Pool bʋ́l wɩ́ɛ́ Fesitiisi sɩ́ɛ́
25
1 Fesitiisi há kué a tápʋlɛ botoro Sezaare mí, ʋ lɩ́ɔ́ mʋ́ Zerizalɛmɛ.
2 Ráŋ nɛ́ Wɩɩsɛ vʋk'ɔɔsa nɩhɩɛ̃́sɛ rɩ́ Zuwifiwa nɩhɩɛ̃́sɛ* sɩɛ́ isi kóú sɩ́ɛ́, a máŋsɛ Pool wɩ́zɔkɛ́ pɔ́ʋ́.
3 Ká ɓa sʋl Fesitiisi, rʋ́ʋ́ lo rí Pool ko Zerizalɛmɛ, bee wɩ́ɛ́ ɓa vʋ́ʋ́rɔ́ rɩ́wɔ́ pɔ́ ŋmɛ́nɔ mɛ́, rʋʋ́ kó, rɩ́wɔ́ ɓʋ́ʋ́.
4 Ɛ́ nɛ́ Fesitiisi sɛ́ Pool mɩŋ bɩnajaa mɛ́, Sezaare mí, rʋ́ʋ́ waá dáánɛ ká rʋ́ʋ́ tɩɩ bɩrmʋ́ ráŋ.
5 Ká bʋl pɔ́wɔ́ bʋlɛ́:
«Ɩ́ a rɩ́ nɩhɩɛ̃́sɛ tɩ́ŋɩ́ŋ mɛ́ mʋ́ Sezaare; rɩ báálɔ ná á wɩ́ɩ́ zɔkɛ, rɩ́wɔ́ makɛ.»
6 Fesitiisi ké ráŋ peri tápʋlɛ córí rí fíwa, ká bɩrmʋ́ Sezaare.
Tɔ́ɔ́ pʋl, ʋ lɩɩ ké sarɩ́yadɩdíí, ká bʋlɛ́ rɩ́wɔ́ ka Pool ko.
7 Pool há kúé, Zuwifiwa ná há lɛ́ Zerizalɛmɛ ko, ɓa túó peri a kílú, a cesi wɩ́piŋe ɓɩkana, Pool há ɛ́ɛ́ zɔkɛ, ká wʋ́ɔ́ há cɩ́ ɛ́wa a taŋá wuó makɛ.
8 Pool lɩ́sɛ nʋʋsɛ rʋ́ʋ́ lɔ́ʋ́ tɩɩ a bʋlɛ́:
«Ŋ wɩ wɩ́ɩ́ ɛ́ɛ́ zɔkɛ Zuwifiwa naabálwa kíŋse mí, ŋ wɩ wɩ́ɩ́ ɛ́ɛ́ zɔkɛ Wɩcʋɔlɩjɩzeno mí, ŋ wɩ wɩ́ɩ́ ɛ́ɛ́ zɔkɛ Romi kuózeno má mɛ́.»
9 Fesitiisi má há có rʋʋ ɔ́ɔ́, rɩ́ Zuwifiwa sɩɛrʋ tɔ́rʋ́ nyúú, ʋ sɩɛ́ bɔsɛ Pool a bʋlɛ́:
«Ɩ sɩ́ mʋ́ Zerizalɛmɛ rɩ́wɔ́ díí wɩ́ɩ́ né sarɩ́ya ráŋ, ŋ sɩ́ɛ́ mɛ́?»
10 Ɛ́ nɛ́ Pool sɛ́:
«Kuózeno, sarɩ́yadɩdíí ní ŋ cɛ́, rɛɛ́ nɛ́ mɔhɛ̃́ rɩ́wɔ́ díŋ sarɩ́ya.
Ŋ wɩ wɩ́bɔ́ŋ ɛ́ɛ́ caasɛ Zuwifiwa, ɩ tɩɩ ɛ̃ ɛ́ mɛ́ wérí.
