Zerizalɛmɛ céŋzeno
15
1 Báála bamma há lɛ́ Ziide ko Aŋtɩɔsɛ, ɓa ísó aá kármɩ́wɔ́ maábináŋa ná há lá Zeezi wɩ́ɛ́ dí a bʋlɛ́:
«Laatɛ́ toó a pɛ́ɩ́wa, rɩɩ́wa nɛ́ wɩ lóé rɩ́wɔ́ cónníwa pɛnɛ, anɛ ɛ́ ná Moyizi* há máŋsɛ́.»
2 Ɛ́ nɛ́ ɓa rɩ́ Pool rɩ́ Barnabasɛ kaá pɔsɛ, a na náŋá wérí.
Zeezi laadííre ná sɩɛ́ lɩ́sɛ Pool rɩ́ Barnabasɛ, a píwó nɩɛ náŋa súúri, rɩ́wɔ́ ka ɛ́ wɩ́ɩ́ mʋ́ Zerizalɛmɛ, Zeezi nɩtʋmɛ́* ná rɩ́ wɩcʋ́ɔ́lɩ́sɩ́dííre* ná há mɩŋ ráŋ dɩhɩ̃́, a zɩŋ.
3 Aŋtɩɔsɛ Zeezi laadííre héwó ŋmɛ́nɔ mɛ́, ɓa tɩŋ Fenisi rɩ́ Samari,* a máŋsɛ ɛ́ ná nɩɛ ná há to Zuwifiwa má há sáŋ Wɩɩsɛ, aá pɔ́wɔ́ maábináŋa, ɓa wuu sɩɛnnɛ tɔrɛ.
4 Ɓa mʋ́ɔ́ peri Zerizalɛmɛ wɩcʋɔla púl* nɩɛ, Zeezi nɩtʋmɛ́ rɩ́ wɩcʋ́ɔ́lɩ́sɩ́dííre ná wuu caklɔ́wɔ́ wérí; ká ɓa má máŋsɛ Wɩɩsɛ há pɛ́wɔ́ mɛ́ ɓa a wɩ́ɛ́ ná.
5 Farɩzɩɛ̃wa* ná há lá Zeezi wɩ́ɛ́ dí, náŋa isi bʋlʋ́ mɔhɔ̃́ rɩ́wɔ́ conni nɩɛ ná há to Zuwifiwa pɛnɛ, ká a rɩ́wɔ́ má tɩ́tɩŋ Moyizi wɩ́máŋsɛ ná.
6 Zeezi nɩtʋmɛ́ rɩ́ wɩcʋ́ɔ́lɩ́sɩ́dííre sɩɛ́ ko ciki rɩ́wɔ́ zɩŋ ɛ́ wɩ́ɩ́.
7 Kapɔsɛ ɓɩzeno ísíwó pɛ́kɛ, ɛ́ nɛ́ Pɩɛrɛ isi a bʋlɛ́:
«Maábináŋa, ɩ́ ɩ́ɔ̃́ zɩŋ rɩ́ fól wuu rí Wɩɩsɛ lɩ́sɩ́ŋ ɩ́ sɩɛrʋ, rɩ́ nɩɛ ná há to Zuwifiwa tɩ́ŋɩ́ŋ nʋɔ mɛ́ nɛ́, a nɛ Labaarɩwero ná wɩ́ɛ́, a laa dí.
8 Wɩɩsɛ há ɛ̃ nɩbííno wuu sɩɛrʋ, ʋ tɔ́ʋ́ sɩɛ́da, a púú Sabɩɩna pɔ́wɔ́, anɛ ʋ há píé párá má ɛ́.
9 Ʋ wɩ cakɔ́ oro wuu héé á rɩ́wɔ́ pɛ́kɛ, ká tɩŋ yardá mɛ́ pɩ́ɩ́rɩ́wɔ́ sɩɛnnɛ.
10 Mʋ́l néé mí sɩɛ́, beé rí tɛ ɩ́ sɩ́sáánɛ Wɩɩsɛ, a pi cɩka né aá cɩ́ɩ́nɛ Zeezi laadííre nyáŋ, cɩka ná duo, á rɩ́rá ánáwa há wɩ wóllé cɩ́ɩ́nɛ?
11 Á é lɔ́ɔ́ dí, rɩ Nyuutɩna Zeezi zilé wɩ́ɛ́ nɛ́ ɓa ná laatɛ́, anɛ á má há ná laatɛ́ ɛ́.»
12 Nɩciké ná wuu sikli síkísíkí, káá zesi Barnabasɛ rɩ́ Pool, ká ɓa sɩɛ́ máŋsɛ ɛ́ ná Wɩɩsɛ há pɛ́wɔ́ mɛ́, ɓa a wɩ́nyɩnɩwa arɩ́ wɩ́gɩrɛ́, nɩɛ ná há to Zuwifiwa sɩɛrʋ.
