Zuwifiwa cɩ́ Pool mí
24
1 Tápʋlɛ bɔmmʋ́ɔ́ há dáárɛ́, Wɩɩsɛ vʋk'ɔɔsa nɔhɔ̃́ Ananɩyasɛ ísó ko Sezaare, ʋ rɩ́ nɩhɩɛ̃́sɛ bamma, arɩ́ wɩ́laazɩnnɔ bɩbar oro, ɓaá yɩ́rʋ́ Tertiliisi, ɓa zʋ́ kʋ́máŋdá Feliksi rɩ́, a bʋlɛ́ rɩ́ ɓa kéŋ wɩ́ɩ́ rɛ́ cɩ́ Pool mí.
2 Ɓa yɩ́rɛ Pool ʋ zʋ.
Tertiliisi sɩɛ́ la sɩ́ɛ́ a máŋsɛ Pool wɩ́zɔkɩ́.
Ʋ sɛ́:
«Nɩwero Feliksi, ɩ yɩ́r mɛ́ nɛ́, á ké tɛŋfɩ́ɛ́l sɩɛrʋ; ɩ zɩmɛ́ má wɩ́ɛ́ nɛ́, á tíé wɩ́ɛ́ wuu bɩ́rsɛ, a a wérí,
3 ɩ sɩɛ́ há á wɩ́were ná aá párá kál wuu, dɩhɛ̃́ wuu mí wɩ́ɛ́, áá bárkɩ́ kɩ́ŋkáŋ.
4 Ŋ waá ja rɩ́ŋ bʋl wɩ́ɛ́ dáánɛ, a zɔ́kɩ́ tɛ́ŋ.
Ŋ sɩɛ́ sʋ́lɩ́, ɩ há ká sawértɩ́ŋ, rɩ́ɩ́ zésírá mʋɔ́, a nɩ́rá wɩ́ɩ́ mʋ́l.
5 «Á kɩ́ɛ́lɔ́ rɩ báálɔ né ká tɔ́zɔ́krʋ́ rɛ́, a yiki Zuwifiwa aá hé náŋá mɛ́, ráŋ ná ɓa há mɩnɛ́, dúníé wuu mí; ʋ nɛ́ ká Nazarɛtɛ karmɛ́ tɩ́náwa nɔhɔ̃́ má.
6 Ʋ fa díŋrá Wɩcʋɔlɩjɩzeno bírse, ɛ́ nɛ́ á kánʋ́.
[Á faá já ráá dúú sarɩ́ya arɩ́ ɛ́ há cɛ́rɛ́ á kíŋse mí.
7 Amá sóójiwa nɔhɔ̃́ Lɩsɩyasɛ kúó, a hé dóé ká lɔ́ʋ́, á nɛ́sɛ mɛ́.
8 Ká sɩɛ́ bʋlɛ́ nɩɛ ná há cɩ́nʋ́ mɛ́ kóí rɩ́.]
Rɩɩ nɛ́ bɔ́sɛ́ báálɔ né, ɩ tɩɩ sɩ́ ná rɩ wɩ́ɩ́ ná á há kené cɩ́nʋ́ mɛ́, ká taŋá rɛ́.»
9 Ɛ́ nɛ́ Zuwifiwa isi pɛ́, a bʋlɛ́ Tertiliisi wɩ́bʋlɛ́ ná ká taŋá nɛ́.
Pool cɩ́ kʋ́máŋdá Feliksi sɩ́ɛ́ bʋl wɩ́ɛ́
10 Kʋ́máŋdá pá Pool ŋmɛ́nɔ rʋ́ʋ́ bʋl wɩ́ɛ́; ɛ́ nɛ́ ʋ sɛ́:
«Ŋ ɩ́ɔ̃́ rɩ́ɩ́ ká tɔ́ɔ́ né nɩɛ wuu sarɩ́yadír, ʋ bɩŋsɛ káŋ; ɛ́ nɛ́ tɛ, ŋ baŋcɩla waá yo, rɩ́ŋ cɩ́nɩ́ sɩ́ɛ́ a bʋl wɩ́ɛ́ láŋ tɩɩ.
