Sawér pálɔ
8
1 Maábináŋa, áá já rɩ́ɩ́wa zɩŋ tʋtʋmɩ́ ná, Zeezi laadííre ná há mɩŋ Masɩdʋanɛ* mɛ́ há tʋ́mɛ́, Wɩɩsɛ zilé mí ní.
2 Wɩɩla wálmɩ́wɔ́ kɩ́ŋkáŋ, amá ɓa sɩɛnnɛ ha tɔ́rɔ́ wérí.
Ɓa ká súmmé kɩ́ŋkáŋ, ká ha ka sawér má kɩ́ŋkáŋ, a kɩɛsɛ kɩɛsɔ́ rɩ́wɔ́ laa sáŋ nɩɛ mɛ́.
3 Ŋ nɛ́ bʋ́lɛ́ pɛ́ɩ́wa, ɓa kɩ́ɛ́sɔ́, ɓa dóé mʋɔsɔ; ɓa kɩ́ɛ́sɔ́ kɩ́llɩ́wɔ́ dóé má tɩɩ, ɓa satɔrɔ́ mɛ́,
4 ká sʋ́lrá jɛ́ŋjɛ́ŋ, ráá pɔ́wɔ́ ŋmɛ́nɔ, rɩ́wɔ́ má sáŋ Zeezi laadííre ná há mɩŋ Ziide dɩtɩ́llɛ mɛ́.
5 Ɓa tʋ́mɔ́ dáárɩ́rá há kéŋ ɛ́ yɩɛla.
Ɓa tɩ́ŋ Wɩɩsɛ cólle mí, a la sɩ́ɛ́ píwó tɩɩ pá Nyuutɩna nɛ́, ká sɩɛ́ baa píwó tɩɩ párá má.
6 Tiiti fa púló a, ɩ́ tʋ́tʋŋ tʋtʋ́ŋwérí rí.
Ɛ́ nɛ́ á sʋ́lʋ́ rʋ́ʋ́ kóíwa rɩ́, a tʋŋ ɛ́ tʋtʋmɩ́ tenni.
7 Ɩ́ ká kuóré wɩ́ɛ́ wuu sɩɛrʋ; ɩ́ kéŋ yardá, ɩ́ ɩ̃ wɩ́ɛ́ bʋlɛ́, ɩ́ kéŋ wɩ́zɩmɛ, ɩ́ kéŋ kajáŋa wɩ́ɛ́ wuu mí, ɩ́ córá.
Ɛ́ wɩ́ɛ́, ɩ́ a kuóré zilé díí má mɛ́, aá pá nɩɛ.
8 Ŋ wɩ́ɩ́wa mɩ́ɩ́ fɩkɛ rɩɩ́wa dí zilé pá nɩɛ.
Amá ŋŋ́ já rɩ́ŋ makɛ nɩɛ náŋa há tʋ́ŋ ɛ́ arɩ́ kajáŋa nɛ́ pɛ́ɩ́wa, ká tɩŋ ɛ́ mɛ́ néíwa cólle mʋɔsɔ.
9 Ɩ́ ɩ̃́rá Nyuutɩna Zeezi Kirisi zilé mʋɔsɔ.
Ʋ fa ká kuór, ká tɩ́ŋɩ́wa wɩ́ɛ́ a bɩrmɛ súmmú, a makɛ rʋ́ʋ́ tɩ́ŋʋ́ súmmú mí, a a rɩ́ɩ́wa dí kuorí.
10 Ɛ́ wɩ́ɩ́ mɛ́, ɩ́ náŋ sabɩɩna:
Ʋ yɛ́rɛ́ nɛ́ ká, rɩ́ɩ́wa ha tʋ́tʋ́ŋ tʋtʋmɩ́ ná ɩ́ há púlé duoli.
Ɩ́ nɛ́ lá sɩ́ɛ́ ka ɛ́ sabɩɩna, a la sɩ́ɛ́ tʋŋ má.
11 Ɩ́ tʋŋ ɛ́ mʋ́l néé mí, a kaa mʋ́ gírsi, arɩ́ óŋ ná wuu ɩ́ há kené.
Kajáŋa ná ɩ́ há kené púl ɛ́ wɩ́ɩ́, ɩ́ ka ɛ́ kajáŋa tʋ́mʋ́ mʋ́ gírsi.
