Zeezi nɩtʋmɩ́ ker rɩ́rʋ́ wɩ́'állɛ
9
1 Ŋ wɩ́ŋ tɩɩ tɛ?
Ŋ to Zeezi nɩtʋmɩ́?
Ŋ wɩ́rá Nyuutɩna Zeezi néé?
Ŋ Nyuutɩna tʋŋ pɛ́ɛ́ nɔnɔ* rá tóíwa?
2 Rɩ nɩɛ náŋa nɛ́ wɩ néé rɩŋ ká Zeezi nɩtʋmɩ́* má, ɩ́ é ɩ́ɔ̃́ rɩ́ŋ kɔ́ʋ́ nɩtʋmɩ́ rɛ́; ʋ ɛ́ malla nɛ́ kɛ́ɩ́wa, a tɩŋ mɩɩsɛ ná ɩ́ há kené Nyuutɩna ŋmɛ́nɔ mɛ́ wɩ́ɛ́.
3 Ŋ nʋlɩ́sɔ wɩ́ɩ́ nɛ́ ɛ́, ŋ kaa bʋl aá láŋ tɩɩ, nɩɛ ná há cɩ́nɩ́ŋ mɛ́ nɛ́sɛ mɛ́.
4 Á tʋtʋmɛ́ yɩr mɛ́, á wɩ mɔhɛ̃́ ráá ná ɓɩdííle aá dí, a ná nyii aá nyɔ?
5 Á wɩ mɔhɛ̃́ ráá ja háála, a kaa tɩ́ŋrá tɩɩ mɛ́ anɛ nɩtʋmɛ́ ná náŋa, rɩ́ Nyuutɩna maábɛlɛ, arɩ́ Sefa* háá a ɛ́?
6 Ŋ rɩ́ Barnabasɛ dʋŋɔ nɛ́ mɔhɛ̃́ ráá tʋŋ aá pɛ́ɩ́wa, ká jaá dírá tɩɩ mɛ́?
7 Sóóji orí rí mɩŋ gɛnnɛ* mɛ́, káá dɔ́ʋ́ tɩɩ ʋ suolé mí?
Áŋ rɩ́ɩ́ cɔ́ŋsɛ tuu, káá sʋ́ʋ́ nɔŋ dí?
Áŋ é ríí nʋɔlɛ nɛsɛ, ká wʋ́ɔ́ nɛ'ɩ́l nyɔ?
8 Wɩ́bɔsɛ́ nyáŋ ŋ há píé máŋsɛ, nɩbííne wɩ́zɩmɛ nɛ́; Wɩɩsɛ kíŋse é sɩɛ́ wɩ ɛ́ nɛ́ bʋ́lɛ́ rɛ́?
9 Wɩɩsɛ kíŋse* ná Moyizi* há pʋ́ŋsɛ́ sɩɛrʋ ɓa sɛ́:
«Rɩɩ kéŋ nɔɔ aá tʋ́mɩ́ mɩ́ɛ́ sɩɛrʋ,
ɩ sɩ́ omo píí tɔ́ʋ́ nʋɔ mɛ́.»
Nɔɔ dʋŋɔ wɩ́ɛ́ nɛ́ Wɩɩsɛ bʋl nyɛ?
10 Á wɩ́ɛ́ rá Wɩɩsɛ bʋl ɛ́ rɛ́?
Óó!
Á wɩ́ɛ́ nɛ́ Wɩɩsɛ bʋl ɛ́.
Padííro rɩ́ mɩ́ŋmɔɔrɔ wuu kéŋ yɩɛla, rɩ ɓa sɩ́ ná óŋ, ɓa tʋtʋmɩ́ mʋ́l mɛ́.
11 Á há bʋ́l Wɩɩsɛ wɩ́ɛ́ pɛ́ɩ́wa anɛ mɩ́dúó á dúíwa sɩɛrʋ, ʋ wɩ mɔhɛ̃́ ráá ka kʋsɛ́ yɩɛla ɩ́ tíé nyúú ɓɩɛ mɛ́?
