Ɩ́ zíl gʋ́vɛ́rnɩ́máŋ tíŋtɩ́náwa
13
1 Nɛrɔ wuu mɔhɔ̃́ rʋ́ʋ́ zízíl gʋ́vɛ́rnɩ́máŋ tíŋtɩ́náwa nɩhɩɛ̃́sɛ nʋɔ.
Tíŋ wuu lɛ́ Wɩɩsɛ nɛ́.
Nɩɛ ná wuu há ké tíŋ dɩhɛ̃́, Wɩɩsɛ nɛ́ bílwó ráŋ.
2 Ɛ́ wɩ́ɛ́, nɛrɔ ná há vɛ́ tíŋtɩ́náwa nʋɔ, Wɩɩsɛ há có rɩ́ wɩ́ɛ́ vá ɛ́ nɛ́, ʋ vɛ.
Nɩɛ ná sɩɛ́ háá a ɛ́, ɓa pɔ́sɛ́ sarɩ́ya nɛ́ aá héwó tɩɩ mɛ́.
3 Nɛrɔ ná háá a wérí, ʋ wɩ tíŋtɩ́náwa ná fá, bɔ́ŋbɔ́ŋ ɩ́'aarɔ nɩ́ɩ́ fɔ́wɔ́.
Rɩɩ́ já rɩ́ɩ́ sɩ́ tíŋtɩ́náwa fá, ɩ ɩ́'a wérí, ɓa sɩ́ bɩ́ɩ́ mɛ́.
4 Tíŋtɩ́na ká Wɩɩsɛ tʋtʋ́nnʋ́ rɛ́, aá jɛ́ɩ́ wérí.
Amá rɩɩ́ a bɔ́ŋbɔ́ŋ, ɩ fɩ́fá héwíŋ, Wɩɩsɛ há pɔ́ʋ́ tíŋ ná, ʋ to yɔ́ɔ́.
Ʋ ká Wɩɩsɛ tʋtʋnnɔ nɛ́, rʋ́ʋ́ tʋrɛ wɩ́tɛ'aarɔ, rʋ́ʋ́ zɩŋ rɩ́ Wɩɩsɛ cɔ́ɛ́ wɩ́ɔ́.
5 Ɛ́ nɛ́ tɛ, ʋ mɔ rɩ́ɩ́wa saŋ pá tíŋtɩ́náwa.
Ɩ́ sɩɛ́ sɩ́ ɛ́ tʋ́mʋ́, ɩ́ háá fá Wɩɩsɛ cɔwɩɩlɔ́ ná dʋŋɔ wɩ́ɛ́ nɛ́, amá ɩ́ taŋa saŋ pɔ́wɔ́, ɩ́ há néé, rɩ ɛ́ nɛ́ mɔhɛ̃́ ɩ́ sabɩɩna mɛ́.
6 Ɛ́ nɛ́ tɛ ɩ́ tútúŋ loŋpówa má.
Loŋpolaara ná má ká Wɩɩsɛ tʋtʋnna nɛ́, aá tʋ́ŋwɔ́ tʋtʋmɩ́ ɛ́.
7 Ɩ́ túŋ nɛrɔ ná wuu omo kɩŋ há mɩ́nɩ́wa mɛ́; ɩ́ túŋ loŋpó a pá nɛrɔ ná há mɔhɛ̃́ rɩ́ɩ́wa túŋ pá, a túŋ táksɩwa pá nɛrɔ ná há mɔhɛ̃́ rɩ́ɩ́wa túŋ pá; ɩ́ fá nɛrɔ ná há mɔhɛ̃́ rɩ́ɩ́wa fɔ́ʋ́, a zíl nɛrɔ ná há mɔhɛ̃́ zíle.
Ɩ́ cólli náŋá
8 Ɩ́ sɩ́ ló rɩ́ nɛ́ŋ kɩ́ŋ mɩ́nɩ́wa mɛ́.
Náŋá cólle kɩŋ dʋŋɔ nɛ́ waá tenni.
Nɛrɔ ná há cóú náŋa, Wɩɩsɛ kíŋse* kɛnɔ sɩɛrʋ wɩ́máŋsɛ wuu ní, ʋ tɩŋ ɛ́.
9 Wɩɩsɛ wɩ́máŋsɛ nyáŋ há ká:
«Sɩ́ cɔ́rmʋ tʋ́mʋ́, sɩ́ nɛrɔ ɓʋ́,
sɩ́ gá, sɩ́ nɩɛ ɓɩɛ hɩ́ɛ̃́nʋ́,»
ɓa rɩ́ náŋa ná wuu, kúó hé náŋá mɛ́ wɩ́máŋsɛ né mí ní:
«Cóllí nɔ́ŋɔ anɩ́ tɩɩ.»
10 Rɩɩ cóí nɔ́ŋɔ, ɩ wʋ́ʋ́ bɔ́ŋbɔ́ŋ a.
Rɩɩ có nɩɛ, Wɩɩsɛ kíŋse ná wuu ní, ɩ tɩŋ ɛ́.
Ɩ́ kánɩ́wa tɩɩ aá dɛllɛ Kirisi koe
11 Ɩ́ tʋŋ ɛ́, bee wɩ́ɛ́ ɩ́ ɩ̃́rá há mɩŋ tɛ́ŋ ná mɛ́ rɛ́.
Ɩ́ dóŋ mí gírki isé tɛ́ŋ péró.
Mʋ́l néé mí, laatɛ́ ɔ́sɔ́ pérírá tɛ́sɩ́ɩ́, a kɩ́llɛ tɛ́ŋ ná mɛ́, á há lá Zeezi dí.
12 Tɩ́tafɩɛla nɛ́, tɔ́ɔ́ pʋlɛ́ pérí tɛ́sɩ́ɩ́.
Á tá bíno sɩɛrʋ wɩ́'állɛ, ká pa lal gɛnnɛ su, a wólli yo pʋmmɔ sɩɛrʋ lal.
13 Á ka nɩtáŋnɛ, aá a wɩ́ɛ́ anɛ wɔhɔ sɩɛrʋ.
Á pɔ́rá tɩɩ mɛ́ rɩ́ caŋsɛ dídaarɔ́, rɩ́ nyɔɔbuké mí; a pɔ́rá tɩɩ mɛ́ rɩ́ nɩlɩɩlɩ́wɩ́ɛ́, rɩ́ wɩ́tɩɛnnɛ ɛɛ mɛ́; á pɔ́ nɛsɛ nɛɛ, rɩ́ sahaksɩ́ mɛ́.
14 Ɩ́ lo rí Nyuutɩna Zeezi Kirisi súíwa, anɛ gɛrɔ, ká sɩ́ ló rɩ́ɩ́wa sɩ́ɛ́ mɩŋ tɛŋnamɩɛ satɔrɔ́ wɩ́hɩɛ̃nɛ́ mɛ́.