Pool bʋ́l wɩ́ɛ́ Agiripa sɩ́ɛ́
26
1 Ɛ́ nɛ́ Agiripa bʋl Pool rɩ́ bʋlɛ́:
«Ŋmɛ́nɔ mɩ́nɔ́ rɩ́ɩ́ bʋl wɩ́ɛ́ a lɛ́ɩ́ tɩɩ.»
Ɛ́ nɛ́ Pool nyaanɛ nɛ́sɛ, ká sɩɛ́ bʋlɛ́:
2 «Kuóro Agiripa, ŋ sɩɛrʋ tɔ́rɔ́, ŋ zaa há wóí sɩ́ɛ́ cɛ́, rɩ́ŋ lɩ́sɛ nʋʋsɛ, arɩ́ nyɛwɩ́ɛ́ ná wuu Zuwifiwa há kené cɩ́nɩ́ŋ mɛ́,
3 bee wɩ́ɛ́ ɩ tɩɩ ɛ̃ Zuwifiwa kusúŋ, rɩ́wɔ́ tɩ́ŋtɔ́wɩ́ɛ́ wuu ní.
Ɛ́ wɩ́ɛ́, ŋŋ́ sʋ́lɩ́, rɩ́ɩ́ nyammɛ ká zésíŋ wɩ́bʋlɩ́.
4 «Zuwifiwa wuu ɩ́ŋ hiẽsó wɩ́ɛ́, ŋ heŋbííri mí wuu ní; ɓa ɛ̃ ɛ́ ná ŋ há mɩ́nɩ́ŋ nɩɛ sɩɛrʋ Zerizalɛmɛ mɛ́, a kaa wa.
5 Rɩ ɓaá jɔ́wɔ́ bʋl taŋá, ɓa ɩ́ŋ fól rí; a zɩŋ rɩ́ŋ ká Farɩzɩɛ̃ rɛ́, á mɩ́ŋrá wɩcʋ́ɔ́lɩ́ŋmɛ́nɔ cɔɔ ná há dúókó kɩ́ŋkáŋ mɛ́.
6 Ká mʋ́l néé mí, ŋ há kéŋ yɩɛla, Wɩɩsɛ há tá nʋɔ ná párá naabálwa, wɩ́ɛ́ nɛ́ ɓaá ja rɩ́wɔ́ díŋ sarɩ́ya.
7 Ɩzɩrayɛl duo* nɩɛ, jɩmʋ́ʋ́la fí rí bɛllɛ ná wuu kéŋ ɛ́ nʋtálɔ yɩɛla nɛ́, a fɛ́l sɩ́ɩ́ aá cʋɔlɛ Wɩɩsɛ, wɔhɔ rɩ́ tɩ́taŋ wuu.
Kuóro, ɛ́ yɩɛla wɩ́ɛ́ nɛ́ Zuwifiwa cɩ́nɩ́ŋ mɛ́.
8 Beé rí tɛ, Zuwifiwa, ɩ́ ná rɩ Wɩɩsɛ wɩ sʋsɛ wuo bɩrɛ aá ílli?
9 «Ŋ tɩɩ fa bɩ́ɩ́nɔ́ rɩ́ŋ yo Nazarɛtɛ Zeezi, a áŋ há wo ɛ́ wuu, a zɔ́kʋ́ yɩr.
10 Ɛ́ nɛ́ ŋ tʋŋ Zerizalɛmɛ mɛ́.
Wɩɩsɛ vʋk'ɔɔsa nɩhɩɛ̃́sɛ páŋ dóé, ŋ kɛsɛ Zeezi laadííre ɓɩkana hé bɩnajaa mɛ́, ká rɩ ɓa kúó aá ɓʋ́ʋ́sɩ́wɔ́, ŋ má sɛ́ mɩŋ ráŋ.
11 Ŋ válɔ́ zʋ Zuwifiwa cémejɩɩsɛ,* a a ɓa kɛ́sɩ́wɔ́ bɛŋsɛ, a fɩ́kwɔ́ mɛ́ rɩ́wɔ́ báásɛ Zeezi, káá tʋ́ksʋ́.
Ŋ cɔ́ɛ́ wɩ́wɔ́ kɩ́ŋkáŋ, ŋ mʋ́ tɔ́nɛ ná há to Zuwifiwa tɔ́nɛ má, a kɛ́sɩ́wɔ́ aá bɛŋsɛ.
