Pool bɔ́llɛ nɩɛ
16
1 Á nátoló Foobe, ŋ púú héíwa nɛ́sɛ mɛ́.
Ɩ́ kánʋ́ wérí.
Háála ná há tʋ́mɛ́ aá pá wɩcʋɔla púl* ná há mɩŋ Saŋkire mí, ɓa nɔ́ŋɔ nɛ́.
2 Ɩ́ kánʋ́ wérí Nyuutɩna yɩr mɛ́, ɛ́ ná Wɩɩsɛ nɩɛ há mɔhɛ̃́ rɩ́wɔ́ ka náŋá.
Rʋʋ sʋ́lɩ́wa óŋ, ɩ́ sáŋʋ́ mɛ́ arɩ́ óŋ ná ʋ háá jɛɛ́.
Ʋ má sáŋ nɩɛ ɓɩkana mɛ́ wérí, ʋ sáŋɩ́ŋ má mɛ́ rɛ́.
3 Ɩ́ bɔ́llɛ Pirisiili rí Akila.
* Ŋ rɩ́wɔ́ wuu ní ká tʋtʋ́nnʋ́náŋá Zeezi Kirisi tʋtʋmɛ́ mɛ́.
4 Ɓa yówó mɩɩsɛ má tɩɩ tá, ŋ wɩ́ɛ́.
Ŋŋ́ bárkwɔ́; ŋ dʋŋɔ má rá sɩɛ́ wʋ́ɔ́ bárkɛ, wɩcʋɔla púlli nɩɛ ná wuu há to Zuwifiwa, ɓa máá bárkwɔ́ rɛ́.
5 Ɩ́ bɔ́llɛ wɩcʋɔla pul* nɩɛ ná wuu há mɩ́ŋwɔ́ jaa mɛ́.
Ɩ́ bɔ́llɩ́ŋ nɩcólli tɩɩ Ɩpayɩnɛtɛ.
Ʋ nɛ́ ká dʋ́ŋdʋ́ʋ̃́ nɛrɔ ná há lá Zeezi wɩ́ɛ́ dí, Azi dɩtɩ́llɛ wuu mí.
6 Ɩ́ bɔ́llɛ Maari, ʋ tʋ́mɔ́ wérí a pɛ́ɩ́wa.
7 Ɩ́ bɔ́llɛ Aŋdonikisi rɩ́ Zuniya.
Ɓa káŋ dunɩ́ɛ́ rɛ́, a baa áŋ bɩnajaa zʋ́zʋ́ʋ́rnáŋá má.
Kirisi nɩtʋmɛ́ ná sɩɛrʋ, ɓa ká nɩbúúlé rí; ɓa láŋ sɩ́ɛ́ má tɩɩ, a la Kirisi wɩ́ɛ́ dí.
8 Ɩ́ bɔ́llɛ Aŋpiliyatisi, ʋ káŋ nɩcólli tɩɩ rɛ́, Nyuutɩna wɩ́ɛ́ mɛ́.
9 Ɩ́ bɔ́llɛ Ɩrbɛŋ, á tʋtʋ́nnʋ́nɔ́ŋɔ, Kirisi wɩ́ɛ́ mɛ́, a bɔ́llɛ Sitaki, ŋ naŋnɔ́ŋcólli.
10 Ɩ́ bɔ́llɛ Apɛlɛsɛ ná, wálmɛ há pérú Kirisi wɩ́ɛ́ mɛ́,
ká ʋ cɩ́ tɩkɛ.
Ɩ́ bɔ́llɛ Arisitobili jaa nɩɛ.
11 Ɩ́ bɔ́llɩ́ŋ dunɛrɔ Erodiyoŋ má.
Ɩ́ bɔ́llɛ Narsiisi jaa nɩɛ ná há mɩŋ Nyuutɩna ŋmɛ́nɔ mɛ́.
12 Ɩ́ bɔ́llɛ Tɩrɩfɛɛnɛ rɩ́ Tirifozi, ɓa ká háála ná há tʋ́mɛ́ aá pá Nyuutɩna nɛ́.
Ɩ́ bɔ́llɩ́rá nɩcólli tɩɩ Persidi má.
Ʋ ká háálɔ ná há tʋ́ŋ kɩ́ŋkáŋ a pá Nyuutɩna.
13 Ɩ́ bɔ́llɛ Nyuutɩna nɩlɩ́sɛ Rufisi, rɩ́rʋ́ maá ná há káŋ má maá.
14 Ɩ́ bɔ́llɛ Asɛŋkiriti, a bɔ́llɛ Fɩlɛgɔŋ, a bɔ́llɛ Ɛrmɛɛsɛ, a bɔ́llɛ Patiroba, a bɔ́llɛ Ɛrmaasɛ, a bɔ́llɩ́rá maábináŋa ná wuu há mɩ́ŋwɔ́ dɩhɩ̃́.
