23
1 Pool bel Zuwifiwa sɩ́dííre ná cúrútútú ká bʋlɛ́:
«Ŋ aŋbináŋa, ŋ áŋ wɩ́ɛ́ wuu rɩ́ sapʋmmɩ́ nɛ́ Wɩɩsɛ sɩ́ɛ́ mɛ́, a kaa ko aá lɛ zaa mɛ́.»
2 Ɛ́ nɛ́ vʋk'ɔɔsa nɔhɔ̃́ Ananɩyasɛ sɛ́ nɩɛ ná há mɩ́nʋ́ laka, rɩ́wɔ́ ŋmɔ́wʋ́ nʋɔ mɛ́.
3 Ɛ́ nɛ́ Pool bʋ́lʋ́ rɩ́ bʋlɛ́:
«Wɩɩsɛ sɩ́ ŋmɔ́wɩ́, ɩ ká zebʋ́kɛ rɛ́!
Ɩ kénó rɩ́ɩ́ pi Wɩɩsɛ kíŋse* ní díŋ sarɩ́ya, ká aá zɔkɛ ɛ́ kíŋse mí, a bʋlɛ́ rɩ́wɔ́ ŋmɔ́wɩ́ŋ!»
4 Pool laka nɩcɩ́nɛ ná bʋ́lʋ́ rɩ́ bʋlɛ́:
«Wɩɩsɛ vʋk'ɔɔsa nɔhɔ̃́ nɛ́ ɩ tʋksɛ?»
5 Ɛ́ nɛ́ Pool sɛ́:
«Aŋbináŋa, ŋ wɩ ɛ̃ rɩ́ vʋk'ɔɔsa nɔhɔ̃́ nɛ́; rɩŋ fa ɩ́ɔ̃́ rɛ́, ŋ wɩ ɛ́ɛ́ bʋl; bee wɩ́ɛ́ ɓa pʋ́ŋsɔ́ bʋlɛ́:
‹Ɩ wɩ mɔhɛ̃́ rɩ́ɩ́ bʋl bɔ́ŋbɔ́ŋ cáásɩ́ tɔ́ɔ́ kuóro.› »
6 Pool há ɩ́ɔ̃́ zɩŋ rɩ́ nɩciké ná náŋá ká Sadɩsɩɛ̃wa,* ká náŋa má a Farɩzɩɛ̃wa,* ɛ́ nɛ́ ʋ ɓɔ́ʋ́ liŋó, a bʋl nɩɛ ná rɩ́ bʋlɛ́:
«Ŋ ká Farɩzɩɛ̃ rɛ́, ŋ lʋlla má Farɩzɩɛ̃wa.
Ŋ há sáŋɛ́ laa dí, rɩ sʋsɛ wúóló bɩrɛ aá isi wɩ́ɛ́ nɛ́, ɓa kánɩ́ŋ rɩ́wɔ́ díŋ sarɩ́ya.»
7 Ʋ há bʋ́l ɛ́, kapɔsɛ zʋ́ Farɩzɩɛ̃wa rɩ́ Sadɩsɩɛ̃wa pɛ́kɛ, a káŋwɔ́ púl ná caksɛ bɛllɛ.
8 Sadɩsɩɛ̃wa é sɛ́, rɩ nɛrɔ sʋ́wɔ́, ʋ báá wɩ wuo bɩrɛ aá isi; rɩ́ malɩ́kawa toó, kaŋtɔmɔ toó, lɛlɛ má toó; ká Farɩzɩɛ̃wa má sɛ́, ɓa nyáŋ nyɛ wuu ní mɩnɛ́.
9 Tɩ́ŋtɔ́ɛ́ zúkó, Wɩɩsɛ kɛŋzɩnna* náŋa má há mɩŋ Farɩzɩɛ̃wa har, ɓa má isi a pɛ́wɔ́ mɛ́ bʋlɛ́:
«Á wɩ báálɔ né wɩ́tɔ́k wuu néé; nyɛ mɛ́ leeɓoŋ ní bʋ́lʋ́ rɩ́, ɛ́ rá má malɩ́ka nɛ́.»
10 Nɛsɛ de ɔsɛ aá zuki wuu.
Sóójiwa nɔhɔ̃́ ná fɩ́fá rɩ́ nɩɛ ná háá ka Pool cɔ́nnɛ; ɛ́ nɛ́ ʋ a sóójiwa tuwi ka Pool, a kaa bɩrzɛ́ sóójizʋ́ɔ́.*
11 Ɛ́ tɔ́ɔ́ há pʋ́lɛ́, Nyuutɩna túwó bʋl Pool rɩ́ tɩ́taŋ a bʋlɛ́:
«Dí nyamma, ɩ há bʋ́lɩ́ŋ wɩ́ɛ́ ɛ́ Zerizalɛmɛ mɛ́, ʋ mɔhɔ̃́ rɩ́ɩ́ bʋ́lɩ́ŋ wɩ́ɛ́ Romi má mɛ́ ɛ́ nɛ́.»
