Wɩɩsɛ Sabɩɩna há pí dóé ná aá ɓa nɩɛ
12
1 Ŋ maábináŋa, ɩ́ lo rɩ́ŋ sɩɛ́ baa bʋl Wɩɩsɛ Sabɩɩna há pí dóé ná, a ɓaá pá nɩɛ wɩ́ɛ́ pɛ́ɩ́wa.
Ŋ waá ja rɩ́ɩ́wa sɩ́ ɛ́ wɩ́ɛ́ zɩ́mʋ́.
2 Ɩ́ ɩ́ɔ̃́ zɩŋ rɩ́ tɛ́ŋ ná mɛ́ ɩ́ fa há wɩ Wɩɩsɛ cʋɔlɛ, Sɩtaanɛ nɛ́ fa tɩ́ɩ́wa, a yíkíwa hé venni ná há wɩ wɩ́ɛ́ bʋl cʋɔlɛ́ mɛ́.
3 Ɛ́ nɛ́ tɛ, ŋ có rɩ́ɩ́wa zɩŋ rɩ́, rɩ nɛ́ŋ kéŋ Wɩɩsɛ Sabɩɩna dóé, ʋ waá sáŋ bʋlɛ́:
«Wɩɩsɛ zɔkɛ Zeezi!»
Ká nɛ́ŋ má báá wɩ wo rʋ́ʋ́ bʋlɛ́:
«Zeezi ní ká Nyuutɩna!»
Rɩ Wɩɩsɛ Sabɩɩna dóé mí rá.
4 Sabɩɩna balá nɛ́, ká pi dóé bámmá bámmáwa aá pá nɩɛ.
5 Nyuutɩna Zeezi tʋŋ pɛ́ɩ́wa duo káŋ, amá Nyuutɩna Zeezi balá nɛ́ ɓa wuu tʋŋ aá pá.
6 Wɩɩsɛ tʋmɛ́ ŋmɛ́ŋsɛ káŋ, amá Wɩɩsɛ balá léŋ ní tɩ́ŋ nɩɛ wuu mí, aá tʋ́ŋwɔ́ wuu.
7 Ká, Sabɩɩna dóé ná ʋ há píé aá pá nɩɛ, ʋ píó aá pá náŋá sáŋɛ wɩ́ɛ́ nɛ́.
8 Ɛ́ nɛ́ tɛ, ʋʋ́ pá nɔ́ŋɔ dóé, ʋ ka wɩ́zɩmɛ aá bʋl wɩ́ɛ́; ká pá nɔ́ŋɔ má dóé, ʋ zɩŋ Wɩɩsɛ wɩ́ɛ́ mʋ́ʋ́la lɩ́sɛ, Sabɩɩna ná balá nɛ́.
9 Ʋʋ́ pi yardá ná há kɔ́ʋ́ dʋŋɔ, a pá nɔ́ŋɔ, a pi pʋɔllɛ dúóre pá nɔ́ŋɔ má; ɛ́ Sabɩɩna balá.
10 Ʋʋ́ pá nɔ́ŋɔ dóé, ʋ tʋ́tʋŋ wɩ́nyáŋsɛ; nɔ́ŋɔ nɩ́nɛ Wɩɩsɛ liŋó, a laa bʋl aá pá nɩɛ; nɔ́ŋɔ wólli sabɩŋtɩɛnnɛ rɩ́ Wɩɩsɛ Sabɩɩna zɩŋ aá caksɛ; nɔ́ŋɔ bʋ́bʋl Wɩɩsɛ wɩ́ɛ́, liŋó ná ʋ há wɩ máŋsɛ́ mɛ́; nɔ́ŋɔ má nɩ́nɛ ɛ́ wɩ́ɛ́, a lɩ́sɩ́wɔ́ mʋ́ʋ́la aá pá nɩɛ.
11 Sabɩɩna ná balá tɩɩ nɩ́ɩ́ tʋŋ ɛ́ wɩ́ɛ́ wuu; ʋ há có dóé ná nɛ́, ʋ pi aá pá nɛrɔ ná ʋ há có.
Tɛŋ balá, ká naŋdaasɛ ɓɩkáná
12 Nɩbííno tɛŋ ká balá rɛ́, ká ka naŋdaasɛ ɓɩkáná.
Naŋdaasɛ kánɔ́ ɛ́ nɛ́, ká hé náŋá mɛ́ a a tɛŋ balá.
Kirisi sɩɛ́ nɩhɩ̃́ ɛ́ nɛ́.
13 Á wuu há lá Zeezi dí, á nɩhɩ̃́ ɛ́ nɛ́.
Á kánɔ́, ká hé náŋá mɛ́ a bɩrmɛ nɛ́ŋ balá.
Zuwifiwa* rɩ́ nɩɛ ná há to Zuwifiwa, yósi arɩ́ ɓa ná há to yósi wuu, Sabɩɩna ná balá sɩɛrʋ nɛ́ á wuu muŋsi; á wuu lɔ́ʋ́ balá nɛ́ hérá sɩɛnnɛ.
14 Nɩbííno tɛŋ naŋdaasɛ to óŋ balá, ɓa kánɔ́ rɛ́.
15 Rɩ naa ísó bʋlɛ́:
«Ŋ há to nɛ́sɛ, ŋ to nɩbííno tɛŋ naŋdáá.»
Ɛ́ bʋlɛ́ wúóló aá a rʋ́ʋ́ sɩ́ nɩbííno tɛŋ naŋdaa á?
16 Rɩ dɩllɛ má ísó bʋlɛ́:
«Ŋ to sɩ́ɩ́, ɛ́ wɩ́ɛ́ ŋ to nɩbííno tɛŋ cɔɔ́.»