13 Ɓa há bʋ́lɛ́ mʋ́ tenni, Zakɛ* lá dɩhɩ̃́ a bʋlɛ́:
«Maábináŋa, ɩ́ zésíŋ rí!
14 Sɩmɔŋ máŋsɛ ɛ́ náwa Wɩɩsɛ há lá sɩ́ɛ́ muuli nɩɛ ná há to Zuwifiwa sɩɛrʋ, a bɛ́llɛ lɩ́sɛ duo balá, ʋ yɩr wɩ́ɛ́.
15 Ʋ ɛ́ rɩ́ Wɩɩsɛ wɩ́laabʋlla sɛ́ ná cɛ́rɔ́, anɛ ɛ́ ɓa há pʋ́ŋsɛ́ bʋ́lɛ́:
16 ‹Ɛ́ har rɩ́ mɛ́, ŋ sɛ́ bɩrko cúóli Davidi* jɩɓalɩ́,
ŋ sɩ́ sɔ́ zekuléwa, a tʋ́rwɔ́ wuu,
17 a makɛ rɩ́ nɩkáánɛ ná ja Nyuutɩna.
Káŋ yɩr há yɩ́rɛ́ duo ná wuu sɩɛrʋ,
rʋ́ʋ́ má jáŋ.
18 Nyuutɩna ná háá a wɩ́ɛ́ nyáŋ wuu,
a zɩ́ŋwɔ́ wuu mí dúníé púle mí, ʋ nɛ́ bʋ́l ɛ́.›
19 «Ɛ́ wɩ́ɛ́, ŋ má Zakɛ sáŋɔ́, ráá báá sɩ́ wɩhála jáá pá to Zuwifiwa ná há sáŋ Wɩɩsɛ.
20 Amá ɩ́ lo ráá pʋ́ŋsɛ kɛnɔ pɔ́wɔ́, a bʋl rɩ́wɔ́ báá sɩ́ venni káá bírsíwó tɩɩ, rɩ́wɔ́ sɩ́ nɩcɔrmɩwɩ́ɛ́ á, rɩ́wɔ́ sɩ́ pʋsɛ ná há sʋ́sɛ́ pim, ɓa wɩ kɔ́rkɛ́ namɩŋsa dí, a sɩ́ cɛ́l dí.
21 Ʋ bɩna lúŋ, nɩɛ há mɩŋ tɔ́ɔ́ wuu mí a máŋsɛ Moyizi wɩ́máŋsɛ ná aá pá nɩɛ.
Ɓa haá kármɩ́wɔ́ nɛ́ Zuwifiwa fɩɛlɛ́ tápʋlɛ* wuu, cémejɩɩsɛ* mɛ́.»
22 Ɛ́ nɛ́ Zeezi nɩtʋmɛ́ ná rɩ́ wɩcʋ́ɔ́lɩ́sɩ́dííre rɩ́ nɩhilmé ná wuu, ná rɩ́ ɛ́ wéró; ɓa lɩ́sɩ́wɔ́ sɩɛrʋ, Ziidi ná ɓa háá yɩ́rɛ́ Barsabasɛ rɩ́ Sila; nɩtaŋáwa bɛllɛ, nɩɛ háá búwó, a súúri Pool rɩ́ Barnabasɛ mɛ́, a tʋ́ŋwɔ́ Aŋtɩɔsɛ mɛ́.
23 Ná kɛnɔ ná ɓa há píé tʋ́ŋwɔ́, sɩɛrʋ wɩ́ɛ́:
Á é Zeezi nɩtʋmɛ́, rɩ́ wɩcʋ́ɔ́lɩ́sɩ́dííre, rɩ́rá maábináŋa, áá cʋ́ɔ́lɩ́wa nɩɛ ná há to Zuwifiwa, ká taŋa saŋ la Zeezi wɩ́ɛ́ dí a mɩŋ Aŋtɩɔsɛ rɩ́ Silisi mí.
24 Á nɩ́ɔ́ rɩ ɓa sɛ́ nɩɛ lɩ́rá sɩɛrʋ, a ko bʋl wɩ́ɛ́ vúkmíwa kéne, ká fúklíwa dʋŋsɛ, ká á wʋ́ɔ́ tʋ́mɛ́.
25 Ɛ́ nɛ́ sɩɛ́ á hé náŋá mɛ́, a vʋʋrɛ ná, rʋʋ mɔhɔ̃́ ráá lɩ́sɛ nɩɛ tʋ́mɩ́wa mɛ́, rɩ́wɔ́ pɛ́rá naŋnɔ́ŋwere Barnabasɛ rɩ́ Pool mí;
26 ɓa tʋ́ŋrá Nyuutɩna Zeezi Kirisi tʋtʋmɛ́, ɓa mɩɩsɛ jɩ́ja rʋ́ʋ́ yʋ́ksɛ ɛ́ wɩ́ɛ́.
