Wɩɩsɛ sarɩ́ya wɩ́ɛ́
2
1 Ɩ nɛ́ŋ ná háá díí náŋa sarɩ́ya, rɩɩ có rɩ́ɩ́ a nɩbeé má, ɓa waá píí cɛ́ɩ́, ɓa sɩ́ díí má sarɩ́ya.
Ɩ háá díí náŋa sarɩ́ya, ká má ɩ́'a wɩ́ɛ́ ná tɩɩ tɩɩ ɓa háá ɛɛ́, ɩ dídíwó sarɩ́ya, ɓa sɩ́ dí sarɩ́ya yóí, a héí wɩhála sɩɛrʋ.
2 Nɩɛ ná háá tʋŋ ɛ́, á ɩ́ɔ̃́ rɩ Wɩɩsɛ díwó sarɩ́ya, ʋ sɩ́ɩ́ mɛ́ nɛ́ arɩ́ taŋá.
3 Ɩɩ́ dí nɩɛ ná háá a wɩ́bɔmɔ sarɩ́ya, ká tɩɩ ɩ́'a ɛ́ wɩ́bɔmɔ.
Ɩ sɩɛ́ bɩ́ɩ́nɔ́ rɩ Wɩɩsɛ sɩ́ pii cɛ́ɩ́, ká sɩ́ɩ́ sarɩ́ya dí?
4 Ɩ bɩ́ɩ́nɔ́ rɩ Wɩɩsɛ sɩɛrʋ há wéró, ʋ ka nyamma kɩ́ŋkáŋ ɛ́, rʋʋ wɩ wɩ́ɩ́ wuó a nɛ́?
Ɩ wɩ ɛ̃ rɩ́ Wɩɩsɛ há kéŋ sawér ɛ́, ʋʋ́ já rɩ́ɩ́ bɩ́rsɩ́ mála nɛ́, a báá sɩ́ wɩ́bɔmɔ á?
5 Amá ɩ dɩllɛ háákɔ́, ɩ waá ja rɩ́ɩ́ bɩ́rsɛ, a lo wɩ́bɔmɔ ɛɛ.
Wɩɩsɛ cɔ́ɛ́ nɛ́ sɩɛ́ ɩ pusi aá héí tɩɩ mɛ́.
Ʋ sɩɛ́ sɩ́ díí sarɩ́ya, tápʋl ná ʋ háá á rʋ́ʋ́ dí dúníé nɩɛ sarɩ́ya.
Ɛ́ tápʋl, nɩɛ wuu sɩ́ ná ɛ́ ná Wɩɩsɛ háá dí sarɩ́ya arɩ́ taŋá.
6 Nɛrɔ wuu wɩ́'állɛ mʋɔsɔ nɛ́, rʋ́ʋ́ bel ká túŋ tɩ́na.
7 Nɩɛ ná há kéŋ kajáŋa tʋtʋ́ŋwere ɛɛ mɛ́, a tʋŋ aá ja píŋ rɩ́ yɩr, arɩ́ tɛŋ ná há waá sʋɔrɛ, ʋ sɩ́ pɔ́wɔ́ rɩ́ mɩɩsɛ ná há waá tenni.
8 Ká mákʋ́ cɔwɩɩlɩ́zeno, a pá nɩɛ ná há vɔ́ʋ́ nʋɔ, a vɔ́ʋ́ taŋá má, káá a wɩ́bɔmɔ.
9 Wɩɩla rɩ́ sazɔkɔ́ sɩ́ peri nɩɛ ná wuu háá tʋŋ bɔ́ŋbɔ́ŋ.
Ɛ́ sɩ́ la sɩ́ɛ́ peri Zuwifiwa nɛ́ kɛ́rɛ́, ká sɩɛ́ pá nɩɛ ná há to Zuwifiwa.
10 Amá Wɩɩsɛ sɩ́ píŋsí nɩɛ ná wuu háá a wɩ́were, a yɩ́rwɔ́ yɩwero, a pɔ́wɔ́ tɛŋfɩ́ɛ́l.
Ʋʋ́ á rʋ́ʋ́ púl Zuwifiwa mɛ́ nɛ́, ká rɩ́ nɩɛ ná há to Zuwifiwa sɩɛ́ tʋkɛ,
11 bee wɩ́ɛ́ Wɩɩsɛ wɩ nɩɛ́ caksɛ.
