Toopere fí wɩ́ɛ́ sɩ́ŋsʋ́ɔ́lɔ
25
1 Ɛ́ nɛ́ Zeezi sʋ́ɔ́lɛ bʋlɛ́:
«Ɛ́ tɛ́ŋ mɛ́, Wɩɩsɛ kuótɔ́ɔ́ ná á rʋ́ʋ́ nɛ toopere fí há píwó cáŋsɛ, a mʋ́ rɩ́wɔ́ céŋ háfɛlɔ bála nɛ́.
2 Ɓa sɩɛrʋ, bɔmmʋ́ɔ́ fa ká nɩcʋ́llɛ́, ká bɔmmʋ́ɔ́ a wɩ́zɩ́nná.
3 Nɩcʋ́llɛ ná bɔmmʋ́ɔ́ há píwó cáŋsɛ, ɓa báá wɩ nʋʋ jɛ́ɛ́ pɛ́ kaá va, rɩ ɓa ténnó rɩ́wɔ́ hé.
4 Ká wɩ́zɩnna ná bɔmmʋ́ɔ́ é pɛ́ ja nʋʋ hé búlliwiisi mí, a kaá va.
5 Háfɛlɔ bála ná sɩɛ́ há wɩ kɩ́kɛ́lɛ́ kúé, ɓa dɛ́llɔ́ dɛ́llɔ́ bɔl, ká pii pɩ́ donni.
6 «Tɔ́ɔ́ ɓaamɔnáŋáwa mɛ́, ɓa ɔ́ɔ́ rɩ́wɔ́ cɛ́, rɩ búŋse níí ŋmɔwɛ́ a bʋlɛ́:
‹Ɩ́ ná háfɛlɔ bála ná nɛ́, ɩ́ lɩɩ cémú!›
7 «Ɛ́ nɛ́ toopere ná wuu gírki isi, a bɩ́rmɩ́wɔ́ cáŋsɛ.
8 Nɩcʋ́llɛ ná sɩɛ́ bʋl wɩ́zɩnna ná rɩ́ bʋlɛ́:
‹Á cáŋsɛ ná dʋ́sʋ́ rɛ́, ɩ́ ɛ́ɩ́wa nʋʋ ná mʋ́ɔ́ párá.›
9 «Ɛ́ nɛ́ wɩ́zɩnna ná sɛ́:
‹Aɩ́, nʋʋ ná wɩ́rá wuú peri; ɩ́ mʋ́ nʋyɛ́lla rɩ́ a yɔwɛ nʋʋ pɛ́ɩ́wa tɩɩ.›
10 «Tɛ́ŋ ná mɛ́ ɓa há mʋ́ɛ́ rɩ́wɔ́ yɔwɛ nʋʋ ná, háfɛlɔ bála ná péró.
Toopere ná bɔmmʋ́ɔ́ há kéŋwó tɩɩ, ɓa rɩ́ háfɛlɔ bála ná zʋ hájaasɛ cana jaa, ká ɓa ka dánnʋɔ tɔ́.
11 «Ʋ ɛ́ har rɩ́ mɛ́, toopere ná bɔmmʋ́ɔ́ há káánɛ́ má kúó a bʋlɛ́:
‹Nyuutɩna, Nyuutɩna, wúri dánnʋɔ párá.›
12 «Ɛ́ nɛ́ ʋ sɛ́:
‹Taŋá nɛ́ ŋ bʋl aá pɛ́ɩ́wa, ŋ wɩ́ɩ́wa ɛ̃.› »
13 Zeezi sɩɛ́ súúri bʋlɛ́:
«Ɛ́ wɩ́ɛ́ ɩ́ pɔ́ wérí, bee wɩ́ɛ́ ɩ́ wɩ́ŋ tápʋl rɩ́rɩ́ŋ tɛ́ŋ koolí ɛ̃.
Báálɔ oro há pí meéwíé ɓɔ́ʋ́ tʋtʋnna ká mʋ́ ŋmɛ́nɔ
14 «Wɩɩsɛ kuótɔ́ɔ́ ná wɩ́ɛ́ nɩhɩ̃́ anɛ báálɔ oro háá já rʋ́ʋ́ va ŋmɛ́nɔ, a yɩ́rʋ́ tʋtʋnna, a púú ɓɩɛ héwó nɛ́sɛ mɛ́ rɩ́wɔ́ bíbel ní.
