6
1 Á rɩ́ Kirisi ní sɩɛ́ tʋmɛ́, ɛ́ nɛ́ a sʋ́sʋ́lɩ́wa, ɩ́ sɩ́ ló rí Wɩɩsɛ zilé ná ʋ ha díé pɛ́ɩ́wa tá yɔ́ɔ́.
2 Wɩɩsɛ tɩɩ bʋ́lʋ́ kɛnɔ sɩɛrʋ bʋlɛ́:
«Tɛ́ŋ ná mɛ́, ŋ há có rɩŋ á wérí pá nɩbííne há péré,
ŋ zésí sʋlɛ́.
Nɩɛ laatɛ́ tɔ́ɔ́ há pʋ́lɛ́, ŋ fɛ́ɩ́ búŋse.»
Mʋ́l néé mí ní sɩ́ɛ́ ká tɛ́ŋ ná, Wɩɩsɛ há có rʋʋ á wérí párá, mʋ́l néé mí ní ká laatɛ́ kal.
3 Á waá ja ráá tʋtʋmɛ́ yɩtɔk yɩ́rɛ, ɛ́ nɛ́ tɛ, á waá ja ráá a wɩ́ɩ́ wuu rʋ́ʋ́ a nagbámɔ wɩ́ɩ́, nɛ́ŋ ŋmɛ́nɔ mɛ́.
4 Á taŋá árá wɩ́ɛ́ wuu, aá ja rɩ́ nɩɛ zɩŋ ráá ká Wɩɩsɛ tʋtʋnna nɛ́.
Ɛ́ nɛ́ wɩɩla wɩ́rá mɛ́, ká á nyammɛ.
Sazɔkɔ́ rɩ́ wɩhálwɩ́ɛ́ wuu pérírá, á nyammɛ.
5 Ɓa ŋmásɩ́rá, a kɛ́sɩ́rá tɔ́ bɩnajaa, a yiki nɩɛ hérá mɛ́.
Á tʋ́ŋ tʋtʋ́ŋduoru, á wɩ dóŋ néé aá pɛ́, a wɩ ɓɩdííle má néé aá dí.
6 Á kéŋrá tɩɩ anɛ Wɩɩsɛ tʋtʋnna nɛ́, a wɩ lóé busunnu ɓákrá; á ɛ̃ wɩ́ɛ́, á kéŋ nyamma, a ka sawér; Wɩɩsɛ Sabɩɩna mɩ́ŋrá mɛ́, á có nɩɛ rɩ́ taŋá.
7 Wɩɩsɛ párá dóé, á bʋ́lʋ́ wɩ́táŋsɛ aá pá nɩɛ.
Á ká tékétékéwa, Wɩɩsɛ sɩ́ɛ́ mɛ́.
Tékétéké ná nɛ́ sɩɛ́ kárá lalyóórí'omo, á kaá yo dɩŋdɔmɔ, ká kaá pɔ́rá tɩɩ mɛ́.
8 Nɩɛ náŋá búrá, ká náŋa má hɩ́hɩ́ɩ̃́sɩ́rá; náŋa bɩ́bɩ́rá mɛ́, ká náŋa má tʋ́tʋ́ksɩ́rá.
Ɓa pírá makɛ nyɛtɩ́ɩ́ná, ká taŋá nɛ́ á bʋ́bʋl;
9 ɓaá bélrá anɛ ɓa wɩ́rá ɛ̃, ká ɓa wuu ní ɩ̃́rá; ɓaá bélrá anɛ á cɩ́ sʋʋ mɛ́, ká á a nɩwómmé, ɓaá bélrá anɛ nɩbɛŋsɛ́, ká á wɩ sʋ́sɛ́.
10 Ɓaá aa zɔ́krá sɩɛnnɛ, ká á jɩ́jʋɔsɛ kál wuu.
Á nɩhɩ̃́ summe ní, ká a nɩɛ ɓɩkana dí kuorí; anɛ wɩ'óŋkenéwa, ká nɛ́ tɩ́llɛ onni wuu.
11 Kɔrɛŋtɛ tɩ́náwa, á cáásɔ́ bʋl taŋá pɛ́ɩ́wa, á wúrírá sɩɛnnɛ má wuu pɛ́ɩ́wa.
12 Á dé wúólírá sɩɛnnɛ wuu ní cáásɩ́wa, ká ɩ́ é wɩ́ɩ́wa sɩɛnnɛ wúré cáásɩ́rá.
13 Ŋŋ́ bʋ́lɩ́wa rɩ́ nɛ́, anɛ ŋ bɛ́lɛ́:
Ɩ́ má wúólíwa sɩɛnnɛ párá!
Bíno rɩ́ pʋmmɔ wɩ náŋá hé
14 Ɩ́ sɩ́ ló rɩ́ɩ́wa rɩ́ nɩɛ ná há wɩ Zeezi lɛ́ɛ́ dí, suki cɩ́ɩ́nɛ cɩka.
Nɛrɔ ná há ká tékétéké, rɩ́ nɛrɔ ná há to tékétéké wɩ náŋá wuó hé?
Pʋmmɔ é rí bíno sɩ́ wólli hé náŋá mɛ́?
15 Kirisi rɩ́ Sɩtaanɛ sɩ́ tʋŋ nʋɔ mɛ́?
Nɛrɔ ná há lá Zeezi dí, arɩ́ nɛrɔ ná há wʋ́ʋ́ lɛ́ɛ́ dí, ɓa tʋ́ŋ beé mí?
16 Wɩcʋɔlɩjɩzeno* rɩ́ venni sɩ́ cɛ́rɛ́?
Á nɛ́ sɩɛ́ ká Wɩɩsɛ ná há wómmó jaa, anɛ ɛ́ Wɩɩsɛ tɩɩ há bʋ́lɛ́, ʋ sɛ́:
«Ŋ sɩ́ zʋʋ mɩ́ŋwɔ́ sɩ́sɩ́ɛ́nnʋ́wa aá va.
Ŋ sɩ́ ɔ́wɔ́ Wɩɩsɛ, ká rɩ́wɔ́ má áŋ nɩ́ɛ́.»
17 Ɛ́ nɛ́ tɛ́ Nyuutɩna Wɩɩsɛ sɛ́:
«Ɩ́ lɛ ɛ́ nɩɛ sɩɛrʋ, a ɛ́ɩ́wa dʋŋɔ.
Ɩ́ sɩ́ busunnu óŋ wuu mí tɩ́kʋ́.
Rɩɩ́wa á ɛ́, ká kóŋ rɩ́, ŋ sɩ́ caklɛ́ɩ́wa.
18 Ŋ sɩ́ ɛ́ɩ́wa Ana,
ká rɩ́ɩ́wa má áŋ heŋbólli rɩ́rɩ́ŋ tolé.»
Dóé wuu tɩ́na Wɩɩsɛ nɛ́ sɛ́.