Jɛ́ɩ́ nɔ́ŋɔ wér
15
1 Á nɩɛ ná há dúókó yardá wɩ́ɛ́ mɛ́, ʋ mɔhɔ̃́ ráá nyammɛ nɩɛ ná há ká pʋ́ɔ́llɛ́ yardá mɛ́, héwíwɩ́ɛ́, ká sɩ́ dé ɩ́'árá tɩɩ tɛŋpɔrɔ́ wɩ́ɛ́ nɛ́.
2 Ʋ mɔhɔ̃́ ráá nɛ́ŋ balá wuu a wɩ́ɛ́ aá jɔ́ʋ́ nɔ́ŋɔ́ wérí ní, a aá jɔ́ʋ́ tɛŋpɔrɔ́ nɛ́, a makɛ rʋ́ʋ́ yardá súúri.
3 Kirisi wʋ́ʋ́ tɩɩ tɛŋpɔrɔ́ wɩ́ɛ́ nɛ́ jɛ́ɛ́, amá ɓa pʋ́ŋsɛ Wɩɩsɛ Kɛnɔ sɩɛrʋ a bʋ́lʋ́ wɩ́ɛ́ bʋlɛ́:
«Zome ná nɩɛ há píé aá tʋ́ksɩ́ nɛ́,
ɓa pii tʋ́ksɩ́ŋ.»
4 Ká wɩ́pʋ́ŋsɩbilé ná wuu sɩɛ́ ká ɓa pʋ́ŋsɔ́ bil, á cáánɛ wɩ́ɛ́ nɛ́.
Rɩ́ ɛ́ pʋ́ŋsɛ bʋ́ɔ́lɩ́rá, a párá nyamma, a makɛ ráá ka yɩɛla.
5 Rɩ́ Wɩɩsɛ ná háá pá nyamma, a nɛ́ bʋ́bʋɔlɛ nɩɛ, rʋ́ʋ́ pɛ́ɩ́wa mɛ́ rɩ́ɩ́wa ka nʋtʋmɛ, aá va Zeezi Kirisi nabulle mí,
6 a wuu hé náŋá mɛ́, a tʋŋ nʋɔ mɛ́, aá bɩ Wɩɩsɛ ná há kárá Nyuutɩna Zeezi Kirisi Ana mɛ́.
Kirisi kó duo wuu wɩ́ɛ́ nɛ́
7 Ɛ́ wɩ́ɛ́, ɩ́ saŋ ka náŋá wérí, anɛ Kirisi há keníwa wérí ɛ́, rɩ́ Wɩɩsɛ yɩr píŋsi.
8 Ŋ bʋ́lɔ́ aá pɛ́ɩ́wa, Wɩɩsɛ wʋ́ʋ́ nʋɔ hár bɩrɛ; Kirisi púú tɩɩ makɛ yómo, a pá Zuwifiwa, a makɛ rɩ́ Wɩɩsɛ há tá nʋʋsɛ ná párá naabálwa, rɩ́wɔ́ nʋɔ sú.
9 Ká rɩ́ nɩɛ ná há to Zuwifiwa má pípíŋsi Wɩɩsɛ, ʋ susufárʋ wɩ́ɛ́.
Ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ a bʋlɛ́:
«Ɛ́ wɩ́ɛ́, ŋ sɩ́ bɩ́ɩ́ mɛ́ nɩɛ ná
há to Zuwifiwa sɩɛrʋ,
a yɩ yɩɩla dɛ́nnɩ́.»
10 Ɓa báá pʋ́ŋsɔ́ bʋlɛ́:
«Ɩ́ nɩɛ ná há to Zuwifiwa,
ɩ́ rɩ́ duo ná nɩɛ Wɩɩsɛ há lɩ́sɛ́,
ɩ́ wuu hé náŋá aá jʋɔsɛ.»
11 Ká baa bʋlɛ́:
«Nɩɛ ná há to Zuwifiwa, ɩ́ bɩ Nyuutɩna mɛ́,
rɩ́ duó wuu nɩɛ bʋ́ʋ́ mɛ́.»
12 Ezayi* má báá sɛ́:
«Izayi* dunɩɛ sɩɛrʋ báálɔ nɔ́ŋɔ sɩ́ ko,
a isi dí kuorí nɩɛ ná há to Zuwifiwa nyúú.
Rɩ́ nɩɛ ná há to Zuwifiwa tɩ́ŋʋ́ mɛ́, a ka yɩɛla.»
