Nɛ́ŋ wuu to tékétéké Wɩɩsɛ sɩ́ɛ́ mɛ́
3
1 Beé sɩɛ́ Zuwifiwa ka, a kɩ́llɛ nɩɛ ná há to Zuwifiwa?
Pɛŋcoki* é bee nyʋɔrɛ́ sɩɛ́?
2 Taŋá, ɓa kɩ nɩɛ ná há to Zuwifiwa, wɩ́ɛ́ ɓɩkana mɛ́ nɛ́.
Dʋ́ŋdʋ́ʋ̃́ wɩ́ɩ́ nɛ́ ká:
Wɩɩsɛ púú nʋɔ wɩ́ɛ́ pá Zuwifiwa nɛ́, rɩ́wɔ́ zízíl.
3 Rɩ Zuwifiwa náŋa nɛ́ sɩɛ́ wɩ ɛ́ wɩ́ɛ́ lɛ́ɛ́ dí, ɛ́ sɩ́ a rɩ́ Wɩɩsɛ sɩ́ taŋá kánʋ́?
4 Ɛ́ wɩ wuó a!
Rɩ nɩbííne wuu ní ká nyɛtɩ́ɩ́ná má, Wɩɩsɛ wɩ nyɩɛrʋ́ nyɛ, ʋ kéŋ taŋá.
Ɛ́ nɛ́ ɓa bʋl Wɩɩsɛ wɩ́ɛ́ ʋ kɛnɔ sɩɛrʋ a bʋlɛ́:
«Ʋ mɔhɔ̃́ rɩ́wɔ́ zɩŋ rɩ́ɩ́ bʋl wɩ́táŋsɛ nɛ́.
Rʋʋ ká sarɩ́ya díí má, rɩ́wɔ́ pi taŋá pɛ́ɩ́.»
5 Raá wɩ́bɔmɔ ná ɛɛ nɩ́ɩ́ máŋsɛ Wɩɩsɛ há kéŋ taŋá ɛ́, áá já ráá bʋlɛ́ beé rí?
Wɩɩsɛ cɔ́ɛ́ háá ko wɛ, ʋ isi aá tʋ́rɩ́rá ɛ́, ʋ wɩ taŋá kené ní?
Nyɛ é sɩɛ́ ká nɩbinní zɩmɛ́ mɛ́ nɛ́, ŋ bʋ́bʋl.
6 Ɛ́ rá toó!
Rɩ Wɩɩsɛ nɛ́ to taŋá tɩ́na, ʋʋ́ a ɛrɛ́ káá dí dúníé nɩɛ sarɩ́ya?
7 Rɩŋ nyɛ́ nyɩɛrʋ, ká rɩ́ Wɩɩsɛ taŋá tɩŋ ɛ́ mɛ́ a caasɛ nyɩɩsɛ, a píŋsú, bee wɩ́ɛ́ sɩɛ́, ɓa pi zɔ́krʋ aá cɩ́ɩ́nɩ́ŋ, anɛ ŋ ká wɩ́tɛ'ár?
8 Rɩ ɛ́ nɛ́, ŋŋ́ bʋ́lɩ́wa lo ráá ɩ́'a wɩ́bɔmɔ nɛ́, rɩ́ wɩ́were tɩŋ ɛ́ mɛ́ nyɩɩsɛ.
Nɩɛ náŋa faá tʋ́ksɩ́ŋ rɛ́ má wuu; a nyɛ nyɩɛrʋ héŋ nʋɔ mɛ́, a bʋlɩ́ŋ sɛ́ nɩɛ ɩ́'a ɛ́ nɛ́.
Rɩ Wɩɩsɛ dí sarɩ́ya yo ɛ́ nɩɛ duo mí, ʋ sɩ́ɩ́ mɛ́ nɛ́.
9 Beé sɩɛ́?
Á é Zuwifiwa, á nɛ́ kɩ nɩɛ ná há to Zuwifiwa?
