Sool wálmɛ Zeezi laadííre
8
1 Sool má sáŋɔ́ rɩ Ɩtɩɛnɛ mɔhɛ̃́ ɓʋ́ɩ́.
Ɛ́ kal, ɓa wálmɛ Zerizalɛmɛ Zeezi laadííre wuu wérí.
Ɓa wuu pɩsɛ fá féŋsi Ziide rɩ́ Samari* tɔ́wɩɛla mɛ́, ká káánɛ Zeezi nɩtʋmɛ́ ná dʋŋɔ.
2 Nɩɛ ná háá fá Wɩɩsɛ, ɓa kúó pi Ɩtɩɛnɛ kaa mʋ́ hu, ká wúú wɩ́ɛ́ kɩ́ŋkáŋ.
3 Ká Sool é mɩŋ ráŋ, aá hé dóé rʋ́ʋ́ zɔkɛ Zeezi laadííre wuu tenni; a tɩŋ zʋ jɩɩsɛ kɛsɛ báála rɩ́ háála kaa lɩɩ mʋ́ aá tɔ́ bɩnajaa mɛ́.
Filipi bʋ́l Zeezi Labaarɩwero wɩ́ɛ́ Samari mí
4 Nɩɛ ná há pɩ́sɛ́ fá, sɩɛ́ gʋɔrɛ dɩhɩ̃́ wuu a bʋl Wɩɩsɛ Labaarɩwero ná aá pá nɩɛ.
5 Filipi há ísé tuwi Samari tɔ́zeŋsi nɔ́ŋɔ, ʋ bʋ́l Kirisi wɩ́ɛ́ pá nɩɛ ráŋ.
6 Nɩɛ káŋ a fá ko pú náŋá mɛ́, a ké cɩ́m aá zésú wɩ́bʋlɛ́ ná; ɓa há nʋ́ʋ́ wɩ́nyáŋsɛ wɩ́ɛ́, ɓa sɩ́ɩ́ má ná.
7 Ʋ ɔ́ʋ́ kaŋtɔmɔ lɛ nɩɛ ɓɩkana mɛ́, a fá káá kɩ́ɩ́lɛ, ká gbɛrka rɩ́ nacɔ́kɔ tɩ́náwa má ɓɩkana dúóri.
8 Tɔ́ɔ́ ná nɩɛ wuu sɩɛ́ jɩ́jʋɔsɛ.
9 Báálɔ oro má fá mɩŋ ɛ́ tɔ́ɔ́ mɛ́, ɓaá yɩ́rʋ́ Sɩmɔŋ.
Ʋ tɩ́ŋ tɩɩ́wʋ mɛ́, a púú tɩɩ makɛ nɩpíŋí, a tʋŋ tʋtʋmɛ́ gɩrɛ Samari tɩ́náwa wuu.
10 Ɓa heŋbiisi rɩ́wɔ́ nɩhɩɛ̃́sɛ wuu fa cóú wɩ́ɛ́ wérí; ɛ́ nɛ́ ɓa sɛ́:
«Báálɔ né ní ká Wɩɩsɛ dóé ná, ɓa háá yɩ́rɛ dóé tɩɩ.»
11 Ɓa faá zésú wɩ́ɛ́ rɩ́ taŋá, bee wɩ́ɛ́ bɩŋsɛ káŋ ʋ há tɩ́ŋ tɩɩ́wʋ mɛ́, a a wɩ́ɛ́ gɩ́rwɔ́.
12 Amá Filipi há kúé bʋl Wɩɩsɛ kuótɔ́ɔ́ Labaarɩwero ná, rɩ́ Zeezi Kirisi yɩr ná wɩ́ɛ́, báála rɩ́ háála wuu lá Filipi wɩ́ɛ́ dí, ká a ɓa káŋwɔ́ muŋsi nyii mí.
13 Sɩmɔŋ tɩɩ saŋ la Wɩɩsɛ wɩ́ɛ́ dí, ɓa kánʋ́ má muŋsi nyii mí.
Ɛ́ nɛ́ sɩɛ́, ʋ de fá pu Filipi, a báá wʋ́ʋ́ mɛ́ kɛkɛ́ có, ká tɩŋ pɛ nʋɔ aá bel Filipi wɩ́nyɩnɩwa rɩ́ wɩ́nyáŋsɛ ná ʋ háá ɛɛ́.
