Wɩɩsɛ Sabɩɩna tɩɩ sɩ́rá ká Wɩɩsɛ bɛlɛ nɛ́
8
1 Ɛ́ nɛ́ tɛ, Wɩɩsɛ báá wɩ sarɩ́ya díí yo nɩɛ ná há lá Zeezi dí, ɓa rɩ́rʋ́ a balá.
2 Á rɩ́ Zeezi Kirisi há ká balá ɛ́, ʋ Sabɩɩna* nɩ́ɩ́ párá hiẽsó.
Ʋ nɛ́ lárá tá wɩ́bɔmɔ rɩ́ sʋʋ wuu nɛ́sɛ mɛ́.
3 Wɩɩsɛ kíŋse* ná Moyizi há pʋ́ŋsɛ́, há wʋ́ʋ́ ná wuó a, a tɩŋ nɩbííne há wʋ́ɔ́ wuó zíl wɩ́ɛ́, Wɩɩsɛ tɩɩ tʋ́ŋ ɛ́ tʋtʋmɩ́.
Ʋ tɩɩ Bio ní, ʋ tá ʋ ko bɩrmɛ nɩbíŋ, anɩ́rá, ʋ kaa ɔsɛ vʋk, a la nɩbííne wɩ́bɔmɔ tá, ká tɩŋ ɛ́ mɛ́, a dí wɩ́bɔmɔ ná há mɩŋ nɩbííno mí sarɩ́ya.
4 Ʋ sɩɛ́ tʋ́ŋ ɛ́, a makɛ ráá nɩ́ɛ́ ná háá va Wɩɩsɛ Sabɩɩna cólle mí, ká wɩ tɛŋnamɩɛ cólle míí va, ráá wólli a wɩ́ɛ́ ná Wɩɩsɛ kíŋse há sɛ́ nɩɛ a nɛ́.
5 Nɩɛ ná wuu háá va tɛŋnamɩɛ cólle sɩɛrʋ, tɛŋnamɩɛ wɩ́ɛ́ nɛ́ mɩ́ŋwɔ́ nyúú mí, ká nɩɛ ná háá va Sabɩɩna cólle mí, Sabɩɩna wɩ́ɛ́ nɛ́ mɩ́ŋwɔ́ má nyúú mí.
6 Tɛŋnamɩɛ wɩ́jaalɛ́ é mí cúme ká sʋʋ nɛ́, amá Sabɩɩna wɩ́jaalɛ́ é mí cúme ká hiẽsó rɩ́ tɛŋfɩ́ɛ́l nɛ́.
7 Nɩɛ ná wuu há cúŋ tɛŋnamɩɛ wɩ́ɛ́ cólle mí, ɓa ká Wɩɩsɛ dɩŋdɔma nɛ́; ɓa wɩ Wɩɩsɛ kíŋse ná tɩŋ, ɓa wʋ́ɔ́ wuó saŋ má wuu.
8 Nɩɛ ná háá va tɛŋnamɩɛ cólle sɩɛrʋ, ɓa wɩ wuo a, aá tɔrɛ Wɩɩsɛ sɩɛrʋ.
9 Amá ɩ́ é, ɩ́ wɩ tɛŋnamɩɛ cólle mí níí va, ɩ́ɩ́ va Wɩɩsɛ Sabɩɩna ná há mɩ́nɩ́wa sɩɛrʋ cólle mí ní.
Rɩ Kirisi Sabɩɩna to nɛ́ŋ mɛ́, Kirisi wɩ tɩ́na tɛ.
10 Rɩ Kirisi ní mɩ́nɩ́wa mɛ́, tɛŋnamɩɛ sɩ́ sʋwɛ, a tɩŋ wɩ́bɔmɔ wɩ́ɛ́; ká rɩ́ Wɩɩsɛ Sabɩɩna ná há mɩ́nɩ́wa mɛ́ a hiẽsó, a pɛ́ɩ́wa, ɩ́ há ká tékétéké Wɩɩsɛ sɩ́ɛ́ mɛ́ wɩ́ɛ́.
