22
1 «Ŋ ánáwa rɩ́rɩ́ŋ aŋbɛlɛ, ɩ́ zesi wɩ́ɩ́ ná ŋ há kené rɩ́ŋ bil pɛ́ɩ́wa, ká láŋ tɩɩ.»
2 Ɓa há nɩ́ɛ́ rɩ Ebirewa* liŋó mí ní Pool bʋ́bʋ́lwɔ́ rɩ́, ɓa ɔ́sɔ́ ké cɩ́m, ká Pool sɩɛ́ bʋ́lwɔ́ rɩ́ bʋlɛ́:
3 «Ŋ ká Zuwifi rí, ɓa lʋ́lɩ́ŋ Tarsɛ mɛ́ nɛ́, Silisi tíé; ŋ taŋa wá tɔ́ɔ́ né sɩɛrʋ nɛ́.
Á ánáwa kíŋse wuu, Gamalɩyɛl nɛ́ kármɩ́ŋ ŋ zɩ́ŋwɔ́ wérí.
Ŋ má fa kéŋ kajáŋa wérí Wɩɩsɛ wɩ́ɛ́ sɩɛrʋ, anɛ ɩ́ má zaa há kéŋ kajáŋa nyɛ nɛ́.
4 Ŋ fa ɓʋ́ʋ́sɛ nɩɛ má, Zeezi ŋmɛ́nɔ́ né wɩ́ɛ́, a a ɓa kɛsɛ báála rɩ́ háála vɔsɛ, a kaa mʋ́ hé bɩnajaa mɛ́, ɛ́ wɩ́ɛ́.
5 Vʋk'ɔɔsa* nɔhɔ̃́ rɩ́ tɔ́ɔ́ nɩhɩɛ̃́sɛ* wuu káŋ dáŋsɩ́ɛ́wa nɛ́.
Ɓa pʋ́ŋsɛ kɛnnɛ má tɩɩ páŋ rɩ́ŋ kaa mʋ́ Damaasɛ, a pɔ́wɔ́ maábináŋa rɩ́wɔ́ páŋ ŋmɛ́nɔ, rɩ́ŋ kɛsɛ Zeezi laadííre ná há mɩŋ ráŋ, a vɔsɛ kaa ko Zerizalɛmɛ, rɩ́wɔ́ tʋ́rwɔ́.
6 «Ŋ há lɛ́ ŋmɛ́nɔ a mʋ́ aá peri Damaasɛ, pʋmmʋzeno oro lɛ́ bána rɩ́, wɔhɔ, a ko cúólíŋ wuu, naasɩ́ balá.
7 Ŋ tuwi ɓal tíé, ká nɛ nɛrɔ liŋó há bʋ́lɩ́ŋ rɩ́ bʋlɛ́:
‹Sool, Sool, beé rí tɛ ɩ wɩ́wálmɩ́ŋ nyɛ?›
8 «Ɛ́ nɛ́ ŋ bɔsɛ:
‹Áŋ rɩ́ kɛ́ɩ́, Nyuutɩna?›
«Ɛ́ nɛ́ ʋ sɛ́:
‹Ŋ nɛ́ ká Nazarɛtɛ Zeezi ná, ɩ háá wálmɛ́.›
9 Ŋ rɩ́ nɩɛ ná háá valɛ́ wuu ná pʋmmɔ ná, amá ɓa wɩ liŋó ná há bʋ́lɩ́ŋ rɩ́ é nɩ́ɛ́.
«Ɛ́ nɛ́ ŋ sɩɛ́ bɔsɛ:
‹Nyuutɩna, ŋ́ a beé?›
10 «Nyuutɩna sɛ́:
‹Isi mʋ́ Damaasɛ, ráŋ nɛ́ rɩ́wɔ́ mákɩ́ wɩ́ɩ́ ná wuu ɩ há mɔhɛ̃́ rɩ́ɩ́ a.›
11 Pʋmmɔ ná há cúólíŋ sɩ́ɛ́, ŋ báá wɩ ráŋ ná; ŋ vállɩ́náŋa nɛ́ cɔ́ŋ nɛ́sɛ mɛ́, a kánɩ́ŋ mʋ́ Damaasɛ.
12 «Báálɔ oro má fá mɩŋ ɛ́ tɔ́ɔ́ mɛ́ aá tɩŋ Wɩɩsɛ kíŋse* wérí, ɓaá yɩ́rʋ́ Ananɩyasɛ, Damaasɛ Zuwifiwa wuu sʋ́ʋ́ ká nɩtaŋá.