Pool máŋsʋ́ Zeezi laadí naasɛ
12 «Ɛ́ wɩ́ɛ́ nɛ́ Wɩɩsɛ vʋk'ɔɔsa nɩhɩɛ̃́sɛ tʋ́mɩ́ŋ Damaasɛ mɛ́, ŋ káŋwɔ́ dóé mʋ́.
13 Kuóro, ŋ sɩɛ́ há mɩŋ ŋmɛ́nɔ mɛ́ aá va, pʋmmɔ tʋlɛ́ há kɛ wɩpomí, lɛ́ bána rɩ́ a ko tuwi cúólíŋ, ŋ rɩ́rɩ́ŋ vállɩ́náŋa.
14 Á wuu tuwi ɓallɛ tíé.
Káŋ nɛ liŋó há bʋ́lɩ́ŋ rɩ́, Ebirewa* liŋó mí a bʋlɛ́:
‹Sool, Sool, beé rí tɛ ɩ wɩ́wálmɩ́ŋ?
Anɛ nɔɔ há vɛ́ valɛ́ ɓaá ŋmɔ́wʋ́ ɛ́, ɩ má wɩ́ŋ nɛ́sɛ mɛ́ wuó fóri.›
15 «Ɛ́ nɛ́ ŋ bɔsɛ:
‹Áŋ rɩ́ kɛ́ɩ́, Nyuutɩna?›
«Ɛ́ nɛ́ Nyuutɩna sɛ́:
‹Ŋ nɛ́ ká Zeezi ná ɩ háá wálmɛ́.
16 Amá isi cɩ́ dahá.
Ŋ keníŋ tɩɩ ko nyɩ́ɩ́sɩ́ mɛ́, rɩ́ɩ́ ko áŋ tʋtʋnnɔ rɩ́rɩ́ŋ har nɛrɔ nɛ́; bʋ́lɩ́ŋ wɩ́ɛ́ pá nɩɛ; máŋsɛ ɛ́ náwa ɩ zaa há néŋ, a bʋl wɩ́ɛ́ ná wuu ŋ háá á rɩ́ŋ a rɩ́ɩ́ ha ná.
17 Ŋ lɩ́sɩ́, Zuwifiwa rɩ́ nɩɛ ná há to Zuwifiwa sɩɛrʋ, rɩ́ŋ tʋ́mɩ́, ɓa rɩ́.
Ŋ sɩɛ́ sɩ́ lɛ́ɩ́ tá, ɓa wálmɛ wuu mí,
18 rɩ́ɩ́ mʋ́, a a rɩ́wɔ́ sɩ́ɛ́ wúri, rɩ́ɩ́ káŋwɔ́ lɩ́sɛ bíno mí, a hé pʋmmɔ sɩɛrʋ, a lɩ́sɩ́wɔ́ Sɩtaanɛ* nɛ́sɛ mɛ́, a kaa ko Wɩɩsɛ rɩ́, a makɛ rɩ ɓa láŋ wɩ́ɛ́ dí, rɩ́ŋ héwó wɩ́bɔmɔ suúri, ká rɩ́wɔ́ ná liwe Wɩɩsɛ nɩlɩ́sɛ sɩɛrʋ.›
19 «Ɛ́ nɛ́ sɩɛ́ tɛ, kuóro Agiripa, ŋ wɩ wɩ́muulináálɛ ná há lɛ́ bána rɩ́ ko túwíŋ mí wɩ́ɛ́ vɛ́ɛ́.
20 Amá ŋ púló bʋl Wɩɩsɛ wɩ́ɛ́ pá Damaasɛ tɩ́náwa rɩ́ Zerizalɛmɛ nɩɛ, ká baa mʋ́ bʋl pá Ziide nɩɛ wuu, arɩ́ nɩɛ ná há to Zuwifiwa.
Ŋ bʋ́lwɔ́ rɩ́, rɩ́wɔ́ bɩ́rsɛ a lo Wɩɩsɛ mɛ́ aa zɔkɛ́, ká kóú rí, a tʋŋ tʋtʋmɛ́ ná háá makɛ́, rɩ ɓa ɓɩɛ́na bɩ́rsɔ́.
21 Ɛ́ wɩ́ɩ́ wɩ́ɛ́ nɛ́ Zuwifiwa kánɩ́ŋ Wɩcʋɔlɩjɩzeno sɩɛrʋ, aá wálmɛ rɩ́wɔ́ ɓʋ́ŋ.