15 Ɩ́ bɔ́llɛ Filologi rɩ́ Zili, a bɔ́llɛ Nere rɩ́rʋ́ nátoló, rɩ́ Ɔlɛŋpɛ, arɩ́ Zeezi laadííre ná wuu há mɩ́ŋwɔ́ dɩhɩ̃́.
16 Ɩ́ bɔ́llɛ náŋá wérí arɩ́ cólle, ká rɩ́ busunnu sɩ́ ráŋ mɩ́nʋ́.
Kirisi laadííre púlli nɩɛ wuú bɔ́llɩ́wa.
Pool hatɩ́ŋnɩ́cáánɛ
17 Maábináŋa, ŋŋ́ sʋ́lɩ́wa rɛ́, ɩ́ pɔ́ɩ́wa tɩɩ mɛ́ arɩ́ nɩɛ ná háá hé cakɔ́, aá yéŋŋi nɩɛ, rɩ́wɔ́ sɩ́ cáánɛ ná ɩ́ há nɩ́ɛ́ sáŋʋ́.
Ɩ́ sɩ́ ɛ́ nɩɛ ɓárʋ́.
18 Ɛ́ nɩɛ duo mí wɩ tʋ́mɛ́ aá párá Nyuutɩna Kirisi ní, ɓa tʋ́mɔ́ aá héwó filli mí ní, a bʋl nʋŋmɔ́ŋwɩ́ɛ́ rɩ́ nɩnyɩ́ɩ́sɩ́wɩ́ɛ́, aá tɛl nɩɛ ná wɩ́zɩmɛ há wɩ zeŋ.
19 Ɩ́ há sáŋɛ́ aá tɩŋ Wɩɩsɛ nʋɔ sɛ́ ɛ́, nɩɛ wuu ní ʋ́ʋ̃́ mɛ́.
Ʋ ɛ́ káŋ satɔrɔ́, ŋ jɩ́jʋ́ɔ́sɩ́wa wɩ́ɛ́; ŋ sɩɛ́ có rɩ́ɩ́wa zɩŋ wɩ́ɛ́, aá a wɩ́were, ká kánɩ́wa tɩɩ páár wɩ́bɔmɔ cɔɔ rɩ́.
20 Tɛŋfɩ́ɛ́l Wɩɩsɛ sɩ́ tɩ́ksɛ Sɩtaanɛ* ɩ́ naasɛ mʋ́l, ʋ waá dáánɛ.
Ráá Nyuutɩna Zeezi Kirisi hé bárka pɛ́ɩ́wa!
21 Ŋ tʋtʋ́nnʋ́nɔ́ŋɔ Timote bɔ́llɩ́wa.
Ŋ dunɩɛ Likisi rɩ́ Zasɔŋ rɩ́ Sɔsɩpatɛrɛ máá bɔ́llɩ́wa.
22 Ŋ é Tertisi ní pʋ́ŋsɛ kɛnɔ né, ŋŋ́ bɔ́llɩ́wa Nyuutɩna yɩr mɛ́.
23 Ŋ é Pool nɩhɔjaatɩ́na Gayisi rɩ́ wɩcʋɔla púl nɩɛ ná wuu há mɩ́nʋ́ jaa mɛ́, ɓaá bɔ́llɩ́wa.
Tɔ́ɔ́ meéwíbillo Ɛrasɩtɛ máá bɔ́llɩ́wa.
Á maábinɔ́ŋɔ Kartisi máá bɔ́llɩ́wa.
24 [Ráá Nyuutɩna Zeezi Kirisi hé bárka pɛ́ɩ́wa wuu!
Amɩɩ*!]
Wɩɩsɛ dʋŋɔ nɛ́ tɛ píŋ
25 Á píŋsi Wɩɩsɛ!
Ʋ nɛ́ wóíwa yardá aá súúri, a tɩŋ Labaarɩwero mí, arɩ́ Zeezi Kirisi ná wɩ́ɛ́ ŋ háá bʋlɛ́ mɛ́.
Ɛ́ Labaarɩwero mí ní, Wɩɩsɛ tɩŋ a, ʋ wɩ́ɛ́ ná wuu fa há féŋsé bɩŋsɛ ɓɩkáná,
26,27 ɓa zaá a nyaamɩ́, a báá wɩ féŋsé, ká dúníé nɩɛ wuu zɩ́ŋwɔ́, a tɩŋ Wɩɩsɛ há ɛ́ɛ́ ʋ wɩ́laabʋlla pʋ́ŋsɩ́wɔ́ hé kɛnnɛ mɛ́, a makɛ rɩ́ duó wuu nɩɛ wólli la ɛ́ wɩ́ɛ́ dí.
Á píŋsi Wɩɩsɛ ná, há wɩ dɩpúli kené a wɩ dɩtenní kené; ʋ dʋŋɔ nɛ́ ká wɩ́zɩ́nnʋ́.
A tɩŋ Zeezi Kirisi mí, á bʋ́ʋ́ mɛ́, bɩŋsɛ́ rɩ́ bɩŋsɛ́!
Amɩɩ*!