Timote tɩ́ŋ Pool rɩ́ Sila mɛ́
16
1 Pool lɛ́ ráŋ, a mʋ́ Dɛrbɛ arɩ́ Lisitiri.
Ráŋ nɛ́ ʋ ná Timote,* Zeezi laadííro oro.
Ʋ áná ká Gɩrɛkɛ rɛ́, ká ʋ maá a Zuwifi, a la Zeezi wɩ́ɛ́ dí wérí.
2 Ɓa maábináŋa ná há mɩŋ Lisitiri* rɩ́ Ikooni wuu ní sʋ́ʋ́ ká nɛ́ŋ.
3 Pool có rʋ́ʋ́ kánʋ́ tɩ́ŋʋ́ tɩɩ mɛ́.
Ɛ́ nɛ́ ʋ a ɓa cókú pɛŋ, Zuwifiwa ná há mɩŋ ráŋ wɩ́ɛ́; bee wɩ́ɛ́ ɓa wuu ɩ́ɔ̃́ rʋ́ʋ́ áná ká Gɩrɛkɛ rɛ́.
4 Rɩ ɓa nɛ́ mʋ́ɛ́ lɛ tɔ́ɔ́ wuu, ɓaá cáánɩ́wɔ́ maábináŋa ná há mɩŋ ráŋ, a bʋl rɩ́wɔ́ zíl Zeezi nɩtʋmɛ́,* rɩ́ Zerizalɛmɛ wɩcʋ́ɔ́lɩ́sɩ́dííre* há máŋsɛ wɩ́ɛ́ ná pɔ́wɔ́.
5 Wɩcʋɔla púlli nɩɛ yardá ɔsɛ aá súúri, ká ɓa nɩɛ pul aá súúri tápʋ́l wuu.
Pool ná Masɩdʋanɛ báálɔ duose mí
6 Wɩɩsɛ Sabɩɩna* há wʋ́ɔ́ ŋmɛ́nɔ pɛ́ɛ́, rɩ́wɔ́ bʋl Wɩɩsɛ wɩ́bʋlɛ Azi mí, ɓa mʋ́ɔ́ caŋ Firizi lɛ, a mʋ́ Galasi* tíé.
7 Ɓa mʋ́ɔ́ saasɛ Miisi, aá ja rɩ́wɔ́ mʋ́ Bitini, amá Zeezi Sabɩɩna wɩ sáŋɛ́.
8 Ɛ́ nɛ́ ɓa zʋ Miisi, a daarɛ mʋ́ Tʋrʋwasɛ.
9 Tɩ́taŋ, Pool pɩ́nɔ́ duosi, a ná Masɩdʋanɛ* tɩ́náwa báálɔ, rʋʋ kúó sʋ́lʋ́ a bʋlɛ́:
«Ko Masɩdʋanɛ a sáŋrá mɛ́.»
10 Pool wɩ́náálɛ ná har rɩ́ mɛ́, á wɩ dáánɛ ká mʋ́ Masɩdʋanɛ; a ɩ́ɔ̃́ zɩŋ rɩ́ Nyuutɩna nɛ́ yɩ́rɩ́rá, ráá mʋ́ bʋl Labaarɩwero wɩ́ɛ́ ráŋ.
Háálɔ oro ɓaá yɩ́rɛ Liidi, wɩ́ɛ́
11 Á lɛ́ Tʋrʋwasɛ mɛ́, a zʋ nyiidabore a caasɛ Samɔtrasɛ térké.
Tɔ́ɔ́ pʋ́lɔ́, ráá mɩŋ Neyapolisi mí.
12 Á lɛ ráŋ mɛ́, a mʋ́ Masɩdʋanɛ dɩtɩ́llɛ tɔ́zeno oro, yɩr há ká Filipi.
* Romi* dɩtɩ́llɛ nɛ́ ká ráŋ wuu.
Á ké ɛ́ tɔ́ɔ́ mɛ́ tápʋlɛ mʋɔ́.
13 Fɩɛlɛ́ tápʋl,* á isi mʋ́ tɩŋ dánnʋɔ lɛ a mʋ́ fuo nʋɔ, a bɩɩnɛ raá sɩ́ ná Wɩɩsɛ dɩcʋɔlɩ́.
Á kénó, aá bʋ́l wɩ́ɛ́ arɩ́ háála ná fa há hé náŋá mɛ́ ráŋ.