12 Nɩɛ ná wuu há wɩ Wɩɩsɛ kíŋse* ná Moyizi* há ɛ́ɛ́ ɓa pʋ́ŋsɛ ɛ̃, káá a wɩ́bɔmɔ, ɓa sɩ́ sʋsɛ.
Wɩɩsɛ sɩɛ́ waá a rʋ́ʋ́ pi kíŋse ná wɩ́ɩ́ oro wuu bɔ́sɩ́wɔ́.
Amá nɩɛ ná wuu há ɛ̃ Wɩɩsɛ kíŋse ná Moyizi há ɛ́ɛ́ ɓa pʋ́ŋsɛ, káá a wɩ́bɔmɔ, rɩ ɓa nɛ́ sʋ́sɛ́, Wɩɩsɛ sɩ́ pi ɛ́ kíŋse ní díwó sarɩ́ya.
13 Wɩɩsɛ kíŋse zesé dʋŋɔ wɩ wuo a, ɩ ɩ́'a tékétéké Wɩɩsɛ sɩ́ɛ́ mɛ́; amá nɩɛ ná há sáŋɛ́ aá tɩŋ kíŋse ná, ɓa nɛ́ rɩ́ Wɩɩsɛ bʋl, rɩ́ ɓa ká tékétékéwa.
14 Nɩɛ ná há to Zuwifiwa wɩ Wɩɩsɛ kíŋse ná kené.
Amá rɩ ɓa nɛ́ píwó sɩɛrʋ mɛ́ aá a wɩ́ɛ́ ná Wɩɩsɛ há máŋsɛ́ pá Moyizi, ɓa rɩ́wɔ́ wʋ́ɔ́ kené ná wuu, ɛ́ wɩ́ɛ́ mɩ́ŋwɔ́ tɛŋ mɛ́.
15 Ɓa wɩ́'állɛ ná sɩɛ́ mákʋ́, rɩ́ Wɩɩsɛ kíŋse ná mɩ́ŋwɔ́ sɩɛrʋ rɩ́ nɛ́.
Ʋ ká ɛ́ nɛ́ ɓa sabɩŋsɛ má mɛ́.
Ɛ́ nɛ́ tɛ, rɩ ɓa á wɩ́ɩ́ zɔkɛ, ɓa sabɩŋsɛ bʋl aá lɩ́wɔ́ har; ká rɩ ɓa á wɩ́wérí, ɓa sabɩŋsɛ bʋl aá pɛ́wɔ́ mɛ́.
16 Ʋ sɩɛ́ á rʋ́ʋ́ nɛ ɛ́ nɛ́, kal ná Wɩɩsɛ háá á rʋ́ʋ́ tɩŋ Zeezi Kirisi mí, a dí dúníé wuu sarɩ́ya.
Anɛ ɛ́ há mɩŋ Labaarɩwero ná ŋ háá bʋlɛ́ sɩɛrʋ, ɛ́ kal, nɩbííno hiẽsó sɩɛrʋ wɩ́féŋse wuu sɩ́ nyɩɩsɛ, rɩ́ Wɩɩsɛ díwó sarɩ́ya.
Zuwifiwa rɩ́ Wɩɩsɛ kíŋse wɩ́ɛ́
17 Ɩ nɛ́ŋ ná há sɩ́ɩ́ ká Zuwifi, a yelli Wɩɩsɛ kíŋse mí, aá nyʋ́kɛ rɩ́ɩ́ ɛ̃ Wɩɩsɛ,
18 rɩ́ɩ́ ɛ̃ Wɩɩsɛ cólle.
Ɓa pí Wɩɩsɛ kíŋse ná nɛ́ kármɩ́, ɩ zɩŋ wɩ́were caksɛ aá lɩ́sɛ.
19 Ɩ bɩ́ɩ́nɔ́ rɩɩ nɩ́ɩ́ tɩɛsɛ nyʋmma, a a caanɔ́ a pá nɩɛ ná há mɩŋ bíno mí.
