Á rɩ́ Wɩɩsɛ pɛ́kɛ wéró
5
1 Ɛ́ wɩ́ɛ́, á há lá Zeezi dí, Wɩɩsɛ sɩ́ ráá ká tékétéké ʋ sɩ́ɛ́ mɛ́.
Á rɩ́ Wɩɩsɛ pɛ́kɛ sɩɛ́ wéró, a tɩ́ŋrá Nyuutɩna Zeezi Kirisi mí.
2 Ʋ mɛ́ nɛ́ á tɩŋ, á há lɔ́ʋ́ dí wɩ́ɛ́, a tuu peri Wɩɩsɛ, a zʋʋ mɩ́nʋ́ susufárʋ ná sɩɛrʋ wérí.
Ká á ka yɩɛla raá sɩ́ zʋ Wɩɩsɛ píŋ má sɩɛrʋ, a jɩ́jʋɔsɛ ɛ́ wɩ́ɛ́.
3 Wɩɩla ná á háá díé wɩ́ɛ́ nɛ́, á ɔsɛ aá jʋɔsɛ wuu.
Wɩɩla ná sɩɛ́ sɩ́ a ráá ka nyamma,
4 rɩ́ nyamma a ráá dí dóé wálmɛ sɩɛrʋ, rɩ́ ɛ́ dóé má a ráá ka yɩɛla.
5 Ɛ́ yɩɛla sɩɛ́ wɩ nɛ́ŋ tɛl, bee wɩ́ɛ́ Wɩɩsɛ bɩ́sʋ́ cólle hérá sɩɛrʋ, a tɩ́ŋ Wɩɩsɛ Sabɩɩna ná ʋ há píé párá mɛ́.
6 Tɛ́ŋ ná mɛ́ á fa há wɩ dóé wuu kené, Kirisi lá wɩ́bɔŋ'aara sʋʋ sʋwɛ, Wɩɩsɛ tɛ́ŋ makɩ́ mɛ́.
7 Nɩtékétéké má tɩɩ nyúú mí laa sʋwɛ́ ká wɩ́dúó rí; nyɛ mɛ́, nɛrɔ nɔ́ŋɔ sɩ́ ka baŋcɩpɩrɩ́, a saŋ la wɩ́wer'aarɔ nyúú mí sʋwɛ.
8 Amá Wɩɩsɛ mákrá, ʋ há córá mɔ ɛ́; bee wɩ́ɛ́ tɛ́ŋ ná mɛ́ á fa há ká wɩ́bɔŋ'áárá, Kirisi sʋ́wɩ́rá wɩ́ɛ́.
9 Ʋ sʋʋ ná yɩr mɛ́, á ká tékétéké Wɩɩsɛ sɩ́ɛ́ mɛ́.
Ɛ́ nɛ́ sɩɛ́ á zɩŋ kɩ́ŋkáŋ wuu, rʋ́ʋ́ sɩ́ lárá Wɩɩsɛ cɔwɩɩlɔ́ má mɛ́.
10 Á fa ká Wɩɩsɛ dɩŋdɔma nɛ́, ká ʋ tɩ́ŋʋ́ Bio sʋʋ ná mɛ́, a a, á rɩ́rʋ́ pɛ́kɛ a wérí.
Á rɩ́rʋ́ pɛ́kɛ zaa sɩɛ́ há wéró, ɛ́ nɛ́ rʋ́ʋ́ tɩ́ŋʋ́ Bio hiẽsó mí, a lárá tá wuu.
11 Ɛ́ má dʋŋɔ rá sɩɛ́; áá jʋ́ɔ́sʋ́, Wɩɩsɛ há tɩ́ŋrá Nyuutɩna Zeezi Kirisi mí, a a, á rɩ́rʋ́ pɛ́kɛ a wérí má wɩ́ɛ́.
Adaŋ rɩ́ Kirisi wɩ́ɛ́
12 Nɩbíŋ balá mɛ́ rɛ́ wɩ́bɔmɔ tɩŋ zʋ dúníé, wɩ́bɔmɔ má pɔsɛ sʋʋ hé dúníé mí.
Ɛ́ nɛ́ sʋʋ mɩŋ dúníé nɩbííne wuu nyúú, bee wɩ́ɛ́ ɓa wuu ká wɩbɔŋ'áárá.