13 Ɛ́ báálɔ nɛ́ kóŋ rɩ́, a bʋlɛ́:
‹Ŋ maábinɔ́ŋɔ Sool, bel aá ná ráŋ.›
Mʋ́l ná tɩɩ tɩɩ mɛ́, rɩŋ sɩ́ɛ́ ná ráŋ, ŋ bel nóú.
14 «Ɛ́ nɛ́ ʋ sɛ́:
‹Á ánáwa Wɩɩsɛ nɛ́ lɩ́sɩ́ rɩ́ɩ́ zɩ́mʋ́ cólle, rɩ́ɩ́ ná nɩtékétéké ná, ká nʋ́ʋ́ nʋɔ wɩ́bʋlɛ́.›
15 Ʋʋ́ já rɩ́ɩ́ ɔ́ʋ́ sɩɛ́da nɛ́ŋ rɛ́, nɩbííne wuu sɩ́ɛ́ mɛ́, a tɛ wɩ́ɛ́ ná wuu ɩ há néé, arɩ́ ɓa ná wuu ɩ há nɩ́ɛ́ sɩɛ́da.
16 Mʋ́l néé mí sɩɛ́, ɩ báá kénó tɩkɛ beé?
Isi dahá, a yɩ́rɛ hé Nyuutɩna yɩr mɛ́, ká rɩ́wɔ́ kánɩ́ muŋsi nyii mí, rɩ́ɩ́ wɩ́bɔmɔ suúri hé.»
Pool lɛ́ Zerizalɛmɛ mɛ́, a mʋ́ nɩɛ ná há to Zuwifiwa sɩɛrʋ
17 «Ŋ há bɩ́rɛ́ ko Zerizalɛmɛ, a zʋ Wɩcʋɔlɩjɩzeno aá cʋɔlɛ Wɩɩsɛ, ŋ ná Nyuutɩna nyaamɩ́, anɛ duose sɩɛrʋ.
18 Ʋ bʋ́lɩ́ŋ rɩ́ bʋlɛ́:
‹Pɛ́rmɛ a lɛ Zerizalɛmɛ mɛ́ kɩ́kɛ́lɛ́, bee wɩ́ɛ́ ɓa sɩ́ vɛ sɩɛ́da ná ɩ háá á rɩ́ɩ́ tɛ, ŋ yɩr mɛ́.›
19 «Ɛ́ nɛ́ ŋ sɛ́:
‹Nyuutɩna, ɓa tɩɩ ɩ́ɔ̃́ rɩ́ŋ ɔ́ɔ́ ɓa kɛsɛ nɩɛ ná há lɛ́ɩ́ dí, a tɔ́ bɩnajaa mɛ́, ká a ɓa zʋ cémejɩɩsɛ,* a kɛ́sɩ́wɔ́ ná wuu há lɛ́ɩ́ wɩ́ɛ́ dí, a ŋmasɛ wérí.
20 Ká kal ná ɓa há ɓʋ́ Ɩtɩɛnɛ, ɩ sɩɛ́da nɛrɔ, ŋ mɩŋ ráŋ, a pɔ́ nɩɛ ná há ɓʋ́ʋ́, gɛnnɛ mɛ́; a má saŋ bʋlɛ́ rɩ́wɔ́ ɓʋ́ʋ́.›
21 «Ɛ́ nɛ́ Nyuutɩna sɩɛ́ bʋ́lɩ́ŋ rɩ́ bʋlɛ́:
‹Isi rɩ́ŋ tʋ́mɩ́ dɩbólí, nɩɛ ná há to Zuwifiwa rɩ́.› »
22 Ɓa zésí Pool wɩ́bʋlɛ́ wérí, a ko pérú har dɩbʋlɩ́ né.
