Yardá sɩɛrʋ bɩbara rɩ́ pʋɔllɛ wɩ́ɛ́
14
1 Ɩ́ saŋ nɛrɔ ná há ká pʋɔlá, yardá sɩɛrʋ, ɩ́ sɩ́sɩ́ɛ́nnʋ́wa, ká lo tɩ́ŋtɔ́wɩ́ɛ́.
2 Ɓɩ́ŋnyáŋwɩ́ɩ́ bɩ́ɩ́nɔ́ rʋʋ wo óŋ wuu ní aá dí; ká ɓɩ́ŋ né yardá há wɩ duoki, ʋ é dídí dɩpaarʋ dʋŋɔ.
3 Nɛrɔ ná há wo óŋ wuu aá dí, ʋ wɩ mɔhɛ̃́ rʋ́ʋ́ lɔ́rɛ nɛrɔ ná háá dí ɓɩdííle náŋa, ká wɩ náŋa dí; nɛrɔ ná má há wʋ́ɔ́ wuú dí, ʋ́ʋ́ má sʋ́ʋ́ ná háá dí óŋ wuu sarɩ́ya dí; Wɩɩsɛ sáŋʋ́ tɩ́na.
4 Áŋ rɩ́ kɛ́ɩ́, a la nɛrɔ nɔ́ŋɔ tʋtʋnnɔ sarɩ́ya aá dí?
Rʋʋ́ tʋ́ŋ wérí, rʋʋ ɔ́ɔ́ aá zɔkɛ, ʋ kɔ́ʋ́ nyúútɩ́na wɩ́ɩ́ rɛ́.
Ʋ sɩɛ́ sɩ́ tʋŋ wérí, bee wɩ́ɛ́ Nyuutɩna sɩ́ pɔ́ʋ́ dóé.
5 Nɛrɔ nɔ́ŋɔ béló ná rɩ tápʋlɛ wér kɩ náŋá rɛ́, ká nɔ́ŋɔ má bel ná, rɩ ɓa wuu mɔhɩ̃́ náŋá.
Nɛ́ŋ wuu zɩ́mɩ́ dɩnáálɛ taŋá, a cɩ́nʋ́ har.
6 Nɛrɔ ná háá caksɛ tápʋlɛ, Nyuutɩna wɩ́ɛ́ nɛ́, ʋʋ́ a ɛ́.
Nɛrɔ ná há wo óŋ wuu aá dí, Nyuutɩna yɩr mɛ́ nɛ́, ʋ dídí; ʋʋ́ bɔ́llɛ Wɩɩsɛ nɛ́ ká dí.
Nɛrɔ ná má há wɩ onni wuú dí, Nyuutɩna wɩ́ɛ́ nɛ́, ʋ waá dí, ká má bʋ́bɔ́llɛ Wɩɩsɛ.
7 Á oro wuu wʋ́ʋ́ tɩɩ tɛ, ʋ hiẽsó mí, a wʋ́ʋ́ tɩɩ tɛ, ʋ sʋʋ má mɛ́.
8 Raá wómmó, á wómmó pá Nyuutɩna nɛ́, raá sʋ́sʋ́ má, áá sʋ́sʋ́ pá Nyuutɩna nɛ́.
Ɛ́ wɩ́ɛ́, raá wómmó, Nyuutɩna nɛ́ tɩ́rá, raá sʋ́sɔ́ nɛ́, Nyuutɩna nɛ́ tɩ́rá.
9 Kirisi sʋ́wɔ́ ká bɩr'isi sʋʋ mɛ́, rʋ́ʋ́ a nɩsʋsɛ rɩ́ nɩwómme wuu Nyuutɩna.
10 Beé rí sɩɛ́ tɛ, ɩ é dídí maábinɔ́ŋɔ sarɩ́ya?
Beé rí tɛ, ɩ má lʋ́lɔ́rɩ́ maábinɔ́ŋɔ?
Á wuú á ráá mʋ́ cɩ́ Wɩɩsɛ sɩ́ɛ́ nɛ́, rʋ́ʋ́ dírá sarɩ́ya.
11 Wɩɩsɛ Kɛnɔ sɩɛrʋ, ɓa pʋ́ŋsɔ́ bʋlɛ́ Nyuutɩna Wɩɩsɛ sɛ́:
«Ŋ wómmó, nɩbííne wuu sɩ́ ɓírmi tíé ŋ sɩ́ɛ́,
ká rɩ́ neŋdulí wuu píŋsíŋ Wɩɩsɛ.»
12 Ɛ́ wɩ́ɛ́, Wɩɩsɛ sɩ́ bɔ́sɩ́rá, rɩ́ nɛ́ŋ má wuu bílú nʋɔ pɔ́ʋ́.
