2
1 Ɩ́ bel pallɛ nyúú ná, nɛ́ŋ rɛ́ lɛ́ ráŋ aá ko arɩ́ labáárɛwero; ʋʋ́ kó rʋ́ʋ́ bʋlɛ́ tɛŋfɩ́ɛ́l péríwa nɛ́. Zida nɩɛ, ɩ́ dííwa caŋsɛ, a lɩ́sɩ́ɩ́wa nʋʋsɛ ná ɩ́ há tɛ́ɛ́ pá Wɩɩsɛ. Nɩbɔmɔ ná háá gɛ́rɩ́wa báá wɩ́ɩ́wa rɩ́ wuó ko, beewɩ́ɛ́ ŋ zɔ́kʋ́ dóé wuu.2 Ninivi nɩɛ, ɩ́ ná lalyoore níí kóéwa mɛ́. Sóójiwa, ɩ́ isi zɛ́ zesɔɔkɛ́rɛ a pɔ́, aá bel ŋmɛ́ŋsɛ rɩ́ wérí, ɩ́ kánɩ́ɩ́wa tɩɩ, a cɛ́ rɩ́ doé, a pɔ́ wérí rɩ́ɩ́wa yo lal.3 Dɩŋdɔma fa kúó zɔkɛ Zakɔbɛ duo nɩɛ, a káŋwɔ́ nyʋ́ksɛ anɛ ɓa há ɓɔ́rɛ viinyi ká ka hílli bónni ɛ́. Amá Nyuutɩna Wɩɩsɛ bɩ́rɔ́ ko púú wér pɔ́wɔ́; (óó ʋ bɩ́rɔ́ pi Ɩzrayɛl wér pɔ́ʋ́.)
Ɓa sɩ́ ko yo Ninivi tɔ́ɔ́, a búksú wuu
4 Ʋ lalyoore hɔkɛ́rɛ wuu ní ɓɩfɩɛŋsɛ́, ɓa bɩbara má gɛnnɛ wuu ɓɩfɩɛŋsɛ́. Lalyóórítoórkowa há pɩ́ɛ́rɛ́ rɩ́wɔ́ kaa mʋ́ lal, wuu dé tʋ́tʋl anɛ níŋ ní, ká ɓa káŋwɔ́ cɔlmɛwa ɓɔ́. 5 Ɓa lalyóórítórkowa dé caasɛ fɩ́fá bɩbarɩ́, ŋmɛ́ŋsɛ rɩ́ gɩra wuu mí, anɛ níŋkáŋtɔrɔ nɛ́; ɓaá fá kɩ́kɛ́lɛ́, anɛ duófɩ́llɔ nɛ́. 6 Asiri kuóro yɩ́rʋ́ lalyoore bɩbara, ɓa isi vaa gɛ́ŋsɛ aá ko. Ɓaá fɔ́ɔ́ mʋ́ peri zeŋ ná há kíl tɔ́ɔ́, a mʋ́ na dɩyúóli raŋ. 7 Naasɩ́ balá, rɩ Ninivi tɔ́ɔ́ dáŋnʋʋsɛ ná há cáásɛ mʋnaa rí wuu gínnó, ká kuoro zʋɔ́ wuu tuwi tie; 8 Ɓa gírwó wɩháálɔ veŋgúle ná a kaa col, ká háála ná fa há tʋ́mɛ́ aá pɔ́ʋ́, wi aá hiini anɛ kuókʋ́sɛ, ká pa nɛ́ŋsa faarɛ́ 9 Ninivi bɩ́rmɛ fozeno há gíré ká nyii pal aá col ní. Ɓa kiri aá yɩ́rɛ nɩfáalɛ: «Ɩ́ cɛ́! Ɩ cɛ́!» ká nɛ́ŋ balá má wɩ bɩ́rɛ́ aá bel. 10 Ɩ́ pa warɛ, Ɩ́ pa salmɛ! Kuóɓɩɛ oŋwere rɩ́wɔ́ duó wuu mɩŋ tɔ́ɔ́ ná sɩɛrʋ, ɓa kuóɓɩɛ wɩ wuó tenni. 11 Ɓa pá tɔzeno na oŋwere wuu, ká zɔkʋ́ ɓóŋ. Nibííne naasɛ yʋɔrɛ, ɓa cícel, neɓííne ŋmɩ́ŋmasɛ naŋá mɛ́; ká ɓa sɩ́ɛ́ wuu zɔkɛ.
Ɓa kéŋ dúníé áŋwóŋ
12 Áŋwóŋwa tɔ́ɔ́ ná báá mɩŋ nɛ́ɛ́? Kɩ́ŋkaŋbɛlɛ pɛ́ ráŋ nɛ́ ká ɓa ana lɩɩ jaa ko pɔ́wɔ́ ɓaá dí, ká nɛ́ŋ wɩ kɩ́kaŋbio mí kɔwɛ aá tɩkɛ. 13 Kɩ́ŋkaŋwal nɩ́ɩ́ lɩɩ ɓʋ́ pʋna, a kaa cɔ́nnɛ pɔ́ʋ́ háálɔ rɩ́rʋ́ bɛlɛ. Ʋ dɩpɩ́nɛ wuu dé ká naŋkulewa dʋŋɔ nɛ́. 14 Ŋ sɩɛ́ cɩ́nɩ́ mɛ́ Ninivi. Nyuutɩna Wɩɩsɛ ná há kɛ óŋ wuu nɛ bʋlɛ́. Ʋ sɛ́: « Ŋ sɩ́ nyɩ́kɩ́ lalyóórítoókowa ná, rɩ́wɔ́ dí níŋ. Ɩ heŋbiwafɛlɛ ná, há nɩhɩ̃́ kɩ́ŋkaŋbɛlɛ, tókowí sɩ ɓʋ́ʋ́sɩ́wɔ́ lal mɛ́. Ŋ báá waá lo rɩ́ gʋɔrɛ aá fórí nɩɛ ɓɩɛ tíé nyúú; ɩ nɩtʋmɛ́ ná há gʋɔrɛ aá fiki nɩɛ, ɓa báá waá a rɩ́wɔ́ nɩ́wɔ́ liŋ́sí.»