11 Bɔsɛ nɩɛ ná, ŋ há mʋ́ Zerizalɛmɛ rɩ́ŋ cʋɔlɛ Wɩɩsɛ, ʋ ha wɩ tápʋlɛ fí rí bɛllɛ kɛ.
12 Nɩɛ nyáŋ wɩ́ŋ néé rɩŋ zʋ́ Wɩcʋɔlɩjɩzeno, aá tɔ tɩ́ŋtɔ́ɛ́ rɩ́ nɛ́ŋ wuu, ɓa wɩ́ŋ néé rɩŋ yíkí nɩɛ hé náŋá mɛ́, ɓa cémejɩɩsɛ* sɩɛrʋ dɩhɩ̃́ wuu.
13 Ɓa sɩɛ́ wɩ wɩ́ɩ́ ná tɩɩ ɓa há kené cɩ́nɩ́ŋ mɛ́, wuo makɛ aá pɛ́ɩ́.
14 Amá ŋ é há kéŋ wɩ́ɩ́ ná aá bʋ́lɩ́ rɩ́ nɛ́ ká:
‹Ŋŋ́ cʋ́ɔ́lɩ́rá naabálwa Wɩɩsɛ nɛ́, aá tɩŋ wɩcʋ́ɔ́lɩ́ŋmɛ́ŋfɛlɔ ná ɓa há sʋ́ʋ́ ká nyɩɛrʋ ŋmɛ́nɔ.
Amá ŋ lá wɩ́ɛ́ ná wuu ɓa há pʋ́ŋsɛ Wɩɩsɛ kíŋse* kɛnnɛ sɩɛrʋ, arɩ́ Wɩɩsɛ wɩ́laabʋlla kɛnnɛ sɩɛrʋ wuu dí.
15 Ŋ kéŋ yɩɛla rɩ Wɩɩsɛ sɩ́ a rɩ́ sʋsɛ bɩr'isi, nɩbíwere rɩ́ nɩbíbɔmɔ wuu.
Ɓa má tɩɩ kéŋ ɛ́ yɩɛla rɛ́.
16 Ɛ́ nɛ́ tɛ, ŋ fɩ́fɩ́kɩ́ŋ tɩɩ kál wuu, rɩ́ŋ sabɩɩna sɩ́ nyɔ́rkʋ́, Wɩɩsɛ sɩ́ɛ́ mɛ́, arɩ́ nɩbííne sɩ́ɛ́ mɛ́.›
17 «Ŋ há lɛ́ Zerizalɛmɛ mɛ́ a dáánɛ bɩŋsɛ ɓɩkáná, ŋ bɩ́rɔ́ ka meéwíé ko ráŋ, rɩ́ŋ sáŋɩ́ŋ dunɩɛ mɛ́, ká ɔsɛ vʋka pá Wɩɩsɛ.
18 Ɛ́ nɛ́ ɓa ko zʋʋ náŋ Wɩcʋɔlɩjɩzeno sɩɛrʋ, rɩŋ faá ɔsɛ busummʋ́ʋ́rɛ vʋk.
Nɩkáná wɩ́ŋ mɛ́ tɩ́ŋɛ́ zʋ ráŋ, ŋ wɩ nɩɛ má wálmɛ́.
19 Amá Azi dɩtɩ́llɛ Zuwifiwa bamma rɩ́ fa mɩŋ ráŋ; ɛ́ nɩɛ nɛ́ fa mɔhɛ̃́ rɩ́wɔ́ ko cɩ́nɩ́ sɩ́ɛ́ rɛɛ́, a makɛ wɩ́ɩ́ ná ɓa há kéné cɩ́nɩ́ŋ mɛ́, rɩ ɓa nɛ́ ná wɩ́ɩ́.