13 Wɩɩsɛ ná há hé yɩɛla nɩɛ sɩɛrʋ, sɩ́ a rɩ́ satɔrɔ́ súíwa, rɩ́ tɛŋfɩ́ɛ́l mɩŋ, ɩ́ há lɔ́ʋ́ dí wɩ́ɛ́, a makɛ rʋ́ʋ́ tɩ́ŋʋ́ Sabɩɩna dóé mí, a a rɩ́ yɩɛla má péríwa wérí.
Pool sʋ́ʋ́ ká Zeezi tʋtʋnnɔ nɛ́
14 Maábináŋa, ŋ tɩɩ ɩ́ɔ̃́ zɩŋ rɩ́ sawér súíwa rɛ́.
Ɩ́ ɛ̃ wɩ́ɛ́ má wérí, a wólli náŋá aá cáánɛ.
15 Amá wɩ́ɛ́ náŋa mɛ́, ŋ ha ɔ́sɔ́ aá pʋ́ʋ́sɩ́wa dɩlla mɛ́ rɛ́, ŋ kɛnɔ né sɩɛrʋ, a jɩ́ja rɩ́ɩ́wa pi wɩ́ɛ́ ná, ɩ́ há ɩ̃́wɔ́ a líísíwa tɩɩ, a tɩŋ zilé ná mɛ́ Wɩɩsɛ há píé páŋ,
16 rɩ́ŋ wólli a Zeezi Kirisi tʋtʋ́nnʋ́, nɩɛ ná há to Zuwifiwa sɩɛrʋ.
Ŋ tʋ́ŋwɔ́ sɩ́sɩ́ɛ́nnʋ́wa anɛ vʋk'ɔɔsɔ nɛ́, a bʋ́l Labaarɩwero ná pɔ́wɔ́, a makɛ rɩ́ Wɩɩsɛ sáŋwɔ́, anɛ vʋk ná há kéŋ hɩɛŋ nɛ́, rɩ́wɔ́ a nɩɛ ná Wɩɩsɛ Sabɩɩna há mʋ́ʋ́rɩ́wɔ́ busunnu.
17 Ɛ́ nɛ́ tɛ, Wɩɩsɛ wɩ́ɛ́ sɩɛrʋ, ŋ wóŋ tɩɩ aá píŋsi Zeezi Kirisi yɩr mɛ́.
18 Ŋ wɩ wɩ́ɩ́ nɔ́ŋ wɩ́ɛ́ kɔwɛ aá bʋl, rɩ Kirisi há pɛ́ŋ mɛ́, ŋ tʋŋ tʋtʋmɛ́ ná dʋŋɔ wɩ́ɛ́ rá.
Ŋ wólló kɛsɛ nɩɛ ná há to Zuwifiwa, ɓa ko saŋ aá tɩŋ Wɩɩsɛ nʋɔ; a tɩŋ nʋɔ wɩ́bʋlɛ́ rɩ́ wɩ́'állɛ mɛ́,
19 a tɩŋ nyáŋsɛ rɩ́ wɩ́gɩrɛ́ dóé mí, a tɩŋ Wɩɩsɛ Sabɩɩna dóé mí.
Ŋ sɩɛ́ púl Zerizalɛmɛ* mɛ́ nɛ́, a bʋl Kirisi Labaarɩwero wɩ́ɛ́ pá nɩɛ, a kaa zʋ kíŋkere tɔ́nɛ, a mʋ́ yakɛ Iliri dɩtɩ́llɛ mɛ́.
20 Ŋ hé dóé a zʋ tɔ́nɛ ná, nɛ́ŋ wuu ha há wɩ Kirisi yɩr ráŋ yɩ́rɛ́ ná nɛ́, a bʋl Labaarɩwero ná, a makɛ rɩ́ŋ sɩ́ nɩɛ náŋa mʋ́biló daha sɔ́.
21 Anɛ ɛ́ ɓa há pʋ́ŋsɛ́ Wɩɩsɛ Kɛnɔ sɩɛrʋ a bʋl; ɓa sɛ́:
«Nɩɛ ná ɓa há wʋ́ʋ́ wɩ́ɛ́ bʋ́lɛ́ pɔ́wɔ́, ɓa sɩ́ nóú,
ká nɩɛ ná má há wʋ́ʋ́ wɩ́ɛ́ nɩ́ɛ́, ɓa sɩ́ nɛ.»
