Pool mʋ́ Masɩdʋanɛ arɩ́ Gɩrɛkɛwa tɔ́nɛ
20
1 Tɔ́ɔ́ vúkme ná há kúé tenni, Pool yɩ́rɛ Zeezi laadííre ná hé náŋá mɛ́, a cáánɩ́wɔ́, ká sʋ́lʋ́ tɩɩ a col Masɩdʋanɛ dɩtɩ́llɛ.
2 Ʋ há mʋ́ ráŋ, ʋ gʋ́ɔ́rɛ́ ɛ́ tɔ́nɛ kílo wuu, a bʋl wɩ́ɛ́ dúóri Zeezi laadííre naasɛ,
3 ká daarɛ mʋ́ Gɩrɛkɛwa* tíé, a ké ráŋ caŋsɛ botoro.
Ʋ há kenú tɩɩ rʋ́ʋ́ mʋ́ daarɛ Siiri* cɔɔ rɩ́ tɛ́ŋ ná mɛ́, rɩ Zuwifiwa vʋ́ʋ́rʋ́ ɓʋ́ɩ́ wɩ́ɛ́.
Ɛ́ nɛ́ ʋ bɩrɛ, a tɩŋ Masɩdʋanɛ ŋmɛ́nɔ col.
4 Nɩɛ ná há tɩ́ŋʋ́ mɛ́ a col ní ká:
Beere tɩ́náwa Piriisi bio Sɔpatɛrɛ, rɩ́ Arɩsɩtarkɛ rɩ́ Sekoŋ há lɛ́ Tesaloniki,* rɩ́ Gayisi há lɛ́ Dɛrbɛ, rɩ́ Timote, a pi Tisiiki rɩ́ Tirofiimi há lɛ́ Azi.
5 Ɓa nyáŋ wuu lárá sɩ́ɛ́, a mʋ́ mɩŋ Tʋrʋwasɛ mɛ́, aá dɛ́llɩ́rá.
Pool mʋ́ Tʋrʋwasɛ
6 Ɓa dí sɩbʋ́r* toó dɩpɛ́ŋ cana* tápʋlɛ balpɛ, ká á é isi mʋ́ Filipi a zʋ nyiidabore, a col.
Á vá tápʋlɛ bɔmmʋ́ɔ́, ká mʋ́ púwó Tʋrʋwasɛ mɛ́, á wuu ké ráŋ tápʋlɛ balpɛ.
7 Jɩmáásɛ kal, á hé náŋá mɛ́, ráá dí liisidílo.
* Ʋ tɔ́ɔ́ nɩ́ɩ́ pʋlɛ́ rɩ́ Pool col.
Ɛ́ nɛ́ ʋ rɩ́ nɩɛ ná há mɩŋ ráŋ ké, a bʋl wɩ́ɛ́ wuu, tɔ́ɔ́ ɓaamɔnáŋáwa peri.
8 Jɩtúko sɩɛrʋ nɛ́ á zʋʋ ké, ɓa nyɩkɛ cáŋsɛ ɓɩkana tá.
9 Bápʋɔsɩ́wie oro, ɓaá yɩ́rʋ́ Etikiisi, fa ké tókóró mí aá zesi.
Pool há bʋ́l wɩ́ɛ́ aá dáánɛ, dóŋ kenú ʋ pɛ́.
Dóŋ kɔrɔ zʋ́ʋ́, ʋ lɛ jɩtúkni botoro nyúú mí tuwi ɓal tíé.
Ɓa túwó ka rɩ́wɔ́ cúóli, rʋʋ sʋ́wɔ́.
10 Amá Pool há túwé a cúllú mí, ʋ kenú ɓɔ́, ká bʋlɛ́:
«Ɩ́ sɩ́ fúklú, ʋ wɩ sʋ́wɛ́.»
11 Pool há bɩ́rɛ́ zɩ́ túko ná sɩɛrʋ, ʋ pí dɩpɛ́ŋ conni a dí, ká baa ha ké bʋl wɩ́ɛ́ dáánɛ wuu, tɔ́ɔ́ pʋl.
Ɛ́ nɛ́ sɩɛ́ ká ʋ isi col.
12 Bápʋɔsɩ́wie ná ísó aá hiẽsi, ɓa kánʋ́ bɩrzɛ́ nɩɛ ná rɩ́; ʋ ɛ́ a beŋtúpɔ́ɔ́rwɩ́ɩ́.
Pool lɛ́ Tʋrʋwasɛ mɛ́, a mʋ́ Mile
13 Á é lá sɩ́ɛ́ a zʋ nyiidabore aá mʋ́ Asɔsɛ, ká Pool va naasɛ mɛ́, aá kɛ́rɩ́rá ráŋ, ráá púú; á vʋ́ʋ́rɛ́ ɛ́ nɛ́.