Zuwifiwa vʋ́ʋ́rɛ́ Pool ɓʋ́ɩ́ wɩ́ɛ́
12 Tɔ́ɔ́ há pʋ́lɛ́, Zuwifiwa náŋa vʋ́ʋ́rɔ́; a ŋmɩ́ɛ́sɛ bʋlɛ́:
«Raá nɛ́ wɩ Pool ɓʋ́ɛ́, á wɩ ɓɩɛ́ dí, a wɩ nyií nyɔ; rɩ ɛ́ rá, rɩ́ Wɩɩsɛ zɔ́krá.»
13 Ɓa nɩɛ ná há vʋ́ʋ́rɛ́ ɛ́ vʋʋrɛ́, ɓa kɩ nɩɛ mɛɛ́sɛllɛ.
14 Ɛ́ nɛ́ ɓa isi mʋ́ ná vʋk'ɔɔsa* nɩhɩɛ̃́sɛ rɩ́ tɔ́ɔ́ nɩhɩɛ̃́sɛ,* a bʋl pɔ́wɔ́ bʋlɛ́:
«Á vʋ́ʋ́rɔ́ rɛ́, a ŋmɩ́ɛ́sɛ bʋlɛ́:
‹ Raá wɩ Pool ɓʋ́ɛ́, á wɩ ɓɩɛ́ dí.›
15 Ɛ́ wɩ́ɛ́, ɩ́ rɩ́ Zuwifiwa sɩ́dííre isi mʋ́l néé mí, a mʋ́ ná sóójiwa nɔhɔ̃́ ná, ɩ́ bʋl rɩ́ɩ́waá já rɩ́ɩ́wa ɔsɛ dí Pool sarɩ́ya nɛ́, rʋ́ʋ́ kánʋ́ bɩrkóíwa sɩ́ɛ́; ká ráá má pɔ́ wérí, rʋʋ́ ko, ráá kɛ́rɛ ŋmɔwɛ ɓʋ́.»
16 Pool nátoló bio fa mɩŋ ráŋ, a nɛ ɛ́ vʋʋrɛ́.
Ɛ́ nɛ́ ʋ mʋ́ sóójizʋ́ɔ́, a bʋl pá Pool.
17 Ɛ́ nɛ́ Pool yɩ́rɛ sóójiwa zɔlɔ nɔhɔ̃́, a bʋ́lʋ́ rɩ́ bʋlɛ́:
«Ka báwie né mʋ́ɩ́wa nɔhɔ̃́ rɩ́, ʋ kéŋ wɩ́ɩ́, aá bʋ́lʋ́ rɩ́.»
18 Sóójiwa zɔlɔ nɔhɔ̃́ ná ka báálɔ ná mʋ́wɔ́ nɔhɔ̃́ rɩ́, a bʋlɛ́:
«Pool ná há mɩŋ bɩnajaa mɛ́ nɛ́ tʋ́mɩ́ŋ, rɩ́ŋ ka báálɔ né ko; rʋ́ʋ́ kéŋ wɩ́ɩ́ rɛ́ aá bʋ́lɩ́ rɩ́.»
19 Sóójiwa nɔhɔ̃́ ná ka Pool nátoló bio ná nɛ́sɛ mɛ́, a kaa kɛkɛ nɩɛ mɛ́, ká bɔ́sʋ́ bʋlɛ́:
«Bee wɩ́ɩ́ rɛ́ ɩ ka aá ja rɩ́ɩ́ bʋ́lɩ́ŋ rɩ́?»
20 Ɛ́ nɛ́ ʋ sɛ́:
«Zuwifiwa tʋ́ŋ nʋɔ mɛ́ rɩ́wɔ́ ko sʋ́lɩ́, rɩ́ɩ́ cíé ka Pool kówó sɩ́dííre sɩ́ɛ́, ká bʋlɛ́ ɓaá já rɩ́wɔ́ ɔsɛ dúú sarɩ́ya nɛ́.
21 Sɩɛ́ sɩ́wɔ́ láá dí.
Ɓa nɩɛ kɩ mɛɛ́sɛllɛ, a ŋmɩ́ɛ́sɛ bʋlɛ́ ɓa wɩ ɓɩɛ́ dí, a wɩ nyií nyɔ, rɩ ɓa nɛ́ wɩ Pool ɓʋ́ɛ́.
Mʋ́l néé mí sɩɛ́, ɓa kéŋwó tɩɩ a féŋsi ŋmɛ́nɔ mɛ́, aá dɛ́llʋ́, rɩɩ pɔ́ʋ́ ŋmɛ́nɔ rʋ́ʋ́ kúko, rɩ́wɔ́ ɓʋ́ʋ́.»