11 Rɩ Wɩɩsɛ ná há ílli Zeezi sʋʋ mɛ́ Sabɩɩna nɛ́ mɩ́nɩ́wa mɛ́, ʋ sɩ́ tɩŋ ɛ́ Sabɩɩna dóé mí, a íllíwa tɛŋnamɩɛ ná há wuolé aá sʋwɛ.
12 Ɛ́ wɩ́ɛ́ sɩɛ́, maábináŋa, ʋ wɩ mɔhɛ̃́ ráá tʋ́tʋŋ tɛŋnamɩɛ cólle, anɛ ʋ kɩŋ há mɩ́ŋrá nyúú, á tʋŋ aá túŋ.
13 Rɩɩ́wa tɩ́ŋ tɛŋnamɩɛ cólle é mí ní, ɩ́ɩ́ sʋ́sɛ́ nɛ́; ká rɩɩ́wa nɛ tɩ́ŋ Wɩɩsɛ Sabɩɩna cólle mí, a lo tɛŋnamɩɛ wɩ́jaalɛ́ sʋsɛ, ɩ́ sɩ́ ná hiẽsó.
14 Nɩɛ ná wuu há lóé Wɩɩsɛ Sabɩɩna tɩ́ɛ́sɩ́wɔ́ aá va, ɓa ká Wɩɩsɛ bɛlɛ nɛ́.
15 Wɩɩsɛ Sabɩɩna ná há mɩ́nɩ́wa sɩɛrʋ, ʋ wɩ́ɩ́wa píé makɛ yósí, rɩ́ɩ́wa fɩ́fá héwíŋ.
Amá ɛ́ Sabɩɩna yɩr mɛ́ nɛ́, ɩ́ a Wɩɩsɛ bɛ́lɛ́, a tɩ́ŋʋ́ mɛ́ cáási aá yɩ́rɛ Wɩɩsɛ bʋlɛ́:
«|iAba|d! Ŋ Ana!» 16 Wɩɩsɛ Sabɩɩna tɩɩ bʋ́lɔ́ párá sabɩŋsɛ, ráá ká Wɩɩsɛ bɛlɛ nɛ́, á zɩŋ ɛ́ mɛ́.
17 Á sɩɛ́ há kɔ́ʋ́ bɛ́lɛ́, á tɛ liwe ná wuu ʋ há bílú bɛlɛ mɛ́ nɛ́.
Á rɩ́ Kirisi ní tʋ́ŋ Wɩɩsɛ liwe wuu mí!
Raá nɛ́ tɩ́ŋ Kirisi mí a ná wɩɩla, á sɩ́ tɩ́ŋʋ́ mɛ́ a zʋ́ʋ́ píŋ sɩɛrʋ.
Wɩɩsɛ sɩ́ a ráá zʋ́ʋ́ píŋ sɩɛrʋ
18 Wɩɩsɛ cíé háá á rʋ́ʋ́ makɛ píŋ ná duo párá, ŋ bɩ́ɩ́nɔ́ ʋ rɩ́ zaa wɩɩla né wɩ náŋá wuó máŋsɛ.
19 Dúníé wuu pɛ́ sɩ́ɩ́ aá dɛllɛ kal ná Wɩɩsɛ háá kóó mákʋ́ bɛlɛ píŋ ní.
20 Dúníé né Wɩɩsɛ há ɛɛ, ʋ zʋ́ɔ́ ɓal wɩ́ɛ́ ná há kéŋ dóé ká wɩ mʋ́l kené sɩɛrʋ.
Ʋ sɩɛ́ to anɛ ʋ má có, Wɩɩsɛ nɛ́ lóé ʋ ɓal ɛ́ wɩ́duoru mí.