12 Rɩ nɩ́ɛ́ bamma rɩ́ mɩnɛ́, a tɩ́llɩ́wa ɓɩɛ aá dí, á ra wɩ mɔhɛ̃́ ráá dííwa ɓɩɛ kɩ́llɩ́wɔ́?
Ká á wɩ ɛ́ ɛ́ɛ́.
Á wɩ́ɩ́wa óŋ sʋ́lɛ́.
Á sáŋ wɩɩla duó wuu, a makɛ ráá sɩ́ nagbámɔ wɩ́ɩ́ wuu á, Zeezi Labaarɩwero ná bʋlɛ́ mɛ́.
13 Ɩ́ tɩɩ ɩ́ɔ̃́ zɩŋ rɩ́ nɩɛ ná háá tʋŋ Wɩcʋɔlɩjɩzeno* sɩɛrʋ, ɓa ɓɩdíílí lɛ ráŋ nɛ́, ká Wɩɩsɛ vʋk'ɔɔsa* má ka ker, vʋka ná ɓa há ɔ́sɛ́ aá pá Wɩɩsɛ, ɓɩɛ sɩɛrʋ.
14 Ʋ ká ɛ́ nɛ́, arɩ́ nɩɛ ná má háá bʋl Wɩɩsɛ Labaarɩwero ná.
Nyuutɩna sɛ́, rɩ́ ɓa ɓɩdííli mɔhɔ̃́ rʋ́ʋ́ lɛ Labaarɩwero ná bʋlɛ́ mɛ́ nɛ́.
15 Ká arɩ́ ɛ́ wuu, ŋ wɩ ɛ́ wɩ́ɛ́ tɩ́ŋɛ́ lɛ́ɩ́wa óŋ wuu.
Ʋ sɩɛ́ to anɛ ŋ pʋ́ŋsɛ kɛnɔ né má aá ja rɩ́ɩ́wa páŋ ɓɩɛ nɛ́.
Ʋ ɛ́ káŋ píŋ wɩ́ɩ́ rɛ́.
Ŋ sɩɛ́ waá ja rɩ́ŋ tɩŋ nɩɛ ɓɩɛ wɩ́ɛ́, a sɩ́ ɛ́ píŋ dí; rɩŋ sʋ́wɔ́ nɛ́ cúcó ɛ́ mɛ́.
16 Ŋ háá bʋl Wɩɩsɛ Labaarɩwero ná, ʋ to nyʋkwɩ́ɩ́; ʋ ká wɩ́fɩkɩ́ rɛ́.
Wɩɩla sɩ́ púŋ, rɩŋ nɛ́ wɩ Labaarɩwero ná bʋ́lɛ́.
17 Rɩŋ tɩɩ nɛ́ fa bɛ́llɛ́ pi Labaarɩwero ná bʋlɛ́ páŋ tɩɩ, ɛ́ é, ŋ sɩ́ ké tɩkɛ rɩ́wɔ́ túmíŋ.
Ɛ́ rá sɩɛ́, Wɩɩsɛ nɛ́ héŋ ráŋ, ŋ nyúú cɩka nɛ́.
18 Beé sɩɛ́ káŋ túme?
Ŋ túme ní ká, rɩ́ŋ bʋl Labaarɩwero ná pá nɩɛ yɔ́ɔ́, ká sɩ́ kénú rɩ́ɩ́ tɩkɛ, Labaarɩwero bʋ́bʋlla túme ná há mɔhɛ̃́ rɩ́ŋ ná.
19 Ŋ tɩ́ŋ tɩɩ wɩ́ɩ́ wuu mí; ŋ to yómó.
Ŋ taŋa sáŋɔ́ bɩrmɛ nɩɛ wuu yómo, a makɛ rɩ́ŋ wólli nɩkana pɔsɛ ko Zeezi rí.
