Wɩɩsɛ tʋ́ŋ Zaŋ Batiisi
3
1,2 Romi* kuózeno oro fa mɩŋ ráŋ ɓaá yɩ́rɛ Tɩbɛɛrɛ.
Ʋ kuorí díí bɩŋsɛ fí rí bɔmmʋ́ɔ́ nyúú mí ní, rɩ Zakari bio Zaŋ fa mɩŋ gɩrbétéke sɩɛrʋ; ráŋ nɛ́ sɩɛ́ Wɩɩsɛ pɔ́ʋ́ liŋó.
Ɛ́ tɛ́ŋ mɛ́, rɩ kʋ́máŋdá Pɔŋsɛ Pɩlatɛ* nɩ́ɩ́ bel Ziide dɩtɩ́llɛ mɛ́.
Kuóro Erodi* má bíbel Galiile* dɩtɩ́llɛ, ká ʋ máálá Filipi bíbel Itire rɩ́ Tirakoniti dɩtɩ́llɛ mɛ́, ká Lɩzanɩasɛ má bíbel Abɩlɛnɛ dɩtɩ́llɛ mɛ́.
Ɛ́ bɩna, rɩ Anaasɛ rɩ́ Kayifi má nɛ́ ká Wɩɩsɛ vʋk'ɔɔsa* nɩhɩɛ̃́sɛ.
3 Wɩɩsɛ liŋó ná sɩɛ́ há pérí Zaŋ* ɛ́, ɛ́ nɛ́ ʋ mʋ́ Zʋrdɛŋ fuo laka tɔ́nɛ, a gʋɔrɛ ráŋ wuu, a bʋl nɩɛ rɩ́ bʋlɛ́:
«Ɩ́ bɩ́rsɛ, a báá sɩ́ aá zɔkɛ Wɩɩsɛ mɛ́, ká rɩ́ŋ kánɩ́wa muŋsi nyii mí, rɩ́ Wɩɩsɛ héíwa wɩ́zɔkɛ́ suúri.»
4 Wɩɩsɛ wɩ́laabʋllɔ* Ezayi* fa pʋ́ŋsɛ wɩ́ɛ́ nyáŋ Wɩɩsɛ Kɛnɔ sɩɛrʋ; ɛ́ wɩ́ɛ́ nɛ́ péré.
Ʋ pʋ́ŋsɔ́ bʋlɛ́:
«Bál rɩ́ cɩ́ gɩr sɩɛrʋ aá búóli bʋlɛ́:
‹Ɩ́ bɩrmɛ ŋmɛ́nɔ bil Nyuutɩna Wɩɩsɛ mɛ́;
ɩ́ a rʋ́ʋ́ ŋmɛ́ŋwɩɛla tʋrɛ.
5 Ɩ́ tɔ́ kúŋkórkowa wuu,
ɩ́ cakɛ pallɛ rɩ́ dúŋdúóme.
Ɩ́ tʋrɛ ŋmɛ́ŋgʋrɛ́,
ɩ́ bɩrmɛ ŋmɛ́ŋbɔma rɩ́wɔ́ a wérí, mʋ́lámʋ́lá.
6 Nɩɛ wuu sɩ́ tɩŋ ɛ́ mɛ́,
a zɩŋ Wɩɩsɛ há lá nɩɛ aá tá ɛ́.› »
Zaŋ Batiisi bʋ́l Wɩɩsɛ wɩ́ɛ́ pá nɩɛ
7 Nɩɛ ɓɩkana sɩɛ́ ko Zaŋ rɩ́, rʋ́ʋ́ káŋwɔ́ muŋsi nyii mí.
Ɛ́ nɛ́ ʋ bʋ́lwɔ́ rɩ́ a bʋlɛ́:
«Nɩbídʋbɔma duo!
Áŋ rɩ́ cáánɩ́wa, ɩ́ fá aá kɛkɛ Wɩɩsɛ sarɩ́ya ná háá kué mí.
8 Ɩ́ sɩɛ́ bɩ́rsɛ, a báá sɩ́ áá zɔkɛ Wɩɩsɛ mɛ́, káá a wɩ́were.
