nɩɛ náŋa mákwɔ́ tɩɩ aá daarɛ.
Á rɩ́wɔ́ wɩ náŋa wuó mɔ, á wɩ́rá tɩɩ kɔwɛ kaá máŋsɩ́wɔ́.
Ɓa jɔ́wɔ́ tɩɩ oŋ'máŋsɛ a kaá máŋsɛ náŋá, a pi náŋá aá máŋsɩ́wɔ́ tɩɩ.
Ɓa sɩɛ́ cʋ́ʋ́lɔ́ nɛ́ ɛ́.
13 Á é wɩ wuo nyʋ́kɛ aá daarɛ ɛ́ ná, Wɩɩsɛ há bílé.
Wɩɩsɛ há párá ŋmɛ́nɔ ráá kóíwa dɩhɩ̃́, ʋ mákrá dɩtʋŋ'mʋ́ɓiirí párá rɛ́.
14 Á sɩɛ́ ɓɩɛ́na há kóíwa dɩhɩ̃́, á wɩ tʋ́mɛ́ mʋ́ daarɛ ɛ́ nʋɔ.
Á nɛ́ lá sɩ́ɛ́ ka Kirisi Labaarɩwero ná ko yákɩ́wa mɛ́.
15 Á waá tʋ́ŋ daarɛ nʋɔ, rɩ́ɩ́ tɩŋ nɩɛ náŋa tʋtʋmɛ́ wɩ́ɛ́ rɩ́ nyʋ́nyʋ́kɛ.
Amá á kéŋ yɩɛla, rɩɩ́wa yardá sɩ́ súúri, ká ráá má wólli ɔsɛ tʋŋ tʋtʋ́ŋzéní ɩ́ rɩ́, Wɩɩsɛ há cókí panʋɔ ná párá sɩɛrʋ.
16 Rɩ ɛ́ nɛ́ ɛ́ɛ́, á sɩ́ ka Labaarɩwero ná dáárɩ́wa mɛ́, a mʋ́ bʋ́lʋ́ pá sɩ́ɛ́rɩ́ tɔ́nɛ nɩɛ.
Á waá ja ráá tɩŋ nɩɛ náŋa tɩ́llɛ sɩɛrʋ tʋtʋmɛ́ wɩ́ɛ́, aá a nyʋkɔ.
17 Wɩɩsɛ Kɛnɔ sɩɛrʋ, ɓa pʋ́ŋsɔ́ bʋlɛ́:
«Rɩ nɛrɔ́ já rʋ́ʋ́ mákʋ́ tɩɩ, rʋ́ʋ́ mákʋ́ tɩɩ Nyuutɩna wɩ́'állɛ sɩɛrʋ.»
18 Nɛrɔ ná tɩɩ há kenú tɩɩ aá ɓɔ́ rá, Wɩɩsɛ zízíl, amá Nyuutɩna Wɩɩsɛ tɩɩ há lɩ́sɛ nɛ́ŋ ná nɛ́, ʋ zízíl.