20 Rɩŋ zʋ́ Zuwifiwa sɩɛrʋ, ŋŋ́ kánɩ́ŋ tɩɩ anɛ Zuwifi, a makɛ rɩ́ŋ wólli pɔ́sɩ́wɔ́ ko Zeezi rí; ŋ wɩ kíŋse ná Moyizi há pʋ́ŋsɛ́ tɩŋ, ká rɩŋ zʋ́ nɩɛ ná háá tɩ́ŋwɔ́ sɩɛrʋ, ŋ má nɩ́wɔ́, a makɛ rɩ́ŋ wóllíwó má nɩkana pɔsɛ ko Zeezi rí.
21 Rɩŋ nɛ́ zʋ́ nɩɛ ná há wɩ Wɩɩsɛ kíŋse ná ɛ̃ má sɩɛrʋ, ɛ́ nʋ́ʋ́ nɛ́; ŋŋ́ kánɩ́ŋ tɩɩ a nɩ́wɔ́ nɛ́, a makɛ rɩ́ŋ wóllíwó ɓɩkana pɔsɛ ko Zeezi rí.
Ɛ́ sɩɛ́ to anɛ ŋ wɩ kíŋsé tɩŋ nɛ́, ŋŋ́ tɩŋ Kirisi kíŋse ní.
22 Ŋ zʋ́ nɩɛ ná há wɩ duoki sɩɛrʋ, a bɩ́rmɩ́wɔ́ nɔ́ŋɔ, a makɛ rɩ́ŋ wóllíwó ɓɩkana pɔsɛ ko Zeezi rí.
Ŋ píŋ tɩɩ makɛ óŋ rɩ́rʋ́ duó wuu, nɩɛ wuu sɩ́ɛ́ mɛ́, a makɛ rɩ́ŋ bɩ́rɛ bɩ́rɛ́ rɩ́rʋ́ duó wuu, a wóllíwó náŋa kɛsɛ ko Wɩɩsɛ rɩ́, rʋ́ʋ́ lɔ́wɔ́ tá.
23 Labaarɩwero ná wɩ́ɛ́ nɛ́ sɩɛ́ ŋ tɩŋ aá a nyáŋ wuu, a makɛ rɩ́ŋ ka ker ʋ sɩɛrʋ.
24 Rɩ nɩɛ nɛ́ lɛ́ fɛ́ɛ́ mɛ́, ɓaá a ɓɩkáná rɛ́ aá fá, amá nɩbala nɩ́ɩ́ fá la sɩ́ɛ́, a mʋ́ dí nyúú, a la bɩbaker.
Ɛ́ wɩ́ɛ́, ɩ́ má ɔsɛ fá wérí a mʋ́ la sɩ́ɛ́, a mʋ́ dí nyúú, a la bɩba'onni.
25 Nɩɛ ná wuu háá lɛ áá fá ɛ́, ɓa ɩ̃́wɔ́ tɩɩ kanɛ́; ɓaá bɛ́ŋsɩ́wɔ́ tɩɩ ɛ́ nɛ́, aá ja rɩ́wɔ́ mʋ́ dí ŋmɛ́sɛ, a la bɩba'omo*; omo ná há wɩ dáánɛ́ káá zɔkɛ.
Amá á é fá, a mʋ́ la bɩba'onni ná há waá zɔkɛ.
26 Ɛ́ nɛ́ tɛ, ŋ fá térké a caasɛ dɩmʋ́tenní, ŋ wɩ bínó fá.
Aá yo cɔrɛ́, ká wɩ nɛ́sɛ yɔ́ɔ́ viki.
27 Amá ŋŋ́ bɛ́ŋsɩ́ŋ tɩɩ ɛ́, a háárɩ́ŋ tɩɩ mɛ́, aá ja rɩ́ŋ sɩ́ Wɩɩsɛ wɩ́ɛ́ bʋ́l pá nɩɛ, káá mʋ́ʋ́ peri, rɩ́wɔ́ yíkíŋ tá har rɩ́.