Á sʋ́sɔ́ rɩ́ Kirisi, ká bɩr'isi rɩ́ Kirisi
6
1 Á sɩɛ́ já ráá bʋlɛ́ beé rí?
Ráá ha mɩŋ wɩ́bɔmɔ ɛɛ mɛ́, rɩ́ Wɩɩsɛ zilé ɔsɛ pʋrkɛ kɩ́ŋkáŋ yáá?
2 Ɛ́ rá toó!
Á sʋ́sɔ́ rɛ́ wɩ́bɔmɔ cɔɔ rɩ́; á sɩɛ́ báá cɩ́ ɛrɛ́ rɩ́ɩ́ mɩŋ wɩ́bɔmɔ ɛɛ mɛ́?
3 Á há tɩ́ŋ wɩcʋ́ɔ́lɩ́nyimuŋsi ná mɛ́ á rɩ́ Zeezi Kirisi a óŋ balá ɛ́, ɩ́ wɩ ɛ̃ ráá tɩ́ŋ ɛ́ mɛ́, á rɩ́rʋ́ a óŋ balá, ʋ sʋʋ má mɛ́ rɛ́?
4 Ɛ́ wɩ́ɛ́, nyii ná muŋsé nɩhɩ̃́ anɛ á tɩ́ŋʋ́ mɛ́, a muŋsi sʋʋ má sɩɛrʋ nɛ́, a makɛ, anɛ Wɩɩsɛ há ílli Kirisi sʋʋ mɛ́, ʋ dóé mí ɛ́, ráá má bɩr'isi sʋʋ mɛ́, aá va mɩfɛlɔ sɩɛrʋ.
5 Á rɩ́rʋ́ wuu há kúé a óŋ balá, a tɩ́ŋʋ́ sʋʋ mɛ́ ɛ́, á rɩ́rʋ́ wuu sɩ́ ko a óŋ balá má, a tɩŋ sʋʋ mɛ́ bɩr'isé mí.
6 Á sɩɛ́ zɩŋ rɩ́ Kirisi dagɛsɛ́* daha sʋʋ ná tɛ́ŋ mɛ́, ɓa ɓásʋ́ rɩ́rá die nɩɩsɔ ná é ní, a makɛ rɩ́ wɩ́bɔmɔ cólle dóé ná há mɩ́ŋrá mɛ́, rʋ́ʋ́ báá sɩ́ wóllé wuu kánʋ́, ráá báá sɩ́ wɩ́bɔmɔ yósi á,
7 bee wɩ́ɛ́ nɛrɔ ná há sʋ́wɛ́, lɔ́ʋ́ tɩɩ wɩ́bɔmɔ nɛ́sɛ mɛ́.
8 Á rɩ́ Kirisi há hé náŋá sʋsɛ, á lɔ́ɔ́ dí raá rɩ́rʋ́ sɩ́ hé náŋá lɛ sʋʋ mɛ́, aá hiẽsi arɩ́rʋ́.
9 Á ɩ́ɔ̃́ zɩŋ rɩ́ Wɩɩsɛ há ílli Kirisi sʋʋ mɛ́, ʋ báá waá sʋ́wɩ́ ná; sʋʋ báá wʋ́ʋ́ wo.
10 Kirisi sʋ́wɔ́ naasɩ́ balá dʋŋɔ nɛ́, wɩ́bɔmɔ yɩr mɛ́.
Ʋ zaa wómmó, a lo Wɩɩsɛ nɛ́ tɩ́llʋ́ mɩɩsɛ.
11 Ɛ́ wɩ́ɛ́, ɩ́ zɩŋ rɩ́ɩ́wa má sʋ́sɔ́ rɛ́ wɩ́bɔma cɔɔ rɩ́, ká lo rɩ́ Wɩɩsɛ nɛ́ tɩ́llɩ́wa mɩɩsɛ, ɩ́ rɩ́ Zeezi Kirisi há ká óŋ balá wɩ́ɛ́.
12 Ɩ́ báá sɩ́ ló rɩ́ wɩ́bɔmɔ dí dóé, tɛŋnamɩɛ né há ká ɓɩsʋwɩ́ nyúú, rɩ́ɩ́wa tʋ́tʋ́mʋ́ cólle.
13 Ɩ́ sɩ́ɩ́wa tɛŋ naŋdaasɛ lóó pá wɩ́bɔmɔ, anɛ tʋtʋ́nnʋ́ɓɩ́ɛ́, rʋ́ʋ́ kaá tʋŋ bɔ́ŋbɔ́ŋ.
