7
1 Ŋ nɩcólle, Wɩɩsɛ sɩɛ́ há tá nʋɔ bʋlʋ́ sɩ́ a wɩ́ɛ́ nyáŋ wuu párá, á lɩ́sɩ́rá tɛnnɛ rɩ́rá dʋŋsɛ, busunnu duó wuu mí, a a sapʋmmɔ tɩ́náwa, aá zíl Wɩɩsɛ.
Pool satɔ́ɔ́rwɩ́ɩ́
2 Ɩ́ wúólíwa sɩɛnnɛ párá.
Á wɩ nɛ́ŋ wɩ́ɩ́ zɔ́kɛ́, á wɩ nɛ́ŋ nyúú zɔ́kɛ́, á wɩ nɛ́ŋ vɩ́rɛ́.
3 Ŋ sɩɛ́ wɩ nyɛ bʋ́lɛ́, aá ja rɩ́ŋ bʋlɩ́wa zɔ́kɛ́ wɩ́ɩ́ nɛ́.
Ŋ lá sɩ́ɛ́ bʋ́lɩ́wa rɩ́ bʋlɛ́:
«Á cóíwa, ɩ́ wɩ́ɛ́ mɩ́ŋrá sɩɛnnɛ; ɛ́ nɛ́ tɛ, raá wómmó, á rɩ́rɩ́wa nɛ́; raá báá sʋ́sɔ́ má, á rɩ́rɩ́wa nɛ́.»
4 Ŋ keníwa yɩɛla wérí, a tɩ́ŋɩ́wa wɩ́ɛ́ aá nyʋ́kɛ.
Á wɩɩla wuu sɩɛrʋ, nayʋɔrɔ́ tóŋ mí, satɔrɔ́ nɛ́ mɩ́nɩ́ŋ mɛ́ kɩ́ŋkáŋ.
5 Á há kúé zʋ Masɩdʋanɛ* dɩtɩ́llɛ má tɩɩ, á wɩ fɩɛla néé.
Á taŋa ná wɩhála rɩ́rʋ́ duó wuu ní; nɩɛ cɩ́ŋrá mɛ́, ká héwíŋ má mɩ́ŋrá sɩɛnnɛ.
6 Amá Wɩɩsɛ nɛ́ háá dúóri nɩɛ ná naasɛ há yʋ́ɔ́rɛ́, ʋ nɛ́ dúórírá naasɛ, a tɩŋ Tiiti rɛɛ́ koe mí.
7 Ʋ rɛɛ́ koe ná má dʋŋɔ wɩ́ɛ́ rá sɩɛ́; ʋ há césí wɩ́ɛ́ ná párá nɛ́ ɔ́sɛ́ dúórírá naasɛ.
Ʋ sɩ́ɩ́wa kenú wérí, a dúórú naasɛ.
Ʋ sɩ́ɩ́waá hɩ́ɛ̃́nɩ́ŋ bɩrnéé wérí.
Ʋ máŋsɩ́wa sazɔkɔ́ má mʋɔsɔ párá, arɩ́ ɛ́ ná, ɩ́ há keníŋ wɩ́ɛ́.
Ɛ́ wɩ́ɛ́ nɛ́, ŋ sɩɛrʋ ɔsɛ tɔrɛ kɩ́ŋkáŋ.
8 Ŋ kɛnɔ ná nɔ́ŋɔ ŋ há pɛ́ɩ́wa, ʋ ná wɩ́ɛ́ ŋ há bʋ́lɛ́, ʋ zɔ́kɩ́wa sɩɛnnɛ rɛ́, amá ŋ wɩ fa'ɩ́ɔ̃́ bʋl.
Rɩŋ fa bʋ́l fa'ɩ́ɔ̃́ má, ɩ́ sazɔkɔ́ ná há wɩ dáánɛ́ wɩ́ɛ́ nɛ́.
9 Amá mʋ́l néé mí, ŋ sɩɛrʋ tɔ́rɔ́ rɛ́.
Ɩ́ sazɔkɔ́ ná wɩ́ɛ́ rá sɩɛ́ ŋ sɩɛrʋ tɔrɛ.
