Wɩcʋ́ɔ́lɩ́tʋtʋnna tʋɔsɛ́
6
1 Ɛ́ tɛ́ŋ mɛ́, Zeezi hatɩŋna há púlé, Zuwifiwa ná háá bʋl Gɩrɛkɛwa* liŋó sɩɛ́ ŋmúŋmurmi wɩ́ɛ́, ɓa ná háá bʋl Ebirewa* liŋó rɩ́, a bʋlɛ́ rɩ́ tápʋ́l wuu, ɓa ɓá ɓɩɛ aá vɔ́ŋwɔ́ é yúháála.
2 Zeezi nɩtʋmɛ́ ná fí rɩ́ bɛllɛ sɩɛ́ yɩ́rɛ Zeezi hatɩŋna ná wuu hé náŋá mɛ́, a bʋlɛ́:
«Ʋ wɩ mɔhɛ̃́ ráá tá Wɩɩsɛ wɩ́bʋlɛ ná bʋlɛ́, ká cúŋ ɓɩɛ ɓɛɛ mɛ́.
3 Ɛ́ wɩ́ɛ́, maábináŋa, ɩ́ bélíwa sɩɛrʋ, a tʋɔsɛ báála balpɛ.
Ʋ mɔhɔ̃́ rɩ́wɔ́ a nɩɛ ná, nɩɛ wuu háá bʋ́lwɔ́ nɛrɩ́ wɩ́ɛ́, a a nɩɛ ná Wɩɩsɛ Sabɩɩna* há súwó, ká ɓa ka wɩ́zɩmɛ, ráá pi ɛ́ tʋtʋmɩ́ héwó nɛ́sɛ mɛ́.
4 Ká ráá má fɛ́l sɩ́ɩ́ wɩcʋɔlɔ́ mɛ́, arɩ́ Wɩɩsɛ wɩ́bʋlɛ bʋlɛ́ mɛ́.»
5 Ɓa bʋlɛ́ ná tɔrɛ nɩkana ná wuu sɩɛrʋ.
Ɓa sɩɛ́ lɩ́sɛ Ɩtɩɛnɛ, báálɔ ná há kéŋ yardá, Wɩɩsɛ Sabɩɩna há súú, arɩ́ Filipi, Pɩrɔkɔɔrɛ, Nɩkanɔrɛ, Tɩmɔŋ, Parmena, arɩ́ Aŋtɩɔsɛ tɩ́náwa Nikola ná há to Zuwifi, ká mɩŋ Zuwifiwa wɩcʋɔlɔ́ mɛ́.
6 Ɓa káŋwɔ́ wuu mʋ́ cáánɛ Zeezi nɩtʋmɛ́ ná, ɓa cʋɔlɛ Wɩɩsɛ, ká pa nɛ́ŋsa tɩ́kwɔ́ mɛ́.
7 Ɓa bʋ́l Wɩɩsɛ wɩ́bʋlɛ ná la dɩhɩ̃́ wuu; Zeezi hatɩŋna pul kɩ́ŋkáŋ Zerizalɛmɛ mɛ́, Wɩɩsɛ vʋk'ɔɔsa* ɓɩkana má la Wɩɩsɛ wɩ́ɛ́ dí.
Ɩtɩɛnɛ kanɛ́ wɩ́ɛ́
8 Wɩɩsɛ bárka rɩ́ Wɩɩsɛ dóé fa mɩŋ Ɩtɩɛnɛ mɛ́, ʋ wólli a wɩ́gɩrɛ́ rɩ́ wɩ́nyɩnɩwa ɓɩkana, nɩɛ ná.
9 Zuwifiwa bamma de isi cɩ́nʋ́ mɛ́.
Ɓa náŋa ká tɩ́ŋtɩɩwa*f2* tíé nɩɛ nɛ́, náŋa lɛ Sɩɩrɛnɛ,* náŋa lɛ Alɛkzaŋdiri, ká náŋa má lɛ Silisi rɩ́ Azi; a wuu ka tɩ́ŋtɔ́ɛ́ cɩ́nʋ́ mɛ́.
10 Amá Wɩɩsɛ Sabɩɩna ná há mɩŋ Ɩtɩɛnɛ mɛ́, ʋ ɛ̃ wɩ́ɛ́ wérí, ɓa wʋ́ʋ́ wuo bʋl aá ka.
11 Ɛ́ nɛ́ ɓa lʋɔrɛ yiki nɩɛ hóú mí, ɓa nyɛ nyɩɛrʋ bʋlɛ́:
«Á nóú rʋʋ bʋ́l wɩ́ɛ́ aá tʋksɛ Moyizi* rɩ́ Wɩɩsɛ.»
12 Ɓa á ɛ́ nɛ́ yiki tɔ́ɔ́ ná, nɩɛ wuu hé Ɩtɩɛnɛ mɛ́, ɓa rɩ́wɔ́ nɩhɩɛ̃́sɛ rɩ́wɔ́ kɛŋzɩnna cɔ́ɛ́ wɛ, ká ɓa isi mʋ́ gbúrkú, a kaa bɩrmʋ́ sarɩ́yadííre dɩhɩ̃́,
13 a bʋlɛ́:
«Báálɔ né ní gʋ́ɔ́rɛ́ bʋl wɩ́ɛ́ aá zɔkɛ Wɩcʋɔlɩjɩzeno ná, rɩ́ Moyizi há pʋ́ŋsɛ́ kíŋse* ná yɩr.
14 Á nɩ́ɔ́ rʋʋ sɛ́ Nazarɛtɛ Zeezi sɩ́ ko zɔkɛ dɩhɩ̃́ né, ká bɩ́rsɩ́rá kusúŋ wɩ́ɛ́ ná Moyizi há pʋ́ŋsɛ́ párá.»
15 Nɩɛ ná wuu há ké ráŋ firki sɩ́ɛ́ hé Ɩtɩɛnɛ mɛ́.
Ɓa nóú rʋʋ sɩ́ɛ́ dé nɛ́ malɩ́ka sɩ́ɛ́ nɛ́.