Zeezi laadííro lɔ́ʋ́ tɩɩ Wɩɩsɛ kíŋse mí
7
1 Maábináŋa, ɩ́ ɛ̃ wɩ́ɩ́ ná ŋ háá já rɩ́ŋ bʋl má tɩɩ rɛ́.
Ɩ́ ká nɩɛ ná há ɛ̃ kíŋse ní.
Kíso kéŋ dóé nɛrɔ ná há wómmó dʋŋɔ rɩ́ nɛ́.
2 Ɛ́ wɩ́ɛ́, rɩ háálɔ nɛ́ já bála, kíso kéŋwó hé náŋá mɛ́.
Ʋ bála hiẽsó wuu mí, ʋ bála nɛ́ tʋ́ʋ́; amá rʋʋ bála kúó rʋʋ sʋ́wɔ́, ʋ tʋ́ʋ́ tɩɩ, ɛ́ kíso báá wʋ́ʋ́ wo.
3 Rʋʋ bála nɛ́ ha mɩnɛ́, ká rʋ́ʋ́ lɩɩ mʋ́ ja bál nɔ́ŋ, ɓaá yɩ́rʋ́ hácɔrmɔ nɛ́; amá rʋʋ bála nɛ́ sʋ́wɛ́, ɛ́ kíso báá wʋ́ʋ́ wo.
Ɛ́ é, ʋ wo bála nɔ́ŋɔ jɩ́ja, ká rɩ́wɔ́ sʋ́ʋ́ káá yɩ́rɛ hácɔrmɔ.
4 Maábináŋa, ʋ sɩɛ́ ká ɛ́ nɛ́, ɩ́ má rɩ́.
Kíso cɔɔ rɩ́, ɩ́ tɩ́ŋ Kirisi mí sʋsɛ rɛ́, ká rɩ́ nɛ́ŋ nɔ́ŋ wóllíwa tɩ́llɛ.
Nɛrɔ ná há sʋ́wɛ́ ká bɩr'isi, ʋ nɛ́ sɩ́sɛ́nyɛ tɩ́ɩ́wa, a makɛ rɩ́ɩ́wa ɩ́'a wɩ́ɛ́ ná háá tɔrɛ Wɩɩsɛ sɩɛrʋ.
5 Tɛ́ŋ ná mɛ́, á fa háá tʋ́ŋrá tɛŋnamɩɛ cólle, kíso ná yíkí wɩ́bɔmɔ hɩɛŋ hérá mɛ́, á ɩ́'a wɩ́ɛ́ ná há kéŋrá aá pá sʋʋ.
6 Amá mʋ́l néé mí, Wɩɩsɛ lárá tá kíso nɛ́sɛ mɛ́, á sʋsɛ ká tá wɩ́ɛ́ ná wuu fa háá gɛ́rɩ́rá, anɛ bɩnajaa sɩɛrʋ, á mɩŋ.
Ɛ́ wɩ́ɛ́, á wo ŋmɛ́ŋfɛ́lʋ́ pi, a tʋŋ aá pá Wɩɩsɛ, ʋ Sabɩɩna dóé sɩɛrʋ, ká báá sɩ́ áá nɛ́ tésíé mí, á fa háá tɩŋ kíŋse.
Wɩɩsɛ kíŋse ná tɛɛ mʋ́l ní beé rí?
7 Á sɩɛ́ já ráá bʋlɛ́ beé rí?
Kíso ká wɩ́bɔ́ŋ rɛ́?
Aɩ́, ɛ́ rá!
Kíso taŋa ɔ́ɔ́, ŋ zɩŋ óŋ ná há ká wɩ́bɔmɔ nɛ́.
Ŋ fa waá zɩŋ rɩ́ hɩɛ̃nɛ́ ká wɩ́tɔ́k, rɩ kíso há sɛ́:
«Sɩ́ɩ́ nɔ́ŋɔ omo hɩ́ɛ̃́nʋ́» wɩ́ɛ́ rá.
8 Kíso mɩnɛ́ nɛ́ tɛ, wɩ́bɔmɔ ná ŋmɛ́nɔ, a pɔsɛ wɩ́kíse dúó wuu hɩɛ̃nɛ́ héŋ sɩɛrʋ.
Rɩ Moyizi há pʋ́ŋsɛ kíŋse* ná wɩ́ɛ́ rá nɛ́, wɩ́bɔmɔ ká sʋ́wɛ́.
9 Ŋ fa há wɩ kíŋse ná ɛ̃, ŋ ká nɩwómmí rí; amá kíŋse ná kúó, wɩ́bɔmɔ ná há ká sʋ́wɛ́, bɩr'isi a dí dóé, káŋ nɛ́ bɩrsʋwɛ.
10 Ɛ́ nɛ́ tɛ, ŋ é rɩ́, kíŋse ná fa há mɔhɛ̃́ rɩ́wɔ́ kánɩ́ŋ mʋ́ hé hiẽsó mí, ɓa bɩ́rɔ́ kánɩ́ŋ mʋ́ pá sʋʋ nɛ́.