Yɩɛla taŋa ha mɩ́nɔ́ rɛ́, a pá dúníé,
21 rɩ kal oro, ɓa sɩ́ ko lɔ́ʋ́ tá wɩ́ɛ́ ná háá zɔ́kʋ́ a kánʋ́ anɛ yómó, nɛ́sɛ mɛ́, rʋ́ʋ́ má ko tɩ́llʋ́ tɩɩ anɛ Wɩɩsɛ bɛlɛ háá zʋ píŋ sɩɛrʋ, rɩ́ɩ́ tɩ́llɩ́wɔ́ tɩɩ ɛ́.
22 Ká á sɩɛ́ ɩ́ɔ̃́ arɩ́ zaa wuu, dúníé né Wɩɩsɛ há ɛ́ɛ́, haá ná wɩɩla rɛ́, aá hiĩni anɛ hápuuko háá ko aá lʋl aá hiĩni ɛ́.
23 Dúníé né dʋŋɔ rá sɩɛ́ wɩ ɛ́ɛ́ hiĩni, á má nɩɛ ná Wɩɩsɛ há púú Sabɩɩna pá, anɛ ʋ oŋpállɛ oŋdʋʋnɛ, á máá hiĩni ɛ́ nɛ́ á sɩɛrʋ rɩ́, aá dɛllɛ tɛ́ŋ ná mɛ́ Wɩɩsɛ ná há lárá tá, háá kóó bɩ́rsɩ́rá tɛnnɛ, káá pírá rɩ́ɩ́ mákʋ́ bɛlɛ tɩɩ.
24 Wɩɩsɛ lárá tá rɛ́, ʋ sɩɛ́ ha ká yɩɛla nɛ́.
Rɩɩ sɩ́ɩ́ kúó ná omo ná ɩ háá yɩɛlɛ́, ʋ báá to yɩ́ɛ́lá.
Áŋ rɩ́ sɩɛ́ báá yɩɛlɛ omo ná ɩ sɩ́ɩ́ há néé?
25 Amá ráá nɛ́ kéŋ omo ná á há wʋ́ʋ́ néé yɩɛla, á sɩ́ ka nyamma aá dɛllɛ.
26 Ɛ́ nɛ́ Wɩɩsɛ Sabɩɩna* ko aá pɛ́rá mɛ́, á há ká pʋ́ɔ́llɛ́ wɩ́ɛ́.
Á wɩ Wɩɩsɛ cʋɔlɛ́ yɛ́rɛ́ má ɛ̃.
Ɛ́ nɛ́ Sabɩɩna laa cʋɔlɛ aá párá, arɩ́ hiĩné ná, nʋɔ há wɩ wuo la áá bʋl.
27 Wɩɩsɛ háá muuli nɩbííne sɩɛnnɛ, ʋ ɛ̃ wɩ́ɩ́ ná wɩ́ɛ́ Sabɩɩna háá cʋ́ɔ́lʋ́, bee wɩ́ɛ́ Wɩɩsɛ cólle sɩɛrʋ nɛ́, ʋ sʋ́lʋ́ aá pá Wɩɩsɛ nɩɛ.
28 Á ɩ́ɔ̃́ rɩ́ nɩɛ ná há có Wɩɩsɛ, a ɔ́ʋ́ nɩtʋɔsɛ́ fól wuu, rɩ wɩ́ɩ́ wuu pérwó, ɓa wér wɩ́ɛ́ nɛ́.
29 Wɩɩsɛ sɩɛ́ há tʋ́ɔ́sɛ́ nɩɛ ná fól wuu, ʋ sʋ́ʋ́ sɩ́ bɩ́rsɩ́wɔ́, rɩ́wɔ́ nʋ́ʋ́ Bio nɩɩsɔ, a makɛ rʋ́ʋ́ Bio a maábikana máálá.