14 Ɛ́ háála nɔ́ŋɔ yɩr nɛ́ ká Liidi, ʋ ká háyɛlɔ́ rɛ́, a fɛ́l gɛnnɛ aá yɛ́llɛ Tiyatiiri mí.
Ʋ ká háálɔ ná háá fá Wɩɩsɛ wérí.
Ʋ há kéné aá zesi, Nyuutɩna wúrú sɩɛrʋ, ʋ zesi Pool wɩ́bʋlɛ́ ná wérí.
15 Ɓa kánʋ́ rɩ́rʋ́ jaa nɩɛ muŋsi nyii mí.
Ɛ́ nɛ́ ʋ sʋ́lrá a bʋlɛ́:
«Rɩɩ́wa búó rɩŋ lá Nyuutɩna wɩ́ɛ́ dí arɩ́ taŋá é rí, ɩ́ ko zʋʋ cɔ́ŋ jaa mɛ́.»
Ká de cɩ́ŋrá mɛ́ pɩ́ɩ̃́, á saŋ.
Ɓa kɛ́sɛ́ Pool rɩ́ Sila tɔ́ bɩnajaa mɛ́
16 Á há lɩ́ɛ́ aá mʋ́ Wɩɩsɛ dɩcʋɔlɩ́, á céŋ tolyómo oro, nála há kené, ʋ vʋ́vʋrɛ.
Ʋ vʋ́rɔ́ a la ɓɩɛ wérí aá pɔ́ʋ́ tɩ́náwa.
17 Ʋ de tɩ́ŋrá rɩ́ Pool mí, aá cáási bʋlɛ́:
«Báála nyáŋ ká bána rɩ́ Wɩɩsɛ tʋtʋnna nɛ́, laatɛ́ ŋmɛ́nɔ nɛ́ ɓa máŋsɛ aá pɛ́ɩ́wa.»
18 Ʋ cáási ɛ́ nɛ́ tɩ́ŋrá mɛ́, tápʋlɛ ɓɩkáná.
Pool bɔl ká bɩ́rɛ́ bɛsɛ kaŋtɔŋ ná mɛ́ bʋlɛ́:
«Arɩ́ Zeezi Kirisi yɩr ná, ŋ nɛ́ bʋ́lɛ́, lɛ toló né mí.»
Ɛ́ nɛ́ ʋ lɛ, mʋ́l ná tɩɩ tɩɩ mɛ́.
19 Tolyómo ná tɩ́náwa há néé rʋʋ báá wɩ vʋ́rɛ́ la ɓɩɛ ko aá pɔ́wɔ́, ɓa ísó mʋ́ ka Pool rɩ́ Sila, a kaa pɔsɛ lɛ nɩɛ náŋá dɩcémi, sarɩ́yadííre sɩ́ɛ́ mɛ́.
20 Ɓa mákwɔ́ cáánɛ Romi tɩ́náwa sarɩ́yadííre nɩhɩɛ̃́sɛ, a bʋlɛ́:
«Nɩɛ nyáŋ ká Zuwifiwa rɛ́, aá vúkmírá tɔ́ɔ́.
21 Ɓaá máŋsɛ kíŋse ná, á é Romi nɩɛ há wʋ́ɔ́ wuó saŋ, a wʋ́ɔ́ wuó tɩŋ.»
22 Nɩciké ná isi pɛ́wɔ́ mɛ́.
Sarɩ́yadííre nɩhɩɛ̃́sɛ ná a ɓa wúrkwó gɛnnɛ, ká bʋl rɩ́wɔ́ ja vɩllɛ fɩ́rwɔ́.
23 Ɓa há fɩ́rwɔ́ wérí, ɓa kɛ́sɩ́wɔ́ tɔ́ bɩnajaa mɛ́, ká bʋlɛ́ dánnʋpɔ́ɔ́rɔ pɔ́wɔ́ mɛ́ wérí.
24 Dánnʋpɔ́ɔ́rɔ ná há nɛ́ ɛ́, ʋ kéŋwó daarɛ zʋ sɩ́ɛ́rɩ́ jaa, a hé kure ɓa naasɛ mɛ́.
25 Tɔ́ɔ́ há fɩ́ɛ́lɛ́, ʋ ɓaamɔnáŋáwa mɛ́, Pool rɩ́ Sila ísó aá cʋɔlɛ Wɩɩsɛ, a yɩ yɩɩla aá bɩ Wɩɩsɛ mɛ́, bɩnajaa nɩɛ wuu nɩ́nɛ.