14 Zeezi nɩtʋmɛ́ ná há káánɛ Zerizalɛmɛ mɛ́, ɓa há nɩ́ɛ́ rɩ Samari tɩ́náwa lá Wɩɩsɛ wɩ́ɛ́ dí, ɓa tʋ́ŋ Pɩɛrɛ rɩ́ Zaŋ ráŋ.
15 Ɓa mʋ́, a cʋɔlɛ Wɩɩsɛ pɔ́wɔ́, aá ja rɩ́ Wɩɩsɛ Sabɩɩna súwó.
16 Wɩɩsɛ Sabɩɩna fa tówó oro wuu mí; ɓa múŋsíwó nyii dʋŋɔ mɛ́ nɛ́, Nyuutɩna Zeezi yɩr mɛ́.
17 Ɛ́ nɛ́ Pɩɛrɛ rɩ́ Zaŋ pa nɛ́ŋsa tɩ́kwɔ́ mɛ́, ká cʋɔlɛ Wɩɩsɛ, Wɩɩsɛ Sabɩɩna sɩɛ́ súwó.
18 Sɩmɔŋ há néé rɩ Zeezi nɩtʋmɛ́ ná píwó nɛ́ŋsa tɩkɛ nɩɛ mɛ́, Wɩɩsɛ Sabɩɩna zʋ́wɔ́, ʋ ísó lɩ́sɛ meéwíé pɔ́wɔ́,
19 ká bʋlɛ́:
«Ɩ́ páŋ má dóé né duo mí, a makɛ rɩŋ píŋ nɛ́sɛ sakɛ nɛ́ŋ wuu mí, rʋ́ʋ́ ná Wɩɩsɛ Sabɩɩna.»
20 Ɛ́ nɛ́ Pɩɛrɛ bʋ́lʋ́ rɩ́ bʋlɛ́:
«Nyɩ́ɩ́kɛ arɩ́rɩ́ meéwíé ná wuu; ɩ há bɩ́ɩ́nɛ́ rɩ Wɩɩsɛ pálɔ ná ká meéwíé rí, ɓa pi aá yɔwɛ.
21 Ɩ kér wuu to wɩ́ɩ́ né sɩɛrʋ, bee wɩ́ɛ́ ɩ sɩɛrʋ to tékétéké Wɩɩsɛ sɩ́ɛ́ mɛ́.
22 Bɩ́rsɛ a lo sabɩŋbɔmɔ, ká sʋl Wɩɩsɛ, rʋʋ ká mɔlɛ́, rʋ́ʋ́ héí sabɩɩna wɩ́ɛ́ suúri.
23 Ŋ há bélí, ɩ sɩɛrʋ biiní; ɩ mɩŋ wɩ́bɔmɔ yomí sɩɛrʋ nɛ́.»
24 Ɛ́ nɛ́ Sɩmɔŋ sʋ́lwɔ́ bʋlɛ́:
«Ɩ́ tɩɩ sɩɛ́ cʋɔlɛ Wɩɩsɛ páŋ, a makɛ rɩ́ɩ́wa wɩ́bʋlɛ́ nyáŋ oro wuu sɩ́ŋ pérú.»
25 Pɩɛrɛ rɩ́ Zaŋ tɛ́ Wɩɩsɛ wɩ́'állɛ sɩɛ́da, a bʋl Wɩɩsɛ wɩ́bʋlɛ tenni, ká bɩrɛ mʋ́ Zerizalɛmɛ; a tɩŋ Samari tɔ́nɛ ɓɩkana, a bʋl Labaarɩwero wɩ́ɛ́ aá col.
Filipi rí Etiopi báálɔ
26 Wɩɩsɛ malɩ́ka* nɔ́ŋɔ kúó bʋl Filipi rɩ́ a bʋlɛ́:
«Isi píí sɩ́ɛ́ caasɛ tɔ́ɔ́ lʋ́lɔ́ŋɛ rɩ́, a mʋ́ cɩ́ gɩr sɩɛrʋ, ŋmɛ́ŋwie ná há lɛ́ Zerizalɛmɛ aá mʋ́ Gaza mɛ́.»
27 Ɛ́ nɛ́ ʋ isi mʋ́.
Ʋ cɩ́nɔ́, rɩ Kaŋdaasɛ minísi níí kué; ʋ nɩ́ɩ́ bel Etiopi hákuóro ɓɩɛ wuu mí.
Ʋ mʋ́ɔ́ cʋɔlɛ Wɩɩsɛ nɛ́ Zerizalɛmɛ mɛ́, ká sɩɛ́ bɩrɛ aá col;
28 a zʋʋ kénú záka tórko sɩɛrʋ, aá karmɛ Wɩɩsɛ Kɛnɔ cɔɔ nɔ́ŋɔ, ráŋ ná Wɩɩsɛ wɩ́laabʋllɔ Ezayi* há pʋ́ŋsɛ́.