15 Ʋ sɩɛ́ pi táláŋ* bɔmmʋ́ɔ́ pá nɔ́ŋɔ, a pi bɛllɛ pá nɔ́ŋɔ ká pi balá pá nɔ́ŋɔ má; ʋ bél nɛrɔ wuu dóé mʋɔsɔ nɛ́ ká pá ɛ́, ká sɩɛ́ col.
16 Tʋtʋnnɔ ná há lá táláŋ bɔmmʋ́ɔ́, ʋ kéŋwó bɩ́rɛ, a ná táláŋ bɔmmʋ́ɔ́ náŋa súúri, mʋ́l ná tɩɩ tɩɩ mɛ́.
17 Ʋ ná má há lá táláŋ bɛllɛ ná, ʋ má kéŋwó bɩ́rɛ, a ná táláŋ bɛllɛ náŋa a súúri.
18 Ká ʋ ná há lá táláŋ balá ná, ʋ kaa mʋ́ lú bʋɔ a púú nyúútɩ́na meéwí ná féŋsi ráŋ.
19 «Ʋ dáánɛ wérí, ká tʋtʋnna ná nyúútɩ́na bɩrko, a yɩ́rwɔ́, rɩ́wɔ́ bílwó nʋʋsɛ.
20 Ɛ́ nɛ́ tʋtʋnnɔ ná fa há lá táláŋ bɔmmʋ́ɔ́ ná tuu peri, a bʋlɛ́:
‹Ŋ nyúútɩ́na, ɩ fa pí táláŋ bɔmmʋ́ɔ́ nɛ́ páŋ, sɩɛ́ nówó, ŋ kenó bɩ́rɛ a ná táláŋ bɔmmʋ́ɔ́ náŋa a súúri.›
21 «Ɛ́ nɛ́ ʋ nyúútɩ́na ná bʋl pɔ́ʋ́ bʋlɛ́:
‹Tabárkála, ɩ ká tʋtʋnnʋwérí; ɩ bél oŋwiisi mí arɩ́ taŋá, ɛ́ wɩ́ɛ́ ŋ sɩ́ bílí rɩ́ɩ́ bíbel oŋkana mɛ́.
Ko zʋʋ mɩ́nɩ́ŋ wér sɩɛrʋ.›
22 «Tʋtʋnnɔ ná má há lá táláŋ bɛllɛ ná, ʋ má tuu peri a bʋlɛ́:
‹Ŋ nyúútɩ́na, ɩ fa pí táláŋ bɛllɛ nɛ́ páŋ, sɩɛ́ nówó, ŋ kenó bɩ́rɛ a ná táláŋ bɛllɛ náŋa a súúri.›
23 «Ɛ́ nɛ́ nyúútɩ́na ná bʋl pɔ́ʋ́ má bʋlɛ́:
‹Tabárkála, ɩ ká tʋtʋnnʋwérí; ɩ bél oŋwiisi mí arɩ́ taŋá, ɛ́ wɩ́ɛ́ ŋ sɩ́ bílí rɩ́ɩ́ bíbel oŋkana mɛ́.
Ko zʋʋ mɩ́nɩ́ŋ wér sɩɛrʋ.›
24 «Ɛ́ nɛ́ tʋtʋnnɔ ná fa há lá táláŋ balá ná, ʋ má tuu peri a bʋlɛ́:
‹Ŋ nyúútɩ́na, ŋ fa ɩ́ɔ̃́ rɩɩ ká nɛrɔ ná wɩ́ɛ́ há dúókó ní.
Ɩɩ́ kʋŋ ɓɩɛ ná ɩ ra há wɩ dúé ní, aá kʋsɛ ɓɩɛ ná má ɩ ra há wɩ cɔ́ŋsɛ́.