Aɩ́, á wʋ́ɔ́ kɛ.
Ʋ nɛ́ ŋ la sɩ́ɛ́ bʋl, rɩ́ Zuwifiwa rɩ́ nɩɛ ná há to Zuwifiwa wuu ká wɩ́bɔŋ'aara nɛ́.
10 Ɛ́ nɛ́ ɓa pʋ́ŋsɛ Wɩɩsɛ Kɛnɔ sɩɛrʋ.
Ɓa sɛ́:
«Nɩbíŋ wuu to tékétéké, balá má tɩɩ.
11 Wɩ́zɩ́nnʋ́ wuu toó, nɛ́ŋ wuu toó aá ja Wɩɩsɛ.
12 Ɓa wuu cʋ́rɔ́ ká tá ŋmɛ́ŋwero, a wuu tɛl.
Nɛ́ŋ wuu toó aá a wɩ́were, balá má tɩɩ.
13 Ɓa nʋʋsɛ wɩ́bʋlɛ́ lɔrɛ́,
a lɩ́wɔ́ sɩɛnnɛ aá lɛ, anɛ lɛlbule ɓa há wúré.
Ɓa neŋdúlli daha wɩ́ɛ́ wuu ká nɩnyɩsɛ wɩ́ɛ́ nɛ́.
Ɓa wɩ́bʋlɛ́ huõno nɩhɩ̃́ bɔsɔ huõno ní.
14 Ɓa nʋʋsɛ wɩ́ɛ́ nɛ́ ká, rɩ́wɔ́ bʋrɛ aá zɔkɛ nɩɛ,
arɩ́ wɩ́bɔmɔ bʋlɛ́.
15 Ɓa bíéró wérí nɩɛ ɓʋ́ɩ́ mɛ́.
16 Ɓa dɩmaanɩ́ wuu ɓaá zɔkɛ zɔ́krʋ nɛ́,
a hé nɩɛ wɩhála mɛ́.
17 Ɓa wɩ tɛŋfɩ́ɛ́l ja nɩɛ pɛ́kɛ.
18 Ɓa wɩ Wɩɩsɛ héwíŋ fá mʋɔ́ má.»
19 Á sɩɛ́ ɩ́ɔ̃́, rɩ́ Wɩɩsɛ kíŋse* kɛnɔ há máŋsɛ wɩ́ɩ́ ná, ɛ́ máŋsɔ́ pá nɩɛ ná háá tɩŋ ɛ́ kíŋse ní, a makɛ rɩ́ nɩbíŋ wuu sʋ́ʋ́ nʋɔ mɛ́ wúrú, ká rɩ́ Wɩɩsɛ bʋl yo dúníé nɩbííne wuu, ʋ sarɩ́ya kal;
20 bee wɩ́ɛ́ nɛ́ŋ wuu wɩ Wɩɩsɛ kíŋse ná wuó zíl, a mʋ́ aá a tékétéké Wɩɩsɛ sɩ́ɛ́ mɛ́.
Wɩɩsɛ kíŋse ná mɛ́ nɛ́ nɩbííno tɩŋ aá zɩŋ, rʋ́ʋ́ ká wɩ́bɔŋ'ár.
Ɛ́ ná háá pá tékétéké
21 Amá mʋ́l néé mí, Wɩɩsɛ mákɛ́ ŋmɛ́nɔ ná ʋ há tɩ́ŋɛ́, a pi tékétéké aá pá nɩbííne, ká ʋ kíŋse ná wɩ sɛ́ kené ráŋ.
Wɩɩsɛ kíŋse rɩ́ Wɩɩsɛ wɩ́laabʋlla má wuu bʋ́l ɛ́ ŋmɛ́nɔ wɩ́ɛ́ nɛ́.
