10
1 Maábináŋa, ŋ sɩɛrʋ wɩ́cólli wuu rɩ́rɩ́ŋ wɩsʋlɔ́ nɛ́ ká, rɩ́ Wɩɩsɛ la Zuwifiwa tá.
Ɛ́ nɛ́ ŋ sʋ́sʋ́lʋ́ rɩ́ aá pɔ́wɔ́.
2 Ŋ wúóló aá bʋlɛ́ ɓa kéŋ kajáŋa é rí, Wɩɩsɛ wɩ́ɛ́ mɛ́, amá taŋa, wɩ́zɩmɛ toó kajáŋa nɛ́, ɓa ka.
3 Ɓa wɩ ŋmɛ́nɔ ná Wɩɩsɛ há mákɛ́, rɩ́ nɩɛ tɩŋ a a tékétékéwa ʋ sɩ́ɛ́ mɛ́ ɛ̃, ká má bílwó tɩɩ tékétéké ŋmɛ́nɔ.
Ɛ́ wɩ́ɛ́, ɓa wɩ Wɩɩsɛ tékétéké ŋmɛ́nɔ ná ʋ há makɛ́ tɩ́ŋɛ́.
4 Kirisi sɩɛ́ kúó a zíl Wɩɩsɛ kíŋse* ná wuu, a kaa mʋ́ cesi; ɛ́ wɩ́ɛ́, nɛrɔ ná wuu há lá Zeezi Kirisi wɩ́ɛ́ dí, ʋ ká tékétéké Wɩɩsɛ sɩ́ɛ́ mɛ́.
Laatɛ́ pérí nɛrɔ ná wuu há lá Nyuutɩna wɩ́ɛ́ dí
5 Moyizi* há pʋ́ŋsɛ́ bʋl tékétéké ná há lɛ́ Wɩɩsɛ kíŋse ná wɩ́ɛ́, ʋ sɛ́:
«Rɩɩ wo ɛ́ wɩ́ɛ́ wuu nʋɔ zíl,
ɓa sɩ́ pɛ́ɩ́ hiẽsó.»
6 Amá tékétéké ná há lɛ́ yardá wɩ́ɛ́, ʋ sɛ́:
«Sɩ́ɩ́ tɩɩ mɛ́ bɩ́ɩ́nʋ́ káá bʋlɛ́:
‹Áŋ rɩ́ɩ́ á rʋ́ʋ́ zɩ́ bána, a ka Kirisi kaa tuwi?›
7 Sɩɛ́ báá sɩ́ bʋ́l bʋlɛ́:
‹Áŋ rɩ́ɩ́ á rʋ́ʋ́ zʋ tíé mʋ́l, a ka Kirisi bɩrlɛ sʋsɛ mɛ́?› »
8 Ʋ sɩɛ́ bʋ́lɔ́ bʋlɛ́ beé rí?
Ʋ sɛ́:
«Wɩ́bʋlɛ mɩ́nɩ́ laka, a mɩ́nɩ́ nʋɔ mɛ́, a mɩ́nɩ́ sɩɛrʋ.»
Ɛ́ wɩ́bʋlɛ nɛ́ ká yardá labáárɛ ná wɩ́ɛ́, á háá bʋlɛ́.
9 Rɩɩ cɩ́ nɩɛ sɩ́ɛ́ mɛ́, a wúrí nʋɔ mɛ́, a bʋlɛ́ Zeezi ká Nyuutɩna, a laa dí rɩ́rɩ́ sɩɛrʋ wuu rɩ Wɩɩsɛ íllú sʋʋ mɛ́, Wɩɩsɛ sɩ́ lɛ́ɩ́ tá.
10 Rɩɩ lá Zeezi dí a rɩ́rɩ́ sɩɛrʋ wuu, Wɩɩsɛ sɩ́ bʋlɩ́ ká tékétéké; rɩɩ cɩ́ nɩɛ sɩ́ɛ́ má mɛ́, a wúrí nʋɔ mɛ́ bʋlɩ́ mɩŋ Kirisi har, Wɩɩsɛ sɩ́ lɛ́ɩ́ tá.
11 Ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ bʋlɛ́:
«Nɛrɔ ná wuu há lɔ́ʋ́ wɩ́ɛ́ dí,
ʋ wɩ fa'ɩ́ɔ̃́ bʋl.»
