1
1 Wɩ́ɛ́ ná Wɩɩsɛ há mákɛ́ pá Nahumi há lɛ́ Ɛlkɔsɛ, a mʋ́ tɩɩnɛ tɔ́zeno Ninivi mí, ɓa nɛ́ mɩ́nʋ́ kɛnɔ né sɩɛrʋ
Nyuutɩna ká Wɩɩsɛ ná wɩ́ɛ há dúókó, kɔ́ʋ́ wɩ́ɛ́ wéró
2 Nyuutɩna ká Wɩɩsɛ ná wɩ́ɛ́ há duoko ní, ʋʋ́ tʋrɛ nɩɛ ná há cɩ́nʋ́ mɛ́; Nyuutɩna cɔwɩɩlɔ zéŋ. Nyuutɩna tʋrɛ nɩɛ na há cɩ́nʋ́ mɛ́; ʋ cɔɛ́ ísú dɩŋdɔma nyuu. 3 Nyuutɩna Wɩɩsɛ cɔwɩɩlɔ́ wɩ kɩ́kɛ́lɛ́ isi, kɔ́ʋ́ kéŋ dóé má wérí. Nɩɛ ná há á wɩ́ɛ zɔ́kʋ́ mɛ́, ʋ wʋ́ɔ́ yɔ́ɔ́ lo. Rʋʋ nɛ́ ísé rʋ́ʋ́ va, pozeno nɩ́ɩ́ tɩ́ŋʋ́ mɛ́. Duóbásɛ nɩhɩ́ŋ kukulo ní ʋ naasɛ lɔkɛ aá tá. 4 Ʋʋ́ ɓɛ mʋʋ mɛ́ ʋ nyii hʋ́ʋ́sɛ kɔ́ʋ́ hɩl; ʋʋ́ a fuonni wuu nyii hʋ́ʋ́sɛ ká ɓa hɩ́l. Basaŋ nyɔ́lɔɔ, rɩ́ Karmɛl paalɔ daha nyɔ́lɔɔ wuu hɩl. Libaŋ má tuuni fɩɩla wuu yuori 5 Pallɛ vaklʋ́ sɩ́ɛ́ mɛ́, ká dúŋduóme yʋɔlɛ.Ʋ sɩ́ɛ́ mɛ, tíé zíkili ní ká dúníé nibííne wuu cícel. 6 Aŋ́ rɛ́ sɩ́ wóllú sɩ́ɛ́ mɛ́ cɛ́, rʋʋ cɔwɩɩlɔ́ nɩ́ ísé? Áŋ rɛ́ sɩ́ wóllú sɩ́ɛ́ mɛ́ cɛ́, rʋʋ nɛ́ loé rʋ́ʋ́ cɔwɩɩlɔ́ pusi? Ʋ cɔwɩɩlɔ́ nɩhɛ́ níŋ háá díé ní, a dí bʋ́ɔ́ ɓaá poŋsi. 7 Nyuutɩna Wɩɩsɛ wéró; ʋ ká dɩyúólí rí sazɔkɔ́ tɛ́ŋ mɛ́ a pá nɩɛ ná há mɩŋ sazɔkɔ́ sɩɛrʋ. Nɩɛ ná há lɔ́ʋ́ wɩ́ɛ́ di, a káŋwɔ́ tɩɩ ko yuolú mí, ʋʋ́ bélwó mí wérí, 8 rɩ nyipoduo ní kúé lɩ́wɔ́ mɛ́ má. Amá ʋ dɩŋdɔma é, ʋʋ́ kírwó mʋ́ hé sʋʋ mɛ́ nɛ́, ká zɔ́kɩ́wɔ́ tɔ́ɔ́ wuu. 9 Ɩ́ɩ́ bɩɩnɛ béé rí a caasɛ Nyuutɩna Wɩɩsɛ? Rʋʋ́ é níí ja rʋ́ zɔkɛ, ʋʋ́ de zɔkɛ ɓóŋ ní, sazɔkɔ́ báá waá bɩrko. 10 Beewɩɛ ɓa nɩhɛ̃́ sɔrʋ há fáárɛ́ náŋá mɛ́ nɛ́; ɓa búkó anɛ sɩnyɔɔra, níŋ sɩɛ́ sɩ́ díwó ɓóŋ, anɛ nyɔ́hɩlɛ́. 11 Ninivi, ɩ nɩɛ sɩɛrʋ nɛ́ nɩtɔk oro lɛ, a bɩɩnɛ bɔ́bɔ́ŋ caasɛ Nyuutɩna Wɩɩsɛ; ʋ sabɩ́ɩ́ná jáŋwa wuu ká zɔ́krʋ́ wɩ́ɛ́ nɛ́. 12 Ɛ́ wɩɛ, ná Nyuutɩna Wɩɩsɛ há sʋ́ʋ́ ná a pá Ziida nɩɛ: «Rɩ dɩŋdɔma (Asiiri nɩɛ) có rɩ́wɔ́ kaŋ, a ka dóé mɔ ɛrɛ má, ŋ sɩ́ zɔ́kwɔ́ a tenníwó wɩɛ wuu. Ŋ fa múúríwa rɛ́, amá ŋ báá wɩ́ɩ́waá múúri. 13 Mʋ́l né mí, ŋ lɩ́sɩ́wa Asiiri tɩ́náwa dóé ná ɓa há kené aá gɛ́rɩ́wa mɛ́, ŋ cónní bɛŋzɛllɛ ná há vɔ́sɩ́ɩ́wa 14 Ɩ é Ninivi kuóro, ná wɩ́ɩ́ ná Nyuutɩna Wɩɩsɛ há bʋ́lɛ́ a caasɩ́: «Ɩ dunɛ́ŋ oro wuu waá mɩŋ, rɩ́ɩ́ yɩr yɩ́rɛ. Ɩ venni jaa ná sɩɛrʋ, ŋ sɩ́ zɔkɩ́ venni ná ɓa há pí daa cɔ́, arɩ́wɔ́ ná ɓa há pí hɔɔ cʋɔrɛ. Ŋ bɩrmɩ́ lɛlbule tenni, beewɩ́ɛ́ ɩ wɩ piŋ ŋ sɩ́ɛ́ mɛ́.