14 Ʋ há kúé púrá Asɔsɛ mɛ́, á púú hérá nyiidabore ná mɛ́, á wuu mʋ́ Mɩtɩlɛnɛ.
15 Á lɛ́ ráŋ mɛ́, a zʋ mʋʋ va wuu, tɔ́ɔ́ kúó aá pʋl, raá mʋ́ɔ́ aá cɛ́rɛ Kɩɔsɛ.
Tɔ́ɔ́ pʋl, á isi caasɛ Samɔsɛ rɩ́, tɔ́ɔ́ nɔ́ŋɔ́ báá pʋ́lɔ́, raá pérí Mile.
16 Pool sʋ́ʋ́ sɩ́ mʋ́ daarɛ Ɩfɛɛzɛ* mɛ́, ká sɩ́ ráŋ cɩ́nʋ́; ʋ wɩ có rʋʋ zɔ́kʋ́ tɛ́ŋ Azi tíé, káá ja, rʋʋ ká mɔlɛ́, rʋ́ʋ́ va kɩ́kɛ́lɛ́ mʋ́ dí Paŋtɩkɔtɛ* cana, Zerizalɛmɛ mɛ́.
Pool tá Ɩfɛɛzɛ wɩcʋ́ɔ́lɩ́sɩ́dííre
17 Pool sɩɛ́ mɩŋ Mile mí ní, ká tʋŋ ɓa mʋ́ yɩ́rɛ Ɩfɛɛzɛ wɩcʋɔla púl sɩ́dííre.*
18 Ɓa ko, ʋ bʋ́lwɔ́ rɩ́ bʋlɛ́:
«A kaa púlíŋ Azi tíé dʋ́ŋdʋ́ʋ̃́ kal zʋʋlɩ́ mɛ́, ɩ́ wuu ní ɛ̃ ɛ́ ná, ŋ há keníŋ tɩɩ héíwa mɛ́.
19 Zuwifiwa háá jɛɛ́ rɩ́wɔ́ lɩ́sɩ́ŋ mɩɩsɛ, ŋ mɩŋ wɩhála sɩɛrʋ ɛ́ nɛ́, ká múúríŋ tɩɩ a tʋŋ aá pá Nyuutɩna, arɩ́ sɩ́mɩɩrʋ.
20 Wɩ́ɛ́ ná há mɔhɛ̃́ rɩ́wɔ́ sáŋɩ́wa mɛ́, ɩ́ ɩ́ɔ̃́ zɩŋ rɩ́ŋ wʋ́ɔ́ oro wuu píé féŋsíwa.
Ŋ wɩ sɩ́ɩ́ fɛ́ɛ́, ká cáánɩ́wa, a kármɩ́wa, nɩkana sɩɛrʋ, arɩ́ jɩɩsɛ má sɩɛrʋ.
21 Ŋ bʋ́lɔ́ aá pá Zuwifiwa rɩ́ Gɩrɛkɛwa, rɩ́wɔ́ bɩ́rsɛ, a sɩ́ áá zɔkɛ Wɩɩsɛ mɛ́, ká a yardá á Nyuutɩna Zeezi Kirisi mí.
22 «Ká mʋ́l néé mí, Wɩɩsɛ Sabɩɩna vɔ́wɩ́ŋ, ŋ mʋ́mʋ́ Zerizalɛmɛ, ká wɩ wɩ́ɩ́ ná háá á rʋ́ʋ́ péríŋ ráŋ ɛ̃.
23 Amá taŋa, rɩŋ nɛ́ mʋ́ɛ́ aá zʋ tɔ́ɔ́ wuu, Wɩɩsɛ Sabɩɩna nɩ́ɩ́ la sɩ́ɛ́ mákɩ́ŋ wɩɩla ná ŋ háá á rɩ́ŋ dí, ká rɩ́wɔ́ kánɩ́ŋ vɔwɛ, a tɔ́ bɩnajaa má mɛ́.