29 Wɩɩsɛ Sabɩɩna bʋl Filipi rí bʋlɛ́:
«Mʋ́, tuu peri tórko né.»
30 Filipi túó peri zesi, rʋʋ́ karmɛ Wɩɩsɛ wɩ́bʋlɛ, ráŋ ná Wɩɩsɛ wɩ́laabʋllɔ Ezayi há pʋ́ŋsɛ́ nɛ́.
Ɛ́ nɛ́ ʋ bɔ́sʋ́:
«Ɩɩ́ nɛ wɩ́ɛ́ nyáŋ ɩ háá karmɛ́ mʋ́ʋ́la rɛ́?»
31 Ɛ́ nɛ́ báálɔ ná sɛ́:
«Ŋŋ́ á rɩ́ŋ a ɛrɛ́ ká nɩ́wɔ́ mʋ́ʋ́la, rɩ nɛ́ŋ wʋ́ɔ́ mʋ́ʋ́la lɩ́sɛ́ páŋ?»
Ká yɩ́rɛ Filipi rʋ́ʋ́ zɩ́ kénú laka, tórko ná sɩɛrʋ.
32 Wɩ́pʋ́ŋsɛ ná ʋ fa háá karmɛ́ nɛ́ nyɛ:
«Ɓa kenú, anɛ pieŋso ɓa há kené
aá mʋ́ naŋyɛ́llɔ jaa rɩ́wɔ́ ɓʋ́,
anɛ pewie ɓa háá kɛ́ pʋ́sɛ,
ká ʋ wɩ wuó wi.
Ʋ dé wʋ́ʋ́ nʋɔ mɛ́ wúré.
33 Ʋ múúrú tɩɩ, ká nɛ́ŋ toó bʋl aá lɔ́ʋ́.
Áŋ rɩ́ sɩɛ́ á rʋ́ʋ́ mákʋ́ má dunɩɛ nɩɩsɔ?
Ɓa lɩ́sʋ́ mɩɩsɛ dúníé mí.»
34 Minísi ná bɔsɛ Filipi a bʋlɛ́:
«Ŋŋ́ sʋ́lɩ́, áŋ wɩ́ɛ́ rɛ́ báálɔ né pʋ́ŋsɛ aá bʋl?
Ʋ tɩɩ wɩ́ɛ́ nɛ́ yáá, nɛ́ŋ oro wɩ́ɛ́ rɛ́?»
35 Filipi sɩɛ́ la wɩ́bʋlɛ, a mʋ́ púlú dɩkarmɩ́ ná mɛ́, ká máŋsɛ Zeezi Labaarɩwero wɩ́ɛ́ déŋdéŋ a pɔ́ʋ́.
36 Ɓa píwó ŋmɛ́nɔ vɩ́va, a mʋ́ ná nyii.
Ɛ́ nɛ́ báálɔ ná sɛ́:
«Ná nyii ní, beé sɩɛ́ báá kɛ́rɩ́ŋ ráŋ muŋsé mí?»
37 Ɛ́ nɛ́ Filipi sɛ́:
«Rɩɩ nɛ́ á yardá rɩ́rɩ́ sɩɛrʋ wuu, ʋ ɛ́ ká wɩ́mɔlɛ́.»
Ɛ́ nɛ́ báálɔ ná sɛ́:
«Ŋ lɔ́ɔ́ dí, rɩ Zeezi Kirisi ká Wɩɩsɛ Bio ní.»
38 Ʋ ka tórko ʋ cɛ́, ká ɓa wuu bɛllɛ tuwi zʋ nyii ná sɩɛrʋ, Filipi kánʋ́ muŋsi.
39 Ɓa há lɛ́ nyii mí ko tenni, Nyuutɩna Sabɩɩna pí Filipi kaa yʋ́ksɛ, ká minísi ná báá wʋ́ʋ́ néé.
Ɛ́ nɛ́ ʋ zʋ́ʋ́ ŋmɛ́nɔ, a jʋɔsɛ aá col.
40 Filipi kúó aá cɛ́, rʋʋ mɩŋ Azɔtɛ mɛ́.
Ʋ lɛ́ ráŋ nɛ́ a daarɛ tɔ́nɛ náŋa, a mʋ́ lɛ Sezaare mí.
Ká rʋʋ lɛ́ tɔ́ɔ́ wuu, ʋ bʋl Wɩɩsɛ Labaarɩwero ná wɩ́ɛ́ ráŋ, ká daarɛ.