Amá ɩ́ há ɩ́ɔ̃́ zɩŋ rɩ́ɩ́wa á bɔ́ŋbɔ́ŋ, ɩ́ sɩɛnnɛ zɔkɛ, ɩ́ bɩ́rsɛ a ló Wɩɩsɛ mɛ́ aa zɔkɛ́, ʋ nɛ́ káŋ satɔrɔ́.
Wɩɩsɛ cólle sɩɛrʋ nɛ́ sɩɛ́, ɩ́ sɩɛnnɛ zɔkɛ ɛ́, ɛ́ nɛ́ tɛ, á wɩ wɩ́tɔk wuu píé ɛ́ɩ́wa mɛ́.
10 Rɩ nɛrɔ sɩɛrʋ zɔ́kɔ́ Wɩɩsɛ cólle mí, ɛ́ sɩ́ a rʋ́ʋ́ bɩ́rsɛ, rɩ́ Wɩɩsɛ lɔ́ʋ́ tá, ʋ wɩ fa'ɩ́ɔ̃́ bʋl.
Ká rɩ nɛrɔ sɩɛrʋ zɔ́kɔ́, anɛ dúníé nɩɛ sɩɛnnɛ háá zɔkɛ ɛ́, ʋ ɛ́ kéŋ tɩ́na aá zʋ sʋʋ sɩɛrʋ nɛ́.
11 Ɩ́ sazɔkɔ́ ná ká Wɩɩsɛ cólle ní.
Ɩ́ sɩɛ́ nóú há ɛ́ɛ́, ɩ́ nɛ ɛ́:
Ɩ́ zaa bíéró, wɩ́ɛ́ ɔsɛ́ mɛ́, a bʋl la taŋá aá pɛ́ɩ́wa tɩɩ.
Ɩ́ ɛ̃ wɩ́bɔmɔ sazɔkɔ́, aá fá wɩ́bɔmɔ ɛɛ; ɩ́ kéŋ kajáŋa, a cólli wɩ́bɔŋ'aarɔ tʋrɛ́, ká cóllíŋ má néé.
Ɩ́ á wɩ́ɛ́ wuu, a makɛ rɩ́wɔ́ zɩŋ rɩ́ɩ́wa wɩ wɩ́ɩ́ wuu zɔ́kɛ́.
12 Ŋ sɩɛ́ há pʋ́ŋsɛ kɛnɔ ná pɛ́ɩ́wa, nɛrɔ ná há á wɩ́ɩ́ zɔkɛ wɩ́ɛ́ rá, nɛrɔ ná ɓa há ɛ́ɛ́ zɔ́kʋ́ mɛ́, má wɩ́ɛ́ rá; ŋ taŋa pʋ́ŋsɔ́ aá ja rɩ́ɩ́wa zɩ́mɩ́wa há córá mɔ ɛ́ nɛ́, Wɩɩsɛ sɩ́ɛ́ mɛ́.
13 Ɛ́ nɛ́ dúórírá naasɛ.
Wɩ́ɩ́ ná sɩɛ́ há ɔ́sɛ́ tɔ́rɩ́rá sɩɛnnɛ nɛ́ ká, ɩ́ wuu há ɛ́ɛ́ Tiiti sɩɛrʋ tɔrɛ, ʋ nyúú nyaasɛ.
14 Ŋ bʋ́lɩ́wa wɩ́ɛ́ pɔ́ʋ́ káá nyʋ́kɛ nɛ́, hɩɩ̃sɛ wɩ́ŋ kené.
Taŋá ná á há bʋ́lɛ́ pɛ́ɩ́wa, a bɩ́ɩ́wa mɛ́ ɛ́, Tiiti sɩ́ɛ́ mɛ́, ɓa wuu taŋá nyɩ́ɩ́sɔ́.
15 Ʋ há kúé, ɩ́ cákɔ́ lɔ́ʋ́ wérí, aá zílú, aá zɛ́sʋ́ mɛ́, ʋ ná rɩɩ́wa có wɩ́ɛ́ saŋɛ́.
Ɛ́ nɛ́ tɛ, ʋ ɔsɛ cóllíwa kɩ́ŋkáŋ.
16 Ŋ sɩɛrʋ tɔ́rɔ́, ŋ há wóíwa nyúú aá gieli wɩ́ɩ́ wuu mí.