Wɩ́were ná nɩ́ɩ́ ɛɛ́ rɩ́wɔ́ zɩŋ rɩ́ɩ́wa bɩ́rsɔ́, ká sɩ́ bɩ́bɩ́ɩ́nʋ́ rɩ Abɩrahaŋ* há kɛ́ɩ́wa naabál, rʋʋ ɛ́ mɔhɔ̃́.
Taŋá nɛ́ ŋ bʋl aá pɛ́ɩ́wa, Wɩɩsɛ wo dɔ́wʋ́ɔ́ nyáŋ kaa bɩrmɛ nɩbííne, ɓaá a Abɩrahaŋ bɛlɛ.
9 Tuuni ɓɛ́ɛ́ péró.
Tuu ná wuu há wɩ nɔŋweré nɔŋ, ɓa sɩ́ ɓɔ́ʋ́, a pii hé níŋ mí.»
10 Ɛ́ nɛ́ jamáŋ ná nɩɛ sɩɛ́ bɔsɛ Zaŋ bʋlɛ́:
«Beé wɩ́wéré rí mɔhɛ̃́ ráá a?»
11 Ɛ́ nɛ́ ʋ bʋl pɔ́wɔ́ bʋlɛ́:
«Nɛrɔ ná há kéŋ gɛnnɛ bɛllɛ, ʋ mɔhɔ̃́ rʋ́ʋ́ pi nɔ́ŋɔ pá nɛrɔ ná há wɩ gɛrɔ kené.
Nɛrɔ ná má há kéŋ ɓɩdííle, ʋ má mɔhɔ̃́ rʋ́ʋ́ pá nɛrɔ ná há wɩ ɓɩdííle kené.»
12 Loŋpolaara má ko, rʋ́ʋ́ káŋwɔ́ muŋsi nyii mí, a bɔ́sʋ́ bʋlɛ́:
«Karmɩ'áná, beé rí mɔhɛ̃́ ráá má a?»
13 Ɛ́ nɛ́ ʋ bʋl pɔ́wɔ́ bʋlɛ́:
«Ɩ́ sɩ́ loŋpó ɓáá sakɛ ɛ́ ná ɓa há sɩ́ɩ́wa la mɛ́.»
14 Sóójiwa má bɔ́sʋ́ bʋlɛ́:
«Ká á é, beé rí mɔhɛ̃́ ráá a?»
Ʋ bʋ́lwɔ́ má rɩ́ bʋlɛ́:
«Ɩ́ sɩ́ nɩɛ fíkú rɩ́ɩ́ la meéwíé, a sɩ́ nyɩɛrʋ má nyɛ́ɛ́ hé nɩɛ mɛ́ káá la meéwíé.
Amá ɩ́ lo rɩ́ɩ́wa sɩɛrʋ tɔ́rɩ́wa túme.»
15 Nɩɛ fa há kéŋ yɩɛla, aá dɛllɛ Kirisi* koe, nɛrɔ wuu bɩ́ɩ́nɔ́ anɛ rʋʋ nɛ́ ká Zaŋ.
16 Ɛ́ nɛ́ Zaŋ bʋl pɔ́wɔ́ wuu a bʋlɛ́:
«Ŋ é keníwa aá muŋsi nyii mí ní.
Amá nɛrɔ ná háá kué, ʋ píŋ ní kɩ́ŋ; ŋ rɩ́rʋ́ natɔɔsɛ vɔɔ́sɛ puré má tɩɩ wɩ cɛ́rɛ́.
Rʋʋ é ní kúé, ʋ sɩ́ kánɩ́wa muŋsi Wɩɩsɛ Sabɩɩna* mɛ́, arɩ́ níŋ mí.
17 Ʋ rɩ́rʋ́ mɩ́céllígbaŋa nɩ́ɩ́ kué ʋ nɛ́sɛ mɛ́.
Ʋ sɩ́ cel mɩ́ɛ́, a pa mɩ́bíí hé vʋ́ʋ́ra mɛ́, ká pa mɩ́záksɛ hé níŋ ná há waá dʋsɛ mɛ́.»
