Venni namɩŋsa wɩ́ɛ́
8
1 Venni namɩŋsa ná é wɩ́ɛ́, ʋ ká taŋá, á wuu ní kéŋ zɩmɛ́.
Amá ɛ́ zɩmɛ́ é, ʋʋ́ nyʋ́kɛ nɩɛ rɛ́; cólle níí súúri nɩɛ.
2 Rɩɩ ná sɩ́ɩ́ ɛ̃ wɩ́ɛ́, zɩŋ rɩ́ɩ́ wɩ́zɩmɛ ná tíó rí, ɩ wɩ ɛ̃ a mɔ ɛ́ há mɔhɛ̃́ rɩ́ɩ́ zɩŋ.
3 Amá nɛrɔ ná há có Wɩɩsɛ, Wɩɩsɛ má ʋ́ʋ̃́ tɩ́na nɛ́.
4 Ɩ́ há bɔ́sɛ́ venni namɩŋsa ná díí wɩ́ɛ́, á ɩ́ɔ̃́ rɩ́ veno to óŋ, dúníé mí.
Á sɩ́ɛ́ ɩ́ɔ̃́ zɩŋ rɩ́ Wɩɩsɛ má nɛ́ balá léŋ.
5 Rɩ ónní rí mɩŋ bána nyúú rɩ́ tíé nyúú, ɓa píwó makɛ wɩ́ŋsá, ɛ́ wɩŋsa duduusi káŋ, nyúútɩ́náwa má káŋ.
6 Amá á é rɩ́, Wɩɩsɛ nɛ́ balá; ʋ nɛ́ ká Ana ná há á onni wuu, a nɛ́ tɩ́llɩ́rá.
Nyuutɩna má nɛ́ balá.
Ʋ nɛ́ ká Zeezi Kirisi.
Ʋ yɩr mɛ́ nɛ́ onni wuu mɩŋ, ʋ yɩr mɛ́ nɛ́ á má mɩŋ.
7 Amá nɩɛ wuu ra wɩ ɛ́ zɩmɛ́ kené.
Náŋa há mál vʋka ɔsɛ́, ɓa búó rɩ veno wómmó rí.
Ɓaá dí veno namɩɛ, ká bɩɩnɛ rɩ veno ká óŋ rí; a tɩŋ ɛ́ mɛ́, ɓa sabɩŋsɛ há ká kúlééwa, a bɩɩnɛ rɩ ɓa zɔ́kɛ́ kíso rí.
8 Ɓɩdííli ra wɩ́rá kené aá peri Wɩɩsɛ.
Raá wɩ díé, ɛ́ wɩ́rá wuó múúri; raá báá díó má, ɛ́ wɩ́rá wuó súúri.
9 Ɩ́ tɩ́ɩ́wa tɩɩ é rí, ɩ́ taŋa pɔ́ rɩ́ tɩ́ŋtɩɩ ná sɩ́ dɔ́wɩ́ nɛ́, rɩ́ nɩɛ ná yardá há wɩ péré gɛ́rʋ́ mɛ́.
10 Ɩ há sɩ́ɩ́ kéŋ zɩmɛ́, ká zʋʋ ké venni jaa mɛ́ aá díwó namɩŋsa, ʋ ɛ́ wɩ nɛrɔ ná yardá há wɩ péré sabɩɩná yiki, rʋ́ʋ́ zʋʋ dí ɛ́ namɩŋsa?
11 Ʋ ɛ́ɛ́ á rɩ́ nɛrɔ ná yardá há wɩ péré, ɩ maábinɔ́ŋɔ, Zeezi há sʋ́wʋ́ wɩ́ɛ́, rʋ́ʋ́ tɩ́ŋɩ́ zɩmɛ́ ná wɩ́ɛ́ yʋ́ksɛ nɛ́.
12 Rɩɩ́wa á ɛ́ zɔ́kɩ́wa maábináŋa ná sabɩŋsɛ há ká kúlééwa mɛ́, Kirisi mí ní ɩ́ aa zɔkɛ ɛ́.
13 Ɛ́ wɩ́ɛ́, rɩ ɓɩdííli díí níí yíkíŋ maábinɔ́ŋɔ rɩ́ɩ́ hé wɩ́bɔmɔ mɛ́, ŋ báá wɩ namɩɛ́ díí ná, a makɛ rɩ́ŋ sɩ́ŋ maábinɔ́ŋɔ yíkí hé wɩ́bɔmɔ mɛ́.