20 Rɩ nɩɛ nyáŋ há cɩ́ rɛɛ́ má nɛ́ néé, rɩŋ á wɩ́ɩ́ zɔkɛ, ɓa há keníŋ lɛ Zuwifiwa sɩ́dííre sɩ́ɛ́ tɛ́ŋ ná mɛ́, ɩ lo rɩ́wɔ́ makɛ.
21 Wɩ́ɩ́ ná balá ŋ há cɩ́ŋwɔ́ sɩ́ɛ́ mɛ́ a cáási bʋl nɛ́ ká:
‹Ŋ lɔ́ɔ́ dí rɩ nɩsʋsɛ wúóló bɩrɛ aá isi.›
Ɛ́ wɩ́ɛ́ nɛ́ ɩ́ zaa kánɩ́ŋ lɩ́ɩ́wa sɩ́ɛ́, rɩ́ɩ́wa díŋ sarɩ́ya.»
22 Feliksi ɛ̃ ŋmɛ́ŋfɛlɔ ná, Pool há mɩ́nʋ́ mɛ́ wɩ́ɛ́ wérí.
Ɛ́ nɛ́ ʋ yiki sarɩ́ya hé kal nɔ́ŋɔ, ká bʋlɛ́:
«Sóójiwa nɔhɔ̃́ Lɩsɩyasɛ nɩ́ɩ́ kué, rɩ́ŋ zɩ́mɩ́wa wɩ́ɩ́ né pɛ́ɩ́wa.»
23 Ká bʋlɛ́ sóójiwa zɔlɔ nɔhɔ̃́ nɔ́ŋɔ ka Pool zʋʋ tɔ́ bɩnajaa mɛ́; ká taŋa lo rʋ́ʋ́ tɩ́llʋ́ tɩɩ mʋɔ́wa, a lo rʋ́ʋ́ naŋnɔ́ŋsɛ má zʋ́ʋ́ rɩ́, aá sáŋʋ́ mɛ́.
Ɓa kéŋ Pool lɛ Feliksi rɩ́ Dirisili sɩ́ɛ́
24 Tápʋlɛ mʋɔ́ há dáárɛ́, Feliksi rɩ́rʋ́ háálɔ Dirisili, Zuwifiwa toló, kúó.
Feliksi tʋŋ ɓa mʋ́ yɩ́rɛ́ Pool, ʋ ko.
Pool ko máŋsɛ Zeezi Kirisi laadí wɩ́ɛ́, ʋ zesi.
25 Amá Pool há kúé aá bʋl wɩ́were ɛɛ wɩ́ɛ́, rɩ́ wóllí tɩɩ kanɛ́, arɩ́ sarɩ́ya ná háá kúé é wɩ́ɛ́, héwíŋ kéŋ Feliksi.
Ɛ́ nɛ́ ʋ sɛ́:
«Mʋ́l néé mí, cúcol.
Rɩŋ kúó ná tɛ́ŋ, rɩ́ŋ baa yɩ́rɩ́.»
26 Ʋ bɩ́ɩ́nɔ́ rɩ Pool sɩ́ pɔ́ʋ́ meéwíé ká rʋ́ʋ́ púú tá; ɛ́ yɩɛla nʋ́ʋ́ ka, a a ɓa yɩ́rɛ Pool, ʋ vaá kóú rɩ́, ɓa bɩ́bɛ bɩsɛ.
27 Ʋ ɛ́ déŋdéŋ, bɩŋsɛ bɛllɛ daarɛ, ká Pɔrsɩ Fesitiisi ko la kʋ́máŋdá Feliksi nyúú mí.
Feliksi sɩɛ́ há có rʋʋ ɔ́ɔ́ tɔrɛ Zuwifiwa sɩɛrʋ, ʋ ló Pool bɩnajaa mɛ́ ráŋ.