25 Ŋŋ́ fɛ́ɩ́ rɛ́, ɛ́ nɛ́ tɛ ŋ píí táláŋ ná féŋsi tíé mʋ́l; nóú ní, lɛ́ɩ́ ɓɩnɔ.›
26 «Ɛ́ nɛ́ nyúútɩ́na ná bʋl pɔ́ʋ́ bʋlɛ́:
‹Ɩ ká tʋtʋnnʋtɔ́k rɛ́, a a tɛŋwɩtɩ́ŋ; ɩ fa há ɩ́ɔ̃́ rɩ́ŋ kʋŋ ɓɩɛ ná ŋ ra há wɩ dúé ní, a zɩŋ rɩ́ŋ kʋsɛ ɓɩɛ ná má ŋ há wɩ cɔ́ŋsɛ́ nɛ́,
27 ɩ sɩɛ́ fa mɔhɔ̃́ rɩ́ɩ́ píŋ meéwí ná hé báŋgɛ mɛ́ nɛ́; ŋ há bɩ́rɛ ko nyɛ, ŋ fa sɩ́ lɩ́sɩ́ŋ meéwí arɩ́ nyii ná báŋgɛ há súúré.
28 « ‹Ɛ́ wɩ́ɛ́, ɩ́ kánʋ́ táláŋ ná la, a pii pá tʋtʋnnɔ ná há bɩ́rɛ́, a ná táláŋ bɔmmʋ́ɔ́ súúri ná.
29 Bee wɩ́ɛ́ nɛrɔ ná há kené, ɓa sɩ́ pɔ́ʋ́ súúri rʋ́ʋ́ ɔsɛ ka kɩ́ŋkáŋ; amá nɛrɔ ná há wɩ kené, ɓa sɩ́ la mʋ́ɔ́ ná má tɩɩ há mɩ́nʋ́ rɩ́.
30 Ká tʋtʋnnʋyɔ́ɔ́ ná, ɩ́ kánʋ́ yoo hé bíno sɩɛrʋ.
Ráŋ nɛ́ rʋ́ʋ́ wi a dʋŋ nɛ́sɛ mɩ́sɛ.›
Sarɩ́ya kal díí
31 «Nɩbiino Bio* háá á rʋ́ʋ́ dúú kuorí, a ko arɩ́ Wɩɩsɛ malɩ́kawa wuu, ʋ sɩ́ kénú kuóɓasa ná há píŋó nyúú,
32 ká rɩ́ dúníé nɩɛ wuu sɩɛ́ ko cíkú sɩ́ɛ́, rʋ́ʋ́ káŋwɔ́ caksɛ náŋá mɛ́, anɛ penʋɔlɔ* háá caksɛ pieŋse rɩ́ bʋnnɛ náŋá mɛ́ ɛ́.
33 Ʋ sɩ́ a rɩ́ nɩɛ ná há nɩhɩ̃́ pieŋse cɩ́nʋ́ néduu rí, ká rɩ́ nɩɛ ná há nɩhɩ̃́ bʋnnɛ má cɩ́nʋ́ nágʋɔ rɩ́.
34 «Ɛ́ mɛ́ nɛ́ rɩ́ kuóro bʋl nɩɛ ná há cɩ́nʋ́ néduu rɩ́ bʋlɛ́:
‹Ɩ́ ko, ɩ́ nɩɛ ná há káŋ Ana Wɩɩsɛ bárka nɩɛ; ɩ́ ko dí kuorí ná ʋ há bɩ́rmɛ́ bílíwa mɛ́, dúníé púle wuu mí.
35 Bee wɩ́ɛ́ losu fa keníŋ, ɩ́ páŋ ɓɩdííle ŋ dí; nyinyʋɔ́sɛ fa kánɩ́ŋ, ɩ́ páŋ nyii ŋ nyɔ; ŋ fa há ká nɩhʋ́ɔ́r, ɩ́ keníŋ wérí;
36 ŋ fa há kéŋ tɛŋɓɩla, ɩ́ já gɛrɔ súŋ; ŋ fa háá wɩɩlɛ́, ɩ́ bélíŋ mí; ŋ fa há mɩŋ bɩnajaa má mɛ́, ɩ́ kúó néŋ.›
37 «Ɛ́ mɛ́ nɛ́, rɩ́ nɩtékétékéwa ná bɔ́sɩ́ŋ bʋlɛ́:
‹Nyuutɩna, kal beé rí á néí rɩ losu fa kení á pɛ́ɩ́ ɓɩdííle ɩ dí, nyinyʋɔ́sɛ má fa kánɩ́ á pɛ́ɩ́ nyii ɩ nyɔ?