Kuóro Erodi kéŋ Zaŋ tɔ́ bɩnajaa
18 Zaŋ fɛ́l sɩ́ɩ́ a tɩ́ŋ wɩ́ɛ́ ɓɩkana mɛ́, a máŋsɛ Labaarɩwero wɩ́ɛ́ a pá Ɩzɩrayɛl duo* nɩɛ.
19 Zaŋ bʋ́l kuóro Erodi* má rɩ́, a bʋlʋ́ wɩ wérí ɛ́ɛ́, bee wɩ́ɛ́ ʋ há lɔ́ʋ́ máálá háálɔ Erodiyadɛ* ja, ká a wɩ́tɩɛnnɛ má ɓɩkana.
20 Amá Erodi báá ha á wɩ́tɔk nɔ́ŋɔ a súúríwó ná mɛ́.
Ɛ́ wɩ́tɔk nɛ́ ká:
ʋ há ɛ́ɛ́ ɓa ka Zaŋ tɔ́ bɩnajaa mɛ́.
Zaŋ kéŋ Zeezi muŋsi nyii mí
21 Tɛ́ŋ ná mɛ́ Zaŋ fa há kéŋ nɩɛ ná wuu há kóú rí, a muŋsi nyii mí tenni, ʋ kéŋ Zeezi má muŋsi nyii ná mɛ́.
Ɓa há múŋsú nyii ná mɛ́ ko tenni, ʋ cʋ́ɔ́lɛ́ Wɩɩsɛ.
Tɛ́ŋ ná mɛ́ ʋ háá cʋɔlɛ Wɩɩsɛ, bána yɛ́lɔ́,
22 ká Wɩɩsɛ Sabɩɩna* túwú nyúú anɛ kuókʋ́ma.
Ɛ́ nɛ́ ká Wɩɩsɛ liŋó lɛ bána rɩ́, a bʋ́lʋ́ rɩ́ bʋlɛ́:
«Ɩ nɛ́ káŋ bárka Bicolli, ŋ sɩɛrʋ wuu ní tɔ́rɩ́ wɩ́ɛ́.»
Zeezi duo nɩɛ
23 Zeezi há kúé aá púlú tʋtʋmɛ́, rʋʋ fa kéŋ bɩŋsɛ peri mɛrɛ́ rɩ́ fí.
Ʋ áná nɛ́ ká Zɔzɛfɛ,* anɛ ɛ́ nɩɛ há bɩ́ɩ́nɛ́.
Zɔzɛfɛ má áná yɩr nɛ́ Heli.
24 Heli má áná yɩr nɛ́ Matatɩ.
Matatɩ má áná yɩr nɛ́ Levi.
Levi má áná yɩr nɛ́ Mɛlɩsɩ.
Mɛlɩsɩ má áná yɩr nɛ́ Zanayi.
Zanayi má áná yɩr nɛ́ Zɔzɛfɛ.
25 Zɔzɛfɛ má áná yɩr nɛ́ Matatɩyasɛ.
Matatɩyasɛ má áná yɩr nɛ́ Amɔsɛ.
Amɔsɛ má áná yɩr nɛ́ Nahuŋ.
Nahuŋ má áná yɩr nɛ́ Ɛsɩlɩ.
Ɛsɩlɩ má áná yɩr nɛ́ Nagayi.
26 Nagayi má áná yɩr nɛ́ Maatɛ.
Maatɛ má áná yɩr nɛ́ Matatɩyasɛ.
Matatɩyasɛ má áná yɩr nɛ́ Semeyi.
Semeyi má áná yɩr nɛ́ Zɔzɛfɛ.
Zɔzɛfɛ má áná yɩr nɛ́ Zoda.
27 Zoda má áná yɩr nɛ́ Zʋanaŋ.
Zʋanaŋ má áná yɩr nɛ́ Reza.
Reza má áná yɩr nɛ́ Zɔrɔbabɛl.
Zɔrɔbabɛl má áná yɩr nɛ́ Salasɩɛlɛ.
Salasɩɛlɛ má áná yɩr nɛ́ Neri.
28 Neri má áná yɩr nɛ́ Mɛlɩsɩ.
Mɛlɩsɩ má áná yɩr nɛ́ Adɩ.
Adɩ má áná yɩr nɛ́ Kosaŋ.