20 Ɩ nɩ́ɩ́ makɛ nɩcʋ́llɛ, aá karmɛ heŋbiisi má, bee wɩ́ɛ́ Wɩɩsɛ kíŋse ná mákɛ́ zɩmɛ́ ŋmɛ́ŋsɛ wuu pɛ́ɩ́, a a ɩ zɩŋ taŋá má.
21 Ɩ sɩɛ́ háá karmɛ nɩɛ, ká wɩ́ɩ́ tɩɩ karmɛ!
Ɩɩ́ bʋlɛ́ rɩ́wɔ́ sɩ́ gá, ká tɩɩ gɩ́ga!
22 Ɩ sɩ́ rɩ́wɔ́ sɩ́ cɔ́rmʋ tʋ́mʋ́, ká tɩɩ tʋ́tʋŋ cɔ́rmʋ.
Ɩ bɛ́rɛ venni, ká zʋʋ gáwɔ́, a kaa lɛ aá yɛ́llɛ.
23 Ɩɩ́ nyʋ́kʋ́, ɩ há ɛ̃ Wɩɩsɛ kíŋse, ká wʋ́ɔ́ tɩŋ; ɛ́ wɩ́ɛ́, Wɩɩsɛ nɛ́ ɩɩ́ lɔ́rɛ ɛ́.
24 Wɩɩsɛ Kɛnɔ sɩɛrʋ ɓa pʋ́ŋsɔ́ bʋlɛ́:
«Ɩ́ Zuwifiwa nɛ́ ɛ́ɛ́, nɩɛ ná há to Zuwifiwa, zɩ́zɔkɛ Wɩɩsɛ yɩr.»
25 Taŋá rɛ́, Wɩɩsɛ kíŋse sɩɛrʋ, ʋ sɩ́ɩ́wa cónníwa pɛnɛ.
Rɩɩ cókí pɛŋ ká wɩ Wɩɩsɛ kíŋse ná zíl, ɩ rɩ́rɩ́ pɛŋcoki* ná wuu, ɩ dé nɛ́ pɛŋkɛnɔ tɩ́na nɛ́.
26 Rɩ nɛrɔ ná há wʋ́ʋ́ pɛŋ cóké nɩ́ɩ́ tɩŋ Wɩɩsɛ kíŋse ná, ɩ wɩ ɛ̃ rɩ́ Wɩɩsɛ wóú aá bú, anɛ pɛŋcokí tɩ́na?
27 Ɛ́ pɛŋkɛnɔ tɩ́na háá zíl Wɩɩsɛ kíŋse, sɩɛ́ sɩ́ díí sarɩ́ya, a héí wɩɩla sɩɛrʋ, ɩ é nɛ́ŋ ná há cókí pɛŋ, a zɩŋ Wɩɩsɛ kíŋse ná ɓa há pʋ́ŋsɛ́ má.
28 Nyɩpʋmmɔ yɔ́ɔ́ Zuwifi rá to ɩ ká Zuwifi.
Pɛŋkɛnɔ né coké má rá to pɛŋcoki.
29 Amá nɛrɔ ná há ká Zuwifi tɩɩ, ʋ sabɩɩna wɩ́'állɛ nɩ́ɩ́ mákʋ́.
Ɩ há tɩ́ŋɩ́ sabɩɩna mɛ́, aá a wɩ́ɛ́ ná pɛŋcokí tɩ́na há mɔhɛ̃́ rʋ́ʋ́ a, ɛ́ nɛ́ ká pɛŋcoki tɩɩ.
Ʋ nɛ́ ká pɛŋcoki ná há lɛ́ Wɩɩsɛ Sabɩɩna, ʋ wɩ kíŋse ná Moyizi há ɛ́ɛ́ ɓa pʋ́ŋsɛ lɩ́ɛ́.
Ɛ́ nɛrɔ duo, rʋʋ ká Zuwifi, rʋʋ to Zuwifi, Wɩɩsɛ nɩ́ɩ́ bʋ́ʋ́ mɛ́, nɩbííne rá.