Ɩ́ sɩ́ venni ɓáárʋ́
10
1 Maábináŋa, á naabálwa die há tɩ́ŋ Moyizi mí aá va, wɩ́ɛ́ ná pérwó, ɩ́ píwó aá líísíwa tɩɩ.
Wɩɩsɛ ɔ́ɔ́ duóbána* tuwi cúllíwó mí, ɓa wuu zʋ mʋfɩɛmɔ* mʋ́ lɛ.
2 Mʋfɩɛmɔ ná zʋʋ lɩɩ, rɩ́ duóbána ná sɩɛrʋ valɛ́, nɩhɩ̃́ nyimuŋsi* rí, Moyizi múŋsíwó.
3 Ɓa wuu ní dí ɓɩdííli ná Wɩɩsɛ há tɛ́ɛ́, ʋ lɛ bána rɩ́ tuwi pɔ́wɔ́,
4 a wuu nyɔ nyii ná há lɛ́ Wɩɩsɛ rɩ́; bee wɩ́ɛ́ bʋ́ɩ́* oro fa tɩ́ŋwɔ́ mɛ́, a bul nyii pɔ́wɔ́ ɓaá nyɔ; ɛ́ bʋ́ɩ́ nɛ́ ká Kirisi.
5 Amá ɓa dɩkáŋ nɛ́ wɩ ɛ́ɛ́ tɔrɛ Wɩɩsɛ sɩɛrʋ, ɛ́ nɛ́ tɛ ɓa sʋsɛ ɓɛ́sɛ, gɩrbétéke sɩɛrʋ.
6 Ɛ́ wɩ́ɛ́ wuu sɩɛ́ ká cáánɛ́ rɛ́ a párá, ráá sɩ́ sabɩŋtɩɛnɛ kánʋ́, anɛ ɓa fa há kéŋwó ɛ́.
7 Ɩ́ sɩ́ venni ɓáárʋ́, anɛ ɓa náŋa há tʋ́ŋ ɛ́; ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
«Jamáŋ kúó ciki rɩ́wɔ́ dí ɓɩɛ,
a nyɔ sɩ́ŋ, ká sɩɛ́ isi aá gɔ gʋɔla.»
8 Á sɩ́ nɩlaŋwɩ́ɛ́ á, anɛ ɓa náŋa há tʋ́ŋ ɛ́, ɓa nɩɛ bʋ́ɩ́ mɛrɛ́ rɩ́ botoro sʋsɛ tápʋ́l balá.
9 Á sɩ́ Nyuutɩna díŋú, anɛ ɓa náŋá há á ɛ́, dʋma ɓíésíwó ɓʋ́ʋ́sɛ.
10 Ɩ́ sɩ́ wɩ́ɛ́ ŋmúrmú, anɛ ɓa náŋa há ŋmúrmí wɩ́ɛ́ ɛ́, Wɩɩsɛ tʋ́mʋ́ malɩ́ka* ʋ ko ɓʋ́ʋ́sɩ́wɔ́.
11 Wɩ́ɛ́ ná wuu há tʋ́ŋwɔ́ mɛ́ ká cáánɛ́ rɛ́, Wɩɩsɛ pii mákwɔ́.
Ɓa pʋ́ŋsɩ́wɔ́ hé Wɩɩsɛ Kɛnɔ mɛ́, rɩ́wɔ́ pii mákrá nɛ́.
Á mɩŋ dúníé isé hatɩ́ŋnɩ́tápʋlɛ sɩɛrʋ nɛ́.
12 Ɛ́ wɩ́ɛ́ sɩɛ́, nɛrɔ ná wuu há bɩ́ɩ́nɛ́ rʋʋ cɩ́ wérí rí, ʋ́ʋ́ pɔ́ wérí, rʋ́ʋ́ sɩ́ túwí ɓal.
13 Díŋe ná wuu háá díŋíwa, ɓa tɩɩ nʋ́ʋ́ nɛ́ Sɩtaanɛ pi aá díŋ dúníé nɩbííne wuu.
Wɩɩsɛ ká tékétéké, ʋ waá sáŋ lo rí díŋe kɩ́llɩ́wa dóé.