27 Á sɩɛ́ tʋ́ŋ Ziidi rɩ́ Sila, ɓa sɩ́ ko máŋsɛ ɛ́ wɩ́ɛ́ tɩɩ tɩɩ pɛ́ɩ́wa.
28 Á rɩ́ Wɩɩsɛ Sabɩɩna wuu nóó rʋʋ mɔhɔ̃́, ráá báá sɩ́ wɩ́ɛ́ náŋa páá nyáŋɩ́wa, rɩ wɩ́mɔhɔ̃́wa dʋŋɔ rá.
29 Ɓa nɛ́ ká:
ɩ́ sɩ́ venni namɩŋsa dí, ɩ́ sɩ́ cɛ́l dí, ɩ́ sɩ́ pʋsɛ ná há sʋ́sɛ́ pim, ɓa wɩ kɔ́rkɛ́ namɩŋsa dí, a sɩ́ nɩcɔrmɩwɩ́ɛ́ á.
Rɩɩ́wa nɛ́ wuolé lɩ́sɩ́wa tɩɩ rɩ́ ɛ́ wɩ́ɛ́, ɩ́ á wérí.
Wɩɩsɛ sɩ́ pɛ́ɩ́wa mɛ́.
30 Ɛ́ nɛ́ nɩɛ ná ɓa há tʋ́mɛ́, sʋ́lwɔ́ tɩɩ, a col Aŋtɩɔsɛ, a pi kɛnɔ ná pá nɩhilmé ná wuu.
31 Ɓa há kármɛ́ kɛnɔ ná, a ná nyúnyáásɩ́wɩ́ɛ́ ná wuu há mɩŋ ráŋ, ɓa wuu sɩɛnnɛ tɔ́rɔ́.
32 Ziidi rɩ́ Sila tɩɩ wuu há ká Wɩɩsɛ wɩ́laabʋ́llá, ɓa cáánɩ́wɔ́ wérí, a bʋl wɩ́ɛ́ ɓɩkana dúóríwó naasɛ.
33 Ɓa ké ráŋ tápʋlɛ mʋɔ́, ká Aŋtɩɔsɛ tɩ́náwa tɔ́wɔ́, ɓa bɩrmʋ́ nɩɛ ná há tʋ́ŋwɔ́ rɩ́.
34 [Ká Sila é ha cólli ráŋ, a ké.]
35 Ká Pool rɩ́ Barnabasɛ mɩŋ Aŋtɩɔsɛ mɛ́ ráŋ, nɩkana náŋa súúríwó mí, ɓaá karmɛ nɩɛ, a bʋl Nyuutɩna Labaarɩwero ná aá pá nɩɛ.
Pool rɩ́ Barnabasɛ cáksɛ́ náŋá mɛ́
36 Ʋ a tápʋlɛ mʋɔ́, ká Pool bʋl Barnabasɛ rɩ́:
«Lo ráá bɩrmʋ́ nárá maábináŋa ná há mɩŋ tɔ́nɛ ná wuu mí, á há mʋ́ɛ́ bʋl Nyuutɩna wɩ́bʋlɛ, a nówó kéne mʋɔsɔ.»
37 Barnabasɛ jɩ́ja rʋ́ʋ́ pɛ́ ka Zaŋ ná ɓa háá yɩ́rɛ Markɛ,
38 ká Pool é ná rʋʋ wɩ mɔhɛ̃́, rɩ́wɔ́ baa ka nɛrɔ ná ɓa há lá sɩ́ɛ́ kaa lɩɩ tɩ́ŋwɔ́ tɩɩ mɛ́, a mʋ́ peri Paŋfiili ʋ bɩrfá, ká wʋ́ɔ́ mɛ́ pɛ́ɛ́ a tʋ́ŋwɔ́ tʋtʋmɛ́.
39 Ɛ́ kapɔsɛ nyɛl, a cáksɩ́wɔ́ náŋá mɛ́.
Ká Barnabasɛ ka Markɛ hóú tɩɩ mɛ́, ɓa zʋ nyiidabore, a mʋ́ Siipiri.
40 Pool má ka Sila, ɓa maábináŋa sʋl Nyuutɩna bárka héwó mí, ká ɓa col.
41 Pool mʋ́ Sɩɩrɛnɛ* rɩ́ Silisi, a gʋɔrɛ aá dúóri nɩɛ ná há lá Zeezi wɩ́ɛ́ dí naasɛ.