22 Amá Wɩɩsɛ kɛ́rɩ́ŋ mɛ́ a kaa ko aá lɛ zaa, ŋ ha mɩŋ, a bʋ́lʋ́ wɩ́ɛ́ aá pá nɩɛ wuu, nɩhɩɛ̃́sɛ rɩ́ heŋbiisi.
Wɩɩsɛ wɩ́laabʋlla rɩ́ Moyizi* há sɛ́ wɩ́ɛ́ náwa sɩ́ ko, ɓa tɩɩ tɩɩ nɛ́ ŋ bʋl, ŋ wɩ wɩ́ɩ́ súúré.
23 Ɓa sɛ́:
‹Wɩɩsɛ Nɩlɩsɛ sɩ́ ná wɩɩla a mʋ́ sʋwɛ; ʋ sɩ́ la sɩ́ɛ́ lɛ sʋsɛ mɛ́, a a nɩwómmí, a máŋsɛ pʋmmɔ wɩ́ɛ́, a pá Zuwifiwa rɩ́ nɩɛ ná há to Zuwifiwa.› »
Pool bʋ́lɔ́ ja rɩ́ Agiripa la Zeezi wɩ́ɛ́ dí
24 Pool háá bʋl wɩ́ɛ́ rʋ́ʋ́ lɔ́ʋ́ tɩɩ ɛ́, Fesitiisi ɓɔ́ʋ́ mɛ́ bʋlɛ́:
«Ɩɩ́ gáásɛ́ nɛ́ Pool!
Ɩ́ kármɔ́ mʋ́ daarɛ, a pi aá gáásɛ.»
25 Ɛ́ nɛ́ Pool bʋl pɔ́ʋ́ bʋlɛ́:
«Ŋ waá gáásɛ, ŋ nɩwero Fesitiisi; ŋ wɩ́bʋlɛ́ ná wuu ká wɩ́táŋsɛ nɛ́, a ka ŋmɛ́ŋsɛ.
26 Kuóro Agiripa ɛ̃ wɩ́ɛ́ nyáŋ wuu ní, ɛ́ nɛ́ tɛ ŋ ka baŋcɩpɩrɩ́ aá bʋ́lwɔ́ ʋ sɩ́ɛ́.
Ŋ ɩ́ɔ̃́ arɩ́ taŋá, rʋʋ ɛ̃ ɛ́ wɩ́ɛ́ wuu ní.
Lóŋgbóŋ mí rá, ɓa féŋsi a ɛ́ wɩ́ɛ́.
27 Kuóro Agiripa, Wɩɩsɛ wɩ́laabʋlla há bʋ́l wɩ́ɛ́ ná ɩ lɔ́ɔ́ dí rí?
Ŋ ɩ́ɔ̃́ rɩ́ lɔ́wɔ́ dí rí!»
28 Ɛ́ nɛ́ Agiripa bʋl Pool rɩ́ bʋlɛ́:
«Ʋ káánɛ mʋɔ́ kɛ́ɩ́ bʋl kánɩ́ŋ, rɩ́ŋ la Zeezi wɩ́ɛ́ dí.»
29 Ɛ́ nɛ́ Pool sɛ́:
«Rɩ mʋ́l néé mí ní, rɩ mʋɔ́ nɩ́ɩ́ pɛ́ɛ́, ŋ sʋ́l Wɩɩsɛ aá ja rʋ́ʋ́ sɩ́ɩ́ dʋŋɔ á, amá ɩ́ nɩɛ nyáŋ wuu zaa háá zésíŋ, rɩ́ɩ́wa laa dí, a nɩ́ŋ há nɩhɩ̃́ nyɛ, ká rɩ́wɔ́ sɩ́ bɛŋzɛllɛ páá vɔ́sɩ́wa!»
30 Pool há bʋ́l ɛ́, kuóro rɩ́ kʋ́máŋdá arɩ́ Berenisi, rɩ́ nɩɛ ná wuu há mɩŋ ráŋ ísó lɛ.
31 Ká ɓa sɩɛ́ bʋl náŋá rɩ́ bʋlɛ́:
«Báálɔ né wɩ wɩ́ɩ́ zɔ́kɛ́ a mɔ rɩ́wɔ́ ɓʋ́ʋ́, a sɩɛ́ kánʋ́ aá tɔ́ bɩnajaa nɛ́.»
32 Ɛ́ nɛ́ Agiripa sɩɛ́ bʋl Fesitiisi rɩ́ bʋlɛ́:
«Rɩ báálɔ né há sʋ́lɛ́ rʋ́ʋ́ mʋ́ Romi kuózeno sɩ́ɛ́ rʋ́ʋ́ dúú sarɩ́ya wɩ́ɛ́ rá nɛ́, ɩ fa wóú pi aá tá rɛ́.»