Nyuutɩna Wɩɩsɛ gaasɛ wɩ́ɛ́ Ɩzɩrayɛl sɩ́diire nyúú
3
1 Ŋ sɛ:«Zakɔbɛ dunɩɛ sɩ́diire,
ɩ́ zesi,
ɩ́ é Ɩzɩrayɛl sariyadiire!
ɩ́ rá wɩ mɔhɛ̃́ rɩ́ɩ́wa makɛ taŋá pá nɩɛ rɛ́ɛ́ >>
2 Ká, bee rí sɩɛ́ tɛ́ ɩ́ nɛ́ bɩrɛ bɛrɛ weri,
ka cólli bɔŋbɔŋ nɛ́ >>
A bɛŋsɛ nɩɛ ɓa koŋŋɩ ká tá heŋgbele dʋŋɔ.»
3 Ɩ́ nɩɛ ná há píŋ nɩɛ mákɩ́wa nʋɔ ɓɩdiilí,
a díwó namɩɛ wuu tenni,
a tóksíwó heŋgbele wuu nyʋ́ksɛ múnémúné,
ɩ́ kéŋwó cɔ́nnɛ,
anɛ́ ballɔ namɩɛ ɓa há cɔ́nnɛ́ cɔ́ɔ́ vie mí.
4 Ɛ wɩ́ɛ́, ɓa sɩ́ cáási hé Nyuutɩna Wɩɩsɛ mɛ́,
rʋ́ fɔ́wɔ́ susu,
amá ʋ wá a rʋ́ zésíwó rí;
a tɩŋ wɩ́tɩɛnnɛ ná ɓa há ɛ́ wɩ́ɛ́, ʋ sɩ́ bɩ́rʋ́ har tɛ́wɔ́.
Nyuutɩna Wɩɩsɛ gaasɛ wɩ́ɛ́ wɩ́laabʋlla ná haá tɛl nɩɛ rɩ́
5 Nóú ná Nyuutɩna Wɩɩsɛ há bʋ́lɛ cáásɛ,
nyɛnɛ wɩ́laabʋlla ná haá tɛl Wɩɩsɛ nɩɛ:
«Ɓa có nɩɛ ná há dí zíle aá pɔ́wɔ́ nɛ́;
Ká nɩɛ ná há wɩ óŋ kene aa pawɔ́,
ɓaá yó tɩnáwa.
6 Ɛ wɩ́ɛ́, tɩ́táŋ,
ɩ́ báá wa duosí ná wɩ́ɛ́,
ɩ́ má wɩ́laabʋlla, ʋ sɩ́ a bino a pɛɩ́wa,
ɩ́ báá wɩ wɩ́muulináálɛ ná,
ɛ́ kal sɩ́ a bino, wɩpomí waá mɩŋ!»
7 Nɩɛ ná wuu háá ná wɩ́ɛ́ arɩ́wɔ́ ná há múúle aá ná wɩ́ɛ́,
hɩɩ̃́sɛ sɩ́ káŋwɔ́, rɩ́wɔ́ pa ɓɩɛ tɔ́wɔ́ sɩ́ɛ́ mɛ́,
bee wɩ́ɛ́ Wɩɩsɛ báá wʋ́ɔ́ zesi.
8 Amá ŋ é, Nyuutɩna Wɩɩsɛ puú sabɩɩna héŋ mí,
a páŋ doé,
a páŋ taŋá rɩ́ baŋcɩpɩrɩ́,
rɩ́ŋ wuólli maŋsɛ Ɩzɩrayɛl nɩɛ wɩ́tɩɛ́nnɛ,
rɩ́ Zakɔbɛ duo nɩɛ kéké ná ɓa há tʋmɛ́.
Miise bʋl Zerizalɛmɛ háá rʋ́ zɔkɛ wɩ́ɛ́
9 Ɩ́ zesi,
Zakɔbɛ duo sidiire,
Ɩzɩrayɛl bɛlɛ sariyadiire,
ɩ́ há bɛrɛ taŋá tɩŋɛ́,
ká ka yɛ́rɛ́ aá golli.
10 Ɩ́ bɩsɛ cél nɛ́ aá sɔɔ Sɩɔŋ,
a tʋ́ŋ bɔŋbɔŋ aá sɔɔ Zerizalɛmɛ má.
11 Sariyadiire dí sariya,
kaá la zíle,
vʋ́k'ɔɔsa karmɛ Wɩɩsɛ kɩ́ŋse,
kaá la tume,
ká Wɩɩsɛ wɩlaabʋlla múúli ná wɩ́ɛ́ a bʋl,
kaá la meewié.
ɓaá tʋŋ ɛ́ ká bʋlɛ́,
Nyuutɩna Wɩɩsɛ yɩr mɛ́ nɛ́:
«Nyuutɩna Wɩɩsɛ mɩ́ŋ rá har,
wɩɩla wɩ́rá dí.»
12 Ɛ́ wɩ́ɛ́, ɩ́ wɩ́tɩɛnnɛ ná wɩ́ɛ́,
ɓa sɩ parɛ Sɩɔŋ anɛ baka ɓa haá parɛ ɛ́;
Zerizalɛmɛ má sɩ́ bɩrmɛ́ pupuli,
ká rɩ́ sɔkólli (kaalɔ) tɔ́ wɩcʋɔlɩjɩzeno paalɔ ná mɛ́.