12 Rɩɩ pí óŋ, a wúólí sɩɛrʋ ká pii pá Wɩɩsɛ, Wɩɩsɛ néí zilé.
Ʋʋ́ bélí há kéŋ óŋ ná nɛ́, ʋ wɩ́ɩ́ há wɩ óŋ ná kené bel.
13 Ʋ to anɛ ɓa sɩ́ɩ́wa pá nɩɛ náŋa rɩ́wɔ́ nɩ́ná wér, ká rɩ́ɩ́wa nɛ́ bɩrnɩ́ná wɩɩla.
Amá ʋ ká, rɩ́ kaamɔnáŋá nɛ́ mɩŋ.
14 Ɩ́ zaa kéŋ ɓɩɛ, ɩ́ lɩ́sɛ sáŋ nɩɛ ná há mákɛ́ aá gúl mí, a makɛ rɩɩ́wa má cíé kúó mákɛ aá gúl, kɔ́wɔ́ ka, rɩ́wɔ́ má sáŋɩ́wa mɛ́.
Ɛ́ nɛ́ rɩ́ kaamɔnáŋá mɩŋ.
15 Ʋ ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ.
Ɓa sɛ́:
«Nɛrɔ ná há kúré pá kɩ́ŋkáŋ, ʋ wɩ kené kɩ́llɛ, ká nɛrɔ ná há kúré pá mʋ́ɔ́, ʋ má wɩ jɛ́ɛ́ aá gúl.»
Tiiti rɩ́ nɩɛ náŋa mʋ́ Kɔrɛŋtɛ
16 Wɩɩsɛ bárka, ʋ há ɛ́ɛ́ Tiiti cóllíwa mɛ́ sáŋɛ, anɛ á má há cóíwa mɛ́ sáŋɛ ɛ́.
17 Á há tʋ́mʋ́ ɩ́ rɩ́, ʋ sáŋɔ́; ɩ dɩhɩ̃́ koe kajáŋa fa mɩ́nʋ́ sɩɛrʋ fól wuu rí.
18 Á tʋ́ŋrá maábinɔ́ŋɔ oro má, rʋ́ʋ́ rɩ́ Tiiti hé náŋá ko.
Ɛ́ báálɔ bʋ́l Labaarɩwero wɩ́ɛ́, wɩcʋɔla púlli nɩɛ wuu bɩ́bʋ́ mɛ́.
19 Wɩ́ɩ́ ná nɔ́ŋɔ há tɛ á tʋ́mʋ́, ʋ nɛ́ ká báálɔ ná ɓa há lɩ́sɛ́ hérá har, ráá rɩ́rʋ́ wuu ka sáŋɛ ná mʋ́ pá nɩɛ.
Ráá tʋŋ tʋtʋ́ŋwero ná háá píŋsi Nyuutɩna, kaá máŋsɩ́rá má cólle.
20 Kɩɛsɔ́ ná zénó, ká á waá ja rɩ́ hagaasɛ mɩŋ ráŋ, ɛ́ nɛ́ tɛ, á a ɛ́.
21 Áá járá tʋŋ tʋtʋmɩ́ ná há sɩ́ a wérí Nyuutɩna Wɩɩsɛ sɩ́ɛ́ mɛ́, arɩ́ nɩbííne wuu sɩ́ɛ́ mɛ́ nɛ́.
22 Á maábinɔ́ŋ oro má rɛ́ á tʋŋ, ʋ súúríwó mí ɓaá ko.
Á kɩ́ɛ́lʋ́, wɩ́ɛ́ ɓɩkana mɛ́, ʋ kéŋ kajáŋa wérí.
Ká mʋ́l néé mí, ʋ kajáŋa ɔ́sɔ́ súúri, bee wɩ́ɛ́ ʋ keníwa yardá kɩ́ŋkáŋ.
23 Tiiti é káŋ tʋtʋ́nnʋ́nɔ́ŋ rɛ́, ŋ rɩ́rʋ́ wuu tʋŋ aá pɛ́ɩ́wa.
Maábináŋa ná há tɩ́ŋʋ́ mɛ́, wɩcʋɔla púlli nɩɛ nɛ́ tʋ́ŋwɔ́, ɓa tʋŋ aá píŋsi Kirisi.
24 Ɩ́ sɩɛ́ cóllíwó, a a, a makɛ rɩ́ wɩcʋɔla púlli nɩɛ ná, a zɩŋ ráá há tɩ́ŋɩ́wa wɩ́ɛ́ aá nyʋ́kɛ ɛ́, á kéŋ taŋá.