24 Amá ŋ wɩ́ŋ mɩɩsɛ búé kɩ́llɛ wɩ́ɩ́ wuu; ʋ wɩ́ɛ́ wɩ́ŋ wálmɛ.
Ʋ ná wɩ́ɛ́ há fɩ́ɛ́mɔ́ ŋ rɩ́ nɛ́ ká, rɩ́ŋ wóllíŋ ŋmɛ́nɔ va, a mʋ́ pérú tokó arɩ́ satɔrɔ́, a wólli tʋŋ tʋtʋmɩ́ ná, Nyuutɩna Zeezi há píé héŋ nɛ́sɛ mɛ́, rɩ́ŋ bʋl Wɩɩsɛ Labaarɩwero rɩ́rʋ́ zilé ná wɩ́ɛ́ pá nɩɛ.
25 «Ká mʋ́l néé mí, ŋ ɩ́ɔ̃́ zɩŋ rɩ́ɩ́wa báá waá bɩ́rnáŋ, ɩ́ é nɩɛ nyáŋ wuu, ŋ há gʋ́ɔ́rɩ́wa sɩɛrʋ a bʋl Wɩɩsɛ kuótɔ́ɔ́ ná wɩ́ɛ́.
26 Ɛ́ nɛ́ tɛ, ŋ bʋl taŋá aá pɛ́ɩ́wa zaa, ɩ́ oro wuu cɛ́l tóŋ nyúú mí,
27 bee wɩ́ɛ́ ŋ máŋsɛ Wɩɩsɛ cáánɛwa wuu ní pɛ́ɩ́wa, ŋ wɩ wɩ́ɩ́ wuu féŋsé.
28 Ɩ́ sɩɛ́ pɔ́ɩ́wa tɩɩ mɛ́ wérí, ká bel nɩɛ ná wuu mí, Wɩɩsɛ Sabɩɩna há pííwa héwó sɩ́ɛ́.
Ɩ́ bel wɩcʋɔla púl* nɩɛ mɛ́, anɛ penʋɔlɔ* háá bélú pieŋse* mí ɛ́.
Wɩɩsɛ nɛ́ púú tɩɩ Bio cɛ́l a yɔwɛ lɔ́wɔ́.
29 Ŋ ɩ́ɔ̃́ rɩ́ŋ colé har rɩ́ mɛ́, nɩbínaŋcáwuríwa sɩ́ ko zʋ́ɩ́wa sɩɛrʋ, a zɔ́kɩ́wa anɛ naŋcáwurí há zʋ́ petuu.
30 Ká nɩɛ sɩ́ lɩ́ɩ́wa sɩɛrʋ a pi nyɛwɩ́ɛ́ karmɛ aá pá nɩɛ, a makɛ rɩ́wɔ́ pɔsɛ karmɩbɛlɛ, rɩ́wɔ́ ko tɩ́ŋwɔ́ mɛ́.
31 Ɩ́ líísíwa tɩɩ, ʋ bɩŋsɛ botoro ní nyɛ, ŋ wɩ tɛ́ɛ́, káá cáánɩ́wa baláwa, wɔhɔ rɩ́ tɩ́taŋ wuu, arɩ́ sɩ́mɩɩrʋ.
Ɩ́ sɩɛ́ pɔ́ wérí.
32 «Ká mʋ́l néé mí sɩɛ́, ŋ pííwa hé Wɩɩsɛ, arɩ́rʋ́ zilé wɩ́bʋlɛ nɛ́sɛ mɛ́.
Ʋ nɛ́ wóíwa naasɛ aá dúóri, rɩ́ɩ́wa ka wérí, a mʋ́ ná ker ná Wɩɩsɛ há bílú nɩɛ wuu mí.
33 Ŋ wɩ nɛ́ŋ wuu wárɛ meéwí, rɩ́rʋ́ salmɛ meéwí, rɩ́rʋ́ gɛnnɛ wɩ́ɛ́ hɩ́ɛ̃́nɛ́.
34 Ɩ́ tɩɩ ɩ́ɔ̃́ zɩŋ rɩ́ŋ nɛ́ŋsa nyáŋ nɛ́, ŋ kaa tʋŋ, a yɔ́wɩ́ŋ rɩ́rɩ́ŋ harwa wuu oŋjaalɛ́.
35 Ŋ sɩɛ́ tʋ́ŋ ɛ́, rɩ́ŋ mákɩ́wa nɛ́, rɩ́ɩ́wa zɩŋ ɛ́ ná ɓa háá tʋŋ, a wólli nɩyaara mɛ́ pɛ́; ká rɩ́ɩ́wa pi Nyuutɩna Zeezi wɩ́bʋlɛ́ ná aá líísíwa tɩɩ.
Ʋ há sɛ́:
‹Pɛ́ɛ́ kéŋ tɛŋpɔrɔ́ a kɩ́llɛ lɛɛ.› »