22 Sóójiwa nɔhɔ̃́ ná zésú tenni ká bʋlɛ́:
«Sɩ́ ló rí nɛ́ŋ wuu nɛ wɩ́ɩ́ né, ɩ há bʋ́lɛ́ páŋ wɩ́ɛ́.»
Ká púú tá, ʋ col.
Ɓa tá Pool ʋ mʋ́ kʋ́máŋdá Feliksi rɩ́
23 Ɛ́ nɛ́ sóójiwa nɔhɔ̃́ ná yɩ́rɛ sóójiwa zɔlɔwa nɩhɩɛ̃́sɛ ná bɛllɛ, a bʋ́lwɔ́ rɩ́ bʋlɛ́:
«Ɩ́ lɩ́sɛ sóójiwa zɔwɛllɛ, a lɩ́sɛ zákzɩ́nna mɛɛ́sɩbotoro rɩ́ fí, a lɩ́sɛ hɛyoore má zɔwɛllɛ, rɩ́ɩ́wa isi tɩ́taŋ bɩ́ŋbɩlɩ́ nɛ́mɛ́ cɛ́rɛ, a mʋ́ Sezaare.
24 Ɩ́ ja záksɛ, rɩ́ Pool má zɛ́, rɩ́ɩ́wa kánʋ́ va wérí, a kaa mʋ́ pá kʋ́máŋdá Feliksi.»
25 Ká ʋ pʋ́ŋsɛ kɛnɔ, rɩ́wɔ́ kaa mʋ́ pá Feliksi, a bʋlɛ́:
26 Ŋ Kulodi Lɩsɩyasɛ nɛ́ pʋ́ŋsɛ kɛnɔ né a pɛ́ɩ́,
nɩpiŋo kʋ́máŋdá Feliksi;
ŋŋ́ cʋ́ɔ́lɩ́!
27 Báálɔ né ní Zuwifiwa ka, aá ja rɩ́wɔ́ ɓʋ́.
Ŋ sɩɛ́ nɩ́ɔ́ rʋʋ ká Romi bíí rí, ɛ́ nɛ́ ŋ lɩ́sɛ sóójiwa, á mʋ́ lɔ́ʋ́ ɓa nɛ́sɛ mɛ́.
28 Ŋ há wɩ wɩ́ɩ́ ná há tɛ ɓaá ja rɩ́wɔ́ ɓʋ́ʋ́ ɛ̃, ŋ ɔ́ɔ́ ɓa kánʋ́ mʋ́wɔ́ sɩ́dííre sɩ́ɛ́.
29 Ɛ́ báálɔ bílú nʋʋsɛ ɓa sɩ́ɛ́ mɛ́, ŋ ná rʋʋ wɩ wɩ́ɩ́ zɔ́kɛ́ mɔ ɓʋ́ɩ́, a mɔ rɩ́wɔ́ kánʋ́ tɔ́ bɩnajaa mɛ́; amá ɓa tɩɩ kíŋse wɩ́ɛ́ nɛ́ ɓa kaa cɩ́nʋ́ mɛ́.
30 Ká ŋ nɛ rɩ ɓa féŋsó aá jɔ́ʋ́, ɛ́ nɛ́ ŋ sɩ́wɔ́ kánʋ́ tʋosi kóí rí, a makɛ rɩ́ nɩɛ ná há cɩ́nʋ́ mɛ́, tɩɩ tɩŋ kóí laka, a mákʋ́ wɩ́zɔkɩ́.
[Wɩɩsɛ sɩ́ pɛ́ɩ́ mɛ́.]
31 Sóójiwa ná ɓɩɛ́na isi ka Pool, anɛ ɛ́ ɓa nɔhɔ̃́ há sɛ́; a va tɩ́taŋ ná mʋ́ peri Aŋtipatiri.
32 Tɔ́ɔ́ pʋl, sóójiwa ná háá va naasɛ mɛ́, bɩrmʋ́ sóójizʋ́ɔ́, ká zákzɩ́nna ná dʋŋɔ ka Pool daarɛ col.
33 Ɓa mʋ́ peri Sezaare, a lɩ́sɛ kɛnɔ ná pá kʋ́máŋdá Feliksi, a pi Pool má hóú nɛ́sɛ mɛ́.
34 Kʋ́máŋdá Feliksi lá kɛnɔ karmɛ, ká bɔsɛ Pool ʋ há lɛ́ dɩtɩ́llɛ ná mɛ́; ʋ há nɩ́ɛ́ rɩ Pool lɛ́ Silisi ní,
35 ʋ sɛ́:
«Nɩɛ ná há cɩ́nɩ́ mɛ́, ɓa nɩ́ɩ́ kué rɩ́ŋ sɩɛ́ bɔ́sɩ́ arɩ́ wɩ́ɛ́.»
Ká a ɓa ka Pool zʋʋ hé jaa ná kuóro Erodi* há sɔ́ɛ́ sɩɛrʋ, a pɔ́ʋ́ mɛ́ wérí.