26 Naasɩ́ balá rɩ tíé zíkló, a pɛ́ ka bɩnajaa zeŋe má zíkli; ɛ́ mɛ́ nɛ́, dánnʋʋsɛ wuu wúnni, nɩtɔ́ɔ́lɛ ná wuu naasɛ kure pánnɛ.
27 Dánnʋpɔ́ɔ́rɔ gírkó isi, rɩ jaa ná dánnʋʋsɛ wuu wúnnó; ɛ́ nɛ́ ʋ fókú tókowí rʋ́ʋ́ ɓʋ́ʋ́ tɩɩ; ʋ bɩ́ɩ́nɔ́ rɩ nɩtɔ́ɔ́lɛ ná wuu lɩ́ɔ́ fá rɛ́.
28 Ɛ́ nɛ́ Pool cáási kɩ́ŋkáŋ bʋlɛ́:
«Sɩ́ɩ́ tɩɩ bɛ́ŋsʋ́, á wuu ní mɩnɛ́.»
29 Dánnʋpɔ́ɔ́rɔ ná sʋl níŋ, a fá kɩ́kɛ́lɛ́ zʋʋ ɓírmi Pool rɩ́ Sila sɩ́ɛ́, káá cel.
30 Ʋ a ɓa isi lɛ, ʋ bɔ́sɩ́wɔ́ bʋlɛ́:
«Nyúútɩ́náwa, beé rí rɩ́ŋ a, ká ná Wɩɩsɛ laatɛ́?»
31 Pool rɩ́ Sila bʋ́lʋ́ rɩ́ bʋlɛ́:
«La Nyuutɩna Zeezi wɩ́ɛ́ dí, ɩ sɩ́ ná Wɩɩsɛ laatɛ́, ɩ rɩ́rɩ́ jaa nɩɛ.»
32 Ɓa ɔsɛ máŋsɛ Nyuutɩna wɩ́bʋlɛ pɔ́ʋ́ rɩ́rʋ́ jaa nɩɛ wuu.
33,34 Ʋ káŋwɔ́ mʋ́ʋ́ jaa tɩ́taŋ ná wuu, a sɛ́sɩ́wɔ́ tɛŋ fʋrsɛ, a a ɓɩdííle pɔ́wɔ́ ɓa dí.
Ɓa kánʋ́ rɩ́rʋ́ nɩɛ wuu muŋsi nyii, ká ʋ rɩ́rʋ́ jaa nɩɛ wuu jɩ́jʋɔsɛ, ʋ há lá Wɩɩsɛ wɩ́ɛ́ dí.
35 Tɔ́ɔ́ há pʋ́lɛ́, sarɩ́yadííre nɩhɩɛ̃́sɛ ná tʋ́ŋ gárdɩwa, rɩ́wɔ́ mʋ́ bʋl dánnʋpɔ́ɔ́rɔ ná mɛ́, rʋ́ʋ́ tá báála ná rɩ́wɔ́ lɛ.
36 Dánnʋpɔ́ɔ́rɔ zʋʋ bʋl Pool mí:
«Sarɩ́yadííre nɩhɩɛ̃́sɛ tʋ́mɔ́ rɩ́wɔ́ ko bʋl ráá lɩ́sɩ́wa tá; ɩ́ sɩɛ́ lɛ, aá col arɩ́ tɛŋfɩ́ɛ́l.»
37 Ɛ́ nɛ́ Pool bʋl gárdɛ tʋ́mɛ́ ná rɩ́:
«Á é Romi nɩɛ, ɓa wɩ sarɩ́ya má díé yórá, ká kɛ́sɩ́rá fɩ́rɛ rɩ́ vɩllɛ nɩkana sɩ́ɛ́ mɛ́, a káŋrá mʋ́ tɔ́ bɩnajaa mɛ́, káá ja rɩ́wɔ́ lʋɔrɛ lɩ́sɩ́rá tá!
Ɛ́ waá a; rɩ́wɔ́ tɩɩ ko lɩ́sɩ́rá tá.»