Cólle kɩ wɩ́ɩ́ wuu
13
1 Rɩŋ nɛ́ wo nɩbííne líŋsi wuu aá bʋl, a wólli malɩ́kawa má líŋsi aá bʋl, ká wɩ cólle kené, ʋ ɛ́ ká kɔyɔ́ɔ́wa nɛ́ ŋ kʋ́kɔ, anɛ bɩ́ŋbɩlɩ́ ɓa háá ŋmɔwɛ́, ɛ́ rá má kuléŋléŋ háá dɔ́mɛ́.
2 Rɩ Wɩɩsɛ Sabɩɩna dóé ní mɩ́nɩ́ŋ mɛ́, rɩ́ŋ wólli Wɩɩsɛ wɩ́ɛ́ laa bʋl aá pá nɩɛ, a ka wɩ́zɩmɛ wuu, a zɩŋ Wɩɩsɛ wɩ́féŋse mʋ́ʋ́la, rɩŋ yardá má nɛ́ zené, rɩ́ŋ wólli kaá giri pallɛ, ká rɩŋ nɛ́ wɩ cólle kené, ŋ to óŋ wuu.
3 Rɩŋ ɓɩɛ wuu ní rɩ́ŋ pii ɓa summe, rɩŋ tɩɩ má nɛ́ rɩ́ŋ ló rɩ́wɔ́ kaa hé níŋ mí, ká rɩŋ wɩ cólle kené, ʋ wɩ nyʋɔrɛ́ wuu kené.
4 Cólle tɩ́na kéŋ nyamma, ʋ kéŋ sawér, cólle tɩ́na wɩ sagʋʋmɔ́ kené; cólle tɩ́na wʋ́ʋ́ tɩɩ makɛ, ʋ wɩ nyʋkwɩ́ɛ́ a,
5 ʋ wɩ hɩ̃wɩ́ɛ́ a, ʋ wʋ́ʋ́ dʋŋɔ wérí ja, ʋ wɩ cɔwɩɩlɔ́ dí, rɩ nɛ́ŋ ɔ́ʋ́ bɔ́ŋbɔ́ŋ, ʋ wɩ píé aá bílú sɩɛrʋ.
6 Ʋ wɩ bɔ́ŋbɔ́ŋ bélé aá jʋɔsɛ, amá ʋʋ́ jʋɔsɛ taŋá sɩɛrʋ nɛ́.
7 Cólle tɩ́na kéŋ nyamma wɩ́ɛ́ wuu mí ní; ʋ lá wɩ́ɛ́ wuu ní aá dí, ʋ kéŋ yɩɛla wɩ́ɛ́ wuu mí, ʋ kéŋ baŋcɩla wɩ́ɛ́ wuu mí.
8 Cólle waá tenni.
Wɩɩsɛ wɩ́ɛ́ laa bʋlɛ́ sɩ́ tenni, líŋhuonni* bʋlɛ́ sɩ́ toki, wɩ́ɛ́ zɩmɛ́ sɩ́ tenni.
9 Á wɩ́zɩmɛ ká kɩɛsʋ́, á Wɩɩsɛ wɩ́ɛ́ laa bʋlɛ́ má kɩɛsʋ́;
10 amá rʋʋ ná há césé ní kúé, ʋ ná há ká kɩɛsʋ́ sɩ́ nyɩ́ɩ́kɛ.
11 Ŋ fa há ká heŋbíé, ŋŋ́ bʋl heŋbiwɩ́ɛ́ nɛ́, aá bɩɩnɛ wɩ́ɛ́ anɛ heŋbie, aá kɩ́ɛ́lɛ wɩ́ɛ́ anɛ heŋbie; ŋ zaa há wɛ́ɛ́ tenni, ŋ tá heŋbiwɩ́ɛ́ ná wuu ní.
12 Zaa, áá ná wɩ́ɛ́ wuu anɛ cúŋsi ní, anɛ nɛrɔ há múúlí nyiiló mí a nówó.
Amá cíé kal, á sɩ́ ná wɩ́ɛ́ wuu nyaamɩ́.
Ŋ zaa ɛ̃ wɩ́ɛ́ wuu kɩɛsʋ́ kɩɛsʋ́ rɛ́, amá ŋ cíé sɩ́ ko zɩ́ŋwɔ́ wuu ɓɩlɩ́ɩ́, anɛ Wɩɩsɛ há ɩ́ŋ ɛ́.
13 Nyɛ mɛ́ sɩɛ́, onni botoro rí mɩnɛ́ a waá daarɛ; ɓa nɛ́ ká:
yardá, yɩɛla arɩ́ cólle; amá ɓa wuu sɩɛrʋ, cólle ní kɩ́ɛ́.