Kosaŋ má áná yɩr nɛ́ Ɛlmadaŋ.
Ɛlmadaŋ má áná yɩr nɛ́ Ɛɛrɛ.
29 Ɛɛrɛ má áná yɩr nɛ́ Zeezi.
Zeezi má áná yɩr nɛ́ Ɩlɩɛzɛɛrɛ.
Ɩlɩɛzɛɛrɛ má áná yɩr nɛ́ Zoriŋ.
Zoriŋ má áná yɩr nɛ́ Matatɩ.
Matatɩ má áná yɩr nɛ́ Levi.
30 Levi má áná yɩr nɛ́ Sɩmɩyɔŋ.
Sɩmɩyɔŋ má áná yɩr nɛ́ Ziida.
Ziida má áná yɩr nɛ́ Zɔzɛfɛ.
Zɔzɛfɛ má áná yɩr nɛ́ Zonaŋ.
Zonaŋ má áná yɩr nɛ́ Ɩlɩyakɩŋ.
31 Ɩlɩyakɩŋ má áná yɩr nɛ́ Mɩlɩya.
Mɩlɩya má áná yɩr nɛ́ Mena.
Mena má áná yɩr nɛ́ Matata.
Matata má áná yɩr nɛ́ Nataŋ.
32 Nataŋ má áná yɩr nɛ́ Davidi.*
Davidi má áná yɩr nɛ́ Izayi.*
Izayi má áná yɩr nɛ́ Ɔbɛdɛ.
Ɔbɛdɛ má áná yɩr nɛ́ Bʋazɛ.
Bʋazɛ má áná yɩr nɛ́ Salmɔŋ.
Salmɔŋ má áná yɩr nɛ́ Naasɔŋ.
33 Naasɔŋ má áná yɩr nɛ́ Amɩnadabɛ.
Amɩnadabɛ má áná yɩr nɛ́ Adɩmɩŋ.
Adɩmɩŋ má áná yɩr nɛ́ Arnɩ.
Arnɩ má áná yɩr nɛ́ Ɛsɩrɔŋ.
Ɛsɩrɔŋ má áná yɩr nɛ́ Pɛrɛsɛ.
Pɛrɛsɛ má áná yɩr nɛ́ Ziida.*
34 Ziida má áná yɩr nɛ́ Zakɔbɛ.*
Zakɔbɛ má áná yɩr nɛ́ Ɩzakɛ.*
Ɩzakɛ má áná yɩr nɛ́ Abɩrahaŋ.*
Abɩrahaŋ má áná yɩr nɛ́ Teera.
Teera má áná yɩr nɛ́ Nakɔɔrɛ.
35 Nakɔɔrɛ má áná yɩr nɛ́ Seriki.
Seriki má áná yɩr nɛ́ Rehu.
Rehu má áná yɩr nɛ́ Pɛlɛgɛ.
Pɛlɛgɛ má áná yɩr nɛ́ Ɛbɛɛrɛ.
Ɛbɛɛrɛ má áná yɩr nɛ́ Siila.
36 Siila má áná yɩr nɛ́ Kayɩnaŋ.
Kayɩnaŋ má áná yɩr nɛ́ Arɩfakzadɛ.
Arɩfakzadɛ má áná yɩr nɛ́ Sɛŋ.
Sɛŋ má áná yɩr nɛ́ Nowe.*
Nowe má áná yɩr nɛ́ Lamɛkɛ.
37 Lamɛkɛ má áná yɩr nɛ́ Matɩɩsalɛŋ.
Matɩɩsalɛŋ má áná yɩr nɛ́ Ɩnɔkɛ.
Ɩnɔkɛ má áná yɩr nɛ́ Yerdi.
Yerdi má áná yɩr nɛ́ Malɩlɛɛlɛ.
Malɩlɛɛlɛ má áná yɩr nɛ́ Kayɩnaŋ.
38 Kayɩnaŋ má áná yɩr nɛ́ Ɩnɔkɛ.
Ɩnɔkɛ má áná yɩr nɛ́ Sɛtɛ.
Sɛtɛ má áná yɩr nɛ́ Adaŋ,* Wɩɩsɛ bio.