30 Wɩɩsɛ há tʋ́ɔ́sɛ́ nɩɛ ná fól wuu, ɓa nɛ́ ʋ yɩ́rɛ; nɩɛ ná ʋ há yɩ́rɛ́, ʋ ɔ́ɔ́ ɓa a tékétéké ʋ sɩ́ɛ́ mɛ́; nɩɛ ná há ká tékétéké ʋ sɩ́ɛ́ mɛ́, ʋ pí píŋ má pɔ́wɔ́.
Wɩɩsɛ cólle zénó
31 Ráá sɩɛ́ baa bʋl beé súúri ɛ́ wɩ́ɛ́ mɛ́?
Rɩ Wɩɩsɛ mɩ́ŋrá har, áŋ rɩ́ wórá mɛ́ aá cɛ́?
32 Wɩɩsɛ wʋ́ʋ́ Bio tɩɩ mɛ́ kɛ́rɛ́, ká kaa pá, ɓa ɓʋ́, á wuu wɩ́ɛ́.
Ɛ́ wɩ́ɛ́, ʋ sɩ́ tɩ́ŋʋ́ Bio mí, a pi onni wuu párá yɔ́ɔ́.
33 Áŋ rɩ́ɩ́ á rʋ́ʋ́ pi zɔ́krʋ cɩ́ɩ́nɛ Wɩɩsɛ nɩtʋɔsɛ́?
Nɛ́ŋ toó, bee wɩ́ɛ́ Wɩɩsɛ tɩɩ nɛ́ sɛ́ ɓa ká tékétéké.
34 Áŋ rɩ́ɩ́ á rʋ́ʋ́ díwó sarɩ́ya a bʋl yówó?
Nɛ́ŋ toó, Zeezi Kirisi sʋ́wɔ́, ɛ́ há kɩ́ɔ̃́, ʋ bɩ́rɔ́ isi sʋʋ mɛ́, a mɩŋ Wɩɩsɛ néduu, a cʋɔlɛ Wɩɩsɛ aá párá.
35 Kirisi córá, áŋ rɩ́ɩ́ á rʋ́ʋ́ kɛ́rɛ rʋ́ʋ́ sɩ́rá cóllú?
Wɩɩla nɛ́ yáá?
Sazɔkɔ́ nɛ́ yáá?
Nɩwálmɔ nɛ́ yáá?
Losu ní yáá?
Yaársɛ nɛ́ yáá?
Dʋŋsʋ́ʋ́rwɩ́ɩ́ nɛ́ yáá?
Sʋʋ nɛ́?
36 Ɓa pʋ́ŋsɛ Wɩɩsɛ Kɛnɔ sɩɛrʋ má bʋlɛ́:
«Ɩ wɩ́ɛ́ nɛ́ ɓa tɩŋ aá járá ɓʋ́ɩ́ kál wuu,
aá árá anɛ pieŋse,* ɓa há kɛ́sɛ́ aá lɛ dɩɓʋ́ɩ́.»
37 Amá ɛ́ wɩ́ɛ́ wuu sɩɛrʋ, á nɛ́ ha ká bɩbara tɩɩ, a tɩŋ nɛrɔ ná há córá dóé yɩr mɛ́.
38 Ŋ ɩ́ɔ̃́ arɩ́ taŋá, wɩ́ɩ́ toó aá kɛ́rɩ́rá rɩ́ Wɩɩsɛ cólle mí:
sʋʋ wɩ wo, hiẽsó wɩ wo, malɩ́kawa wɩ wo, dóé tɩ́náwa wɩ wo, zaa wɩ́ɛ́ rɩ́ cíé wɩ́koolé wɩ wo,
39 áŋwóŋwa wɩ wo, nyúú rí bɩbarɩ́ wɩ wo, tíé rí bɩbarɩ́ wɩ wo, oŋ'máálɛ oro wuu wɩ wo.
Wɩɩsɛ há tɩ́ŋrá Nyuutɩna Zeezi Kirisi mí a cóllírá ɛ́, óŋ wuu toó, aá kɛ́rɛ ɛ́ cólle mí.