Pool rɩ́ Barnabasɛ mʋ́ Ikooni
14
1 Ɛ́ nɛ́ Pool rɩ́ Barnabasɛ mʋ́ Ikooni, a zʋ Zuwifiwa cémejaa,* a bʋl wɩ́ɛ́ wérí, Zuwifiwa rɩ́ nɩɛ ná há to Zuwifiwa, ɓɩkana la Zeezi wɩ́ɛ́ dí.
2 Amá Zuwifiwa ná há wɩ lɛ́ɛ́ dí, ɓa tʋ́ŋ zaŋbá, a síísi nɩɛ ná há to Zuwifiwa hé, ɓa isi nyɛl Zeezi laadííre mí.
3 Pool rɩ́ Barnabasɛ ké Ikooni mí a dáánɛ.
Ɓa yéllí Nyuutɩna mɛ́, a bʋ́lʋ́ wɩ́bʋlɛ ná rɩ́ bancɩpɩrɩ́, ɛ́ nɛ́ ʋ pɛ́wɔ́ mɛ́, ɓa wólli wɩ́nyɩnɩwa rɩ́ wɩ́gɩrɛ́ aá a, a makɛ rɩ́wɔ́ zɩŋ rɩ́ bárka wɩ́bʋlɛ ná ká taŋá rɛ́.
4 Ɛ́ nɛ́ tɔ́ɔ́ ná nɩɛ caksɛ bɛllɛ.
Náŋa mɩŋ Zuwifiwa har, ká náŋa má mɩŋ Zeezi nɩtʋmɛ́ ná har.
5 Zuwifiwa rɩ́wɔ́ ná há to Zuwifiwa sɩɛ́ tʋ́ŋ nʋɔ mɛ́, rɩ́wɔ́ píŋŋíwó, a yósíwó rɩ́ dɔ́wʋ́ɔ́.
6 Zeezi nɩtʋmɛ́ ná há kúé zɩŋ, ɓa fɔ́ɔ́ mʋ́ Lisitiri rɩ́ Dɛrbɛ, a rɩ́wɔ́ laka tɔ́nɛ ná há mɩŋ Likawoni tíé.
7 Ɓa bʋ́l Labaarɩwero ná a pɔ́wɔ́ nɩɛ.
Pool rɩ́ Barnabasɛ mʋ́ Lisitiri rɩ́ Dɛrbɛ
8 Bágbɛrkɔ oro mɩŋ Lisitiri mí, ɓa lʋ́lʋ́ rʋʋ gbɛ́rkɔ́, ʋ wɩ válɛ́ ná.
9 Ʋ kénó aá zesi wɩ́ɛ́ ná Pool háá bʋlɛ́.
Pool há néé rʋʋ kéŋ yardá ná há wóú aá dúóri, ʋ cirki sɩ́ɛ́ hóú mí,
10 ká bʋl rɩ́ dóé:
«Isi cɩ́ dahá, ɩ naasɛ mɛ́.»
Ɛ́ nɛ́ ʋ tɩkɛ isi ɓéri naasɩ́ balá, aá va.
11 Nɩhilmé ná há ná Pool wɩ́'aalɩ́ ná, ɓa cáásó, ɓa Likawoni tɩ́náwa liŋó mí a bʋlɛ́:
«Wɩŋsa bɩ́rmɛ́ nɩbííne ko túwírá mɛ́.»
12 Ɛ́ nɛ́ ɓa ka Barnabasɛ a yɩ́yɩ́rɛ Zɩpɩtɛrɛ,* ká ka Pool yɩ́yɩ́rɛ Mɛrkɩɩrɛ,* ʋ nɛ́ fa há lá wɩ́ɛ́ aá bʋl wɩ́ɛ́.
13 Ɓa fa sɔ́ Zɩpɩtɛrɛ jaa, tɔ́ɔ́ dánnʋɔ mɛ́ nɛ́.
Ʋ vʋk'ɔɔsɔ sɩɛ́ isi ja nɔɓallɛ arɩ́ pɛ́ŋsɛ, rʋ́ʋ́ kaa mʋ́ ɔsɛ vʋk, nɩɛ wuu saŋ.
14 Barnabasɛ rɩ́ Pool há nɛ́ ɛ́ wɩ́ɩ́, ɓa cɔ́nnɩ́wɔ́ gɛnnɛ, ká fá kɩ́kɛ́lɛ́ mʋ́ zʋ nɩɛ ná sɩɛrʋ;
15 a cáási bʋlɛ́:
«Nɩɛwa, beé rí tɛ ɩ́ ɩ́'a nyɛ?
Á má ká nɩbííne ní, a nɩ́ɩ́wa há nɩhɩ̃́ ɛ́; á kúó ráá bʋl Labaarɩwero wɩ́ɛ́ nɛ́ pɛ́ɩ́wa, áá sʋ́lɩ́wa, ɩ́ lo wɩ́yɔ́ɔ́wa nyáŋ ɛɛ, ká bɩ́rɩ́wa sɩ́ɛ́ hé Wɩɩsɛ ná há wómmó rɩ́.