22 Zeezi laadí ní ká ŋmɛ́nɔ ná nɩbííno duo wuu háá tɩŋɛ́, rɩ́ Wɩɩsɛ bʋlʋ́ ká tékétéké, ʋ sɩ́ɛ́ mɛ́.
Rɩɩ ká Zuwifi, rɩɩ to Zuwifi, ɛ́ nɛ́.
Wɩɩsɛ wɩ nɩɛ́ caksɛ.
23 Nɩbííne wuu dúó ní ɛ́ɛ́ zɔkɛ Wɩɩsɛ mɛ́, a wʋ́ʋ́ píŋ sɩɛrʋ wuó zʋ.
24 Amá Wɩɩsɛ sawér zénó.
Ʋ tɩ́ŋ Zeezi Kirisi mí a yɔwɛ lɔ́wɔ́ yɔ́ɔ́, ʋ zilé sɩɛrʋ, a pɔ́wɔ́ tékétéké.
25 Zeezi Kirisi ní Wɩɩsɛ kaa ɔsɛ vʋk anɛ pewie, rʋ́ʋ́ tɩ́ŋʋ́ sʋʋ mɛ́ a hé nɩbííno ná wuu há lá Zeezi Kirisi wɩ́ɛ́ dí, wɩ́zɔkɛ́ suúri.
Ʋ tʋ́ŋ ɛ́, rɩ́ nɩɛ zɩŋ rʋ́ʋ́ ká tékétéké, bee wɩ́ɛ́ nɩbííne die á wɩ́ɛ́ zɔ́kʋ́ mɛ́, ká ʋ nyammɛ.
26 Amá Wɩɩsɛ zaa mákɛ́ ŋmɛ́nɔ ná nɩbííno háá tɩŋɛ́, káá a tékétéké ʋ sɩ́ɛ́ mɛ́.
Ʋ mákɔ́ rʋʋ tɩɩ ká tékétéké, ká wólli bʋlɛ́ nɩɛ ná há lá Zeezi wɩ́ɛ́ dí, ɓa má ká tékétékéwa.
27 Nyʋkwɩ́ɩ́ rɩ́ sɩɛ́ báá mɩnɛ́?
Aɩ́!
Wɩ́ɩ́ toó!
Beé kísó mí sɩɛ́?
Á tʋtʋ́ŋwere ɛɛ mɛ́ nɛ́ tɛ?
Aɩ́!
Á há lá Zeezi dí ní tɛ, wɩ́ɩ́ toó.
28 Á ɩ́ɔ̃́ rɩ́ nɩbííno ká tékétéké Wɩɩsɛ sɩ́ɛ́ mɛ́, a tɩ́ŋʋ́ Zeezi laadí mí ní.
Ʋ wɩ tékétéké wuó a, a tɩŋ kíŋse tɩŋɛ́ mɛ́.
29 Ɩ́ bɩ́ɩ́nɔ́ rɩ Wɩɩsɛ ká Zuwifiwa* dʋŋɔ Wɩɩsɛ rɛ́ ɓó?
Ʋ to nɩɛ ná há to Zuwifiwa é Wɩɩsɛ?
Taŋá, ʋ kɔ́wɔ́ má Wɩɩsɛ nɛ́,
30 bee wɩ́ɛ́ Wɩɩsɛ nɛ́ balá léŋ.
Ʋ balá nɛ́ wuolé, rʋ́ʋ́ bʋlɛ́ Zuwifi ká tékétéké ʋ há lá Zeezi dí wɩ́ɛ́, a nɛ́ baa wólli aá bʋlɛ́ nɛrɔ ná má há to Zuwifi má ká tékétéké, ʋ má há lá Zeezi dí wɩ́ɛ́.
31 Á Zeezi laadí ná sɩɛ́ gírí Wɩɩsɛ kíŋse ná Moyizi* há ɛ́ɛ́ ɓa pʋ́ŋsɛ nɛ́?
Aɩ́, á laadí ná taŋa ɔ́sɔ́ aá makɛ ɛ́ ná, Wɩɩsɛ kíŋse ná há wéró ní.