Ɩ́ ká nɩɛ ná há sʋ́sɛ́ ká bɩr'isi ní; ɩ́ sɩɛ́ pííwa tɩɩ wuu hé Wɩɩsɛ nɛ́sɛ mɛ́.
Ɩ́ kánɩ́wa naŋdaasɛ wuu anɛ tʋtʋ́nnʋ́ɓɩɛ, aá a wɩ́ɛ́ ná há ká tékétéké.
14 Ɩ́ báá wɩ kíŋse* ná Moyizi* há pʋ́ŋsɛ nɩ́ɩ́ tɩŋ, ɩ́ mɩŋ Wɩɩsɛ zilé sɩɛrʋ nɛ́.
Ɛ́ wɩ́ɛ́, wɩ́bɔmɔ báá wɩ mɔhɛ̃́ rʋ́ʋ́ wóllíwa.
Mʋ́l néé mí, á ká Wɩɩsɛ yósi ní
15 Beé sɩɛ́?
Á aá zɔkɛ Wɩɩsɛ mɛ́, á há mɩŋ zilé sɩɛrʋ, ká ʋ to fɩkɛ́ ráá tɩŋ kíŋse mí yáá?
Aɩ́!
16 Ɩ́ tɩɩ ɩ́ɔ̃́, rɩɩ́wa pííwa tɩɩ rɩ́ɩ́ hé nɛ́ŋ nɛ́sɛ mɛ́, rɩ́ɩ́ tʋ́ŋ pɩ́pɔ́ʋ́, aá sáŋʋ́ sɛ́, ɩ́ bɩ́rmɛ́ ɛ́ tɩ́na yósi ní:
rɩ wɩ́bɔmɔ nɛ́, ɩ́ kɔ́ʋ́ yósi ní, ʋ kánɩ́wa aá zʋ sʋʋ sɩɛrʋ; rɩ Wɩɩsɛ nʋɔ saŋɛ́ má nɛ́, ɩ́ kɔ́ʋ́ yósi ní, ʋ kánɩ́wa aá zʋ tékétéké sɩɛrʋ.
17 Amá Wɩɩsɛ bárka!
Ɩ́ nɩɛ ná die fa há ká wɩ́bɔmɔ yósi, ɩ́ zaa lá Wɩɩsɛ wɩ́ɛ́ dí arɩ́ taŋá, a saŋ ɛ́ wɩ́ɛ́ wuu ɓa há píé kármɩ́wa.
18 Ɓa lɩ́sɩ́wa wɩ́bɔmɔ nɛ́sɛ mɛ́, ɩ́ bɩ́rmɛ́ tékétéké yósi ní.
19 Ɩ́ dɩlla zímó wɩ́ɛ́ nɩɩ mɛ́, ɛ́ nɛ́ tɛ, ŋ pi nyɛ máŋsɛ rɩ́ɩ́wa nɩ́wɔ́ mʋ́ʋ́la.
Ɩ́ die fa pííwa tɩɩ wuu hé busunnu tʋtʋmɛ́ mɛ́ nɛ́, aá tʋŋ bɔ́ŋbɔ́ŋ, a nɩ́wɔ́ yósi.
Zaa sɩɛ́, ɩ́ pííwa tɩɩ wuu hé tékétéké wɩ́ɛ́ ɛɛ mɛ́, a nʋ́ʋ́ yósi, a lo rí Wɩɩsɛ tɩ́llɩ́wa ɓóŋ.
20 Ɩ́ fa há ká wɩ́bɔmɔ yósi tɛ́ŋ ná mɛ́, ɩ́ sɩ́ɛ́ fa to tékétéké wɩ́ɛ́ mɛ́.
21 Bee nyʋɔrɛ́ sɩɛ́ ɩ́ ná ráŋ?
Ɛ́ wɩ́ɛ́ wuu zaa ká hɩ̃wɩ́ɛ́ rɛ́ a pɛ́ɩ́wa.
Ɓa dɩmʋ́tenní ká sʋʋ nɛ́.
22 Amá zaa, Wɩɩsɛ há lɛ́ɩ́wa tá, ɩ́ ɔ́ʋ́ yósi, ɩ́ wɩ́'állɛ kéŋ nyʋɔrɛ́, ɓa báá há wɩ busunnu kené wɩ́ɛ́; ɓa dɩmʋ́tenní ní ká mɩɩsɛ ná há waá tenni.
23 Wɩ́bɔmɔ túme ká sʋʋ nɛ́; amá Wɩɩsɛ há pí óŋ ná aá pá zilé ní ká, mɩɩsɛ ná há waá tenni, a tɩ́ŋrá Nyuutɩna Zeezi Kirisi mí.