Sɩ́ áá jɛ́ɩ́ maábinɔ́ŋɔ yikyoe
13 Á tá náŋá sarɩ́ya díí; ká rɩ́ɩ́wa sabɩɩna wɩ́ɩ́ nɛ́ a:
Sɩ́ wɩ́ɩ́ á rʋ́ʋ́ a nagbámɔ, rɩ́ɩ́ maábinɔ́ŋɔ gɛ́rʋ́ mɛ́, a a wɩ́bɔmɔ.
14 Rɩ́ ɓɩdííli ká busunnú a to páár, ʋ toó; ŋ tɩ́ŋ Nyuutɩna Zeezi mí ní zɩ́mʋ́ ɛ́.
Amá rɩ nɛrɔ púú sɩɛrʋ mɛ́ bʋlɛ́ ɓɩdííli to páár, ʋ ɓɩɛ́na nɛ ɛ́ nɛ́ tɩ́na rɩ́.
15 Rɩɩ tɩ́ŋ ɓɩdííli wɩ́ɛ́, a aa zɔ́kɩ́ maábinɔ́ŋɔ sɩɛrʋ, ʋ ɛ́, ɩ wɩ cólle mákɛ́ pɔ́ʋ́.
Nɛrɔ né Kirisi há sʋ́wʋ́ wɩ́ɛ́, sɩ́ɩ́ ɓɩdííli wɩ́ɛ́ tɩ́ŋ a rʋ́ʋ́ zɔ́kʋ́ tɩɩ.
16 Wɩ́ɩ́ ná ɩ́ há néé rʋʋ wéró a pɛ́ɩ́wa, ɩ́ sɩ́ lo rʋ́ʋ́ a hagaasɛ a pá náŋa.
17 Wɩɩsɛ kuótɔ́ɔ́ sɩɛrʋ wɩ́fɩɛŋsɛ rá to ɓɩdííle rɩ́ nyɔɔlɔ́.
Ʋ wɩ́fɩɛŋsɛ nɛ́ ká, tékétéké rɩ́ tɛŋfɩ́ɛ́l, arɩ́ satɔrɔ́ ná Wɩɩsɛ Sabɩɩna háá tɛɛ́.
18 Nɛrɔ ná wuu há tɩŋ ɛ́ mɛ́ a tʋŋ aá pá Kirisi, Wɩɩsɛ có tɩ́na, ká rɩ́ nɩbííne má bʋlʋ́ wɩ́ɛ́ wéró.
19 Ɛ́ wɩ́ɛ́, á a wɩ́ɛ́ ná há sɩ́ lo rí tɛŋfɩ́ɛ́l mɩ́ŋrá pɛ́kɛ, wɩ́ɛ́ ná há sɩ́ súúrírá yardá.
20 Sɩ́ ɓɩdííli wɩ́ɛ́ tɩ́ŋ zɔkɛ Wɩɩsɛ há tʋ́ŋ tʋtʋmɩ́ ná.
Ʋ ká taŋá rɛ́, ɓa wo ɓɩdííli wuu ní aá dí.
Amá rɩɩ́ dí ɓɩdííli, ká rɩ́ɩ́ maábinɔ́ŋɔ tɩŋ ɛ́ wɩ́ɛ́ a wɩ́bɔmɔ, ʋ wɩ weri.
21 Ɛ́ ná há wéró ní ká:
Sɩ́ namɩɛ dí, a sɩ́ dɩvɛ́ŋ* nyɔ́, a sɩ́ óŋ dí, rʋ́ʋ́ a nagbámɔ a pɛ́ɩ́ maábinɔ́ŋɔ, rʋ́ʋ́ tɩŋ ráŋ a ɓal.
22 Ɩ sabɩɩna há kɔ́ʋ́ ná wɩ́ɩ́ né mʋ́l mɛ́, lo rʋ́ʋ́ ɛ́ɩ́ rɩ́ Wɩɩsɛ pɛ́kɛ wɩ́ɩ́.
Nɛrɔ ná háá já rʋ́ʋ́ a wɩ́ɩ́, a kɩ́ɛ́lɛ rʋʋ ɛɛ wéró, ʋ ná wér.
23 Amá nɛrɔ ná há ná ɓɩdííli, a kɩ́ɛ́lɛ rʋʋ díí wɩ weri, ká ʋ dí, Wɩɩsɛ sarɩ́ya yó tɩ́na, bee wɩ́ɛ́ ʋ wɩ Wɩɩsɛ yardá ɛ́ɛ́, rɩ ɛ́ wéró ká ʋ a.
Wɩ́ɩ́ ná wuu sɩɛ́ ɩ há wɩ Wɩɩsɛ yardá ɛ́ɛ́, rʋʋ wéró ká ɩ a, wɩ́bɔmɔ nɛ́ ɛ́.