Ɛ́ bʋlɛ́ sɩ́ wólli a rʋ́ʋ́ lɛ nɩbííno tɛŋ cɔrʋ sɩɛrʋ?
17 Rɩ nɩbííno tɛŋ wuu ní ká sɩ́ɩ́, ʋ wo wɩ́ɛ́ aá nɛ?
Rʋʋ wuu sɩɛ́ báá ká dɩllɛ é, ʋ wo sɔ́ŋ aá nɛ?
18 Ʋ ká ɛ́ nɛ́, Wɩɩsɛ á nɩbííno rɩ́rʋ́ naŋdaasɛ, ɛ́ ná ʋ há có ní; oro wuu rɩ́rʋ́ tʋtʋmɩ́.
19 Rɩ nɩbííno wuu fa ká naŋdáá balá, ŋ́ nóú tɛŋ dɩhɩ̃́?
20 Ʋ ká ɛ́ nɛ́, naŋdaasɛ kánɔ́ rɛ́, ká wuu cɔ́ náŋá mɛ́, a a tɛŋ balá.
21 Ɛ́ wɩ́ɛ́ sɩɛ́, sɩ́ɩ́ wɩ wo rʋ́ʋ́ bʋlʋ́ wɩ nɛ́sɛ́ ja; nyúú má wɩ wo rʋ́ʋ́ bʋlʋ́ wɩ naasɛ́ ja.
22 Ɛ́ wɩ wuó a; rɩ nɩbííno tɛŋ cɔwɩɛla ná má tɩɩ há wɩ dóé kené ní tóú mí, ʋ wɩ wér ná;
23 ká tɛŋ cɔrʋ ná á háá guoné ní, á bɩrɛ aá bú kɩ́ŋkáŋ.
Ɛ́ nɛ́ tɛŋ cɔrʋ ná há féŋsé, ɓa wʋ́ɔ́ wɩ́ɛ́ bʋl, ɓa mɛ́ nɛ́ á bɩrɛ aá bel wérí.
24 Ká ɓa ná há wɩ féŋsé, ɓa wɩ belé ja.
Wɩɩsɛ ɔ́ɔ́ nɩbííno tɛŋ naŋdaasɛ cɔ́ náŋá mɛ́ ɛ́, rʋ́ʋ́ búbúwó ná má ɓa há waá bú, a kɩ́llɛ náŋa,
25 a makɛ rɩ́ cakɔ́ sɩ́wɔ́ pɛ́kɛ zʋ́, ká rɩ́wɔ́ wuu tʋŋ pɩ́pá náŋá.
26 Rɩ nɩbííno cɔbalá nɩ́ɩ́ ná wɩɩla, ʋ cɔrʋ ná náŋa má wuú tɩŋ aá ná wɩɩla nɛ́; rɩ cɔbalá mɛ́ nɛ́ rɩ́wɔ́ bɩ́bɛ, náŋa ná má wuú tɩŋ aá jʋɔsɛ nɛ́.
27 Ɩ́ wuu ká Kirisi tɛŋ nɛ́, oro wuu kɔ́ʋ́ tɛŋ cɔɔ́ rɛ́.
28 Ká wɩcʋɔla púl mí, Wɩɩsɛ bíl nɩɛ rɩ́wɔ́ tʋ́tʋ́mʋ́ tʋtʋmɛ́.
Ʋ lá sɩ́ɛ́ bil Zeezi nɩtʋmɛ́ nɛ́, bʋllɛ mɛ́, Wɩɩsɛ wɩ́laabʋlla nɛ́ tʋ́kɛ́, botoro mí, Wɩɩsɛ kɛŋzɩnna nɛ́ tʋ́kɛ́; ká baa pá nɩɛ náŋa dóé ɓaá tʋŋ wɩ́nyáŋsɛ, náŋa dúdúóri pʋɔllɛ, náŋa mɩŋ aá pɛ́ nɩɛ mɛ́, náŋa mɩŋ a a sɩ́láárá, aá bel nɩɛ mɛ́, ká náŋa má mɩŋ aá bʋl Wɩɩsɛ wɩ́ɛ́, líŋsi ná ɓa há wʋ́ɔ́ máŋsɛ́ mɛ́.
29 Ɩ́ nɩɩ mɛ́, ɓa wuu ní ká Zeezi nɩtʋmɛ́?
Ɓa wuu ní ká Wɩɩsɛ wɩ́laabʋlla?
Ɓa wuu ní ká Wɩɩsɛ kɛŋzɩnna?
Ɓa wuu ní sɩɛ́ tʋŋ wɩ́nyáŋsɛ é?
30 Ɓa wuu níí dúóri nɩɛ?
Ɓa wuu níí bʋl wɩ́ɛ́ líŋhuonni* ná ɓa há wʋ́ɔ́ máŋsɛ́ mɛ́?
Ɓa wuu ní sɩɛ́ lɩ́sɛ líŋsi ná ɓa há wʋ́ɔ́ máŋsɛ́ wɩ́ɛ́ mʋ́ʋ́la, aá pá nɩɛ?
Aɩ́.
31 Ɛ́ wɩ́ɛ́, ɩ́ fɛ́l sɩ́ɩ́ ja Wɩɩsɛ Sabɩɩna pállɛ ná há kɛ náŋa wuu.
Ŋ sɩɛ́ báá ha sɩ́ mákɩ́wa ŋmɛ́nɔ ná, há weri ŋmɛ́ŋsɛ wuu, rɩ́ɩ́wa tɩŋ.