Pool có rʋʋ mʋ́ Romi
22 Ɛ́ wɩ́ɛ́ nɛ́ kɛ́rɩ́ŋ naasɩ́ ɛrɛ́, ŋ ja ŋmɛ́ŋsɛ gúl rɩ́ŋ kóíwa rɩ́.
23 Mʋ́l néé mí sɩɛ́, ŋ ténníŋ tʋtʋmɩ́, ɛ́ tɔ́nɛ mɛ́ rɛ́.
Bɩŋsɛ kánɔ́, ŋ há cóíwa rɩ́ koe.
24 Rɩŋ nɛ́ kúé aá mʋ́ Ɛsɩpanyɛ tíé, ŋŋ́ bɩ́ɩ́nʋ́ rɩ́ŋ tɩŋ néíwa rɛ́.
Ŋ sɩ́ ko kéníwa dɩhɩ̃́ mʋɔ́, rɩ́ŋ tɛŋ pɔrɛ, ká rɩ́ɩ́wa pɛ́ŋ mɛ́ rɩ́ŋ daarɛ col.
25 Mʋ́l néé mí, ŋŋ́ mʋ́ Zerizalɛmɛ nɛ́, rɩ́ŋ tʋŋ pá Wɩɩsɛ nɩɛ ná há mɩŋ ɛ́ tɔ́ɔ́ mɛ́.
26 Masɩdʋanɛ dɩtɩ́llɛ, rɩ́ Akayi* dɩtɩ́llɛ Zeezi laadííre vʋ́ʋ́rɔ́, a kɩɛsɛ kɩɛsɔ́, rɩ́wɔ́ pii sáŋ Wɩɩsɛ nɩɛ sɩɛrʋ nɩyaara ná há mɩŋ Zerizalɛmɛ mɛ́.
27 Ɓa bɩ́ɩ́nɛ́ ɛ́, rɩ́wɔ́ sáŋwɔ́ mɛ́ nɛ́, amá ʋ sɩɛ́ ká kɩ́ŋ rɩ́ ɛ́, ɓa túŋ.
Nɩɛ ná há to Zuwifiwa, há tɩ́ŋ Zuwifiwa mɛ́ nɛ́ a ná Wɩɩsɛ wɩ́ɛ́ nyʋɔrɛ́, ɓa má mɔhɔ̃́ rɩ́wɔ́ sáŋ Zuwifiwa mɛ́, a rɩ́wɔ́ oŋjaalɛ́ rɛ́.
28 Rɩŋ nɛ́ zɩ́ŋ ɛ́ wɩ́ɩ́ tenni, rɩ́ɩ́ pi kɩɛsɔ́ ná rɩ́ɩ́ héwó nɛ́sɛ mɛ́, ŋ sɩ́ ko néíwa, ká daarɛ mʋ́ Ɛsɩpanyɛ tíé.
29 Ŋ sɩɛ́ ɩ́ɔ̃́ rɩŋ nɩ́ɩ́ kúé, Kirisi bárka sɩ́ súŋ, rɩ́ŋ kaa kóíwa rɩ́.
30 Maábináŋa, ŋŋ́ sʋ́lɩ́wa rɛ́, Nyuutɩna Zeezi Kirisi yɩr mɛ́, aá sʋ́lɩ́wa, Wɩɩsɛ Sabɩɩna há pí cólle ná párá yɩr mɛ́, ɩ́ pɛ́ŋ mɛ́, ráá lowi wɩcʋɔlɔ́ mɛ́, rɩ́ɩ́wa sʋl Wɩɩsɛ páŋ wérí,
31 rɩ́ŋ lú lɛ Ziide dɩtɩ́llɛ nɩɛ ná há wɩ Wɩɩsɛ ɛ̃ nɛ́sɛ mɛ́.
Ká makɛ rɩ́ Wɩɩsɛ nɩɛ ná há mɩŋ Zerizalɛmɛ mɛ́, cakla kɩɛsɔ́ ná ŋ há kené aá mʋ́ rɩ́ŋ pɔ́wɔ́,
32 a makɛ, rɩ Wɩɩsɛ nɛ́ sáŋɛ́, rɩ́ŋ jʋɔsɛ kóíwa rɩ́, a ko kéníwa sɩɛrʋ fɩɛlɛ mʋɔ́.
33 Rɩ́ tɛŋfɩ́ɛ́l Wɩɩsɛ mɩ́nɩ́wa wuu har!
Amɩɩ*!