38 Kal beé rí á néí rɩɩ ká nɩhʋ́ɔ́r á kánɩ́ wérí, a néí rɩɩ kéŋ tɛŋɓɩla á ja gɛrɔ súí?
39 Kal beé rí á néí rɩɩ́ wɩ́ɩ́lʋ́ á bélí mí, ɓa tɔ́ɩ́ bɩnajaa má mɛ́ á ko néí?›
40 «Kuóro ná sɩɛ́ sɩ́ bʋl pɔ́wɔ́ bʋlɛ́:
‹Taŋá nɛ́ ŋ bʋl aá pɛ́ɩ́wa, tɛ́ŋ ná wuu mí ɩ́ há dé a wérí páŋ maábináŋa sɩɛrʋ ɓɩwie má tɩɩ, ŋ nɛ́ ɩ́ aa pá ɛ́.›
41 «Ká rʋ́ʋ́ sɩɛ́ bʋl pá nɩɛ ná há mɩ́nʋ́ nágʋɔ bʋlɛ́:
‹Ɩ́ tuu lɩ́ŋ laka, Wɩɩsɛ ɓʋ́sɩ́wa pʋ́sɛ.
Ɩ́ mʋ́ zʋ níŋdʋsɩ́rá ná sɩɛrʋ, ɓa há bɩ́rmɛ́ bil Sɩtaanɛ* rɩ́rʋ́ malɩ́kawa mɛ́.
42 Bee wɩ́ɛ́ losu fa keníŋ, ɩ́ wɩ́ŋ ɓɩdííle pɛ́ɩ́, nyinyʋɔ́sɛ má fa kánɩ́ŋ, ɩ́ wɩ́ŋ nyii pɛ́ɩ́ rɩ́ŋ nyɔ.
43 Ŋ fa há ká nɩhʋ́ɔ́r, ɩ́ wɩ́ŋ wérí kené; ŋ fa há kéŋ tɛŋɓɩla, ɩ́ wɩ gɛrɔ jɛ́ɛ́ súŋ; ŋ fa háá wɩɩlɛ́, ɩ́ wɩ́ŋ mɛ́ bélé; ŋ fa há mɩŋ bɩnajaa má mɛ́, ɩ́ wɩ kúé néŋ.›
44 «Ɛ́ mɛ́ nɛ́, rɩ́wɔ́ má bɔsɛ kuóro ná bʋlɛ́:
‹Kal beé rí á néí rɩ losu fa kení, nyinyʋɔ́sɛ kánɩ́, ɩ fa a nɩhʋ́ɔ́r, ɩ fa ka tɛŋɓɩla, ɩ fa wɩ́wɩɩlɛ, ɓa fa tɔ́ɩ́ bɩnajaa mɛ́, ká á wɩ wɩ́ɩ́ ɛ́ɛ́ pɛ́ɩ́?›
45 «Kuóro ná sɩɛ́ sɩ́ bʋl pɔ́wɔ́ má bʋlɛ́:
‹Taŋá nɛ́ ŋ bʋl aá pɛ́ɩ́wa, tɛ́ŋ ná wuu mí ɩ́ há dé vɛ, rɩ́ɩ́wa a wérí páŋ maábináŋa sɩɛrʋ ɓɩwie má tɩɩ, ŋ nɛ́ ɩ́ vɛ rɩ́ɩ́wa aa pá ɛ́.›
46 «Ɛ́ wɩ́ɛ́, ɓa sɩ́ zʋ wɩɩla ná há waá tenni sɩɛrʋ, ká rɩ́ nɩtékétékéwa má zʋ Wɩɩsɛ laka, mɩɩsɛ ná ha waá tenni dɩhɩ̃́.»