11 Rɩŋ nyɔ́rkɛ wɩ́ɩ́ é mí rí, rɩ́ŋ wɩ́zɔkɩ́ mɔ rɩ́wɔ́ ɓʋ́ŋ, ŋ wɩ sʋʋ́ vɛ.
Amá rɩ ɓa wɩ́ɛ́ ná ká nyɩ́ɛ́nnɛ́ rɛ́, ɓa nyɛ aá héŋ mí é, nɛ́ŋ toó a píŋ aá héwó nɛ́sɛ mɛ́.
Romi kuózeno nɩ́ɩ́ dé díŋ sarɩ́ya.»
12 Ɛ́ nɛ́ Fesitiisi isi nóú cɩ́cáána, ká bʋlɛ́:
«Ɩ sɩ́ Romi kuózeno nɩ́ɩ́ díí sarɩ́ya, ɩ sɩɛ́ mʋ́ʋ́ rɩ́ɩ́ nɛ́.»
Pool lɛ́ Agiripa rɩ́ Berenisi sɩ́ɛ́
13 Ʋ ɛ́ wɩ dáánɛ́, ká kuóro Agiripa rɩ́ Berenisi isi ko Sezaare, rɩ́wɔ́ bɔ́llɛ kʋ́máŋdá fɛlɔ Fesitiisi.
14 Ɓa há ké ráŋ aá dáánɛ, Fesitiisi bʋ́l Pool wɩ́ɛ́ pá kuóro Agiripa, a bʋlɛ́:
«Báálɔ oro rí Feliksi a ɓa kaa tɔ́ bɩnajaa mɛ́, ʋ ha mɩŋ ráŋ.
15 Ŋ há mʋ́ Zerizalɛmɛ, Wɩɩsɛ vʋk'ɔɔsa rɩ́ Zuwifiwa nɩhɩɛ̃́sɛ ísó cɩ́nʋ́ mɛ́, a sʋ́lɩ́ŋ, rɩ́ŋ dúú sarɩ́ya, a pi dɩtɔk cɩ́ɩ́nʋ́.
16 «Ɛ́ nɛ́ ŋ bʋ́lwɔ́ rɩ́ bʋlɛ́:
‹La sɩ́ɛ́ dí nɛrɔ sarɩ́ya a yóú, ká nɩɛ ná há cɩ́nʋ́ mɛ́, ha wɩ kúé bílwó nʋʋsɛ, rʋ́ʋ́ bʋl lɔ́ʋ́ tɩɩ gúl, ʋ ɛ́ to Romi nɩɛ wɩ́'aamalɩ́.›
17 Ŋ rɩ́wɔ́ nɛ́ sɩɛ́ kó rɛɛ́.
Ŋ wɩ kené ziemi, ká tɔ́ɔ́ pʋl ŋ ké sarɩ́yadɩdíí, ká a ɓa ka ɛ́ báálɔ ko.
18 Nɩɛ ná há cɩ́nʋ́ mɛ́ há kúé, ŋ bɩɩnɛ wɩ́zɔkɛ́ ná ɓa háá bʋ́l cáásʋ́, ɓa wʋ́ɔ́ balá má bʋ́lɛ́ hóú rɩ́.
19 Ɓa tɩɩ wɩcʋɔ́llɛ ŋmɛ́nɔ wɩ́ɛ́ dʋŋɔ nɛ́, ɓa rɩ́rʋ́ kaá pɔsɛ náŋá, arɩ́ báálɔ oro ɓaá yɩ́rʋ́ Zeezi, há sʋ́wɛ́ ká Pool sʋ́ʋ́ wómmó wɩ́ɛ́.
20 Ŋ wɩ́ŋ háá a ɛ́, káá dí ɛ́ wɩ́ɛ́ duduusi sarɩ́ya ɛ̃.