12 Ɛ́ wɩ́ɛ́, caksɛ́ to Zuwifiwa rɩ́ nɩɛ ná há to Zuwifiwa pɛ́kɛ.
Ɓa wuu Nyuutɩna nɛ́ balá; nɩɛ ná wuu há yɩ́rɛ́ aá hóú mí, ʋʋ́ pɛ́wɔ́ mɛ́ wérí.
13 Ɛ́ nɛ́ Wɩɩsɛ Kɛnɔ sɩɛrʋ ɓa sɛ́:
«Nɛrɔ ná wuu há yɩ́rɛ́ aá hé Nyuutɩna mɛ́,
ʋ sɩ́ lɔ́ʋ́ tá.»
14 Ɓa sɩɛ́ a ɛrɛ́ káá yɩ́rɩ́ hé Nyuutɩna mɛ́, rɩ ɓa wʋ́ʋ́ lɛ́ɛ́ dí?
Ɓa sɩɛ́ a ɛrɛ́ káá lɔ́ʋ́ rɩ́ɩ́ dí, rɩ ɓa wʋ́ʋ́ wɩ́ɛ́ nɩ́ɛ́?
Ɓa sɩɛ́ a ɛrɛ́ é rí, rɩ́ɩ́ nʋ́ʋ́ wɩ́ɛ́, rɩ nɛ́ŋ wɩ bʋ́lɛ́ pɔ́wɔ́?
15 Ɓa sɩɛ́ báá a ɛrɛ́ rɩ́ɩ́ bʋ́lʋ́ wɩ́ɛ́, rɩ ɓa wɩ nɩɛ tʋ́mɛ́ rɩ́wɔ́ lɩɩ bʋl?
Anɛ ɓa há bʋ́l ɛ́ Wɩɩsɛ Kɛnɔ sɩɛrʋ a bʋlɛ́:
«Labaarɩwero bʋ́bʋlla ná koe kéŋ satɔrɔ́.»
16 Amá ɓa wuu wɩ Labaarɩwero ná sáŋɛ́.
Ezayi* fa bʋ́l wɩ́ɩ́ né bʋlɛ́:
«Nyuutɩna, áŋ rɩ́ lárá wɩ́bʋlɛ́ ná dí?»
17 Ɩɩ́ nɛ wɩ́ɩ́ nɛ́, a laa dí, ká wɩ́ɩ́ ná sɩɛ́ há mɔhɩ̃́ nɩɩ nɛ́ ká, Kirisi wɩ́ɛ́.
18 Ŋ sɩɛ́ á rɩ́ŋ bɔsɛ wɩ́ɩ́ rɛ́:
Zuwifiwa wɩ Labaarɩwero ná nɩ́ɛ́?
Ɓa nɩ́ɔ́ wérí.
Wɩɩsɛ Kɛnɔ sɩɛrʋ ɓa sɛ́:
«Bʋ́bʋlla liŋó céŋ tíé nyúú wuu,
dúníé wuu ní nɩ́wɔ́ wɩ́bʋlɛ́.»
19 Ŋ báá háá bɔ́sɛ́ rɛ́:
Ɩzɩrayɛl nɩɛ sɩɛ́ ha wɩ nɩ́ɛ́ nɛ́?
Ná Moyizi há lá sɩ́ɛ́ a bʋl wɩ́ɩ́ ná, ʋ sɛ́ Wɩɩsɛ sɛ́:
«Ŋ sɩ́ lo rɩ́ɩ́wa tɛŋ búbuori duo ná há tóŋ duo wɩ́ɛ́,
ká rɩ́ɩ́wa cɔ́ɛ́ wɩ́wɛ duo ná há wɩ wɩ́zɩmɛ kené.»
20 Ezayi kɔ́llɔ́ bʋl má tɩɩ bʋlɛ́ Wɩɩsɛ sɛ́:
«Nɩɛ ná fa há wɩ́ŋ ja, ɓa nɛ́ túkíŋ mí,
ŋ mákɩ́ŋ tɩɩ pá nɩɛ ná há wɩ́ŋ wɩ́ɛ́ bɔ́sɛ́.»
21 Ká Ɩzɩrayɛl é wɩ́ɛ́, ʋ sɛ́:
«Ŋ tɛ́rɩ́ŋ nɛ́sɛ tápʋl pírmí wuu, a caasɛ duó oro nɩɛ há ká dɩlhɔtɩ́ɩ́ná, aá vɛ wɩ́ɛ́.»