Amá rɩ wálmɛ kúó péríwa, Wɩɩsɛ sɩ́ pɛ́ɩ́wa dóé rɩ́ɩ́wa wólli.
Ʋ nɩ́ɩ́ makɛ ŋmɛ́nɔ rɩ́ɩ́ pɛ́ɩ́wa, rɩ́ɩ́wa lú lɛ.
14 Ɛ́ wɩ́ɛ́, naŋnɔ́ŋcólle, ɩ́ lɩ́sɩ́wa tɩɩ venni ɓaarɛ́ mɛ́.
15 Ŋ ɩ́ɔ̃́ rɩ́ɩ́waá nɛ wɩ́ɛ́ mʋ́ʋ́la, ɛ́ nɛ́ tɛ, ŋ pi nyɛ bílíwa rɩ́; ɩ́ tɩɩ kɩ́ɛ́lɩ́ŋ wɩ́bʋlɛ́ ná ná.
16 Liisidílo* bárka nyɔɔlɔ́ ná á há bárkɛ Wɩɩsɛ káá nyɔ, á wɩ́rá tɩɩ kené cɔ́ Kirisi mí ní, a tɩ́ŋʋ́ cɛ́l mɛ́?
Liisidílo dɩpɛ́ŋ ná á háá díé, á wɩ́rá tɩɩ kené cɔ́ Kirisi mí ní, a tɩ́ŋʋ́ tɛŋ mɛ́?
17 Dɩpɛ́ŋ balá nɛ́ á kaa conni pá náŋá, a dídí.
Á kánɔ́, ká wuu tʋŋ aá dí dɩpɛ́ŋ balá; ɛ́ wɩ́ɛ́, á ká tɛŋ balá nɛ́.
18 Ɩ́ bɩɩnɛ Ɩzɩrayɛl* nɩɛ wɩ́ɛ́; rɩ ɓa nɛ́ ɓʋ́ pʋna ɔsɛ vʋk pá Wɩɩsɛ, ɓaá lɩ́sɩ́wɔ́ ker ní, ká pi Wɩɩsɛ ker físú koro daha.
Ʋ ɛ́, ɓa rɩ́ Wɩɩsɛ ká óŋ balá nɛ́, ɓa há tʋ́ŋ vʋk namɩɛ mɛ́.
19 Ŋ dɩbʋlɩ́ ná mʋ́l nɛ́ sɩɛ́ beé rí?
Rɩ́ veno ní ká óŋ yáá, veno namɩɛ nɛ́ ká óŋ?
Aɩ́!
Ɛ́ rá toó!
20 Ŋŋ́ já rɩ́ŋ bʋlɛ́ vʋk'ɔɔsa háá ɓʋ́ʋ́sɛ pʋsɛ ná, ɓa ɓʋ́ʋ́sɔ́ aá pá kaŋtɔmɔ nɛ́; ká, ŋ sɩɛ́ waá ja rɩ́ɩ́wa rɩ́ kaŋtɔmɔ tʋŋ nʋɔ mɛ́.
21 Ʋ wɩ mɔhɛ̃́ rɩ́ɩ́wa nyʋ́nyɔ Wɩɩsɛ nyɔɔlɔ́, káá nyɔ kaŋtɔmɔ má nyɔɔlɔ́; a dídí Nyuutɩna liisidílo, káá dí kaŋtɔmɔ má ɓɩdííle.
22 Áá já ráá pusi Wɩɩsɛ cɔ́ɛ́ mɛ́ nɛ́?
Á bɩ́ɩ́nɔ́ raá dóé ní kɛ Wɩɩsɛ ɓó?
Ɔ́ʋ́ ná háá píŋsi Wɩɩsɛ
23 Ɩ́ náŋa sɩ́ wɩ́kísí toó.