Amá ɓa há kúé nɛ ɛ́ wɩ́ɩ́ é, ɓa dé ŋmaarɛ nɛ́, a bʋlɛ́:
«Ɩ́ a rɩ́ báálɔ né nyɩ́ɩ́kɛ tíé nyúú!
Ʋ wɩ mɔhɛ̃́ rʋ́ʋ́ mɩŋ dúníé mí.»
23 Ká ɓa cáási, a pɔ́wɔ́ gɛnnɛ yo nyúú rí, a pa kuŋkulo má yo bána rɩ́.
24 Ɛ́ nɛ́ sóójiwa nɔhɔ̃́ ná sɛ́ rɩ́wɔ́ ka Pool zɩ́ sóójizʋ́ɔ́* ná, a pi vɩla, a a rʋ́ʋ́ makɛ wɩ́ɩ́ ná wɩ́ɛ́, ɓa há tɩ́ŋɛ́ a kɔ kʋɔllɛ aá hóú mí.
25 Ɓa háá vɔwɛ Pool, ká rɩ́wɔ́ fɩ́rɛ́, ɛ́ nɛ́ ʋ bʋl sóójiwa zɔlɔ nɔhɔ̃́ ná há cɩ́ ráŋ dɩhɩ̃́ a bʋlɛ́:
«Ŋmɛ́nɔ mɩ́nɔ́, rɩ́ɩ́wa ŋmɔwɛ nɛrɔ ná há ká Romi tíé nɛrɔ tɩɩ, rɩ ɓa nɛ́ wʋ́ʋ́ sarɩ́ya díé kɛ́rɛ́?»
26 Sóójiwa zɔlɔ nɔhɔ̃́ há nɛ́ Pool bɔsɛ́ ná, ʋ mʋ́ɔ́ hé duosi pɔ́wɔ́ wuu nɔhɔ̃́, a bʋlɛ́:
«Báálɔ ná ká Romi bíí rí; ɩ sɩɛ́ a ɛrɛ́ rɛ́?»
27 Ɛ́ nɛ́ sɩɛ́, sóójiwa nɔhɔ̃́ ná ko bɔsɛ Pool bʋlɛ́:
«Bʋl rɩ́ŋ nɛ yá, ɩ ká Romi bíí rí?»
Pool sɛ́:
«Óó.»
28 Rɩ sóójiwa nɔhɔ̃́ ná sɛ́:
«Meéwíkana nɛ́ ŋ túŋ, ká a Romi nɛ́ŋ.»
Ɛ́ nɛ́ Pool sɛ́:
«Ŋ é kɔ́ʋ́, ŋ lʋlɛ́ mɛ́ wuu ní.»
29 Kɩ́kɛ́lɛ́, rɩ nɩɛ ná há cɩ́nɛ́ rɩ́wɔ́ ŋmɔwɛ Pool, túó lɛ, ká héwíŋ ka sóójiwa nɔhɔ̃́ ná má, ʋ há ɛ́ɛ́ ɓa ka Pool vɔwɛ, ká ʋ nɛ rʋʋ ká Romi bíí wɩ́ɛ́.
Ɓa kéŋ Pool lɛ Zuwifiwa sɩ́dííre sɩ́ɛ́
30 Tɔ́ɔ́ há pʋ́lɛ́, sóójiwa nɔhɔ̃́ ná jɩ́ja rʋ́ʋ́ zɩŋ wɩ́ɩ́ ná tɩɩ tɩɩ wɩ́ɛ́ Zuwifiwa háá jɛɛ́ rɩ́wɔ́ ɓʋ́ Pool, ʋ ɔ́ɔ́ ɓa púrú tá, ká ʋ yɩ́rɛ Wɩɩsɛ vʋk'ɔɔsa nɩhɩɛ̃́sɛ, rɩ́ Zuwifiwa sɩ́dííre hé náŋá mɛ́; ká ʋ a Pool tuwi, a ko cɩ́ŋwɔ́ sɩ́sɩ́ɛ́nnʋ́wa.