Ʋ nɛ́ á bána rɩ́ tíé rɩ́ mʋʋ, arɩ́ óŋ ná wuu há mɩ́ŋwɔ́ sɩɛrʋ.
16 Tésíé mí, ɛ́ Wɩɩsɛ fa lóó nɛrɔ wuu tɩ́ŋʋ́ ŋmɛ́ŋjaalɩ́,
17 ká arɩ́ ɛ́ wuu, ʋ wɩ́were ɛɛ tɛ́ sɩɛ́da, a makɛ rɩ́wɔ́ zɩ́mʋ́ há ká nɛ́ŋ ná; ʋ tʋ́ŋ tʋtʋ́ŋwero pɛ́ɩ́wa.
Ʋ ɔ́sɩ́wa yibinni, a a duonni ko, ɩ́ baksɛ ɓɩɛ bɛ, ɓɩdííle mɩŋ kɩ́ŋkáŋ, ɩ́ sɩɛnnɛ wuu tɔrɛ.»
18 Wɩ́ɛ́ ná wuu ɓa há bʋ́lɛ́, ɓa ná wɩɩla wérí, ká kɛ́rɛ rɩ́wɔ́ sɩ́ vʋk ɔ́sɩ́ pɔ́wɔ́.
Ɓa yósí Pool rɩ́ dɔ́wʋ́ɔ́ Lisitiri mí
19 Zuwifiwa náŋa ísó lɛ Aŋtɩɔsɛ, náŋa má lɛ Ikooni a ko, nɩɛ saŋ pɔ́wɔ́, ɓa yosi Pool rɩ́ dɔ́wʋ́ɔ́, a kaa tuu lɩ́wɔ́ tɔ́ɔ́ mɛ́ tá.
Ɓa bɩ́ɩ́nɔ́ rʋʋ sʋ́wɔ́ rɛ́.
20 Amá Zeezi laadííre mʋ́ɔ́ kílú, ʋ isi a bɩrzʋ tɔ́ɔ́ sɩɛrʋ.
Tɔ́ɔ́ pʋl, ʋ rɩ́ Barnabasɛ col Dɛrbɛ.
21 Ɓa há mʋ́ɛ́ bʋl Labaarɩwero ná pá ɛ́ tɔ́ɔ́ nɩɛ, ɓa ké ráŋ tápʋlɛ bɛllɛ, Zeezi laadííre dɩhɩ̃́, ká bɩrmʋ́ Lisitiri, Ikooni arɩ́ Aŋtɩɔsɛ,
22 aá dúóri Zeezi laadííre naasɛ, aá ɓáánɩ́wɔ́, rɩ́wɔ́ ka yardá géŋgéŋ, a bʋ́lwɔ́ rɩ́ bʋlɛ́:
«Á sɩ́ ná wɩhála ká zʋ Wɩɩsɛ kuótɔ́ɔ́ sɩɛrʋ.»
23 Tɔ́ɔ́ ná wuu mí wɩcʋɔla púl* há mɩŋ ráŋ, ɓa ɔ́ɔ́ ɓa lɩ́sɛ wɩcʋ́ɔ́lɩ́sɩ́dííre* bil.
Ɓa vɔsɛ nʋʋsɛ, a cʋɔlɛ Wɩɩsɛ ká píwó hé Wɩɩsɛ ná ɓa há lɔ́ʋ́ wɩ́ɛ́ dí nɛ́sɛ mɛ́.
24 Ɓa mʋ́ɔ́ caŋ Pisidi lɛ a mʋ́ Paŋfiili,
25 a bʋl Wɩɩsɛ wɩ́bʋlɛ pá Pɛrzɛ tɩ́náwa, ká daarɛ tuwi Atali.
26 Ɓa cɩ́ ráŋ zʋ nyiidabore a bɩrmʋ́ Aŋtɩɔsɛ, ráŋ ná ɓa fa há sʋ́l Wɩɩsɛ bárka pɔ́wɔ́, ɓa wólli tʋŋ tʋtʋmɛ́ nyáŋ wuu, ɓa há tʋ́mɛ́.
27 Ɓa há mʋ́ɛ́ peri, ɓa yɩ́rɛ wɩcʋɔla púl nɩɛ wuu hé náŋá mɛ́, a cesi wɩ́ɛ́ ná wuu Wɩɩsɛ há pɛ́wɔ́ mɛ́ ɓa a, arɩ́ ɛ́ náwa Wɩɩsɛ há wúri ŋmɛ́nɔ pá nɩɛ ná má há to Zuwifiwa, rɩ́wɔ́ la Zeezi wɩ́ɛ́ dí.
28 Ɓa ké Zeezi laadííre ná há mɩŋ Aŋtɩɔsɛ mɛ́ dɩhɩ̃́, a dáánɛ.