13 Wɩ́bɔmɔ fa zʋ́ dúníé rí, ká Wɩɩsɛ zɩŋ púú kíŋse ná pá Moyizi.
* Ɓa sɩɛ́ fa wɩ wɩ́bɔmɔ taalɛ́ píé aá cɩ́ɩ́nɛ nɩɛ, kíso toó ná tɛ́ŋ mɛ́.
14 Amá sʋʋ é fa wo dúníé wuu ní, a kaa pɔ́ Adaŋ* mɛ́, ká kaa ko yakɛ Moyizi mí.
Ʋ ɓʋ́ʋ́sɛ nɩɛ ná má tɩɩ, ɓa wɩ́bɔmɔ há wɩ Adaŋ Wɩɩsɛ nʋɔ vɛɛ ná nɩhɛ̃́.
Adaŋ fa ká nɛrɔ ná háá kué cuunó ní.
15 Adaŋ wɩ́zɔkɩ́ ná rɩ́ Wɩɩsɛ zilé ná sɩɛ́ wɩ náŋá wuó máŋsɛ, wér mí.
Taŋá rɛ́, Adaŋ balá wɩ́bɔmɔ ná wɩ́ɛ́, nɩkana sʋ́sɔ́; amá Wɩɩsɛ zilé zénó kɩ́ŋkáŋ wuu.
Ʋ tɩ́ŋ Zeezi balá mɛ́, a fá nɩkana susu kɩ́llɛ ɛ́.
16 Wɩɩsɛ zilé ná sɩɛ́ há mʋ́ɛ́ lúri wɩ́ɩ́ ná mɛ́, ʋ kɛ nɩbala wɩ́bɔmɔ há kéŋ wɩ́ɩ́ ná ko; Adaŋ balá wɩ́bɔmɔ yɩr mɛ́, Wɩɩsɛ dí nɩbííne sarɩ́ya, a héwó wɩɩla mɛ́, amá ʋ tɩ́ŋʋ́ zilé ná mɛ́, a pi wɩ́bɔŋkana sarɩ́ya cɛ́ nɩbííne.
17 Óó!
Nɩbala dʋŋɔ wɩ́bɔmɔ yɩr mɛ́ nɛ́, sʋʋ dí kuorí dúníé mí; amá Wɩɩsɛ há tɩ́ŋ Zeezi Kirisi balá mɛ́, a tʋ́mʋ́ ná párá, ʋ kɛ ɛ́ kɩ́ŋkáŋ wuu.
Nɩɛ ná wuu Wɩɩsɛ há fɔ́wɔ́ susu, a pi tékétéké dí zilé pɔ́wɔ́, ɓa wuu sɩ́ ná mɩɩsɛ ná há waá tenni, a dí kuorí Zeezi Kirisi dʋŋɔ yɩr mɛ́.
18 Ɛ́ wɩ́ɛ́, anɛ ɛ́ Adaŋ balá wɩ́bɔmɔ há hé nɩbííne wuu zɔ́krʋ sɩɛrʋ ɛ́, Wɩɩsɛ sɩ́ɛ́ mɛ́, Zeezi Kirisi má balá tʋtʋ́ŋwero ní lá nɩbííne wuu tá, Wɩɩsɛ sarɩ́ya mɛ́, ká pɔ́wɔ́ hiẽsó.
19 Nɩbala há vɛ́ Wɩɩsɛ nʋɔ zíle ní ɛ́ɛ́, nɩɛ wuu a wɩ́bɔŋ'áárá; ɛ́ nɛ́ rɩ́ nɩbala má há zíl Wɩɩsɛ nʋɔ sɛ́, a rɩ́ nɩkana a tékétékéwa, Wɩɩsɛ sɩ́ɛ́ mɛ́.
20 Wɩɩsɛ kíŋse* ná nɛ́ kúé, a makɛ rɩ́ wɩ́bɔmɔ ɔsɛ pʋrkɛ.
Ráŋ ná sɩɛ́ wɩ́bɔmɔ há pʋ́rkɛ́, ráŋ nɛ́ Wɩɩsɛ zilé ɔsɛ pʋrkɛ kɩ́ŋkáŋ,
21 a makɛ rɩ́ wɩ́bɔmɔ há tɩ́ŋ sʋʋ mɛ́, a dí kuorí dúníé mí ɛ́, rɩ́ Wɩɩsɛ ló rʋ́ʋ́ zilé má tɩ́ŋʋ́ tékétéké mí, a dí kuorí ɛ́, a makɛ ráá tɩ́ŋrá Nyuutɩna Zeezi Kirisi mí, a ná mɩɩsɛ ná há waá tenni.