Wɩɩsɛ tʋŋ pɛ́ɛ́ ŋmɛ́nɔ
12
1 Ɛ́ wɩ́ɛ́, ŋŋ́ sʋ́lɩ́wa rɛ́ maábináŋa, Wɩɩsɛ susufárʋ ná wɩ́ɛ́, ɩ́ pííwa tɩɩ wuu pá Wɩɩsɛ anɛ vʋk'ɔsɔ́ ná há wómmó, a wɩ busunnu kené, káá tɔrɛ Wɩɩsɛ sɩɛrʋ.
Ʋ ɛ́ nɛ́ ká Wɩɩsɛ cʋɔlɛ́ taŋá.
2 Ɩ́ sɩ́ dúníé né wɩ́'állɛ naa pí, amá ɩ́ lo rí Wɩɩsɛ bɩ́rsɩ́wa sabɩŋsɛ, a makɛ rɩ́ɩ́wa zɩŋ Wɩɩsɛ wɩ́cólli há kɔ́ʋ́ ná:
Ʋ ná há wéró, a ka hɩɛŋ, a cɛ́rɛ wérí.
3 A tɩŋ Wɩɩsɛ zilé ná ʋ há páŋ wɩ́ɛ́, ɩ́ nóú ná ŋ há píé aá bʋ́lɩ́wa nɛ́ŋ balá wuu rí:
Nɛ́ŋ wuu sʋ́ʋ́ tɩɩ mákʋ́ rɩ́ɩ́ kɩ́llʋ́ tɩɩ; ʋ́ʋ́ taŋa tɩŋ yardá ná Wɩɩsɛ há pɔ́ʋ́ má mɛ́, a zɩ́mʋ́ tɩɩ.
4 Nɩbííno tɛŋ nɛ́ balá, ká ʋ cɔrʋ káŋ; oro wuu rɩ́rʋ́ tʋtʋmɩ́ nɛ́.
5 Ʋ sɩɛ́ nɩhɩ̃́ ɛ́ nɛ́, á má rɩ́.
Á kánɔ́ rɛ́, ká wuu ko hé náŋá mɛ́ Kirisi mí, a a nɛ́ŋ balá, a wuu a naŋdaasɛ́, oro wuu rɩ́rʋ́ dɩhɩ̃́.
6 Wɩɩsɛ dí zilé párá wuu ní, ká ɓa wɩ náŋá nɩhɛ̃́.
Ɛ́ wɩ́ɛ́, rɩ Wɩɩsɛ pá nɛ́ŋ dóé, rʋ́ʋ́ wólli Wɩɩsɛ nʋɔ wɩ́ɛ́ laa bʋl aá pá nɩɛ, ʋ́ʋ́ bʋ́bʋl rɩ́ yardá.
7 Nɛ́ŋ ná ʋ há pɔ́ʋ́ dóé, rʋ́ʋ́ tʋŋ aá pá nɩɛ, ʋ́ʋ́ tʋŋ aá pá.
Nɛrɔ ná ʋ há pɔ́ʋ́ dóé, rʋ́ʋ́ kɩ́karmɛ nɩɛ, ʋ́ʋ́ má kɩ́karmɛ.
8 Nɛrɔ ná ʋ há pɔ́ʋ́ dóé, rʋ́ʋ́ bʋl aá dúóri nɩɛ naasɛ, ʋ́ʋ́ má bʋl aá dúóri.
Ʋ ná há púú ɓɩɛ aá pá nɩɛ, ʋ́ʋ́ pɩ́pá rɩ́ sabalá.
Ʋ ná há ká nɩɛ sɩ́dír, ʋ́ʋ́ tʋ́tʋ́mʋ́ tʋtʋmɩ́ rɩ́ kajáŋa.
Ʋ ná háá fá nɩɛ susu, ʋ́ʋ́ tʋ́tʋŋ ɛ́ arɩ́ satɔrɔ́.
9 Ɩ́ sɩ́ ló rɩ́ɩ́wa cólle a nʋɔ yɔ́ɔ́ cólle.