Ɛ́ nɛ́ ŋ bɔsɛ Pool, rʋʋ nɛ́ có rʋ́ʋ́ kánʋ́ wɩ́ɩ́ ná mʋ́ Zerizalɛmɛ rɩ́wɔ́ dúú sarɩ́ya ráŋ.
21 Amá Pool wɩ sáŋɛ́.
Ʋ sɛ́ rɩ́wɔ́ lo rʋ́ʋ́ ké bɩnajaa mɛ́, rɩ́ kuózeno tɩɩ nɩ́ɩ́ kóó dúú sarɩ́ya.
Ɛ́ nɛ́ ŋ sɛ́ rɩ́wɔ́ bíbélú mí, rɩŋ kúó ná ŋmɛ́nɔ, rɩ́ŋ a rʋ́ʋ́ mʋ́ kuózeno rɩ́.»
22 Ɛ́ nɛ́ Agiripa bʋl Fesitiisi rí:
«Ŋ có rɩ́ŋ má tɩɩ zesi ɛ́ báálɔ wɩ́ɛ́ rɛ́.»
Ɛ́ nɛ́ Fesitiisi sɛ́:
«Ɩ cíé sɩ́ nʋ́ʋ́ wɩ́bʋlɛ́.»
23 Tɔ́ɔ́ sɩɛ́ pʋl, Agiripa rɩ́ Berenisi isi káŋwɔ́ tɩɩ píŋ píŋ, a mʋ́ zʋ sarɩ́yadíírijaa.
Sóójihɩɛ̃́sɛ rɩ́ tɔ́ɔ́ nɩpiŋe má kúó zʋ ráŋ.
Ká Fesitiisi tɛ ŋmɛ́nɔ, ɓa mʋ́ ka Pool ko.
24 Ɛ́ nɛ́ sɩɛ́ ká Fesitiisi sɛ́:
«Kuóro Agiripa, ɩ́ nɩɛ nyáŋ wuu há mɩŋ rɛɛ́ a súúrírá mɛ́, ɩ́ ná báálɔ né:
Ʋ mɛ́ nɛ́ Zuwifiwa wuu isi cɛ́, ɓa ná há lɛ́ Zerizalɛmɛ, rɩ́ rɛɛ́ nɩɛ wuu.
Ʋ wɩ́ɛ́ nɛ́ ɓa kaa kóŋ rí, ká cáási bʋlʋ́ mɔhɔ̃́ rɩ́wɔ́ lɩ́sʋ́ mɩɩsɛ.
25 Ŋ é tɩɩ wɩ wɩ́ɩ́ néé rʋʋ ɔ́ɔ́, a mɔ rɩ́wɔ́ ɓʋ́ʋ́.
Amá ʋ tɩɩ nɛ́ há sʋ́lɛ́ rʋ́ʋ́ mʋ́ kuózeno sɩ́ɛ́, rɩ́wɔ́ dúú sarɩ́ya, ŋ sɩɛ́ já rɩ́ŋ tɔ́ʋ́ rʋ́ʋ́ mʋ́ ráŋ nɛ́.
26 Ŋ wɩ Pool wɩ́ɩ́ ná tɩɩ tɩɩ ŋ há sɩ́ pʋ́ŋsɛ bʋl kuózeno rɩ́ ɛ̃; ɛ́ nɛ́ ŋ a ʋ kóí sɩ́ɛ́, kuóro Agiripa, ɩ rɩ́ nɩɛ ná wuu rɩ́, rɩ́ɩ́ bɔ́sʋ́, ká rɩ́ŋ má ná wɩ́ɩ́, a pʋ́ŋsɛ pá kuózeno.
27 Nɩcʋ́lwɩ́ɩ́ rɩ́ ká, ɩ há tá bɩnajaa nɛrɔ rʋ́ʋ́ mʋ́ kuózeno rɩ́, ká wʋ́ʋ́ wɩ́zɔkɩ́ ɛ̃.»