Ɛ́ ká taŋá rɛ́, á wo wɩ́ɩ́ wuu ní aá a, amá ɓa wuu rá wɩ nyʋɔrɛ́ kené.
Á wo wɩ́ɩ́ wuu ní aá a, amá ɓa wuu wɩ yardá súúri.
24 Nɛ́ŋ wuu sɩ́ɩ́ dʋŋɔ wér wɩ́ɛ́ já, amá bɩ́ɩ́nɩ́ nɔ́ŋɔ má wér wɩ́ɛ́.
25 Rɩɩ́wa ná namɩɛ yɔwɔ mɛ́ rɩ ɓaá yɛ́llʋ́, ɩ́ yɔwɛ mʋ́ dí.
Ɩ́ taŋa sɩ́ bɔ́sʋ́ rɩ́ɩ́ jɩ́jɔ́ʋ́ dɩlɩ́, rʋ́ʋ́ wɩ́wálmɩ́wa.
26 Wɩɩsɛ Kɛnɔ sɩɛrʋ ɓa sɛ́:
«Dúníé rɩ́rʋ́ onni wuu,
Nyuutɩna nɛ́ tɩ́wɔ́.»
27 Rɩ nɛrɔ nɛ́ wɩ Zeezi lɛ́ɛ́ dí, ká yɩ́rɩ́wa rɩ́ɩ́wa ko dí ɓɩɛ, ɩ́ mʋ́; ʋ há pí omo ná wuu pɛ́ɩ́wa, ɩ́ dí, ká sɩ́ kénú rɩ́ɩ́ bɔ́sɩ́ jɩ́jɔ́ʋ́ dɩlɩ́, rʋ́ʋ́ wɩ́wálmɩ́wa.
28 Amá rɩ nɛ́ŋ rɩ́ bʋ́lɩ́wa rɩ́ bʋlɛ́:
«Namɩɛ né ká veno namɩɛ nɛ́!»
Ɩ́ báá sɩ́ dí; nɩbʋlpáálɛ ná wálmɛ wɩ́ɛ́.
29 Ɩ́ é wálmɛ wɩ́ɛ́ rá, amá nɛrɔ ná há bʋ́lɛ́ pɛ́ɩ́wa wálmɛ wɩ́ɛ́ nɛ́, ŋ sɩ́ɩ́wa sɩ́ dí.
Beé rí sɩɛ́ tɛ ŋ tɩ́llɩ́ŋ tɩɩ, ká nɛrɔ nɔ́ŋɔ wálmɛ wɩ́ɛ́ kɩ́kɛ́rɩ́ŋ namɩɛ díí mí?
30 Rɩŋ bárkɛ Wɩɩsɛ ɓɩdííli wɩ́ɛ́ ká dí, hagaasɛ báá lɩ́ nɛɛ́; ɓɩdííli ná wɩ́ɛ́ ŋ há bárkɛ Wɩɩsɛ?
31 Ɛ́ wɩ́ɛ́, rɩɩ́waá dí ní, rɩɩ́waá nyɔ́ nɛ́, wɩ́ɩ́ ná wuu ɩ́ háá ɛɛ́, ɩ́ lo rɩ́ɩ́wa wɩ́'állɛ wuu pípíŋsi Wɩɩsɛ.
32 Ɩ́ pɔ́ wérí, rɩ́ɩ́wa wɩ́'állɛ sɩ́ Zuwifiwa* yíkí yo, a sɩ́ Gɩrɛkɛwa* yíkí yó, a sɩ́ Wɩɩsɛ púl* nɩɛ má yíkí yo.
33 Ɩ́ áŋ háá a ɛ́.
Wɩ́ɩ́ wuu mí, ŋ fɩ́kɩ́ŋ tɩɩ aá ja rɩ́ŋ tɔrɛ nɩɛ wuu sɩɛrʋ nɛ́; ŋ wɩ́ŋ dʋŋɔ wér níí ja, amá ŋŋ́ ja nɩkana wér ní, a makɛ rɩ́ Wɩɩsɛ lɔ́wɔ́ tá.