4
(Boŋzoŋ)1 Ŋ házoŋ ɩ wéró fɛ́, taŋá ɩ ɓɩɛ́na wéró. Ɩ sɩ́belé wéró ɩ máyáfɩ́ mʋ́l, anɛ kuókʋ́ma. Ɩ nyúpʋ́sɛ zʋ́ náŋa anɛ bʋ̃nnɛ há hé náŋá mɛ́, a lɛ Galadɛ tíé paalɔ aá tuwi ní. 2 Ɩ nyɩla (ɓɩ́l ɓɩ́l) pʋ́mmɔ́ anɛ piẽse ɓa há kɛ́ lɔ́ŋ ká fó ní. Ɓa wuu mɔhɩ̃ naŋá anɛ bilɩɛnnɛ , balá má wɩ fúólé. 3 Ɩ nʋkɛnnɛ fɩɛ́mɔ́ a nɛ pɛ́ŋfɩɛmɔ ɓa há píé tɔ́, ɩ nʋɔ wuu wéró. Ɩ tɛ́ŋgbɛ́llɛ wuu (murútútú) anɛ tunɔŋfɛ́lɛ, ɩ máyáfɛ́ mʋ́l. 4 Ɩ baŋ gílé gílé, anɛ Davidi nafara (zekɛ́rɛ) ná, hɔkɛ́rɛ há pérí bʋ́ɩ, bɩbara lalyóórí cɩksɛ rɩ́wɔ́ duó wuu, há ɓélú daha nɛ́. 5 Ɩ ɩ́la bɛllɛ nɩhɩ̃́ ɓɛɛ bɛlɛ bɛllɛ nɛ, anɛ wɩɛma bilɩɛnnɛ há mɩŋ nyɔ́fɩɩla sɩɛrʋ aá dí. 6 Ŋ sɩ́ isi, rɩ tɔ́ɔ́ ha wɩ pʋ́lɛ́, rɩ fɩ́ɛ́la ha wɩ pɩ́sɛ́, a mʋ́ dɛ́llɩ́ miiri paalɔ daha, aŋsaŋsɛwa dúŋduóŋ daha. 7 Ɩ wéró kɩ́ŋkáŋ ŋ házoŋ, dɩkɔsɔ mʋɔ́ wuu tóí mí. 8 Lɛ Libaŋ mɛ́ tɩ́ŋɩ́ŋ mɛ́, lɛ Libaŋ mɛ́ ŋ házovwero, a kóŋ rí. Lɛ Amana, rɩ́ Seniiri, rɩ́ Ɛrmɔŋ pallɛ daha tuwi, a fá ká tá kɩ́ŋkánáwa dɩzʋʋɩ́nɛ, rɩ́ ɓééwa pallɛ ná. 9 Ŋ nátoló, ŋ házowero, ɩ há bélíŋ naasɩ́ balá, kɛ́ɩ́ baŋzíŋ bíí balá má bíksí, ŋ sɩɛrʋ yʋ́ksɔ́ (ŋ nyúú cʋ́rɔ́) ɛ́ wɩɛ́. 10 Ŋ nátoló, ŋ házowero, ɩ nɩkormó (nɩlaarɔ́) weró, ɩ nɩkormó pɔ́rɩ́ tɛŋ aá kɩ́llɛ dɩvɛŋ. Ɩ nʋtɩɩsɛ́ sɔ́ŋ wéró páŋ a kɩ́llɛ tulaaléwa wuu. 11 Ŋ házowero, tʋʋ nɩ́ɩ́ mɩ́nɩ́ nʋkɛnnɛ mɛ́, (rɩ ɓa nɛ́ mʋ́sɩ́wɔ́). Tʋʋ rɩ́ nɛ'ɩ́l nɛ́ mɩ́nɩ́ neŋdulí mʋ́l. Ɩ gɛnnɛ sɔ́ŋ nɩhɩ̃́ Libaŋ tuuni sɔ́ŋ nɛ́. 12 Ŋ nátolo, ŋ házowero, ɩ ká zárdɛ́ (lɩkɔ́) ná ɓa há kéŋ dánnʋɔ tɔ́ nɛ́. Ɩ ká vɩ́lɛ́ ná há kéŋ cúl ni; nyibúlbʋɔ ná á kéŋ boro ɓa kaatɔ́, a yakɛ. 13 Ɩ tɛŋ fɩɛlɩ́ nɩhɩ̃́ dɩsɛ polo há fɩ́ɛ́lɔ́ ɛ́ nɛ́; ɓa cɔ́ŋsɛ tuuni ná nɔnɔ há ŋmɔ́mɔ́, ɓaá yɩ́rɛ girenadiewa. Dɩŋsa ná há kéŋ sɔ́ŋ ɓaá yɩ́rɛ ene arɩ nááɛ, má nyʋ́ ráŋ nɛ́. 14 A rɩ́ ɓa ná ɓa háá yɩ́rɛ náárɛ rɩ́ sáfráŋ, lóríyé, kánɛllɛ, tusɔ́ŋ duówuu, arɩ́ wísínéwa ná há ká mííri rɩ́ alówɛsɛwa, arɩ́ lusɔ́ŋ ná wuu sɔ́ŋ há dúókó kɩ́ŋkáŋ. 15 Ɩ nɩhɩ̃́ zardɛ sɩɛrʋ nyibulé ní, a nɛ fuo ná nyii há ká yɩ́lá yɩ́lá a lɛ Libaŋ paalɔ a pal aá tuwi ní.
(Házoŋ)
16 Poo ná há lɛ wɩɩsɛ dɩpomí néduu rɩ́, isi lú. Poo ná há lɛ wɩɩsɛ dɩpomi nágʋɔ rɩ́, má ko lú. Ɩ́ ko lú héŋ zárdɛ mɛ́, rʋ́ʋ́ sɔŋ wero daklɛ dɩhɩ̃́ wuu. Ŋ boŋzocólli, ko zʋ́ɩ́ zárdɛ sɩɛrʋ a dúú tunɔŋŋmɔmɔ ná.