Wɩɩsɛ có nɛrɔ ná háá tɛɛ́ rɩ́ satɔrɔ́
9
1 Kɩɛsɔ́ ná háá mʋ́ʋ́ sáŋ Zeezi laadííre ná há mɩŋ Zerizalɛmɛ* mɛ́ wɩ́ɛ́, rɩŋ pʋ́ŋsɛ kɛ́ŋ pɛ́ɩ́wa má, ʋ ká yɔ́ɔ́ rɛ́.
2 Ŋ ɩ́ɔ̃́ rɩ́ɩ́wa kéŋ ɛ́ cólle rí; ɛ́ nɛ́ tɛ, ŋ bʋ́lɩ́wa wɩ́ɛ́ pá Masɩdʋanɛ* nɩɛ, káá nyʋ́kɛ.
Ŋ bʋ́lɔ́ pɔ́wɔ́ bʋlɛ́:
«Akayi* nɩɛ é duoli wuu ní kéŋwó tɩɩ, rɩ́wɔ́ tɛ́wɔ́ sáŋɛ.»
Ɩ́ kajáŋa nɛ́ sɩɛ́ pɔ́sɩ́wɔ́ ɓɩkana hé ɛ́ mɛ́.
3 Ŋ sɩɛ́ taŋa tʋ́ŋrá maábináŋa nyáŋ ɩ́ rɩ́, rɩ́ɩ́wa ɓɩɛ́na kánɩ́wa tɩɩ wérí, ɛ́ wɩ́ɛ́ mɛ́, anɛ ɛ́ ŋ há bʋ́lɛ́, a makɛ rɩ́ nyʋkwɩ́ɛ́ ná ŋ há bʋ́lɛ́ cáásɩ́wa, rɩ́wɔ́ sɩ́ nyɩɛrʋ á.
4 Rɩ Masɩdʋanɛ nɩɛ tɩ́ŋɩ́ŋ mɛ́ ko, rɩɩ́wa satɔ́ɔ́rpálɔ wɩ náŋá mɛ́ héé, ʋ sɩ́ a hɩɩ̃sɛ́ a párá, ká a hɩɩ̃sɛ́ pɛ́ɩ́wa má, ɓa sɩ́ɛ́ mɛ́, bee wɩ́ɛ́ á bʋ́lɩ́wa wɩ́ɛ́ sú nʋɔ daarɛ.
5 Ɛ́ nɛ́ ŋ ná, rʋʋ mɔhɔ̃́ rɩ́ŋ tʋŋ maábináŋa rɩ́wɔ́ láŋ sɩ́ɛ́ ko, a zɩ́mɩ́wa satɔ́ɔ́rpálɔ ná wɩ́ɛ́ ɩ́ há bʋ́lɛ́.
Ŋŋ́ kúkó, rɩ ɓa hé náŋá mɛ́.
Ɛ́ nɛ́ rɩ́wɔ́ zɩŋ rɩ́ɩ́waá tɛ́ rɩ́ satɔrɔ́ nɛ́, ɓa wɩ́ɩ́wa mɛ́ fɩ́kɛ́.
6 Ɩ́ sɩ́ wɩ́ɩ́ né mí sʋ́llʋ́:
Nɛrɔ ná há dú mʋɔ́, ʋʋ́ kʋŋ mʋɔ́ nɛ́; nɛrɔ ná há du kɩ́ŋkáŋ, ʋʋ́ kʋŋ kɩ́ŋkáŋ nɛ́.
7 Nɛrɔ wuu há bɩ́ɩ́nʋ́ tɩɩ mɛ́ rʋ́ʋ́ tɛɛ mɔ ɛ́, ʋ tɛ, a makɛ rɩ́ sazɔkɔ́ rɩ́ fɩkɛ́ sɩ́ ráŋ mɩ́nʋ́.
Wɩɩsɛ có nɛrɔ ná háá pɛ́ɛ́ rɩ́ satɔrɔ́ nɛ́.
8 Wɩɩsɛ é kéŋ dóé rʋ́ʋ́ pɛ́ɩ́wa óŋ wuu kɩ́ŋkáŋ, rɩ́ɩ́wa pii ɔ́sɩ́wa wɩ́ɛ́, ká káánɛ, a pi aá tʋŋ tʋtʋ́ŋwere.
9 Ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ a bʋlɛ́:
«Ʋʋ́ pá summe rɩ́ ɓɩɛ wérí,
ʋ tékétéké waá tenni.»
10 Wɩɩsɛ ná há já oŋduo aá pá dúduuro, a nɛ́ jɔ́ʋ́ nʋɔ ɓɩdííli má aá pɔ́ʋ́, ʋ sɩ́ pɛ́ɩ́wa oŋduo, a a rɩ́wɔ́ nyʋ́, a makɛ rɩ́ɩ́wa tékétéké ná nɔŋ nɔŋkana.
11 Wɩɩsɛ sɩ́ á rɩ́ɩ́wa ka ɓɩɛ wérí wɩ́ɩ́ wuu mí, a ɔsɛ dí zilé aá pá nɩɛ.
Rɩ́ nɩɛ ɓɩkana tɩ́ŋɩ́wa zilé ná á há kené ko pɔ́wɔ́ wɩ́ɛ́, a bárkɛ Wɩɩsɛ.
12 Pálɔ ná ɩ́ háá píí sáŋ wɩcʋɔla púl nɩɛ ná mɛ́, sɩ́ a rɩ́wɔ́ nówó oŋjaalɛ́ wuu, ká a rɩ́ nɩɛ ɓɩkana bárkɛ Wɩɩsɛ, arɩ́wɔ́ sɩɛrʋ wuu.
13 Ɓa sɩ́ tɩŋ tʋtʋmɩ́ ná ɩ́ háá á rɩɩ́wa tʋŋ mɛ́, a néíwa háá tɩŋ Kirisi Labaarɩwero ná ɛ́, rɩ́wɔ́ ɓɩkana bɩ Wɩɩsɛ mɛ́.
Ɓa sɩ́ tɩŋ zilé ná ɩ́ há díé pɔ́wɔ́ rɩ́ nɩɛ náŋa wuu wɩ́ɛ́ má, a bɩ Wɩɩsɛ mɛ́.
14 Wɩɩsɛ há tʋ́ŋ bárka tʋtʋ́ŋzeŋsi ná pɛ́ɩ́wa wɩ́ɛ́, ɓa sɩ́ cóllíwa, a cʋɔlɛ Wɩɩsɛ pɛ́ɩ́wa.
15 Á bárkɛ Wɩɩsɛ, ʋ há púú zilé ná nɔ́ŋɔ há toó párá wɩ́ɛ́.