Ɩ́ bɛ́rɛ bɔ́ŋbɔ́ŋ, ká héíwa tɩɩ wérí wérí ɛɛ mɛ́.
10 Ɩ́ cólli náŋá wérí, a ɔsɛ búbú náŋá, anɛ mááláwa rɩ́ maábɛlɛ.
11 Ɩ́ ka kajáŋa a tʋŋ aá pá Nyuutɩna, ʋ Sabɩɩna dóé mí, ká sɩ́ tɛŋwɩtɩ́ɩ́ná á.
12 Ɩ́ jɩ́jʋɔsɛ yɩɛla ná ɩ́ há kené wɩ́ɛ́; rɩɩ́waá ná wɩɩla, ɩ́ dí nyamma; ɩ́ ɔsɛ aá cʋɔlɛ Wɩɩsɛ wérí.
13 Ɩ́ pɩ́pɛ́ɩ́wa maábináŋa ná há lá Wɩɩsɛ dí mí, arɩ́ onni ná ɓa háá jɛɛ́; ɩ́ cakɛ aá la nɩhʋɔra wérí.
14 Ɩ́ sʋl Wɩɩsɛ rʋ́ʋ́ hé bárka pá nɩɛ ná háá wálmɩ́wa, ɩ́ sʋl rʋ́ʋ́ hé bárka ká sɩ́wɔ́ zɔ́kʋ́.
15 Ɩ́ pɛ́ nɩɛ ná háá jʋɔsɛ́ mɛ́ aá jʋɔsɛ; ká pɛ́ nɩɛ ná háá wié mí aá wi.
16 Ɩ́ wúólíwa sɩɛnnɛ pá náŋá.
Ɩ́ sɩ́ ló rí dúníé yɩjɔɔ gɩŋgárʋ kánɩ́wa, ɩ́ taŋa ja múúríŋ tɩɩ wɩ́ɛ́.
Ɩ́ sɩ́ɩ́wa tɩɩ píí makɛ wɩ́zɩ́nná.
17 Ɩ́ sɩ́ bɔ́ŋbɔ́ŋ tʋ́ŋ túŋ bɔ́ŋbɔ́ŋ, nɛ́ŋ wuu mí.
Ɩ́ ɔ́ʋ́ ná há wéró, nɩɛ wuu sɩ́ɛ́ mɛ́.
18 Ɩ́ ɛ́ɩ́wa há wo ɛ́, a ja tɛŋfɩ́ɛ́l, ɩ́ rɩ́ nɩɛ wuu pɛ́kɛ.
19 Ŋ nɩcólle, ɩ́ sɩ́ áá túŋ nɩɛ ná há á wɩ́ɛ́ wɩ́wɩ́wa mɛ́, ɩ́ lo rí Wɩɩsɛ nɛ́ dúú cɔwɩɩlɔ́ ɓa nyúú; bee wɩ́ɛ́ Wɩɩsɛ Kɛnɔ sɩɛrʋ, ɓa pʋ́ŋsɔ́ bʋlɛ́ Nyuutɩna sɛ́:
«Ŋ nɛ́ tɩ́ɩ́ tɛŋbuoró,
ŋ nɛ́ tɩ́wɔ́ aa túme.»
20 Ká ɓa baa pʋ́ŋsɛ bʋlʋ́ sɛ́:
«Rɩ losu kení dɩŋdɔmɔ, ɩ pɔ́ʋ́ ɓɩdííli rʋ́ʋ́ dí;
rɩ nyinyʋɔ́sɛ kenú, ɩ pɔ́ʋ́ nyii rʋ́ʋ́ nyɔ; rɩɩ á ɛ́,
ʋ ká níŋhálá rɛ́, ɩ pa aá sákʋ́ nyúú daha.»
21 Sɩ́ ló rí bɔ́ŋbɔ́ŋ ɛɛ wóllí.
Taŋa a wɩ́were, a dí dóé bɔ́ŋbɔ́ŋ ɛɛ nyúú.