11 Kíŋse ná nɛ́ ɛ́ɛ́ wɩ́bɔmɔ ná gbel, a nyɩ́sɩ́ŋ kaa mʋ́, a pi ɛ́ kíŋse tɩɩ tɩɩ ɓʋ́ŋ.
12 Ɛ́ wɩ́ɛ́, Wɩɩsɛ kíŋse ná wɩ busunnu kené, ɓa sɩɛrʋ wɩ́máŋsɛ má wɩ busunnu kené; ɓa wuu ní ká tékétéké, a a wérí.
13 Oŋwero ná sɩɛ́ sɩ́ ko a sʋ́ʋ́rɩ́wɩ́ɩ́?
Aɩ́!
Ɛ́ rá.
Wɩ́bɔmɔ nɛ́ ká sʋ́ʋ́rɩ́wɩ́ɩ́, a tɩŋ ɛ́ mɛ́ wúllú mʋ́l, a mákʋ́ nɩɩsɔ tɩɩ cáánɛ.
Omo ná há wéró ní, ʋ kaa bɩ́rmɩ́ŋ ɓʋ́ʋ́rɔ.
Á sɩɛ́ tɩ́ŋ wɩ́máŋsɛ ná mɛ́ nɛ́, a zɩŋ rɩ́ wɩ́bɔmɔ ɔ́sɔ́ lɔrɛ kɩ́ŋkáŋ wuu.
Wɩ́bɔmɔ wo nɩbííno
14 Á ɩ́ɔ̃́ rɩ́ kíso ná é lɛ́ Wɩɩsɛ nɛ́; amá ŋ nɛ́ ká nɩbíŋ, a wɩ dóé kené, a mɩŋ wɩ́bɔmɔ nɛ́sɛ mɛ́, anɛ yómó, ɓa yɛ́llɛ pɔ́ʋ́.
15 Ŋ báá wɩ wɩ́ɩ́ ná há keníŋ má tɩɩ ɛ̃.
Ŋ há có rɩŋ á wɩ́ɛ́ ná, ŋ wʋ́ɔ́ nɩ́ɩ́ a, ká bɩrɛ aá a wɩ́ɛ́ ná ŋ há bɛ́rɛ́.
16 Rɩŋ nɛ́ sɩɛ́ a wɩ́ɛ́ ná ŋ há wʋ́ɔ́ có, ŋŋ́ tɩŋ ɛ́ mɛ́ nɛ́ zɩŋ rɩ́ kíŋse ná Moyizi há pʋ́ŋsɛ́ wéró.
17 Ɛ́ wɩ́ɛ́, ŋ tɩɩ ra wɩ ɛ́ɛ́ a; wɩ́bɔmɔ ná há mɩ́nɩ́ŋ mɛ́ nɩ́ɩ́ ɛɛ́.
18 Ŋ ɩ́ɔ̃́ rɩ́ wɩ́wérí tóŋ mí; ŋŋ́ já rɩ́ŋ bʋ́lɩ́ŋ tɛ́ŋ né há wɩ dóé kené wɩ́ɛ́ nɛ́.
Ŋ có wérí wérí ɛɛ é rí, ká a aá gúl ní.
19 Wɩ́wero ná ŋ há cóú ɛɛ, ŋ wʋ́ʋ́ nɩ́ɩ́ a, ká bɩrɛ aá a bɔ́ŋbɔ́ŋ ná ŋ há wɩ có.
20 Ɛ́ wɩ́ɛ́, rɩŋ nɩ́ɩ́ a wɩ́ɩ́ ná ŋ há wʋ́ʋ́ có, ŋ tɩɩ rá waá a, amá wɩ́bɔmɔ ná há mɩ́nɩ́ŋ mɛ́ nɩ́ɩ́ ɛɛ́.
21 Ɛ́ nɛ́ ŋ zɩŋ wɩ́ɩ́ né há ká:
Ŋŋ́ já rɩ́ŋ a wɩ́wero, ŋŋ́ gúl ká wólli bɔ́ŋbɔ́ŋ nɛ́ aá a.
22 Ŋ có Wɩɩsɛ kíŋse ná wérí, arɩ́rɩ́ŋ sɩɛrʋ wuu.
23 Amá loo oro rɩ́ mɩ́nɩ́ŋ tɛŋ mɛ́.
Kíso oro má rɩ́ mɩŋ ráŋ, a cɩ́ Wɩɩsɛ kíso ná ŋ sabɩɩna há có mí.
Ʋ nɛ́ ɛ́ɛ́ wɩ́bɔmɔ kíso ná há mɩ́nɩ́ŋ tɛŋ mɛ́, píŋ makɛ bɩnajaa nɛ́ŋ.
24 Ŋ ká nabɔŋtɩ́ŋ fɛ́!
Áŋ láŋ mɛ́, wɩ́ɛ́ nyáŋ nɛ́sɛ mɛ́?
Ɓa yíkíŋ aá hé sʋʋ nɛ́sɛ mɛ́ nɛ́.
25 Ŋŋ́ bɔ́llɛ Wɩɩsɛ nɛ́, á Nyuutɩna Zeezi Kirisi yɩr mɛ́!
Ɛ́ wɩ́ɛ́, ŋ sabɩɩna rɩ́, ŋ tʋ́mɔ́ aá pá Wɩɩsɛ nɛ́, aá zílú kíŋse, ká ŋ tɛŋnamɩɛ cɔɔ rɩ́, ŋ tʋŋ aá pá wɩ́bɔmɔ, aá zílú nʋɔ.