Wɩɩsɛ wɩ́laabʋllɔ Zona kɛnɔ
Zona máŋsɔ́ rʋ́ʋ́ fá féŋsi Wɩɩsɛ mɛ́
1
1 Nyuutɩna Wɩɩsɛ liŋó bʋ́l Amɩtɛyɩ bio Zona mɛ́ bʋlɛ́: 2 «Isi mʋ́ tɔ́jɛlɔ Ninivi, a búóli pɔ́ʋ́, bee wɩ́ɛ́ ʋ wɩ́bɔma zɩ́nɔ́ yákɩ́ŋ mɛ́.» 3 Amá Zona ísó fá mʋ́ Tarsisi, a makɛ rɩ́ Nyuutɩna Wɩɩsɛ sʋ́ʋ́ ná. Ʋ ísó tuwi Zafa, a zʋ Tarsisi nyiidaborzeno a túŋ ŋmɛ́nɔ kɩŋ, ká zʋʋ súúri nɩɛ ná há mɩŋ ráŋ aá mʋ́ Tarsisi mí, a makɛ rɩ́ Nyuutɩna Wɩɩsɛ sʋ́ʋ́ ná. 4 Ɛ́ nɛ́ Nyuutɩna Wɩɩsɛ a pozeno lú mʋʋ sɩɛrʋ; poo ná fa duokí mʋʋ ná sɩɛrʋ. Nyiidaborzeno ná de cɩ́ rʋ́ʋ́ yɛ́rkɛ. 5 Héwíŋ ka nyiidabore sɩɛrʋ tʋtʋnna. Oro wuu ŋmɔwɛ búŋse a pɔ́ʋ́ Wɩɩsɛ, ká kuori cɩksɛ ná wuu fa há mɩŋ mʋʋ daborzeno ná mɛ́ yoo hé mʋʋ sɩɛrʋ, ká rʋ́ʋ́ dɔ́llɛ. Zona fá tuwi nyiidaborzeno ná tíérí a pɩ́ dóŋ. 6 Dabore sɩɛrʋ tʋtʋnna kuóro tuu pérú a bʋ́lʋ́ rɩ́ bʋlɛ́: Beé rí tɛ ɩ pɩ́ dóŋ? Isi dahá ŋmɔwɛ búŋse pɛ́ɩ́ Wɩɩsɛ, nɛ́ŋ wɩ wɩ́ɩ́ ɛ̃, pʋ́pɔ́ ɩ ɛ́ Wɩɩsɛ sɩ́ bɩ́ɩ́nɩ́rá wɩ́ɛ́, ká sɩ́ ló ráá sʋsɛ.» 7 Ɓa bʋl pá náŋá bʋlɛ́: «Ɩ́ ko ráá kɩ́ɛ́lɛ ná nyúbɔŋtɩɩnɔ; ɩ́ ko ráá yo bíé ná nɛrɔ ná há tɩ wɩ́ɩ́.» Ɓa jɔ́ɔ́ ná rɩ Zona nɛ́ tɩ wɩ́ɩ́. 8 Ɛ́ nɛ́ ɓa bʋ́lʋ́ rɩ́ bʋlɛ́: «Makɛ nɛrɔ ná há hérá wɩɩla né sɩɛrʋ. Ɩɩ́ tʋŋ beé tʋtʋmɩ́? Ɩ lɛ́ nɛɛ́? Ɩ tɔ́ɔ́ yɩr nɛ́ beé? Ɩ lɛ́ duo orí rí?» 9 Ɛ́ nɛ́ ʋ sɛ́: «Ŋ ká Ebire ní, aá fá Wɩɩsɛ ná há mɩŋ bána nyúú, a nɛ́ a mʋʋ rɩ́ tíé wuu.» 10 Ɛ́ nɛ́ héwíŋ ɓɩzeno kɛsɛ nɩɛ ná. Ɓa bʋ́lʋ́ rɩ́ bʋlɛ́: Beé rí ɩ a nyɛ ná? Bee wɩ́ɛ́ ʋ césíwó wuu pɔ́wɔ́ ɓa zɩŋ rʋ́ʋ́ fɔ́ɔ́ fíféŋsi Nyuutɩna Wɩɩsɛ sɩ́ɛ́ mɛ́ nɛ́. 11 Ɛ́ nɛ́ ɓa bʋ́lʋ́ rɩ́ bʋlɛ́: «Áá á ráá ɛ́ɩ́ ɛrɛ́ rɛ́ ká rɩ́ mʋ́ʋ́ ná pɔrɛ párá?» Bee wɩ́ɛ́ mʋʋ dé ɔsɛ aá híkli kɩ́ŋkáŋ nɛ́. 12 Ɛ́ nɛ́ ʋ bʋ́lwɔ́ rɩ́ bʋlɛ́: «Ɩ́ píŋ yoo hé mʋʋ ná sɩɛrʋ, ʋ sɩ́ pɔrɛ pɛ́ɩ́wa. Bee wɩ́ɛ́, ŋ ɩ́ɔ̃́ rɩ́ŋ wɩ́ɛ́ nɛ́ pozeno né lúlú.» 13 Ɛ́ nɩɛ fa kúósí nyii, a wɩ́wálmɛ rɩ́wɔ́ peri gíŋgiŋi, amá ɓa wɩ wóllé, bee wɩ́ɛ́ nyipoo ná fa dúókó kɩ́ŋkáŋ. 14 Ɛ́ nɛ́ ɓa ŋmɔwɛ búŋse hé Nyuutɩna Wɩɩsɛ mɛ́ a bʋlɛ́: «Nyuutɩna Wɩɩsɛ, áá sʋ́lɩ́, sɩ́ ló ráá sʋsɛ a tɩŋ báálɔ né wɩ́ɛ́, ká sɩ́ ló rí wɩ wɩ́ɩ́ ɛ̃ cɛ́l cɩ́ɩ́nɩ́rá, bee wɩ́ɛ́ Nyuutɩna Wɩɩsɛ, ɩ satɔrɔ́ nɛ́ ɩ tʋŋ.» 15 Ʋ ɛ́ har rɩ́, ɓa pí Zona yoo hé mʋʋ ná sɩɛrʋ. Ɛ́ nɛ́ mʋʋ ná cɔ́ɛ́ pɔrɛ. 16 Nyuutɩna Wɩɩsɛ héwíŋ ɓɩzeno ka nɩɛ ná. Ɓa ɔsɛ vʋk pá Nyuutɩna Wɩɩsɛ ká tá nʋtállɛ pɔ́ʋ́.